ဆေးရုံတွင်စောင့်ရှောက်ခြင်းအပေါ် လူနာများ၏တုံ့ပြန်မှု
ဖျားနာမှုနှင့်ပတ်သက်ပြီး အဖြစ်များသော တုံ့ပြန်မှုများနှင့် ဆေးရုံတွင်စောင့်ရှောက်ခြင်း
သင့်ကလေး သို့မဟုတ် ဆယ်ကျော်သက် ဆေးရုံတွင်ရှိနေသောအခါ သူ၏နေ့စဉ်လုပ်ရိုးလုပ်စဉ်များ ပြောင်းသွားပါသည်။ သူတို့သည် ဝမ်းနည်းခြင်း၊ ဒေါသထွက်ခြင်း၊ ကြောက်ရွံ့ခြင်းနှင့် ထိန်းချုပ်နိုင်စွမ်းမရှိခြင်းတို့ ဖြစ်နိုင်သည်။ ၎င်းတို့မှာ သာမန်ခံစားချက်များ ဖြစ်ပါသည်။
ဤခံစားချက်များနှင့်ပတ်သက်ပြီး သူတို့၏ တုံ့ပြန်ပုံသည် အသက်အရွယ်၊ ဖွံ့ဖြိုးတိုးတက်မှုအဆင့်နှင့် ပင်ကိုစရိုက်ပေါ် မူတည်ပါသည်။ ဆေးအချို့သည်လည်း သူတို့ကို ကွဲပြားစွာ ခံစားရစေနိုင်သည်။ ကလေးနှင့် ဆယ်ကျော်သက်များသည် နည်းလမ်း 3 မျိုးဖြင့် တုံ့ပြန်တတ်ပါသည်-
- ဆုတ်ယုတ်ခြင်း
- ရန်လိုခြင်း
- ဆုတ်ခွာခြင်း
ဆုတ်ယုတ်ခြင်း၊ ရန်လိုခြင်းနှင့် ဆုတ်ခွာခြင်းသည် အများအားဖြင့် ယာယီတုံ့ပြန်မှုများဖြစ်ပါသည်။ သူတို့လုံခြုံပြီး နေသားတကျဖြစ်သည်ဟု ခံစားရသောအခါ ဤအပြုအမူများသည် မကြာခဏ လျော့သွားနိုင်သည် သို့မဟုတ် ရပ်သွားနိုင်သည်။
ဆုတ်ယုတ်ခြင်းသည် အခြေအနေအသစ်ကို ရင်ဆိုင်ရန် ဘဝ၏အစောဆုံးအဆင့်သို့ ပြန်သွားခြင်းကို ဆိုလိုပါသည်။ အောက်ပါတို့သည် သင့်ကလေးက သူ့အသက်ထက်ငယ်သည့်ပုံစံ ပြုမူပုံများဖြစ်ပါသည်-
- အိမ်သာသွားတတ်အောင် သင်ပေးထားသော်လည်း သို့မဟုတ် အိမ်သာကို ခဏကြာ အသုံးပြုတတ်သော်လည်း အိပ်ရာထဲတွင် အပေါ့သွားခြင်း
- လက်မစုပ်ခြင်း သို့မဟုတ် မိဘကိုတွယ်ကပ်ခြင်းဖြင့် သူ့ကိုယ်ကို သက်သောင့်သက်သာဖြစ်အောင်လုပ်ခြင်း
- ဆေးရုံရောက်ပြီးနောက် ပို၍ညည်းညူခြင်း
- "ကလေးငယ်တစ်ယောက်ကဲ့သို့ စကားပြောခြင်း" သို့မဟုတ် သူတို့၏ဆက်သွယ်မှုကို ကန့်သတ်ခြင်း
