မောင်နှမများကို ထိန်းကျောင်းခြင်း

မသိခြင်းကို ရှင်းပြပါ

• မောင်နှမများသည် အတွေ့အကြုံအသစ်ကို နားမလည်သောကြောင့် မကြာခဏ ကြောက်ရွံ့ကြသည်။ ကလေးများကို ရိုးရိုးသားသားနှင့် ပွင့်ပွင့်လင်းလင်း ပြောပြပါ။ ဖြစ်ပျက်နေသည်များကို ရှင်းပြသောအခါ ကြောက်ရွံ့မှု သို့မဟုတ် ရှုပ်ထွေးမှုကို လျော့နည်းစေသည်။ သင့်ကလေးစင်တာရှိ ပြုစုစောင့်ရှောက်ရေးအဖွဲ့သည် ကလေးများနှင့်စကားပြောရာတွင် ကူညီနိုင်သည်။
• အသက်အရွယ်နှင့် သင့်တော်သည့် ကင်ဆာအကြောင်း ပြောပြပါ။
• ဖြစ်လေ့ရှိသော အယူအဆအလွဲများကို ရှင်းလင်းပါ။ ဥပမာ ကင်ဆာသည် ကူးစက်ရောဂါဖြစ်သည်ဟု ကလေးအများအပြားက မှားယွင်းစွာ ထင်မြင်သည်။ ကင်ဆာဖြစ်သောအခါ အမြဲတမ်းသေဆုံးကြသည်ဟု အချို့က ကြားသိထားနိုင်သည်၊ အမှန်တကယ်တွင်မူ ကလေးအများစု (၈၀ ရာခိုင်နှုန်း) က အသက်ရှင်သည်။

ဘဝကို အတတ်နိုင်ဆုံး 'ပုံမှန်' ဖြစ်ပါစေ

ဘဝကို အတတ်နိုင်ဆုံး ကြိုတင်သိရှိနိုင်ရန်နှင့် တည်ငြိမ်စေရန် မောင်နှမများသည် နေ့စဉ်လုပ်ဆောင်မှုများကို ဆက်လက်လုပ်ဆောင်ပေးသင့်သည်။ ၎င်းတို့ လုပ်ဆောင်သင့်သည်မှာ-

• ကျောင်း ဆက်တက်ခြင်း
• သင်ရိုးညွှန်းတမ်းပြင်ပ လှုပ်ရှားမှုများတွင် ဆက်လက်ပါဝင်ခြင်း
• မောင်နှမနှင့်အတူနေနိုင်သော စောင့်ရှောက်သူရှိပါက မိသားစုအိမ်တွင် ဆက်လက်နေထိုင်ခြင်း

မောင်နှမများအတွက် အချိန်ပေးပါ

• တစ်ဦးချင်းအလိုက် သီးခြားအချိန် ဖန်တီးပါ။ စာဖတ်ခြင်း၊ လမ်းလျှောက်ခြင်း သို့မဟုတ် ပျော်ရွှင်စရာတစ်ခုခုကို အတူတူပြုလုပ်ခြင်းတို့ လုပ်ဆောင်ပါ။ ဤသီးခြားအချိန်သည် မိသားစုများ အလွန်လိုအပ်သော စိတ်ဖိစီးမှု လျှော့ချခြင်းကို ပေးစွမ်းနိုင်သည်။ ၁၀ မိနစ် စကားပြောခြင်းသည်ပင် အလွန်အကျိုးရှိသည်။
• မောင်နှမများ၏ အကြိုက်ဆုံးလုပ်ဆောင်မှုများကို ပံ့ပိုးပါ။ သင့်တွင်အချိန်မရှိပါက မိတ်ဆွေနှင့် မိသားစုများကို အကြို/အပို့ ပြုလုပ်ခိုင်းပါ။
• ကင်ဆာရှိသောကလေးသည် မည်မျှ “သန်မာကြောင်း” သို့မဟုတ် “ရဲရင့်ကြောင်း” မောင်နှမများက မကြာခဏ ကြားနိုင်သည်။ ၎င်းတို့ပြသသော နှစ်လိုဖွယ်အရည်အသွေးများကိုလည်း နှုတ်အားဖြင့် အသိအမှတ်ပြုပါ။

စိတ်မသန့်ဖြစ်မှုကို ဖယ်ထုတ်ပါ

အချို့ မောင်နှမများသည် ၎င်းတို့ တွေးသော၊ ပြောသော သို့မဟုတ် လုပ်ဆောင်ခဲ့သော တစ်စုံတစ်ခုကြောင့် ၎င်းတို့၏ အစ်ကို/ညီ သို့မဟုတ် အစ်မ/ညီမသည် ကင်ဆာဖြစ်သည်ဟု တွေးနိုင်သည်။

၎င်းတို့သည် ကျန်းမာရေးကောင်းမွန်ပြီး ၎င်းတို့၏ အစ်ကို/ညီ သို့မဟုတ် အစ်မ/ညီမသည် ကျန်းမာရေးမကောင်းမွန်သောအခါ ၎င်းတို့တွင် အပြစ်ရှိသည်ဟု ခံစားနိုင်သည်။

