ကီမိုဆေးသွင်းခြင်းကုထုံးပြီးနောက် ခန္ဓာကိုယ်အစွန်အဖျားပိုင်း အာရုံကြောထိခိုက်ခြင်း

နေအိမ်
ရောဂါရှာဖွေခြင်းနှင့် ကုသခြင်း
ဘေးထွက်ဆိုးကျိုးများ
ခန္ဓာကိုယ်အစွန်အဖျားပိုင်း အာရုံကြောချွတ်ယွင်းသည့်ရောဂါ လက်ရှိစာမျက်နှာ

ခန္ဓာကိုယ်အစွန်အဖျားပိုင်းအာရုံကြောထိခိုက်ခြင်းသည် အာရုံကြော ထိခိုက်ပျက်စီးခြင်းတစ်မျိုးဖြစ်ပြီး တစ်ခါတစ်ရံတွင် ကီမိုဆေးသွင်းခြင်းကုထုံး၏ ဘေးထွက်ဆိုးကျိုးအဖြစ် ခံစားရတတ်သည်။ ၎င်းလက္ခဏာများတွင် နာကျင်ခြင်း၊ ခြေထောက် သို့မဟုတ် လက်များတွင် ထုံကျဉ်ခြင်းနှင့် ရွစိစိဖြစ်ခြင်းတို့ ပါဝင်သည်။ အာရုံကြောထိခိုက်ပျက်စီးမှု များလာလေ၊ ခြေထောက်သို့မဟုတ် လက်များရှိ ကြွက်သားများ အားပျော့လာလေ ဖြစ်မည်။ ကလေးများသည် ထူးခြားစွာ လမ်းလျှောက်တတ်ကြသည်။ အဘယ်ကြောင့်ဆိုသော် ၎င်းတို့၏ ခြေထောက်အား ရှေ့သို့မမြှောက်နိုင်သောကြောင့်ဖြစ်သည်။ ၎င်းအခြေအနေအား ခြေဖမိုးခုံး၍ကျခြင်း foot drop ဟူ၍ ခေါ်သည်။ ခန္ဓာကိုယ်အစွန်အဖျားပိုင်း အာရုံကြောထိခိုက်ခြင်းမှ သက်သာခြင်းသည် ကီမိုဆေးသွင်းခြင်းကုထုံးပြီးဆုံးပြီးနောက် အာရုံကြောများပြန်လည်ကောင်းမွန်လာမှသာ ဖြစ်လာတတ်သည်။ သို့သော်လည်း လက္ခဏာများသည် လုံးဝ ပျောက်ကွယ်သွားသည်မဟုတ်ဘဲ လက္ခဏာအသစ်များပင် ကုထုံး၏ နောက်ပိုင်းဖြစ်လာသည့်အကျိုးဆက်များအဖြစ် တစ်ခါတစ်ရံ ပေါ်လာလေ့ရှိသည်။

ခန္ဓာကိုယ်အစွန်အဖျားပိုင်း အာရုံကြောထိခိုက်ခြင်းအား စီမံနိုင်သည့်နည်းလမ်းများရှိနေပါသည်။ ဆရာဝန်မှ နာကျင်မှုအား သက်သာစေရန် ညွှန်းပေးသည့်ဆေးများ ရှိနိုင်သည်။ ကိုယ်ခန္ဓာပြန်လည်သန်စွမ်းစေသည့်ကုသမှု နှင့် ကိုယ်လက်လှုပ်ရှားခြင်းဖြင့်ကုသသည့်ကုထုံး တို့သည် လူနာများခံစားနေရသည့် နာကျင်ခြင်း၊ အာရုံခံနိုင်မှုဆုံးရှုံးခြင်းနှင့် ကြွက်သားအားနည်းခြင်း တို့အတွက် အကူအညီဖြစ်စေနိုင်မည်ဖြစ်သည်။