ဆေးရုံထဲတွင် ကျန်းမာရေးစောင့်ရှောက်မှုပေးသူနှင့် မိဘများသည် လူနာအပေါ် သက်ရောက်နိုင်သော ဆုံးဖြတ်ချက်များစွာကို ပြုလုပ်ကြသည်။ သင့်ကလေး သို့မဟုတ် ဆယ်ကျော်သက်သည် သူတို့ဖြစ်ပျက်သမျှအပေါ် မထိန်းချုပ်နိုင်ဟု ခံစားရနိုင်ပါသည်။ သူတို့သည် အောက်ပါတို့ကဲ့သို့ ဒေါသထွက်ခြင်း၊ ကြောက်ရွံ့ခြင်းနှင့် ရန်လိုစွာပြုမှုခြင်း (ဆိုးသွမ်းခြင်း) တို့ဖြစ်နိုင်သည်-
- ငိုကြွေးခြင်း သို့မဟုတ် အော်ဟစ်ခြင်း
- ကန်ခြင်း သို့မဟုတ် ရုပ်ပိုင်းဆိုင်ရာအတိုက်အခံလုပ်ခြင်း (ဖမ်းဆုပ်ခြင်း၊ တွန်းခြင်း)
- ဒေါသထွက်လွယ်ခြင်း သို့မဟုတ် အကြောင်းအရာမသိရဘဲ အခြားလူများအပေါ် “ရုတ်တရက်စိတ်ဆိုးခြင်း” (ရိုင်းစိုင်းစွာပြုမူခြင်း၊ အော်ဟစ်ခြင်း)
ကလေးနှင့် ဆယ်ကျော်သက်အချို့သည် သာမန်လုပ်ဆောင်ချက်များကို ရှောင်ရှားခြင်းဖြင့် တုံ့ပြန်ပါသည်။ သူတို့သည် အောက်ပါတို့ဖြစ်နိုင်သည်-
- သူတို့နှစ်သက်သောလုပ်ဆောင်ချက်များတွင် စိတ်ဝင်စားမှုလျော့ကျခြင်း
- ပို၍အိပ်ခြင်း
- စကားနည်းပြီး တိတ်ဆိတ်နေခြင်း
- အစားနည်းခြင်း
- အခြားလူများနှင့် မျက်လုံးချင်းမဆိုင်ခြင်း
သင့်ကလေး၏ တုံ့ပြန်မှုသည် နေ့စဉ်နှင့်အမျှ ပြောင်းလဲပါမည်။ သူတို့၏ အပြုအမူနှင့် ခံစားချက်များတွင် ပြောင်းလဲမှုများသည် အထူးသဖြင့် တစ်ချိန်တွင် ရက်ပေါင်းများစွာမှ ရက်သတ္တပတ်များတိုင်အောင်ကြာပါက ၎င်းတို့ကိုစောင့်ကြည့်ပါ။ ဤအပြုအမူများသည် သူတို့ဆေးရုံ၌ရှိနေချိန်တွင်သာ ဖြစ်ကြောင်းဟုတ်၊ မဟုတ်ကိုလည်း စောင့်ကြည့်ပါ။ သို့မဟုတ် သင့်ကလေး အိမ်ပြန်ရောက်သောအခါနှင့် ကျောင်းတက်သောအခါတွင် ၎င်းတို့ ဆက်ဖြစ်၊ မဖြစ်ကို စောင့်ကြည့်ပါ။ စိုးရိမ်ပူပန်မှုများကို သင်၏ကျန်းမာရေးစောင့်ရှောက်မှုအဖွဲ့သို့ ပြောပြပါ။
ဆေးရုံတွင်းတွင် သင့်ကလေး သို့မဟုတ် ဆယ်ကျော်သက်ကို ကူညီပံ့ပိုးပေးပါ။
ဖျားနာမှုအကြောင်း သင့်ကလေးနှင့် ပြောဆိုခြင်း
