သန္ဓေသားနာဗ့်ဆဲလ်များပါရှိသည့် အာရုံကြောကင်ဆာ

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဆိုသည်မှာ အဘယ်နည်း။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဆိုသည်မှာ အာရုံကြောစနစ်ရှိ ဆဲလ်များမှ ပေါက်ပွားလာသော ကင်ဆာတစ်မျိုးဖြစ်သည်။ ကျန်းမာသော အာရုံကြောစနစ်ဆဲလ်များက ၎င်းတို့ဖွံ့ဖြိုးသင့်သလောက် မဖွံ့ဖြိုးသောအခါတွင် အဆိုပါကင်ဆာရောဂါ ဖြစ်ပေါ်လာသည်။ "သန္ဓေသားနာဗ့်ဆဲလ်များ" ဟုခေါ်သော ကင်ဆာဆဲလ်များသည် ဖွံ့ဖြိုးလာရမည့်အစား အစောပိုင်းဖွံ့ဖြိုးမှုအဆင့်တွင်သာ ရပ်တန့်နေကြသည်။ ၎င်းတို့သည် ကျန်းမာသော ပုံမှန်ဆဲလ်များ ဖြစ်မလာကြပါ။ ကင်ဆာဆဲလ်များ စတင်ကြီးထွားလာပြီး ၎င်းက အကျိတ်ကို ဖြစ်ပေါ်စေသည်။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်ပွားသော လူနာများတွင် အကျိတ်တစ်ခုသာ ရှိနေနိုင်သည်။ သို့မဟုတ် သန္ဓေသားနာဗ့်ဆဲလ်များသည် ခန္ဓာကိုယ်၏ အခြားအစိတ်အပိုင်းများသို့ ပျံ့နှံ့သွားနိုင်သည်။ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါကို ၅ နှစ်အောက် ကလေးများတွင် အများအားဖြင့် တွေ့ရှိရသည်။ ၎င်းသည် ကလေးများ၏ ဦးနှောက်အပြင်ဘက်၌ တွေ့ရအများဆုံး အစိုင်အခဲ အကျိတ်ဖြစ်သည်။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာသည် ဝမ်းဗိုက်အတွင်းရှိ အက်ဒရီနယ်ဂလင်း သို့မဟုတ် အခြားသော အာရုံကြောဆဲလ်များတွင် စတင်ဖြစ်ပေါ်လေ့ရှိသည်။ ၎င်းသည် လည်ပင်း၊ ရင်ဘတ် သို့မဟုတ် တင်ပါးဆုံတွင်လည်း ဖြစ်ပေါ်နိုင်သည်။

ရောဂါလက္ခဏာများသည် အကျိတ် (သို့မဟုတ် ကင်ဆာပျံ့နှံ့သွားပါက အကျိတ်များ) ၏ တည်နေရာပေါ် မူတည်သည်။ ရောဂါလက္ခဏာများတွင် အကျိတ်အခဲဖြစ်ခြင်း၊ နာကျင်ခြင်း၊ အစားအသောက်ပျက်ခြင်း၊ ပင်ပန်းနွမ်းနယ်ခြင်းနှင့် စိတ်တိုဒေါသထွက်လွယ်ခြင်းတို့ ပါဝင်နိုင်သည်။

• သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်ပွားသော ကလေးငယ်အချို့သည် ကုသမှုမလိုအပ်ပါ။ ဆရာဝန်သည် အကျိတ်၏ တိုးတက်ကြီးထွားမှုကို အနီးကပ် စောင့်ကြည့်မည်ဖြစ်ပြီး တစ်ခါတစ်ရံတွင် အကျိတ်သည် သူ့အလိုလို ပျောက်သွားတတ်သည်။
• အချို့သော သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါသည် ကလေးများသည် ခွဲစိတ်ရန်သာ လိုအပ်သည်။
• သို့သော် သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်ပွားသော လူနာထက်ဝက်ခန့်သည် အန္တရာယ်များသော ရောဂါရှိသည်။ ၎င်းတို့သည် ကီမိုဆေးသွင်းကုထုံး၊ ခွဲစိတ်မှု၊ ဓာတ်ရောင်ခြည်ကုထုံးနှင့် ခုခံအားစနစ်ကို ပြုပြင်ခြင်းဖြင့် ကုသခြင်းများ ခံယူရန်လိုအပ်သည်။

အမေရိကန်ပြည်ထောင်စုတွင် သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရှိကြောင်း စမ်းသပ်တွေ့ရှိသည့် ကလေးပေါင်း နှစ်စဉ် ၇၀၀ ခန့်ရှိပါသည်။