ခန္ဓာကိုယ်အစွန်အဖျားပိုင်း ဦးနှောက်အာရုံကြောထိခိုက်ခြင်း၏ လက္ခဏာများ

၎င်းအာရုံကြောထိခိုက်ပျက်စီးခြင်းအတွက် လက္ခဏာများသည် ပျက်စီးသွားသည့် အာရုံကြောအမျိုးအစားများနှင့် ပြင်းထန်မှုပေါ်တွင်မူတည်သည်။ ၎င်းလက္ခဏာတို့တွင် ပါဝင်သည်များမှာ-

အာရုံခံကြောဆိုင်ရာ လက္ခဏာများ

ထုံကျဉ်ခြင်း (အာရုံခံနိုင်မှုဆုံးရှုံးခြင်း)၊ ရွစိစိဖြစ်ခြင်း သို့မဟုတ် အပူလောင်သလို ခံစားရခြင်း၊ လက်နှင့်ခြေထောက်တို့တွင် အများဆုံးဖြစ်တတ်သည်
ခံတွင်း သို့မဟုတ် မေးရိုးနာကျင်ခြင်း
အထိအတွေ့ သို့မဟုတ် အပူချိန်ကို အာရုံခံစားလွယ်ခြင်း
စူးရှနာကျင်ခြင်း၊ ရုတ်တရက်နာကျင်ခြင်း ၊ အရိုက်ခံရသကဲ့သို့နာကျင်ခြင်း

လှုပ်ရှားမှုအားနည်းသည့်လက္ခဏာများ

ဟန်ချက်ပျက်ခြင်း
လမ်းလျှောက်သည့် ဟန်ပန် သို့မဟုတ် လမ်းလျှောက်ဟန်ပြောင်းလဲပြီး ခလုတ်တိုက်ခြင်း သို့မဟုတ် လဲကျခြင်းတို့ဖြစ်ပေါ်ခြင်း
တုံ့ပြန်မှု နှေးကွေးခြင်း
ကြွက်သားများ အားနည်းခြင်းနှင့် ကြွက်သားဆုံးရှုံးခြင်း (ခြေထောက်များကိုပိုမိုသေးသွယ်စေ) ၊ အထူးသဖြင့် လက်မောင်းနှင့် ခြေထောက်များ
ကြွက်တက်ခြင်း
အာရုံကြောအားနည်းသည့် ပြဿနာများသည် စာရေးခြင်း၊ ရှူးဖိနပ်စီးခြင်း သို့မဟုတ် အဝတ်အစား ကြယ်သီးတပ်ခြင်းတို့ကို ပြုလုပ်ရန်အားနည်းစေသည်။

အလိုအလျောက်တုံ့ပြန်သည့် လက္ခဏာများ

ဝမ်းချုပ်ခြင်း သို့မဟုတ် ဆီးဆီးသွားရန် ခက်ခဲခြင်း
ချွေးထွက်နည်းလာခြင်း
သွေးပေါင်ချိန် ပြောင်းလဲမှု

အာရုံကြောအမျှင်စလေးများတွင် ပြဿနာများ စဖြစ်လေ့ရှိပြီး၊ ၎င်းတို့သည် ကျောဆစ်ရိုးတွင်းအာရုံကြောမကြီး၏ အဝေးဆုံးနေရာတွင် ရှိသည်။ ၎င်းကြောင့် လက်နှင့် ခြေထောက်များသည် အကျိုးသက်ရောက်မှု အခံရဆုံးနေရာများဖြစ်ကြသည်။ ထိုနည်းတူစွာပင်၊ အားနည်းမှုသည် လက်မောင်းများတွင်မဖြစ်ခင် ခြေထောက်တွင်အရင်ဖြစ်လေ့ရှိသည်။