ကလေးဘဝ အထူးကုများ၊ စိတ်ပညာရှင်များ၊ လူမှုဝန်ထမ်းများနှင့် ခရစ်ယာန်ဘုန်းကြီးများ သည် သင့်ကလေး သို့မဟုတ် ဆယ်ကျော်သက်နှင့် ဆက်ဆံရာတွင် သင့်ကိုကူညီပေးနိုင်ပါသည်။ သူတို့ထံတွင် အတွေ့အကြုံရှိသလို ကူညီရန် အသင့်ရှိပါသည်။ ဆက်သွယ်ရန် မကြောက်ပါနှင့်၊ လိုအပ်ပါက အကူအညီတောင်းပါ။
သင့်ကလေး သို့မဟုတ် ဆယ်ကျော်သက်အား သူ၏ခံစားချက်များကို စီမံရာတွင် ကျန်းမာရေးနှင့်ညီညွတ်သောနည်းလမ်းများ ရှာဖွေနိုင်ရန်နှင့် သူတို့၏ကြောက်ရွံ့မှုများကို မျှဝေနိုင်ရန် အကူအညီပေးပါ-
- သင်၏ခံစားချက်များကို အပြုသဘောဆောင်သောနည်းလမ်းဖြင့် ဖော်ပြပါ၊ စိတ်အေးအေးထားပါ၊ ကောင်းမွန်သော ရင်ဆိုင်ခြင်းဆိုင်ရာ အရည်အချင်းများကို ပြသပါ။ သင့်ကိုစောင့်ကြည့်ခြင်းဖြင့် သင့်ကလေး သို့မဟုတ် ဆယ်ကျော်သက်သည် သူတို့၏ခံစားချက်များကို ကိုင်တွယ်ရာတွင် မှန်ကန်သောနည်းလမ်းကို သင်ယူလေ့လာပါမည်။
- သင်ငိုကြွေးပါက သို့မဟုတ် စိတ်ပျက်လာပါက ၎င်းသည် အဆင်ပြေပါသည်။ ၎င်းသည် သင့်ကလေး သို့မဟုတ် ဆယ်ကျော်သက်တွင်လည်း ဖြစ်နေနိုင်သည့် ထိုတူညီသောခံစားချက်များကို အတည်ပြုပေးပါမည်။ ကလေးနေမကောင်းဖြစ်ပါက မိဘသည်လည်း စိတ်မကောင်းဖြစ်ကြောင်း ရှင်းပြပါ။ သင်စိတ်မကောင်းဖြစ်ခြင်းက သူတို့၏အပြစ်မဟုတ်ပါ။
- သူတို့ကို စကားပြောလာစေရန် တွန်းအားမပေးပါနှင့်။ သူတို့ အဆင်သင့်ဖြစ်သည်အထိ စောင့်ပါ။ ကလေး သို့မဟုတ် ဆယ်ကျော်သက်များသည် အလိုအလျောက် မေးခွန်းများမေးခြင်းဖြင့် သူတို့အဆင်သင့်ဖြစ်ကြောင်း ဖော်ပြပါမည်။
- သူတို့မျှဝေရန် လုံခြုံသည့်နေရာတစ်ခုကို ဖန်တီးပေးပါ။ သူတို့၏ ခံစားချက်များ၊ စိုးရိမ်ပူပန်မှုများနှင့် ကြောက်ရွံ့မှုများကို သင်အလေးအနက်ထားကြောင်း သူတို့ကို အသိပေးပါ။
သင့်ကလေး သို့မဟုတ် ဆယ်ကျော်သက်သည် အဆင်သင့်ဖြစ်ပါက သူမည်သို့ခံစားရကြောင်းပြောရန်နှင့် သူတို့၏ခံစားချက်များကို ကွယ်ဝှက်မထားရန် အားပေးပါ။ သင့်ကလေးက မေးခွန်းများစမေးလာလျှင် သူပြောလိုသော မေးခွန်းအမျိုးအစားနှင့် စိုးရိမ်ပူပန်မှုများကို သူ့အားဦးဆောင်ခွင့်ပေးပါ။ ၎င်းသည် သင့်ကလေးက သူ၏ဖျားနာမှုအကြောင်းပြောရန်နှင့် ပိုမိုလေ့လာရန် အဆင်သင့်ဖြစ်ကြောင်း သဲလွန်စဖြစ်နိုင်သည်။