ရောဂါလက္ခဏာများသည် ကင်ဆာတည်ရှိရာ နေရာပေါ်တွင် မူတည်သည်။ အောက်ပါတို့ပါဝင်နိုင်သည်-

• လည်ပင်း၊ ရင်ဘတ် သို့မဟုတ် ဝမ်းဗိုက်ရှိ အဖု သို့မဟုတ် အကျိတ်အခဲ
• မျက်လုံးများ စူထွက်နေခြင်း သို့မဟုတ် မျက်ကွင်းညိုခြင်း
• အစာအိမ်နာခြင်း
• စိတ်တိုဒေါသထွက်လွယ်ခြင်း
• အစားအသောက်ပျက်ခြင်း
• ဝမ်းချုပ်ခြင်း
• မောပန်းခြင်း
• ခြေထောက်အားနည်းခြင်း

အခြားလက္ခဏာများတွင် အောက်ပါတို့ ပါဝင်နိုင်ပါသည်-

• ဝမ်းလျှောခြင်း
• မျက်လုံးလှုပ်ရှားမှု ပြောင်းလဲခြင်း
• သွေးတိုးခြင်း
• ခေါင်းကိုက်ခြင်း
• ချောင်းဆိုးခြင်း
• အသက်ရှူရခက်ခြင်း
• ဖျားခြင်း
• အညိုအမည်းစွဲခြင်း
• ဟော်နာဆင်ဒရုန်း

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာသည် ရောဂါရှာဖွေမတွေ့ရှိမီ ခန္ဓာကိုယ်၏ အခြားအစိတ်အပိုင်းများသို့ ပျံ့နှံ့သွားတတ်သည်။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါ၏ အန္တရာယ်ရှိသော အချက်များနှင့် အကြောင်းရင်းများ

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာသည် ငယ်ရွယ်သော ကလေးများတွင် အဖြစ်အများဆုံးဖြစ်သည်။ ၎င်းသည် အမျိုးသမီးများထက် အမျိုးသားများတွင် အနည်းငယ် ပိုအဖြစ်များသည်။

လူနာအနည်းစု (၁-၂%) တွင် မျိုးရိုးလိုက်သော သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်တတ်သည်။ ၎င်းသည် မိသားစုထဲတွင် မျိုးရိုးလိုက်၍ ဖြစ်ပွားနိုင်သည်။ ၎င်းသည် ALK သို့မဟုတ် PHOX2B ဗီဇပြောင်းလဲမှုကြောင့် ဖြစ်လေ့ရှိသည်။ သို့သော် အခြားသော မျိုးဗီဇပြောင်းလဲမှုများကလည်း မျိုးရိုးလိုက်သော သန္ဓေသားနာဗ့်ဆဲလ်များပါရှိသည့် အာရုံကြောကင်ဆာနှင့် ဆက်စပ်နေသည်။ 

 မျိုးရိုးလိုက်သော သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါအကြောင်း ပိုမိုလေ့လာရန်

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါကို ရှာဖွေဖော်ထုတ်ခြင်း

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာကို ရှာဖွေဖော်ထုတ်သည့်အခါ ဆရာဝန်များသည် စမ်းသပ်မှု အမျိုးအစားများစွာကို အသုံးပြုသည်။ အောက်ပါ စမ်းသပ်မှုများ ပါဝင်နိုင်သည်- 