ခန္ဓာကိုယ်အစွန်အဖျားပိုင်းအာရုံကြောထိခိုက်ခြင်း ဖြစ်ရသည့်အကြောင်းအရင်းများ

ခန္ဓာကိုယ်အစွန်အဖျားပိုင်း အာရုံကြောများ သည် ဦးနှောက်မှ သတင်းအချက်လက်များအား ခန္ဓာကိုယ်တလျှောက်သယ်ဆောင်ပြီး ဦးနှောက်ထံသို့ပြန်လည် သယ်ဆောင်ခြင်းကို ဆောင်ရွက်ပေးသည်။ ၎င်းအချက်အလက်များတွင် မတူကွဲပြားသည့်လုပ်ဆောင်ချက်များပါဝင်ပြီး ၎င်းတို့မှာ မော်တာ (လှုပ်ရှားမှု)၊ အာရုံခံခြင်း(နာကျင်ခြင်း၊ အထိအတွေ့) သို့မဟုတ် အလိုအလျောက်တုံ့ပြန်ခြင်း ( သွေးပေါင်ချိန်၊ အပူချိန် )။

ကီမိုဆေးသွင်းခြင်းကုထုံးတွင် အသုံးပြုသောဆေးများသည် ၎င်းအာရုံကြောများအား ထိခိုက်ပျက်စီးစေနိုင်သည်။ ၀ - ၁၈ နှစ်အကြားဖြစ်သော ကလေးဘဝ ကင်ဆာဝေဒနာရှင်များအတွက် အန္တရာယ်အမြင့်ဆုံးရှိသည့် ဆေးဝါးများတွင် ပါဝင်သည်များမှာ-

ဆေးပမာဏမြင့်မားစွာပါဝင်ခြင်းနှင့် ဆေးဝါးများပေါင်းစပ်ခြင်းတို့သည် အာရုံကြောများပျက်စီးနိုင်မှုကို မြင့်မားစေနိုင်သည်။ ပိုမိုငယ်ရွယ်သည့် ကလေးငယ်များသည် ပို၍ ထိခိုက်နိုင်ခြင်းမှာ ၎င်းတို့၏ အာရုံကြောစနစ်သည် ဖွံ့ဖြိုးဆဲအဆင့်တွင်သာရှိနေသေးသောကြောင့်ဖြစ်သည်။ ဓာတ်ရောင်ခြည် ကုထုံး နှင့် ဆေးဘက်ဆိုင်ရာ အခြေအနေများဖြစ်သော ဆီးချိုရောဂါ ကဲ့သို့ရောဂါများသည် အာရုံကြောများပျက်စီးစေနိုင်ပြီး၊ ကီမိုဆေးသွင်းခြင်းကုထုံးနှင့်အတူတွဲပါက ခန္ဓာကိုယ်အစွန်အဖျားပိုင်း ဦးနှောက်အာရုံကြောထိခိုက်ခြင်းအတွက် အန္တရာယ်ပိုမိုများပြားစေနိုင်သည်။

ခန္ဓာကိုယ်အစွန်အဖျားပိုင်း အာရုံကြောထိခိုက်ခြင်းအား သုံးသပ်ခြင်း

ယေဘုယျအားဖြင့် အာရုံကြောထိခိုက်ပျက်စီးမှုအား သုံးသပ်ရာတွင် အောက်ပါတို့ကို ထည့်သွင်းစဉ်းစားသည်-

ရောဂါလက္ခဏာအမျိုးအစားများ (အာရုံခံ၊ လှုပ်ရှားမှု၊ အလိုအလျောက်တုံ့ပြန်ခြင်း သို့မဟုတ် ၎င်းတို့အားလုံးပေါင်းစုံဖြစ်ပေါ်ခြင်း )
ရောဂါလက္ခဏာများ၏ ပြင်းထန်မှု (နာကျင်ခြင်း၊ ရောဂါလက္ခဏာများက နေ့စဉ်ဘဝအပေါ်မည်မျှအကျိုးသက်ရောက်မှုရှိသလဲ)
အချိန်အလိုက်ပြောင်းနေသည့် ရောဂါလက္ခဏာများ(လက္ခဏာများပိုဆိုးလာသလား သို့မဟုတ် အရင်တိုင်းဆက်ဖြစ်နေသလား)

