ဒိုက်ပါကြောင့်ဖြစ်သော အရေပြားရောင်ရမ်းခြင်း၊ (ဒိုက်ပါကြောင့် ဖြစ်သော အရေပြားအနီစက်များ)

ဒိုက်ပါကြောင့်ဖြစ်သော အရေပြားရောင်ရမ်းခြင်း သို့မဟုတ် ဒိုက်ပါကြောင့်ဖြစ်သော အရေပြားအနီစက်များသည် ခန္ဓာကိုယ်အောက်ပိုင်း၊ ပေါင်များ၊ ဝမ်းဗိုက်နှင့် လိင်အင်္ဂါတို့အပါအဝင် ဒိုက်ပါဝတ်သည့်နေရာတွင် ဖြစ်ပေါ်သည့် အရေပြားကျိန်းစပ်ခြင်းဖြစ်သည်။ ဤသို့ဖြစ်ပွားခြင်းကို ဆီးဝမ်းမထိန်းနိုင်ခြင်းနှင့် ဆက်နွှယ်၍ဖြစ်သော အရေပြားရောင်ရမ်းခြင်း သို့မဟုတ် ဆီး သို့မဟုတ် မစင်များကြောင့်ဖြစ်သော ရောင်ရမ်းခြင်းဟုလည်း သိကြသည်။

ဒိုက်ပါကြောင့်ဖြစ်သော အရေပြားရောင်ရမ်းခြင်း၏ အကြောင်းအရင်းများ

အရေပြားသည်အစိုဓာတ်၊ ပွတ်တိုက်မှု၊ ဆီးနှင့် မစင်များ၊အရေပြားကို နီမြန်းရောင်ရမ်းစေသောအရာများထိတွေ့လိုက်သောအခါ ဒိုက်ပါကြောင့်ဖြစ်သော အရေပြားအနီစက်များ ဖြစ်ပေါ်လာသည်။ ဒိုက်ပါကြောင့်ဖြစ်သော အရေပြားရောင်ရမ်းခြင်းကို ဖြစ်စေရန်အားပေးသော အရာများမှာ အောက်ပါတို့ ပါဝင်သည်-

• အစိုဓာတ်
• ဆီး သို့မဟုတ် ကျင်ကြီး
• ဝမ်းလျှောခြင်း
• အစာချေဖျက်မှုစနစ်ကို ပြောင်းလဲစေသော အစားအစာအသစ်များ
• ပွန်းတိုက်မှုပွတ်တိုက်၍ အပူလောင်သကဲ့သို့ဖြစ်ခြင်း၊သို့မဟုတ် ပွတ်တိုက်ခြင်း
• အရေပြားကို နီမြန်းယားယံစေသော အရာများ သို့မဟုတ် (ဆပ်ပြာ၊ အဝတ်လျှော်ဆပ်ပြာ၊ သုတ်သည့် အဝတ်များ သို့မဟုတ် လိုးရှင်းများကြောင့် မကြာခဏဖြစ်တတ်သော) အရေပြားနှင့် ဓာတ်မတည့်သည့် တုန့်ပြန်မှုများ
• ဘက်တီးရီးယား
• မှိုရောဂါကူးစက်မှုများကို ဖြစ်စေသော ပဋိဇီဝဆေးများ (ပူနွေး၊ စိုစွတ်သောနေရာများတွင်ပေါက်ဖွားတတ်သောမှိုများ) သို့မဟုတ် ဝမ်းလျှောခြင်း
• ခီမိုဆေးသွင်းကုထုံး နှင့် ဓာတ်ရောင်ခြည်သုံး ကုထုံးများ အပါအဝင် ကင်ဆာရောဂါ ကုသမှုများ
• ဆီးနှင့် မစင်များမှ တဆင့် စွန့်ပစ်သော ကုသရေးဆေးဝါးများ

ဒိုက်ပါကြောင့်ဖြစ်သော အရေပြားရောင်ရမ်းခြင်းကို ဖြစ်ပေါ်စေနိုင်သော အကြောင်းရင်းများသည် ကလေးများ၌ ကင်ဆာဖြစ်နေချိန်တွင် ပိုမိုများပြားသည်။ ခီမိုဆေးသွင်းကုထုံး ကဲ့သို့သော ကင်ဆာကုထုံးများသည် ဆီးနှင့် ကျင်ကြီးအတွင်း စွန့်ထုတ်မှုကို ဖြစ်ပေါ်စေသည့်အတွက် ဒိုက်ပါကြောင့်ဖြစ်သော အရေပြားရောင်ရမ်းခြင်းကို အားပေးသည်။ ဓာတ်ရောင်ခြည် ကုထုံး ကြောင့် ဖြစ်နိုင်သည်များမှာ-အရေပြားကိုပို၍ ထိခိုက်လွယ်စေပြီး အရေပြားရောင်ရမ်းခြင်းကို ပို၍ခံနိုင်ရည်မရှိဖြစ်စေသည်။ စတီးရိုက်ဆေးများ အသုံးပြုလျှင် သို့မဟုတ် ကိုယ်ခံအားစနစ်မကောင်းလျှင်လည်း ဒိုက်ပါကြောင့်ဖြစ်သော အရေပြားရောင်ရမ်းခြင်းကို ဖြစ်ပွားနိုင်သည့် အလားအလာကို တိုးမြင့်စေသည်။

