ပင်မသွေးပြန်ကြောပိုက်ငယ်များ

ကင်ဆာကုသမှုတွင် ထိုးဆေးအမျိုးမျိုး၊ သွေးဖောက်ထုတ်မှုများနှင့် သွေးပြန်ကြောသွင်း ဆေးဝါးများနှင့် အရည်များပါဝင်လေ့ရှိသည်။ ထိုလုပ်ငန်းစဉ်ကို ပိုမိုလွယ်ကူစေရန် ကလေးကင်ဆာလူနာအများအပြားတွင် သွေးပြန်ကြောထဲသို့ ရောက်နိုင်မည့်  အရည်ဝင်ထွက်ပိုက် (သေးသွယ်၍ကွေးနိုင်သောပလတ်စတစ်ပိုက်)တစ်ခု အားအရေပြားအောက်တွင် တပ်ဆင်ထားရသည်။

ကုသမှုပြုလုပ်သည့် ပထမရက်များအနည်းငယ်တွင် လူနာသည် ယာယီအသုံးပြုရန် ခန္ဓာကိုယ်အစွန်အဖျားပိုင်း သွေးပြန်ကြော (IV) ပိုက် (PIV) ကို တပ်ဆင်ရနိုင်သည်။ ခန္ဓာကိုယ်အစွန်အဖျားပိုင်း IV သည် အများအားဖြင့် လက်အတွင်း သို့မဟုတ် တံတောင်အနီးလက်မောင်းအတွင်းဘက်ရှိ သွေးပြန်ကြောထဲသို့ ထိုးသွင်းသည့် သေးငယ်၍တိုသော အရည်ဝင်ထွက်ပိုက်ငယ်တစ်ခုဖြစ်သည်။ ဤသို့သော IV အရည်ဝင်ထွက်ပိုက်ငယ် အမျိုးအစားသည် ရေတိုအသုံးပြုရန်ဖြစ်ပြီး ရက်အနည်းငယ်အတွင်း ပြန်လည် လဲလှယ်ရမည်ဖြစ်သည်။ ထို့ပြင် သွေးပြန်ကြော၏ အရွယ်အစားမှာ သေးငယ်သောကြောင့်  တချို့ကုသရေးဆေးဝါးများကို ခန္ဓာကိုယ်အစွန်အဖျားပိုင်း IV မှ တစ်ဆင့် ပေးသွင်းနိုင်ခြင်းမရှိပါ။

ပင်မသွေးပြန်ကြောပိုက်များ အမျိုးအစားများ

ကလေးကင်ဆာလူနာများတွင် အသုံးပြုသည့် ပင်မသွေးပြန်ကြောပိုက်များ အဓိက အမျိုးအစား ၃ မျိုးရှိပြီး ၎င်းတို့မှာ အောက်ပါအတိုင်းဖြစ်သည်-

1. လက်မောင်းသွေးပြန်ကြောမှတစ်ဆင့် တပ်ဆင်ထားသော ပင်မသွေးပြန်ကြောပိုက် (PICC ပိုက်)
2. အရေပြားအောက်တွင် လိုဏ်ခေါင်းပြုလုပ်၍ ထည့်ထားသော သွေးပြန်ကြောပိုက်
3. အရေပြားအောက်ရှိ ပင်မသွေးပြန်ကြော ဝင်ထွက်ပေါက်ပိုက်

ပင်မသွေးပြန်ကြောပိုက် အမျိုးအစားများသည် ၎င်းတို့အား ထည့်ထားရသည့်နေရာနှင့် အသုံးပြုနည်းအပေါ်မူတည်ပြီး အပြောင်းအလဲရှိသည်။ လူနာတစ်ဦးစီအတွက် မည်သည့် အရည်ဝင်ထွက်ပိုက်အမျိုးအစားသည် အသင့်တော်ဆုံးဖြစ်သည်ကို အမျိုးမျိုးသော အကြောင်းအရာများက အဆုံးအဖြတ်ပေးပါသည်။ ၎င်းတို့တွင် အောက်ပါတို့ပါဝင်သည်-

• ဆေးဝါးများနှင့် အခြားကုသမှုများ၏ အမျိုးအစားနှင့် အရေအတွက်
• ကုသမှုကာလ
• အသုံးပြုသည့် အကြိမ်အရေအတွက်
• ကုထုံး၏ ပြင်းထန်မှု
• ကလေး၏အသက်၊ အရွယ်အစားနှင့် ကျန်းမာရေးအခြေအေန
• ကလေး၏ လှုပ်ရှားနိုင်မှုအဆင့်
• အရည်ဝင်ထွက်ပိုက်ကို ထိန်းသိမ်းရန် လိုအပ်သည့် ဂရုပြုစောင့်ရှောက်မှုအတိုင်းအတာ
• ရောဂါပိုးကူးစက်မှု ဖြစ်ပွားနိုင်ခြေ နှင့် အခြားနောက်ဆက်တွဲ အခြေအနေများ

ဆရာဝန်က လုပ်ထုံးလုပ်နည်းအသေးစိတ် နှင့် အန္တရာယ်များနှင့် အကျိုးကျေးဇူးများကို ရှင်းပြပါလိမ့်မည်။ ပင်မသွေးပြန်ကြောပိုက်ငယ်များထည့်သွင်းခြင်းကြောင့် ရရှိနိုင်သော အကြီးဆုံးအန္တရာယ်တစ်ခုမှာ ရောဂါပိုးကူးစက်မှုဖြစ်သည်။ ရောဂါပိုးကူးစက်မည့် အန္တရာယ်ကို လျှော့ချရန်နှင့် ပိုက် ကောင်းစွာ အလုပ်လုပ်ရန်အတွက် ပိုက်စောင့်ရှောက်ရေးလမ်းညွှန်များအားလုံးကို လိုက်နာရန် အရေးကြီးပါသည်။