ဦးနှောက်အာရုံကြောထိခိုက်သည့်လက္ခဏာရှိသည့်လူနာများအား ဦးနှောက်နှင့်အာရုံကြောပါရဂူ ဖြင့်ပြသ၍ ထပ်မံစစ်ဆေးရန်အတွက် ညွှန်းလေ့ရှိသည်။ ဦးနှောက်နှင့်အာရုံကြောစမ်းသပ်ချက်များတွင် ပါဝင်သည်များမှာ တုံ့ပြန်မှုအားတိုင်းတာခြင်း၊ အာရုံခံမှုအားတိုင်းတာခြင်းနှင့် အာရုံကြောတို့၏ အချက်ပြမှု (ဆက်သွယ်မှု) တို့ပါဝင်သည်။ ဤ သတင်းအချက်အလက်ပေါ်မူတည်၍၊ ဆရာဝန်များမှ ပျက်စီးသွားသည့်အာရုံကြောများကို အဆင့်သတ်မှတ်ချက်များ ပြုလုပ်၍ သို့မဟုတ် အာရုံခံနိုင်မှုကို တိုင်းတာပြီး ပျက်စီးသွားသည့်အာရုံကြောများကို သတ်မှတ်ကြသည်။

ကိုယ်ခန္ဓာပြန်လည်သန်စွမ်းစေသည့်ကုထုံးပညာရှင် တစ်ဦးမှလည်း အောက်ပါတို့ကို အကဲဖြတ်ရန်အတွက် စစ်ဆေးမှုတစ်ခု လုပ်နိုင်သည်-

ကြွက်သားသန်မာမှု
အဆစ်အမြစ်များလှုပ်ရှားနိုင်သည့်အတိုင်းအတာ
ထိုင်နေစဉ်နှင့် မတ်တတ်ရပ်နေစဉ်အတွင်း ခြေထောက်နှင့်ဒူးတို့၏ ဖြောင့်တန်းမှုအနေအထား
ဟန်ချက်ညီမှု
လမ်းလျှောက်ဟန်နှင့်ခြေထောက်အနေအထားတို့အားကြည့်ရှုရန်အတွက် ရှူးဖိနပ်မစီးဘဲလမ်းလျှောက်ခြင်း
အထိအတွေ့နှင့် တုန်ခါမှုတို့ကို ခံစားနိုင်စွမ်း
အလိုအလျောက်တုံ့ပြန်ခြင်း

လူနာ၊ မိသားစုနှင့် ပြုစုစောင့်ရှောက်ရေးအဖွဲ့ဝင်တို့ထံမှ သတင်းအချက်လက်များသည် နောက်တစ်ဆင့်အား မည်သို့သွားမည်ကို ဆုံးဖြတ်ရာတွင် အကူအညီပေးနိုင်သည်။

ကီမိုဆေးသွင်းခြင်းကုထုံးကြောင့်ဖြစ်လာသည့် အာရုံကြောထိခိုက်ခြင်းအား ကာကွယ်ခြင်းနှင့်ကုသခြင်း

ကီမိုဆေးသွင်းခြင်းကုထုံးအစီအစဉ်အတွက် ဆရာဝန်များသည် ကင်ဆာအား ထိထိရောက်ရောက်ကုသနေရင်း အာရုံကြောထိခိုက်နည်းနိုင်သမျှ အနည်းဆုံးဖြစ်စေရန်အတွက် အထူးဂရုစိုက်ပြင်ဆင်ထားကြသည်။ သုတေသနပညာရှင်များမှ သုတေသနပြုလေ့လာနေဆဲဖြစ်သည့် ဆေးဝါးများသည် ကီမိုဆေးသွင်းခြင်းကုထုံးကြောင့် အာရုံကြောများအပေါ် အဆိပ်ဖြစ်စေသည့်သက်ရောက်မှုများအား ကာကွယ်နိုင်ရန်အတွက် လုပ်ဆောင်နေသည်။ ဖြစ်နိုင်လျှင် ဆရာဝန်များသည် ဆေးပမာဏအားကန့်သတ်၍ ကြားထဲတွင် ဆေးမပေးသည့်အစီအစဉ်အား ပြုလုပ်ရန် သို့မဟုတ် အာရုံကြောထိခိုက်မည့်အန္တရာယ် မြင့်မားသည့် ကုထုံးများပေါင်းစပ်ကုသခြင်းကို ရှောင်ကြဉ်ရန် ကြိုးပမ်းလာကြသည်။