• ရုပ်ပိုင်းဆိုင်ရာစစ်ဆေးမှုနှင့် ကျန်းမာရေးမှတ်တမ်း
• သွေးဥဆဲလ်အရေအတွက်၊ ကျောက်ကပ်နှင့် အသည်း လုပ်ဆောင်ချက်တို့ကို စစ်ဆေးရန် သွေးစစ်ဆေးမှုများ 
• ဗင်နီလိုင်းမန်ဒီလစ် အက်ဆစ် (VMA) နှင့် ဟိုမိုဗင်နီလစ် အက်ဆစ် (HVA) ရှိ၊ မရှိ ရှာဖွေရန် ဆီးစစ်ဆေးမှုများ။ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာများမှ ထုတ်လုပ်သော ဟော်မုန်းများဖြစ်သည့် ကက်တဲကိုလမင်းများ ကွဲထွက်ခြင်းဖြင့် VMA နှင့် HVA တို့ ထွက်ရှိလာသည်။ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါဝေဒနာရှင် ကလေးများတွင် VMA နှင့် HVA ပမာဏများ မြင့်မားလေ့ရှိသည်။ ဤဓာတ်များသည် ကုသမှုအပေါ် တုံ့ပြန်မှုကို စောင့်ကြည့်စစ်ဆေးရန် ကူညီပေးနိုင်သည်။
• မှတ်ဉာဏ်၊ အမြင်အာရုံ၊ အကြားအာရုံ၊ ကြွက်သားကြံ့ခိုင်မှု၊ ဟန်ချက်ညီမှု၊ ချိတ်ဆက်လုပ်ဆောင်မှုနှင့် တုံ့ပြန်မှုများအပါအဝင် ဦးနှောက်နှင့် အာရုံကြောဆိုင်ရာ လုပ်ဆောင်ချက်ကို တိုင်းတာရန် အာရုံကြောဆိုင်ရာ စစ်ဆေးမှုတစ်ခု 
• အကျိတ်(များ)၏ အရွယ်အစားနှင့် တည်နေရာကို လေ့လာရန် ပုံရိပ်ဖော်စစ်ဆေးမှုများ
  • ဓာတ်မှန်ရိုက်ခြင်း 
  • အာထရာဆောင်း 
  • ကွန်ပျူတာဓာတ်မှန် (CT သို့မဟုတ် CAT စကန်) 
  • သံလိုက်လှိုင်းဖြင့် ပုံရိပ်ဖော်စစ်ဆေးမှု (MRI) 
  • MIBG စကန် သို့မဟုတ် PET စကန်ကို အသုံးပြု၍ တစ်ကိုယ်လုံး ပုံရိပ်ဖော်စစ်ဆေးမှု

• ရိုးတွင်းခြင်ဆီဖောက်ထုတ်စစ်ဆေးခြင်းနှင့် အသားစထုတ်ယူစစ်ဆေးခြင်း 
•  အကျိတ် ကို အသားစထုတ်ယူစစ်ဆေးခြင်း

ဆရာဝန်များသည် သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါကို ရှာဖွေရန်နှင့် ကုသရန် အရေးကြီးသော လက္ခဏာအင်္ဂါရပ်များအတွက် အကျိတ်ကို လေ့လာကြပါမည်။ အချို့သောအကျိတ်များသည် ပျံ့ပွားလွယ်ပြီး ပြင်းထန်သောကုထုံးကို လိုအပ်သည်။ ဆဲလ်များ၏ ပုံပန်းသွင်ပြင်နှင့် အကျိတ်တွင် ဗီဇပြောင်းလဲမှုအချို့ရှိ၊ မရှိကိုကြည့်ပြီး အကျိတ်က ကုသမှုအပေါ် မည်သို့တုံ့ပြန်နိုင်သည်ကို ဆရာဝန်များက ခန့်မှန်းနိုင်သည်။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောက်ရှိမှု အဆင့်များ

နိုင်ငံတကာ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာ ဖြစ်နိုင်ခြေအုပ်စု အဆင့်သတ်မှတ်စနစ် (INRGSS) ကို အသုံးပြု၍ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာကို အဆင့်ခွဲခြားပါသည်။ အောက်ပါအချက်များအပေါ် အခြေခံ၍ အဆင့်ခွဲခြားပါသည်-

• အကျိတ်တည်နေရာ  
• အနီးအနားရှိ ကိုယ်အင်္ဂါများပေါ်တွင် သက်ရောက်မှု   
• ရောဂါပျံ့နှံ့မှု 

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်နိုင်ခြေအုပ်စုများ

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာကို အမျိုးအစားခွဲပြီး ကုသမှုများကို အစီအစဉ်ဆွဲရန် ဆရာဝန်များသည် အန္တရာယ်ဖြစ်နိုင်ခြေအုပ်စုများကို အသုံးပြုသည်။ အန္တရာယ်ဖြစ်နိုင်ခြေအုပ်စု ၃ ခုရှိပါသည်-

• အန္တရာယ်နိမ့်
• အန္တရာယ်ဖြစ်နိုင်ခြေအသင့်အတင့်
• အန္တရာယ်မြင့်

အန္တရာယ်မြင့် သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဆိုသည်မှာ ကင်ဆာသည် ပျောက်ကင်းအောင် ကုသရန် ခက်ခဲပြီး ပြန်ဖြစ်ရန် အလားအလာများသည်ကို ဆိုလိုသည်။ အန္တရာယ်မြင့် သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါကို ခံစားနေရပြီး ပြင်းထန်သော ကုထုံးခံယူရန် လိုအပ်သည့် ကလေးများ။