- မည်သည့်အချက်အလက်ကို မျှဝေရမည်နှင့်ပတ်သက်ပြီး မသေချာပါက သင်၏စောင့်ရှောက်မှုအဖွဲ့ကို အကူအညီတောင်းပါ။
- သူ့အရွယ်နှင့်သင့်တော်သော အချက်အလက်များနှင့် ထိုအချိန်တွင် သူတို့သိရန်လိုအပ်သည့်အရာကိုသာ မျှဝေပါ။
- သူ၏ဦးဆောင်မှုနောက်ကို လိုက်ပါ။ သူမေးခွန်းများမေးပါက သင့်တော်သည်ကို ရိုးရိုးသားသား ဖြေပေးပါ။ သူနားလည်နိုင်သည့် ရိုးရှင်းသောစကားလုံးများကိုသာ အသုံးပြုပါ။ ရိုးသားမှုသည် ယုံကြည်မှုကို တည်ဆောက်ပေးပါသည်။
- ကလေးများသည် အချစ်ခံရသည်ဟု ခံစားရပြီး သူတို့အား ကူညီပေးလိုသည့်လူများနှင့် ဝန်းရံပေးရန် လိုအပ်ပါသည်။
- ကုသမှုလုပ်ချိန်တွင် သူတို့နှင့်အတူ မည်သူရှိနေမည်ကို ရှင်းပြပါ။
သင့်ကလေးကို မည်သို့စကားပြောရမည်နှင့်ပတ်သက်ပြီး နောက်ထပ်အရေးကြီးသော အကြံဉာဏ်များအတွက် ကင်ဆာရောဂါအကြောင်း သင့်ကလေးအား ပြောပြခြင်း ကိုကြည့်ပါ။
သင်နှင့် သင့်မိသားစုဝင်များ၏ စိတ်ကျန်းမာရေးကို ဂရုစိုက်ပါ။
အခြေအနေတူဖြစ်နေသည့် အခြားမိဘများနှင့် စကားပြောပါ။
ဆေးရုံတွင်ရှိနေစဉ် ခံစားချက်များကိုစီမံခြင်း
သင့်ကလေး သို့မဟုတ် ဆယ်ကျော်သက်က သူ၏ခံစားချက်များကို ကွယ်ဝှက်ထားခြင်း သို့မဟုတ် ဟန်ဆောင်ခြင်းထက် ၎င်းတို့ကိုထုတ်ပြောရန်အတွက် ပိုကောင်းသောနည်းလမ်းများရှာရာတွင် ကူညီပေးပါ။ အောက်ပါတို့ကို သူတို့လုပ်နိုင်သည်-
- သူတို့ကြောက်ရွံ့နေသောအခါ သို့မဟုတ် စိတ်မကောင်းဖြစ်နေသောအခါ သက်သောင့်သက်သာဖြစ်စေသည့် အရာဝတ္ထုကို ကိုင်ထားနိုင်သည်၊ သို့မဟုတ် ၎င်းတို့မှ အာရုံပြောင်းရန် လုပ်ဆောင်ချက်တစ်ခု (သင့်လက်ကိုကိုင်ခိုင်းခြင်း၊ ဂိမ်းကစားခြင်း၊ သီချင်းဆိုခြင်း) ကို လုပ်နိုင်သည်။
- သူတို့ဒေါသထွက်သောအခါ အခြားလူများကို မထိုးဘဲ ခေါင်းအုံးကို ထိုးနှက်နိုင်သည်။