အာရုံကြောထိခိုက်ပျက်စီးမှုအတွက် ယခုလက်ရှိအသုံးပြုနေသည့် ကုသနည်းသည် လက္ခဏာများအား ဗဟိုပြု၍ စီမံခြင်းနည်းဖြစ်သည်။ ၎င်းဗျူဟာတွင် ပါဝင်သည်များမှာ-

နာကျင်မှု အားထိန်းချုပ်ခြင်း - အာရုံကြောနာကျင်မှုအတွက် မတူညီသည် ဆေးများအား သုံးစွဲရနိုင်သည်၊ ၎င်းဆေးများတွင် စိတ်ငြိမ်ဆေးများ၊ အတက်ရပ်ဆေးများ ဖြစ်သော gabapentinနှင့် အကိုက်အခဲပျောက်ဆေးများ ဖြစ်သောဘိန်းပါသော အနာသက်သာစေသည့်ဆေးများ သို့မဟုတ် lidocaineတို့ပါဝင်သည်။
ပြန်လည်ထူထောင်ရေး အထောက်အပံ့များ - ကိုယ်ခန္ဓာပြန်လည်သန်စွမ်းစေသည့်ကုထုံးနှင့် ကိုယ်လက်လှုပ်ရှားကုသခြင်းတို့သည် လူနာများအား ကြားဖြတ်၍ ၎င်းတို့အတွက် အထောက်ပံ့ဖြစ်စေမည့် ကုသမှုများကို ပြုလုပ်ပေးသည်။ သီးခြား ကုထုံးများတွင် ပါဝင်သည်များမှာ-
- ခွန်အား၊ လှုပ်ရှားနိုင်သည့် အတိုင်းအတာနှင့် ဟန်ချက်ညီမှု တို့ပိုမိုကောင်းမွန်လာစေရန် ပြုလုပ်ရသည့် လေ့ကျင့်ခန်းများ
- လမ်းလျှောက်ရန်အတွက် အသုံးပြုသည့် လမ်းလျှောက်အကူကိရိယာများ၊ ချိုင်းထောက်များ သို့မဟုတ် တုတ်ကောက်များကဲ့သို့ ထောက်ကူပစ္စည်းများ
- အဆစ်အမြစ်များ တည့်မတ်စေရန်နှင့် လုပ်ဆောင်ချက်တိုးတက်စေရန်အတွက် ခြေဖဝါးခွက် သို့မဟုတ် ခြေချင်းဝတ် အထောက်အကူပစ္စည်းများကဲ့သို့ ခြေထောက်အကူပစ္စည်းများ
- အထောက်အကူအဖြစ်အသုံးပြုရသည့် ပစ္စည်းများသည် နေ့စဉ်လုပ်ဆောင်ရသည့်အရာများဖြစ်သည့် စာရေးခြင်း၊ အဝတ်လဲခြင်း သို့မဟုတ် သွားတိုက်ခြင်းတို့ကို ဆောင်ရွက်ရာတွင် ပိုမိုလွယ်ကူစေရန်အတွက်ဖြစ်သည်။
- လျှပ်စစ်ဖြင့် အားနည်းသည့် ကြွက်သားများအား နှိုးဆွခြင်း (ဆရာဝန်၏ ထောက်ခံချက် လိုအပ်သည်၊ ၎င်းကဲ့သို့ကုသခြင်းသည် ကင်ဆာအား ကုသနေစဉ်အတွင်း မလုပ်သင့်သည့်အရာဖြစ်သည်)
- အိမ်တွင်းလေ့ကျင့်ခန်းများနှင့် မိသားစု ပညာရေး
ရောဂါနှင့်လိုက်ဖက်မည့်ကုထုံးများ - လူနာများသည် စိတ်-ခန္ဓာကုသရေးနည်းများ ဖြစ်သည့် အနှိပ်၊ အပ်စိုက်ကုထုံး၊ ဇီဝတုံ့ပြန်မှု နှင့် အနားယူကုသည့်နည်းစနစ်များမှ အကူညီရနိုင်သည်။ မိသားစုများသည် ကုသရေးနည်းအသစ်အား အသုံးမပြုခင် အန္တရာယ်မရှိကြောင်းသေချာစေရန် ပြုစုစောင့်ရှောက်ရေးအဖွဲ့အား ဦးစွာဆွေးနွေးပြောဆိုသင့်သည်။
ကီမိုဆေးသွင်းခြင်းကုထုံးအား ထိန်းညှိခြင်း - ခန္ဓာကိုယ်အစွန်အဖျားပိုင်းအာရုံကြောထိခိုက်ခြင်း ပြင်းထန်သည့်သည့်လူနာများအတွက် ပြုစုစောင့်ရှောက်ရေးအဖွဲ့မှ ကီမိုဆေးသွင်းခြင်းကုထုံးဆေးများနှင့် ထိတွေ့မှု လျှော့ချရန်အတွက် ကုထုံးအစီအစဉ် ပြောင်းလဲရန် အကြံပြုလေ့ရှိသည်။ ၎င်းဆုံးဖြတ်ချက်များသည် လူနာ၏ ကျန်မာရေးအတွက် အန္တရာယ်ရှိမရှိပေါ် လုံးဝမူတည်သည်။