 အန္တရာယ်ဖြစ်နိုင်ခြေအုပ်စုများသည် အောက်ပါတို့အပါအဝင် အကြောင်းအချက်များအပေါ် အခြေခံသည်-

• လူနာ၏ အသက်အရွယ်
• ရောဂါအဆင့်
• အကျိတ်၏ သွင်ပြင်လက္ခဏာများ

ကလေးကင်ဆာဗေဒအုပ်စုမှ ရောဂါပြန်ပေါ်နိုင်ခြေအုပ်စုများအကြောင်း ဆက်လက်လေ့လာပါ။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာကို ကုသခြင်း

ကုသသည့်နည်းလမ်းသည် သတ်မှတ်ထားသော အန္တရာယ်ဖြစ်နိုင်ခြေအုပ်စုပေါ်တွင် မူတည်သည်။ ကုသသည့်နည်းလမ်း ရွေးချယ်စရာများတွင် အောက်ပါတို့ ပါဝင်နိုင်သည်-

• စောင့်ကြည့်လေ့လာခြင်း (ကုသမှုမပါ)
• ခွဲစိတ်ကုသခြင်း
• ကီမိုဆေးသွင်းကုထုံး
• ပင်မဆဲလ်အစားထိုးမှုနှင့် ဆေးပမာဏမြင့်ကီမိုဆေးသွင်းခြင်း ကုထုံး
• ခုခံအားစနစ်ကို ပြုပြင်ခြင်းဖြင့် ကုသခြင်း
• ဓာတ်ရောင်ခြည်ကုထုံး

အလွန်ငယ်ရွယ်ပြီး အန္တရာယ်နည်းသော လူနာများတွင် ပြင်းထန်သောကုသမှုအစား စောင့်ကြည့်လေ့လာခြင်း ဆက်လုပ်နိုင်ပါသည်။ တစ်ခါတစ်ရံ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာသည် သူ့အလိုလို ပျောက်ကင်းနိုင်ပါသည်။ (အကျိတ်ကြီးထွားမှုဆုတ်ယုတ်ခြင်း) သို့သော် သူ့အလိုအလို ပျောက်ကင်းခြင်းမှာ ကြုံတောင့်ကြုံခဲဖြစ်သည်။ အကျိတ်ကြီးထွားလာမှု ရှိ၊ မရှိ သိရှိရန်အတွက် လူနာများကို အနီးကပ် စောင့်ကြည့်ပါသည်။

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာဖြစ်ပွားသော လူနာများအား လက်တွေ့စမ်းသပ်ကုသမှု၏ တစ်စိတ်တစ်ပိုင်းအဖြစ် ကုသစောင့်ရှောက်မှုပေးနိုင်ပါသည်။ သန္ဓေသားနာဗ့်ဆဲလ်များပါရှိသည့် အာရုံကြောကင်ဆာရောဂါ ကုသမှုများကို အန္တရာယ်ဖြစ်နိုင်ခြေ အုပ်စုများအပေါ် အခြေခံ၍ အစီအစဉ်ရေးဆွဲသည်-

သန္ဓေသားနာဗ့်ဆဲလ်များပါရှိသည့် အာရုံကြောကင်ဆာ သက်သာပျောက်ကင်းမှုသည် အောက်ပါတို့ကဲ့သို့ အချက်များစွာအပေါ် မူတည်ပါသည်-

• ရောဂါရှာဖွေတွေ့ရှိချိန် ကလေး၏အသက်အရွယ် 
• အန္တရာယ်ရှိသောအုပ်စု
• အကျိတ်၏ မျိုးရိုးဗီဇ
• ကင်ဆာပျံ့နှံ့ခြင်းရှိ၊ မရှိ 
• ကုသမှုကို အကျိတ်၏ တုံ့ပြန်ပုံ
• ကင်ဆာပြန်ဖြစ်၊ မဖြစ် (ပြန်ပေါ်ခြင်းရှိ၊ မရှိ)

သင့်ကလေး၏ ဆရာဝန်သည် သင့်ကလေး၏ သီးခြားကျန်းမာရေးကိစ္စနှင့်ပတ်သက်၍ အကောင်းဆုံး အချက်အလက်ပေးနိုင်သူ ဖြစ်သည်။