ပို၍အသက်ကြီးသောကလေးများတွင် နေမကောင်းခြင်း၊ ကုသရေးဆေးဝါးများ သို့မဟုတ် ရောဂါတို့ကြောင့် ဆီးအိမ်ထိန်းမနိုင်ခြင်း သို့မဟုတ် အူလမ်းကြောင်း မထိန်းနိုင်ခြင်း (ဆီးဝမ်းမထိန်းနိုင်ခြင်း) ဖြစ်နိုင်သည်။ ထိုကဲ့သို့သော လူနာများတွင် ဒိုက်ပါများ သို့မဟုတ် "သေးခံများ" ဝတ်ရန်လိုအပ်ပြီး ဆီးဝမ်းမထိန်းနိုင်ခြင်းနှင့် ဆက်နွှယ်၍ဖြစ်သော အရေပြားရောင်ရမ်းခြင်းကို ပို၍ဖြစ်စေနိုင်သည်။

ဒိုက်ပါကြောင့်ဖြစ်သော အရေပြားရောင်ရမ်းခြင်းကို ကုသခြင်း

ဒိုက်ပါကြောင့်ဖြစ်သော အရေပြားရောင်ရမ်းခြင်းကိုကုသမှုသည် ရောဂါလက္ခဏာများ၊ ကလေး၏ အသက်၊ ကျန်းမာရေးအခြေအနေ နှင့် အရေပြားရောင်ရမ်းခြင်း၏ ပြင်းထန်မှုအပေါ်မူတည်သည်။ အရေပြားရောင်ရမ်းခြင်းနှင့် ပတ်သက်သော မည်သည့်လက္ခဏာများကိုမဆို စောင့်ရှောက်မှုအဖွဲ့အား သေချာစွာ အသိပေးပါ။ အရေပြားပေါ်၌ မည်သည့်ပစ္စည်းကိုမဆို အသုံးမပြုမီ စောင့်ရှောက်မှုအဖွဲ့ဝင်တစ်ဦးနှင့်အတူ စစ်ဆေးပါ။

ဆရာဝန်တစ်ဦးသည် ဒိုက်ပါကြောင့်ဖြစ်သော အရေပြားအနီစက်များအတွက် အောက်ပါတို့ပါဝင်သော ကုသမှုများကို အကြံပေးနိုင်သည်-

• ဒိုက်ပါများကို အချိန်တစ်ခုကြာသည်အထိ မဝတ်ဘဲထားခြင်း
• ဒိုက်ပါကို မကြာခဏလဲပေးခြင်း
• အရေပြားကို ကာကွယ်ပေးသည့် အဆီပါသော လိမ်းဆေး သို့မဟုတ် လိမ်းဆေးအနှစ်
• မှိုရောဂါကူးစက်မှုအတွက် မှိုရောဂါပျောက်ဆေးခရင်မ်

ဒိုက်ပါကြောင့်ဖြစ်သော အရေပြားရောင်ရမ်းခြင်းကို ကာကွယ်တားဆီးခြင်း

ကင်ဆာကုသစဉ်တွင် ဒိုက်ပါကြောင့်ဖြစ်သော အရေပြားရောင်ရမ်းခြင်းကို ကာကွယ်ရန် အောက်ပါအဆင့်များကို လိုက်နာဆောင်ရွက်ရန် အရေးကြီးသည်။