ကီမိုဆေးသွင်းခြင်းကုထုံးကြောင့်ဖြစ်လာသည့် အာရုံကြောပျက်စီးခြင်း၏ ရေရှည်သက်ရောက်မှုများ

ကြွက်သားများအားနည်းခြင်း၊ လမ်းလျှောက်ဟန်ပြောင်းလာခြင်းနှင့် အဆစ်မြစ်များ ထုံကျဉ်ခြင်းတို့သည် ကင်ဆာရောဂါပျောက်ကင်းသွားလျှင်ပင် နောက်ပိုင်းကြုံနိုင်သည့် ကျန်းမာရေးဆိုင်ရာ ပြဿနာများဖြစ်သည်။ အဆစ်အမြစ်များနှင့် ကြွက်သားများ ကောင်းမွန်စွာ အလုပ်မလုပ်တော့သည့်အခါ ဒူးဆစ်များ၊ တင်ပါးဆုံများနှင့် ကျောရိုးတို့အချိန်ကြာလာသည်နှင့်အမျှ ထိခိုက်နိုင်သည်။ ၎င်းကြောင့် နာကျင်ခြင်း နှင့် ကောင်းမွန်စွာမလှုပ်ရှားနိုင်ခြင်းတို့ကြောင့် လဲကျနိုင်သည့် အန္တရာယ် မြင့်လာနိုင်သည်။ နာကျင်ခြင်းနှင့် မလှုပ်ရှားနိုင်ခြင်းသည် အလုပ်နှင့် မိသားစုဘဝ အပေါ် အကျိုးသက်ရောက်နိုင်သည်။ အာရုံကြောပျက်စီးသည့် ရောဂါသည် ခန္ဓာကိုယ်လှုပ်ရှားမှု အဆင့် ပိုမိုနည်းပါးလာစေပြီး ၎င်းသည် အခြားကျန်းမာရေးဆိုင်ရာ ပြဿနာများကို ဖြစ်လာစေနိုင်သည်။

၀ - ၁၈ နှစ်အကြားဖြစ်သော ကလေးဘဝ ကင်ဆာရောဂါ ပျောက်ကင်းသွားသူများတွင် အာရုံကြောပျက်စီးမှုအား စီမံခြင်းနှင့် လက္ခဏာများအားအချိန်မှန် စောင့်ကြည့်လေ့လာခြင်းသည် အသက်ရှင်သန်မှုတလျှောက်လုံး နှင့် ကောင်းမွန်သည့်ဘဝ ရရှိနိုင်ရန် ပုံမှန် အရေးတယူဆောင်ရွက်ရမည့်အရာများဖြစ်သည်။

