ကိုယ်စိတ်ပြန်လည်ကျန်းမာရေးကုထုံး

ကိုယ်စိတ်ပြန်လည်ကျန်းမာရေးကုထုံးဆိုတာက ဘာလဲ။ 

ကိုယ်စိတ်ပြန်လည်ကျန်းမာရေးကုထုံး(OT) သည် အသက်ရှင်သန်ရန်အတွက် လုပ်ရသည့် အလုပ်နှင့် စွမ်းရည်များကို မြှင့်တင်ပေးသည့် ပြုစုစောင့်ရှောက်မှု အမျိုးအစားဖြစ်သည်။ ယင်းကုထုံးသည် အိမ်၊ ကစားကွင်း၊ ကျောင်းနှင့် အလုပ်ခွင်များတွင် လူများအတွက်အရေးပါသည့် လုပ်ငန်းဆောင်တာများလုပ်ဆောင်နိုင်ရန်အတွက် ကူညီပေးနိုင်ပါသည်။ ကလေးများအတွက်၊ ယင်းကုထုံးသည် ပညာရေးအောင်မြင်မှု၊ သို့မဟုတ် ၎င်းတို့၏ အရွယ်အလိုက် လုပ်ဆောင်ရမည့်တာဝန်များကို ဆောင်ရွက်နိုင်ခြင်းကဲ့သို့သော ဖွံ့ဖြိုးတိုးတက်သည့် မှတ်တိုင်များကိုရရှိစေသည့် အဓိပ္ပာယ်ဆောင်ပါသည်။

ဝေဒနာခံစားနေရသည့် ကလေးငယ်များအတွက် ကိုယ်စိတ်ပြန်လည်ကျန်းမာရေး ပညာရှင်တစ်ယောက်သည် ကလေးငယ်နှင့်ဆယ်ကျော်သက်များအား ကလေးဘဝတွင် လုပ်ကိုင်ရသည့်အလုပ်များဖြစ်သည့် သင်ယူခြင်း၊ ကစားခြင်း၊ အိပ်ခြင်း၊ ကြီးထွားခြင်းနှင့် လွတ်လပ်မှုတို့ကိုခံစားနိုင်စေရန်အတွက် ကူညီပေးနိုင်ပါသည်။ ကင်ဆာရောဂါဝေဒနာရှင်ကလေးငယ်များနှင့်ဆယ်ကျော်သက်များအတွက် ကုထုံးများတွင်ပါဝင်သည့် တူညီသည့်အရာများမှာ-

• အရာဝတ္ထုများကိုင်ဆုပ်ခြင်းနှင့် စာရေးသားခြင်းတို့အတွက် ကောင်းမွန်သည့်ကိုင်တွယ်လှုပ်ရှားမှု စွမ်းရည်များ
  
• ဖွံ့ဖြိုးမှု နှောင့်နှေးခြင်း၊ အားနည်းခြင်း သို့မဟုတ် အမြင်အာရုံအားနည်းခြင်းကဲ့သို့သော ကန့်သတ်ချက်များကို ဖြေရှင်းခြင်း
  
• နေ့စဉ်လုပ်ဆောင်ရသည့်အရာများဖြစ်သည့် စားသောက်ခြင်း၊ ရေချိုးခြင်း၊ ဖြီးလိမ်းသန့်စင်ခြင်း၊ အိမ်သာတက်ခြင်းနှင့် ဝတ်စားဆင်ယင်ခြင်း
  
• အသက်အရွယ်လိုက် ကျွမ်းကျင်ရမည့်စွမ်းရည်များဖြစ်သော ချက်ပြုတ်ခြင်း၊ အိမ်ပြုပြင်ထိန်းသိမ်းခြင်း၊ ကျောင်း၊ အလုပ်နှင့်ပတ်သက်သည့် စွမ်းရည်များနှင့် ယာဉ်မောင်းနှင်ခြင်း။