• ဒိုက်ပါများကို ပုံမှန်စစ်ဆေးပြီး ညစ်ပတ်သွားပါက လှဲလှယ်ပေးပါ။ ဒိုက်ပါကြောင့်ဖြစ်သော အရေပြားအနီစက်များ ဖြစ်နိုင်ခြေ မြင့်သော ကလေးများအတွက် ဒိုက်ပါကို အနည်းဆုံး ၂နာရီခြား တစ်ခါ စစ်ဆေးသင့်ပြီး ဝမ်းလျှောနေသည့် သို့မဟုတ် IV အကြောဆေးများ သွင်းနေရသော ကလေးလူနာများအတွက်ဆိုလျှင် ပို၍ ပြုလုပ်ပေးရမည်။
• အရေပြားကို ညင်သာစွာသန့်ရှင်းပါ။ အရေပြားကို ဆပ်ပြာအပျော့စားနှင့် ရေသုံးပြီး တစ်ခါတည်း သန့်ရှင်းပေးပါ သို့မဟုတ် အဝတ်စို အထည်အပျော့စားကို အသုံးပြုပြီး သန့်ရှင်းပေးပါ။ အရက်ပြန် သို့မဟုတ် ရနံ့ထွက်သော ပစ္စည်းများကို အသုံးပြုခြင်းမှ ရှောင်ကြဉ်ပါ။ အရေပြားကို မပွတ်တိုက်ပါနှင့်။ အရေပြားကို အမြဲတမ်း အောက်သို့ အတည့်အနေအထားဖြင့် ညင်သာစွာ သုတ်ပေးပါ။ တို့ဖတ်ဖြင့်တို့ပြီး ခြောက်အောင်သုတ်ပါ။
• စောင့်ရှောက်မှုအဖွဲ့မှ ထောက်ခံခွင့်ပြုသော အရေပြားလိမ်းဆေးအဆီနှင့် အနှစ်များကို အသုံးပြုပါ။ အစိုဓာတ်ဖြည့်ပေးသော လိမ်းဆေးများလိမ်း၍ အရေပြားကို ကာကွယ်ပါ။ လိမ်းဆေးများကို မသုံးမီ အမြဲတမ်း သင့်ကျန်းမားရေးစောင့်ရှောက်သူနှင့် အမြဲစစ်ဆေးပါ။ သို့သော် ယေဘုယျအားဖြင့် ဇင့်အောက်ဆိုဒ် နှင့်/သို့မဟုတ် ရေနံဆီပါသော လိမ်းဆေးများကို အသုံးပြုရန် ထောက်ခံကြသည်။ လိမ်းဆေးကို ပါးပါးနှင့် အထပ်ထပ်လိမ်းပေးပါ။ လိမ်းဆေးအဆီဖြင့် နီမြန်းရောင်ရမ်းနေသော အရေပြားနေရာအကုန်လုံးကို လိမ်းသင့်သည်။ လိမ်းဆေးကို အတင်းပွတ်မလိမ်းပါနှင့်။
• ကလေးပေါင်ဒါ အသုံးပြုခြင်းကို ရှောင်ကြဉ်ပါ။ ပေါင်ဒါမှုန့်များသည် အသက်ရှူသွင်းရာတွင် အသက်ရှူလမ်းကြောင်းထဲ ဝင်ပြီး အသက်ရှူခြင်းနှင့် အဆုတ်တွင် ပြဿနာတက်နိုင်သည်။
• အရေပြားကို ပုံမှန် စစ်ဆေးပါ။ လေစီးဆင်းမှုကို တိုးမြင့်ကောင်းမွန်စေရန်၊ စိုထိုင်းဆကို လျှော့ချရန်နှင့် ပွန်းရှမှုကို လျော့နည်းစေရန် ဒိုက်ပါမဝတ်ဘဲထားသည့် အချိန်ထားပေးပါ။
• အရေပြားကို ပုံမှန်စစ်ဆေးပါ။ ဒိုက်ပါဝတ်ထားသော နေရာအပါအဝင် ကလေး၏ အရေပြားကို နေ့စဉ် စစ်ဆေးပါ။ အရေပြားရောင်ရမ်းခြင်းဖြစ်နိုင်ခြေပို၍များသော လူနာများတွင် အရေပြားကို မကြာခဏစစ်ဆေးသင့်သည်။ အသက်ကြီးသော ကလေးများသည် သူတို့အရေပြားကို စစ်ဆေးခံရခြင်းကို ရယူရန် ရှောင်ကြဉ်တတ်ကြသည်။ သို့သော် ပုံမှန် စောင့်ကြည့်လေ့လာခြင်းသည် အရေပြားရောင်ရမ်းခြင်း၏ အစောပိုင်းလက္ခဏာများကို ရှာတွေ့နိုင်သည့် အတွက် အရေးကြီးသည်။
• အရေပြား ကျိန်းစပ်ခြင်း သို့မဟုတ် ရောင်ရမ်းနာကျင်ခြင်းလက္ခဏာအကြောင်းကိုမဆို လူနာစောင့်တိုင်းအား အသိပေးပါ။
• အရေပြားအား မည်သို့စောင့်ရှောက်ရမည်ကို လူနာစောင့်များအားလုံးမှ သိရှိရန် ပြုလုပ်ပါ။