- ဆေးရုံနှင့်ပတ်သက်ပြီး သူတို့နှစ်သက်သည်နှင့် မနှစ်သက်သည်များ စာရင်းကိုလုပ်နိုင်သည်။
- သူတို့၏ခံစားချက်များကို အနုပညာ၊ တေးဂီတ၊ ဓာတ်ပုံပညာ၊ "ဟန်ဆောင်သည့်" ဂိမ်းများကစားခြင်း သို့မဟုတ် အခြားလုပ်ဆောင်ချက်များမှတစ်ဆင့် ဖော်ပြနိုင်သည်။
- အသက်ပြင်းပြင်းရှူခြင်းကို လေ့ကျင့်နိုင်သည်။
- နေ့စဉ်မှတ်တမ်းလုပ်ခြင်း (စာရေးခြင်း၊ ပုံဆွဲခြင်း၊ ဗီဒီယိုရိုက်ခြင်း)။
ဆေးရုံတွင်ရှိနေစဉ် စည်းကမ်းနှင့် တသမတ်တည်းဖြစ်သော ကန့်သတ်ချက်များ သတ်မှတ်ခြင်း
ဆေးရုံတွင် သင့်ကလေး သို့မဟုတ် ဆယ်ကျော်သက်အတွက် စည်းကမ်းသတ်မှတ်ပြီး တသမတ်တည်းဖြစ်သော ကန့်သတ်ချက်များထားပါ။ လုပ်ရိုးလုပ်စဉ်တစ်ခု ထားရှိခြင်းသည် သူတို့ကို လုံခြုံစိတ်ချရသည်ဟု ခံစားရစေရန် ကူညီပေးသည်။ အကြံဉာဏ်အချို့မှာ-
- ဖြစ်နိုင်သည့်အခါတိုင်း ဆေးရုံတွင် သူ၏ကုသမှုမတိုင်ခင်ကအတိုင်း တူညီသည့်စည်းကမ်းနှင့် ကန့်သတ်ချက်များကို ဆက်ထားပါ။
- သူ့ကို ရှင်းလင်းသည့်ညွှန်ကြားချက်များ ပေးပါ။ မလုပ်ရမည့်အရာထက် လုပ်ရမည့်အရာကို ပြောပြပါ။
- ကောင်းစွာလုပ်နိုင်သော အရာများ (ခက်ခဲသောလုပ်ငန်းစဉ် သို့မဟုတ် ကုသမှုကို ပြီးအောင်လုပ်နိုင်ခြင်း၊ စိတ်ရှည်စွာစောင့်ဆိုင်းခြင်း) အတွက် ချီးမွမ်းပေးပါ။
- သူ၏ဆေးများကို သောက်နိုင်ခြင်းအတွက် ချီးမွမ်းပေးပါ။
- သူစိတ်မကောင်းဖြစ်နေပါက စိတ်အေးအေးထားပြီး သူ၏ခံစားချက်များကို အသိအမှတ်ပြုပါ။ စည်းကမ်းများကို လိုက်နာခြင်းမပြုရန်အတွက် စိတ်မထိန်းနိုင်ခြင်း သို့မဟုတ် ပေါက်ကွဲခြင်းဖြင့် ထိန်းချုပ်မှုကို သင့်ကလေးအား လုပ်ခွင့်မပေးပါနှင့်။ ရှင်းလင်းသောကန့်သတ်ချက်များ သတ်မှတ်ပြီး တသမတ်တည်းဖြစ်သော နောက်ဆက်တွဲလုပ်ဆောင်ချက်ဖြင့် ၎င်းတို့ကိုပြုလုပ်ပါ။
- ပြင်းထန်သောအပြစ်ပေးမှုနှင့် ရုပ်ပိုင်းဆိုင်ရာအပြစ်ပေးမှုကို ရှောင်ကြည်ပါ။
ထိန်းချုပ်မှု၊ ချိတ်ဆက်မှုတို့နှင့်ပတ်သက်ပြီး အသိတစ်ခုရယူခြင်း