အကူအညီဖြစ်သော အကြံဉာဏ်အချို့မှာ-

• တစ်စုံတစ်ယောက်ကို ကင်ဆာရောဂါဖြစ်စေရန် မည်သူမျှ တွေးတော၊ ပြောဆို သို့မဟုတ် မလုပ်ဆောင်နိုင်ကြောင်း မောင်နှမများကိုပြောပြပါ။
• ၎င်းတို့၏ အစ်ကို/ညီ သို့မဟုတ် အစ်မ/ညီမကို နည်းလမ်းအမျိုးမျိုးဖြင့် ကူညီခွင့်ပေးပါ။ ၎င်းတို့တွင် ခွန်အားမဲ့လာကြောင်း ခံစားရမှု လျော့ပါးလာမည်။
• ၎င်းတို့၏ အစ်ကို/ညီ သို့မဟုတ် အစ်မ/ညီမသည် နေမကောင်းဖြစ်နေသည့်တိုင် ပျော်ရွှင်စွာကစား၍ရကြောင်း မောင်နှမများကို ပြသပါ။

ခက်ခဲသော စိတ်ခံစားမှုများကို အသိအမှတ်ပြုပါ

ချစ်ခင်သူတစ်ဦးသည် အပြင်းအထန်ဖျားနာသောအခါ ဒေါသထွက်ခြင်းသည် ပုံမှန်ပင်ဖြစ်သည်။ ကလေးများသည် ကင်ဆာကို သို့မဟုတ် ထိုသို့ဖြစ်စေသည့် ဘုရားသခင်ကို ဒေါသထွက်နိုင်သည်။ ၎င်းတို့သည် မိဘများ၏ အာရုံထားမှု ပြောင်းလဲခြင်းအပေါ် သို့မဟုတ် နေမကောင်းဖြစ်သည့်အတွက် မောင်နှမကိုပင် ဒေါသထွက်နိုင်သည်။ ၎င်းတို့ကို ကူညီရန် အကြံပြုချက်အချို့-

• ကလေးနှင့် ဆယ်ကျော်သက်များကို ၎င်းတို့၏ဒေါသအား ဖော်ပြခွင့်ပေးပါ။ စာရွက် သို့မဟုတ် မှတ်တမ်းတွင် သင့်ကလေးများ၏ ခံစားချက်တို့ကို ပုံဆွဲခိုင်းပါ သို့မဟုတ် ချရေးခိုင်းပါ။
• စိတ်ခံစားချက်များကို ရုပ်ပိုင်းဆိုင်ရာနည်းအရ ဖွင့်ထုတ်နိုင်သည့် ဘေးကင်းသောနေရာတစ်ခုအား မောင်နှမအတွက် ဖန်းတီးပေးပါ။
• အသက်ပြင်းပြင်းရှူခြင်းကဲ့သို့ အကြောလျှော့နည်းများ သင်ပေးပါ။
• အဝေးသို့လမ်းလျှောက်ထွက်သွားခြင်းသည် အော်ဟစ်ပြောဆိုခြင်းထက် ပိုမိုကောင်းမွန်ကြောင်း ပြောပြပါ။

လူနာသည် လက်ဆောင်များရရှိခြင်း၊ ကျောင်းသို့နေ့စဉ် မသွားရခြင်းနှင့် မိဘများနှင့်အတူ ပိုမိုအတူနေရသောကြောင့် ဆေးရုံတက်ရခြင်းသည် ပျော်ရွှင်ဖွယ်ကောင်းကြောင်း အချို့မောင်နှမများက တွေးနိုင်သည်။ ပြုံးနေ၍ ပျော်ရွှင်နေသော လူနာကလေး၏ ရုပ်ပုံများကိုသာ ၎င်းတို့မြင်နိုင်သည်။ ထိုသို့ဖြစ်ပေါ်ပါက ချိန်းဆိုမှုများကို စောင့်ဆိုင်းခြင်း၊ ဆေးသောက်ခြင်းနှင့် ကုသမှုအဆင့်ဆင့် လုပ်ဆောင်ခြင်းကဲ့သို့ အသက်အရွယ်နှင့် သင့်တော်သော တစ်နေ့တာအကြောင်း ပိုမိုအသေးစိတ်သည့်အချက်အလက်များကို ၎င်းတို့နှင့် မျှဝေနိုင်သည်။

သက်သောင့်သက်သာမရှိသော အခြေအနေများအတွက် ကြိုတင်ပြင်ဆင်ပါ

၎င်းတို့၏ အစ်ကို/ညီ သို့မဟုတ် အစ်မ/ညီမ နေမကောင်းဖြစ်ခြင်းကို အခြားသူများက တွေ့ရှိသောအခါ အဆင်မပြေ ရှိခြင်းမှာ သဘာဝကျသော ခံစားမှုဖြစ်သည်။ မည်သို့ဖြေဆိုရမည်ကို မသိရှိသော ကင်ဆာအကြောင်း မေးခွန်းများကို မောင်နှမများအား မေးနိုင်သည်။