ဒိုက်ပါနေရာရှိ အရေပြားအနီစက်များသည် အကြောင်းရင်းမျိုးစုံကြောင့် ဖြစ်ပေါ်နိုင်သည်။ အနီစက်အမျိုးအစား တစ်မျိုးနှင့် တစ်မျိုးခွဲခြားရန် ခက်သော်လည်း ၎င်းတို့အတွက် မတူညီသော ကုသမှုများကို ပြုလုပ်ရန် လိုအပ်နိုင်သည်။

• ဒိုက်ပါကြောင့်ဖြစ်သော အရေပြားရောင်ရမ်းခြင်း တွင် အတွေ့ရအများဆုံး အမျိုးအစားမှာ ဒိုက်ပါနှင့်ထိသောကြောင့် ဖြစ်ပေါ်လာသော အရေပြားအနီစက်များဖြစ်သည်။ မလိုလားအပ်သောမည်သည့်အရာများကမဆို (များသောအားဖြင့် ဆီးနှင့် မစင်များ) သည် ယင်းကဲ့သို့ အနီစက်များကို ဖြစ်စေနိုင်သည်။ အပျော့စား အရေပြားနီမြန်းခြင်းမှအစပြုပြီး နီမြန်းခြင်း၊ အရောင်တောက်ခြင်း နှင့်/သို့မဟုတ် အသားကွာကျနိုင်သည်အထိ လက္ခဏာအမျိုးမျိုးဖြစ်နိုင်သည်။ အရေပြားအနီစက်များဖြစ်လေ့ရှိသော နေရာများမှာ တင်ပါးများ၊ ပေါင်များ၊ ဝမ်းဗိုက်နှင့် ခါးတို့ ဖြစ်သည်။
• ဒိုက်ပါကြောင့်ဖြစ်သော အရေပြားအနီစက်များကို မကုသဘဲထားပါက အရေပြားတွင် မှိုဆွဲကာကန်ဒီဒါ (မှိုရောဂါ) ဒိုက်ပါကြောင့်ဖြစ်သော အရေပြားရောင်ရမ်းခြင်း ကို ဖြစ်ပေါ်စေနိုင်သည်။ ရောဂါပိုးဝင်ပြီး ရောင်ရမ်းမှုကြောင့် အရေပြားပေါ်တွင် အနီရင့်ရောင် အကွက်များ ထွက်လာနိုင်သည်။ အရည်များဖြင့် ပြည့်နေသော ပြည်ဖုများလည်း ရှိနိုင်သည်။ ဒိုက်ပါကြောင့်ဖြစ်သော အရေပြားအနီစက်များသည် ပေါင်နှင့် လိင်အင်္ဂါ တစ်ဝိုက် အရေပြားအတွန့်များကြားတွင်လည်း ဖြစ်ပွားလေ့ရှိသည်။ တခါတရံတွင် ကလေး၏ ပါးစပ်တွင် မှိုစွဲသော ရောဂါ (အဖြူဖတ်များ) ဖြစ်နိုင်သည်။

အခြားသောအရေပြားအနီစက်များမှာ ဓာတ်မတည့်သောကြောင့်ဖြစ်သော အရေပြားအနီစက်များ၊ အဆီထုတ်ဂလင်းမှ အဆီ အများအပြားထုတ်ခြင်းကြောင့်ဖြစ်သော အရေပြားအနီစက်များနှင့် ဘက်တီးရီးယားကူးစက်မှုတို့ ဖြစ်သည်။

ကလေးတွင် အောက်ပါအခြေအနေများ ဖြစ်ပေါ်လျှင် ကျန်းမာရေးစောင့်ရှောက်မှုပေးသူကို ဆက်သွယ်ပါ-

• ကြီးမားပြန့်ကားနေသော အနာများ၊ အရည်ဖုများ၊ ပြည်ဖုများ၊ အမွှေးအိတ်တွင်ဖြစ်သော ပြည်တည်နာများ သို့မဟုတ် မာတင်းနေသောအနာဖေးများတွေ့ရှိလျှင်
• ၂၄ နာရီအတွင်း အခြေအနေတိုးတက်မှု မရှိလျှင်
• အနီစက်များမှ သွေးထွက်ပြီး အနီတောက်တောက်အရောင်သို့ ပြောင်းလဲသွားလျှင် သို့မဟုတ် အခဲဖြစ်သွားလျှင် သို့မဟုတ် အနီစက်သည် ဒိုက်ပါဝတ်သော အရေပြားနေရာကို ကျော်လွန်ပြီး ပြန့်နေလျှင်
• အနီစက်ကြောင့် အိပ်စက်ရာတွင် အခက်အခဲရှိလျှင်
• အဖျားတက်လာလျှင်
• နေမကောင်းဖြစ်သည့် ပုံသဏ္ဍန်ရှိလျှင်