မိသားစုဝင်များ သိသင့်သိထိုက်သည့်အရာများ

အထောက်အကူဖြစ်ပြီး အလွန်တင်းကြပ်မနေသော ရှူးဖိနပ်များကို စီးပါ။ ရာဘာအောက်ခံပြားပါသည့်ဖိနပ်များကို ရှာစီးပါ၊ အလွယ်တကူ လဲကျ သို့မဟုတ် ချော်လဲနိုင်မည့် ရှူးဖိနပ်များ မစီးပါနှင့်။
ကျန်းမာရေးဆိုင်ရာ ကျွမ်းကျင်သူများမှ ထောက်ခံချက်ပေးထားသည့် အထောက်အကူပစ္စည်းများကိုသာ သုံးစွဲပါ။ ပတ်တီးစွပ်များနှင့် အခြားလူလုပ်ပစ္စည်းများသည် လုပ်ဆောင်ချက်နှင့် ရွေ့လျားနိုင်မှုကို တိုးတက်စေပြီး ကလေးများအား ၎င်းတို့လုပ်လိုသည့်အရာများကို အမှီခိုကင်းစွာ လုပ်နိုင်ပြီး လဲမကျနိုင်ရန်အတွက်ပါ ကူညီပေးနိုင်ပါသည်။ အစဦးတွင် ကလေးများက ငြင်းဆန်ကြမည်ဖြစ်သော်လည်း ၎င်းကဲ့သို့အသုံးပြုခြင်းဖြင့် ပုံမှန်အတိုင်း သွားလာ ကစားနိုင်မည်ဖြစ်သည်။ အနာများ သို့မဟုတ် အရည်ကြည်ဖုများကို မထိခိုက်စေရန်အတွက် အံဝင်မှု ရှိမရှိ ပုံမှန်စစ်ဆေးပါ။
လက်နှင့်ခြေထောက်များ ဒဏ်ရာအနာတရ မဖြစ်စေရန် ကာကွယ်ပါ။ အာရုံခံနိုင်မှုဆုံးရှုံးခြင်းသည် နေ့စဉ်လုပ်ဆောင်ရသည့်အရာများတွင် ထိခိုက်မိခြင်းများ သို့မဟုတ် အပူလောင်ခြင်းများ လွယ်ကူစွာဖြစ်နိုင်၍ သတိပြုပါ။ အရည်ကြည်ဖုများ၊ ခြစ်ရာများနှင့် ရှထားသည့်အနာများအား ပုံမှန်စစ်ဆေးရန် အရေးကြီးသည်။ ခြေဗလာဖြင့် လမ်းလျှောက်ခြင်းကို ရှောင်ကြဉ်ပါ။
လက်မဆေးခင် သို့မဟုတ် ရေမချိုးခင် ရေ၏အပူချိန်ကိုအရင် စစ်ဆေးပါ။ အာရုံခံနိုင်မှုဆုံးရှုံးခြင်းသည် ရေပူနေသည်ကိုမသိပဲ အပူလောင်ခြင်းဖြစ်နိုင်သည်ကို သတိပြုပါ။
ပူပြင်းသည့်ရာသီဥတုတွင် ပြဿနာဖြစ်လာနိုင်မည်ကို သတိထားစောင့်ကြည့်ပါ။ အချို့လူနာများသည် အပူနှင့်ပတ်သက်၍ လက္ခဏာပိုမိုပြတတ်သည် သို့မဟုတ် ချွေးထွက်နည်းလာတတ်သည်။
ချော်လဲခြင်းနှင့် လဲကျခြင်းများမဖြစ်စေရန် အလင်းမှိန်သည့်နေရာနှင့် မျက်နှာပြင်မညီညာသည့်နေရာများ (မြက်ခင်း၊ ကျောက်စရစ်ခင်း စသည့်နေရာများ) တွင် သတိထားဆင်ခြင်ပါ။

ခန္ဓာကိုယ်အစွန်အဖျားပိုင်း ဦးနှောက်အာရုံကြောထိခိုက်ခြင်းနှင့်ပတ်သက်၍ နောက်ထပ်အရင်းအမြစ်များ

---
ပြန်လည်စိစစ်သော ရက်စွဲ- ၂၀၁၈ ခုနှစ် ဩဂုတ်လ