• ၎င်းတို့၏ အစ်ကို/ညီ သို့မဟုတ် အစ်မ/ညီမအား တစ်စုံတစ်ယောက် လူကြားတွင် စိုက်ကြည့်သောအခါ မည်သို့ခံစားရသည်ကို မောင်နှမများအား မျှဝေခိုင်းပါ။
• ကျောင်းတွင် အနိုင်ကျင့်ခြင်း သို့မဟုတ် စနောက်ခြင်း ရှိ၊မရှိ စောင့်ကြည့်ပါ။ မောင်နှမများ၏ ဆရာများနှင့် ပုံမှန်ထိတွေ့မေးမြန်းပါ။ ကျောင်းနှင့်အိမ်တွင် ယုံကြည်စိတ်ချစွာ ပြောဆိုနိုင်သည့် အထောက်အကူပြုပုဂ္ဂိုလ်ကို ကလေးကရှာဖွေရာတွင် ကူညီပါ။
• အချို့မောင်နှမများသည် ၎င်းတို့၏ အစ်ကို/ညီ သို့မဟုတ် အစ်မ/ညီမအကြောင်းကို မေးမြန်းသော ကျောင်းရှိလူကြီးများနှင့် အဆင်မပြေဖြစ်လာနိုင်သည်။ မောင်နှမ၏ ကျောင်းတွင်းအဖွဲ့လိုက်ဆွေးနွေးမှုတွင် ထိုမောင်နှမရှိစဉ်အခါ၌ ရောဂါရှာဖွေခြင်းအကြောင်းကို ဆွေးနွေးရာတွင် သင်သည် သက်သောင့်သက်သာ ရှိ၊မရှိ စဉ်းစားပါ။

မောင်နှမများကြား ချစ်ခင်သောဆက်ဆံရေးကို ပြုစုပျိုးထောင်ပါ

လူတိုင်း၏ စိတ်ပိုင်းဆိုင်ရာ ကျန်းမာပျော်ရွှင်မှုအတွက် မောင်နှမများကြားရှိ ချစ်ခင်သောဆက်ဆံရေးသည် အရေးကြီးသည်။ ၎င်းကို ပြုစုပျိုးထောင်ရန် အကြံဉာဏ်အချို့မှာ-

• ၎င်းတို့ အတူတူပျော်ရွှင်နိုင်ရန် အခွင့်အလမ်းများ ရှာပါ — ဘုတ်ပြားကစားနည်းများ၊ ရုပ်ရှင်များ၊ ဟာသပြောခြင်း၊ စာဖတ်ခြင်း၊ လက်မှုပစ္စည်းများ ပြုလုပ်ခြင်း သို့မဟုတ် ဗီဒီယိုဂိမ်းများ ကစားခြင်း။
• လူနာသည် ကုထုံးကြောင့် ဆံပင်များ ဆုံးရှုံးမည်ဆိုပါက နှစ်ဦးစလုံး သဘောတူလျှင် မောင်နှမများသည် ဦးထုပ်နှင့် ခေါင်းစည်းအဝတ်စတို့ကို အတူတူဈေးဝယ်၍ ဝတ်ဆင်နိုင်သည်။ မောင်နှမများ၏ ခေါင်းများရိတ်ခြင်းကို ပြုစုစောင့်ရှောက်သူများက အကြံမပြုပါ။ ၎င်းသည် “ငါလည်း ဖျားနေတာလား။” ကဲ့သို့ ဆံပင်ကျွတ်သည့် အကြောင်းရင်းနှင့်ပတ်သက်၍ နားလည်မှုအလွဲများကို ဖြစ်စေနိုင်သည်။
• ကုထုံးခံယူနေသော ကလေးသည် မိတ်ဆွေနှင့် ဆွေမျိုးများမှ လက်ဆောင်များရရှိနိုင်ပြီး ၎င်းသည် အချိန်တစ်ခုကြာပါက မနာလိုခြင်းကို ဖြစ်စေနိုင်သည်။ မကြာခဏဖျားနာသော ကလေးများသည် လက်ဆောင်ရရှိခြင်းကဲ့သို့ပင် လက်ဆောင်ပေးကမ်းခြင်းကိုလည်း နှစ်သက်သည်။ မောင်နှမများသည် အခြားသူများကို ကူညီရန် နည်းလမ်းများအား အတူတူစဉ်းစားနိုင်သည်။

မောင်နှမများကြား ဆက်သွယ်ရန်အတွက် ထိုအခွင့်အရေးများ ဖန်တီးခြင်းဖြင့် ၎င်းတို့ကြားချိတ်ဆက်မှုရှိကြောင်း ခံစားစေရန်ကူညီနိုင်သည်။

အရင်းအမြစ်များ

• SuperSibs- Alex’s Lemonade Stand Foundation ၏ အစီအစဉ်တစ်ခုဖြစ်ပြီး ဝန်ဆောင်မှုများ၊ သတင်းအချက်အလက်၊ လေ့ကျင့်ရေးစခန်းနှင့် မိဘအတွက် ကိရိယာအစုံများ ရရှိနိုင်သည်