သန္ဓေသားနာဗ့်ဆဲလ်များပါရှိသည့် အကျိတ်ဖြစ်ပွားသော လူနာများအတွက် ပံ့ပိုးကူညီမှု

ရောဂါပြန်ဖြစ်၊ မဖြစ် စောင့်ကြည့်စစ်ဆေးခြင်း

လူနာများသည် ကုသမှု ပြီးဆုံးပြီးနောက် ရောဂါပြန်ဖြစ်၊ မဖြစ် စောင့်ကြည့်စစ်ဆေးရန်အတွက် နောက်ဆက်တွဲ ကုသစောင့်ရှောက်မှုကို လိုအပ်ပါသည်။ ဆေးကုသမှုအဖွဲ့သည် တိကျသော စစ်ဆေးမှုများနှင့် ၎င်းတို့၏ အချိန်ဇယားကို အကြံပြုပါမည်။

အန္တရာယ်များသော ရောဂါမရှိသည့် လူနာများတွင် ရောဂါပြန်ဖြစ်နိုင်ခြေသည် ၅–၁၅% ဖြစ်သည်။ အန္တရာယ်များသော လူနာများတွင် ရောဂါပြန်ဖြစ်နိုင်ခြေသည် ၅၀% ခန့်ဖြစ်သည်။ ကုသမှုခံယူပြီးနောက် ပထမ ၂ နှစ်အတွင်း ရောဂါပြန်ဖြစ်လေ့ရှိသည်ကို အများဆုံးတွေ့ရသည်။ ကုသမှု ပြီးဆုံးပြီးနောက် ၅ နှစ်အကြာတွင် ကင်ဆာရောဂါ လက္ခဏာမပြသည့်အခါ ရောဂါပြန်ဖြစ်ခဲပါသည်။

ကင်ဆာရောဂါ ကုသပြီးနောက် ကျန်းမာရေး 

ကီမိုဆေးသွင်းခြင်း ကုထုံး သို့မဟုတ် ဓာတ်ရောင်ခြည်ကုထုံးဖြင့် ကုသပြီး ရောဂါသက်သာပျောက်ကင်းသွားသူများတွင် ကုထုံး၏ ရေရှည်နှင့် နောက်ဆက်တွဲ ဆိုးကျိုးများ ခံစားရခြင်းရှိ၊ မရှိကို စောင့်ကြည့်သင့်သည်။ ကုသမှုကြောင့် ဖြစ်ပွားနိုင်သည့် ပြဿနာများတွင် အကြားအာရုံ ဆုံးရှုံးခြင်း၊ နှလုံးဆိုင်ရာ ပြဿနာများ၊ သိုင်းရွိုက် ပြဿနာများ၊ ကြီးထွားနှုန်း ကျဆင်းခြင်း၊ အရိုးသိပ်သည်းဆ လျော့ကျခြင်းနှင့် ကျောက်ကပ် ထိခိုက်မှုတို့ ပါဝင်နိုင်သည်။

ရောဂါသက်သာပျောက်ကင်းသွားသူ ၂၅% ခန့်တွင် ရောဂါရှာဖွေတွေ့ရှိပြီးနောက် ၂၅ နှစ်ကြာအထိ ပြင်းထန်သော နာတာရှည် ကျန်းမာရေး အခြေအနေများရှိကြောင်း  ကလေးကင်ဆာရောဂါမှ သက်သာပျောက်ကင်းသွားသူများဆိုင်ရာ လေ့လာမှုအရ သိရသည်။

ကုထုံးကုသမှုခံယူပြီးနောက် နှစ်ပေါင်းများစွာမှ ဖြစ်ပေါ်လာနိုင်သည့် ကျန်းမာရေးပြဿနာများရှိ၊ မရှိ စောင့်ကြည့်ရန် အခြေခံကျန်းမာရေးစောင့်ရှောက်မှု ဆရာဝန်၏ ပုံမှန်ဆေးစစ်မှုများသည် အရေးကြီးပါသည်။  

သင့်ကလေး၏ပြုစုစောင့်ရှောက်ရေးအဖွဲ့သည် ကုသမှု ပြီးဆုံးပြီးနောက် ရောဂါသက်သာပျောက်ကင်းသွားသူ ကုသစောင့်ရှောက်ရေး အစီအစဉ်ကို သင့်အား ပေးထားသင့်သည်။ ဤအစီရင်ခံစာတွင် ကျန်းမာရေးနှင့် ညီညွတ်သော နေထိုင်မှု ပုံစံအတွက် လိုအပ်သော စစ်ဆေးမှုများနှင့် အကြံပြုချက်များ ပါဝင်ပါမည်။ 

ဆက်စပ်အကြောင်းအရာ