ကိုယ်စိတ်ပြန်လည်ကျန်းမာရေးကုထုံးတွင် လေ့ကျင့်ခန်းများနှင့် လှုပ်ရှားမှုများပါဝင်ပြီး နေ့စဉ်လုပ်ကိုင်ရသည့်အလုပ်များနှင့်ပတ်သက်သည့်စွမ်းရည်များနှင့် အမှီခိုကင်းကင်းဆောင်ရွက်နိုင်မှုတို့ကို မြင့်တင်နိုင်ရန်ဖြစ်သည်။ ကိုယ်စိတ်ပြန်လည်ကျန်းမာရေးကုထုံးက ကူညီပေးနိုင်သည်များမှာ-

• ကိုယ်လက်လှုပ်ရှားမှုများတွင် ပါဝင်ဆောင်ရွက်နိုင်စေရန် ခန္ဓာကိုယ် ကြံ့ခိုင်မှုနှင့် ခံနိုင်ရည်ရှိမှု
• ကောင်းမွန်သည့်ကိုင်တွယ်လှုပ်ရှားမှု စွမ်းရည်များ
  
• အမြင်အာရုံပိုင်းသိမြင်နားလည်ခြင်း
  
• လက်နှင့်အမြင်အာရုံ ပူးတွဲ၍ လုပ်ဆောင်နိုင်ခြင်း
  
• သိမြင်ခြင်း
  
• ဖွံ့ဖြိုးမှုနှောင့်နှေးခြင်းများ
  
• အစာစားခြင်းနှင့် ခံတွင်း၏ လုပ်ဆောင်ချက်များ
  
• နေ့စဉ်ဘဝ လှုပ်ရှားဆောင်ရွက်မှုများ
  
• အကြားအမြင်၊ အာရုံစူးစိုက်ခြင်းနှင့် အပြုအမူပိုင်း ပြဿနာများ
  
• ဆေးဘက်ဆိုင်ရာနှင့် လိုက်လျောညီထွေဖြစ်မည့် အကူအညီများ

ကိုယ်စိတ်ပြန်လည်ကျန်းမာရေးကုထုံး ပညာရှင်အားရှာဖွေခြင်း

ကိုယ်စိတ်ပြန်လည်ကျန်းမာရေးကုထုံး ပညာရှင်များသည်ခွင့်ပြုချက်ရထားပြီး ကိုယ်စိတ်ပြန်လည်ကျန်းမာရေးကုထုံး (OT) နှင့် ပတ်သက်၍ ဘွဲ့ရသည့် ကျွမ်းကျင် ကျန်းမာရေး ပညာရှင်များဖြစ်သည်။ ၎င်းတို့သည် ဆေးရုံများ၊ ဆေးခန်းများ၊ ကျောင်းများနှင့် အိမ်များ စသည့်နေရာအမျိုးမျိုးတွင် လုပ်ကိုင်ကြသည်။ မိမိကလေး၏ လိုအပ်ချက်အပေါ်မူတည်၍၊ ရှေးဦးကြားဖြတ်အစီအစဉ် (မွေးစမှ အသက် ၃ နှစ်အရွယ်ထိ)၏ တစ်စိတ်တစ်ပိုင်းအဖြစ် သို့မဟုတ် တစ်ဦးချင်း ပညာသင်ကြားရေးအစီအစဉ် (IEP) ကာလအတွင်း ကျောင်းများတွင် ကိုယ်စိတ်ပြန်လည်ကျန်းမာရေးကုထုံးကို ရယူနိုင်သည်။ ကလေးများကို ကုသပေးသည့် ကိုယ်စိတ်ပြန်လည်ကျန်းမာရေး ပညာရှင် (ဝေဒနာရှင်ကလေးငယ်များအတွက် ကိုယ်စိတ်ပြန်လည်ကျန်းမာရေး ပညာရှင်) အား သင့်ဆရာဝန်က ကူညီရှာဖွေပေးနိုင်သည်။