ရွေးချယ်စရာများရှိပါက သင့်ကလေး သို့မဟုတ် ဆယ်ကျော်သက်ကို ထိန်းချုပ်မှုနှင့်ပတ်သက်ပြီး အသိရစေရန် ရွေးခွင့်ပေးပါ။ တစ်စုံတစ်ခု ဖြစ်ရမည်ဆိုပါက ၎င်းကိုရွေးချယ်မှုအဖြစ် မကမ်းလှမ်းပါနှင့်။
- သူ၏ ကစားချိန် သို့မဟုတ် အားလပ်ချိန်ကို သတ်မှတ်ခွင့်ပေးပါ။ သူသည် လုပ်ဆောင်ချက်တစ်ခုနှင့် ၎င်းမည်မျှကြာမည်ကို သင့်တော်သလို ဆုံးဖြတ်နိုင်သည်။ ၎င်းကို အနှောင့်အယှက်ကင်းစွာ လုပ်ခွင့်ပေးပါ။
- ရက်ချိန်းများအတွက် စောင့်ဆိုင်းနေစဉ် သူနှစ်သက်သည့်အရာများကို ထုပ်ပိုးနိုင်သည်။
- သူ၏နေမကောင်းဖြစ်မှုနှင့်ပတ်သက်ပြီး အခြားလူများနှင့် မည်သည်ကိုမျှဝေလိုသည်ကို သူ့အားမေးပါ။
- သူ့ကို လည်ပတ်မှုအားစီစဉ်ခွင့်နှင့် အခြားလူများနှင့် ဆက်သွယ်ခွင့်ပေးပါ။ (FaceTime၊ စာသားမက်ဆေ့ဂျ်များ၊ ဗီဒီယိုများ၊ သို့မဟုတ် ဖုန်းခေါ်ဆိုမှုများ)။
- ဆေးရုံတွင် သူငယ်ချင်းအသစ်များရစေရန် သူ့ကိုကူညီပေးပါ။
အဓိကအချက်များ
- သင့်ကလေး သို့မဟုတ် ဆယ်ကျော်သက်သည် ဆေးရုံတွင်ရှိနေစဉ် သို့မဟုတ် နေမကောင်းဖြစ်နေစဉ် ဝမ်းနည်းခြင်း၊ ဒေါသထွက်ခြင်း သို့မဟုတ် ကြောက်ရွံ့ခြင်းတို့ ခံစားရခြင်းသည် ပုံမှန်ဖြစ်သည်။
- အဖြစ်များသော တုံ့ပြန်မှုများတွင် ဆုတ်ယုတ်ခြင်း၊ ရန်လိုခြင်းနှင့် ဆုတ်ခွာခြင်းတို့ ပါဝင်သည်။
- သင့်ကလေးသည် အချစ်ခံရသည်၊ အားပေးခံရသည်၊ အဆင်သင့်ဖြစ်ပါက သူတို့၏ခံစားချက်များကိုမျှဝေရန်အတွက် လုံခြုံသည်ဟု ခံစားရစေရန် ကူညီပေးပါ။
- သူ၏အသက်အရွယ်နှင့် သင့်တော်သောအဆင့်အလိုက် မေးခွန်းများကို ရိုးရိုးသားသား ဖြေပေးပါ။
- သူ၏ခံစားချက်များကိုစီမံရန် အပြုသဘောဆောင်သောနည်းလမ်းများကို ရှာဖွေရာတွင် ကူညီပေးပါ။
- သူ၏အပြုအမူအတွက် တသမတ်တည်းဖြစ်သော ကန့်သတ်ချက်များ သတ်မှတ်ပါ။
- သူ၏ ထိန်းချုပ်မှု၊ ချိတ်ဆက်မှုတို့နှင့်ပတ်သက်ပြီး အသိတစ်ခုပြန်လည်ရယူရာတွင် ကူညီပေးပါ။
—
ပြန်လည်သုံးသပ်သည့်ရက်စွဲ- ဇွန်လ၊ 2022 ခုနှစ်
