ကျောက်ကပ်အကျိတ်များ

Wilms အကျိတ်၏ ရောဂါလက္ခဏာများ

Wilms အကျိတ်၏ ယေဘုယျ ရောဂါလက္ခဏာများတွင် ပါဝင်သည်မှာ-

• ဝမ်းဗိုက်ထဲတွင် အဖုအကျိတ်ဖြစ်ခြင်း သို့မဟုတ် ရောင်ရမ်းခြင်း
• ဆီးထဲသွေးပါခြင်း
• ဝမ်းဗိုက် နာကျင်ခြင်း
• သွေးတိုးခြင်း
• ဖျားခြင်း 
• ခံတွင်းပျက်ခြင်း
• ကိုယ်အလေးချိန် ကျဆင်းခြင်း
• ဝမ်းချုပ်ခြင်း
• နုံးခွေခြင်း
• အလွန်အမင်း ရေဆာခြင်း
• ပျို့အန်ခြင်း

အချို့သော ကလေးများသည် Wilms အကျိတ်ရှိကြောင်း ရှာဖွေမတွေ့ရှိခင် လအနည်းငယ်ကြာအောင် ဝမ်းချုပ်ခြင်းအတွက် ကုသမှုကို ခံယူရနိုင်ပါသည်။

Wilms အကျိတ်  အတွက် အန္တရာယ်ရှိသော အချက်များ

များသောအားဖြင့် Wilms အကျိတ်ဖြစ်ပွားရသည့် အကြောင်းရင်းကို ရှင်းရှင်းလင်းလင်း မသိရပါ။

• ယောက်ျားလေးနှင့် မိန်းကလေး ဖြစ်ပွားမှုနှုန်း တူညီပါသည်။
• ရောဂါရှာဖွေတွေ့ရှိရာတွင် မိန်းကလေးများသည် ကျောက်ကပ်နှစ်ခုစလုံးတွင် ဖြစ်နိုင်ခြေပိုများပါသည်။
• လူဖြူကလေးများထက် လူမည်းကလေးများတွင် ပို၍အဖြစ်များသည်။
• အာရှလူဦးရေတွင် အဖြစ်များလေ့မရှိပါ။
• Wilms အကျိတ်ရှိသော လူနာများ၏ 10% ခန့်တွင် အန္တရာယ်ပိုများစေသည့် မျိုးရိုးလိုက်သော အခြေအနေများရှိကြပါသည်။ ၎င်းတို့တွင် ပါဝင်သည်များမှာ-
  • WAGR ရောဂါလက္ခဏာစု
  • Denys-Drash ရောဂါလက္ခဏာစု
  • ကြီးထွားမှုလွန်ကဲသော ရောဂါလက္ခဏာစုများ(Beckwith-Wiedemann ရောဂါလက္ခဏာစု ကဲ့သို့)

Wilms အကျိတ်ကိုကုသခြင်း

သင့်ကလေး၏ ကုသရေး အဖွဲ့သည် သင့်ကလေးတွင် Wilms အကျိတ်ရှိသည်ဟု သံသယရှိပါက ၎င်းတို့သည် များသောအားဖြင့် ကျောက်ကပ်ကို ခွဲစိတ်ဖယ်ရှားပါလိမ့်မည်။

ကျောက်ကပ် 1 ခုတည်းတွင်သာ အကျိတ်ရှိလျှင် ထိုကျောက်ကပ်တစ်ခုလုံးကို ဖယ်ရှားလေ့ရှိပါသည်။ လူများသည် ကျောက်ကပ် 1 လုံးတည်းနှင့်လည်း ပုံမှန်အတိုင်း ကျန်းကျန်းမာမာ ရှင်သန်နေထိုင်ပါသည်။

ရောဂါရှာဖွေတွေ့ရှိချိန် သင့်ကလေး၏ ကျောက်ကပ်အကျိတ်ကို မဖယ်ရှားနိုင်ပါက သို့မဟုတ် ကျောက်ကပ်နှစ်ခုစလုံးတွင် အကျိတ်များ ရှိနေပါက ခွဲစိတ်မှုမပြုခင် သင့်ကလေးကို ကီမိုဆေးသွင်းပေးပါမည်။

သင့်ကလေးတွင် ကျောက်ကပ်နှစ်ခုစလုံး၌ Wilms အကျိတ်ရှိနေပါက ကျောက်ကပ်တစ်ခုစီ၏ တစ်စိတ်တစ်ပိုင်းကိုသာလျှင် ခွဲစိတ်ဖယ်ရှားနိုင်ပါမည်။ ခွဲစိတ်ပြီးနောက် ၎င်းတို့ကို နောက်ထပ် ကီမိုဆေးသွင်းပေးပါမည်။

သင့်ကလေး၏ အခြေအနေအပေါ်မူတည်၍ ကုသမှုတွင် ဓာတ်ရောင်ခြည်ကုထုံးလည်း ပါဝင်နိုင်ပါသည်။

သတ်မှတ်ချက်ပြည့်မီသော လူနာများသည် လက်တွေ့စမ်းသပ်မှု တွင် ပါဝင်ရန်လည်း စဉ်းစားနိုင်သည်။

Wilms အကျိတ်အတွက် ပြန်ကောင်းနိုင်ခြေနှင့် ရှင်သန်မှုနှုန်း ခန့်မှန်းချက်

ယေဘုယျအားဖြင့် Wilms Tumor သည် ကုသပျောက်ကင်းနိုင်သည့်ရောဂါ ဖြစ်ပါသည်။  ဆဲလ်တစ်ရှူးစမ်းသပ်လေ့လာချက် အရ ပြင်းထန်မှုနည်းသော Wilms အကျိတ်ရှိသည့် လူနာများ၏ ငါးနှစ်ကြာ ရှင်သန်မှုနှုန်းမှာ 90% အထက်ရှိပါသည်။

ပြန်ကောင်းနိုင်ခြေနှင့် ရှင်သန်မှုနှုန်း ခန့်မှန်းချက်သည် အောက်ပါတို့အပေါ်တွင် မူတည်ပါသည်-

• ရောဂါရှာဖွေတွေ့ရှိသည့် အသက်အရွယ်။ အသက် 10 နှစ် မတိုင်မီ ရောဂါရှာဖွေတွေ့ရှိသည့် လူနာများတွင် များသောအားဖြင့် ပိုကောင်းသော ပြန်ကောင်းနိုင်ခြေနှင့် ရှင်သန်မှုနှုန်း ခန့်မှန်းချက်ရှိသည်။
• ရောဂါရှာဖွေတွေ့ရှိစဉ် ကင်ဆာရောဂါ၏အဆင့်
• ရောဂါဖြစ်ပွားမှုနှင့်ပတ်သက်သော စစ်ဆေးမှု (အဏုကြည့်မှန်ဘီလူးမှမြင်ရသော ဆဲလ်များပုံစံ) နှင့်/သို့မဟုတ် အကျိတ်၏မော်လီကျူးလက္ခဏာများ။ ဆက်လက်ပျံ့ပွားကြီးထွားခြင်းမရှိသော ဆဲလ်များ သို့မဟုတ် ဆက်လက်ပျံ့ပွားကြီးထွားသော ဆဲလ်များဟူ၍ ခွဲခြားနိုင်ပါသည်။
  • (anaplasia ဟုလည်း သိရှိကြသည့်)ဆက်လက်ပျံ့ပွားကြီးထွားသော ဆဲလ်တစ်ရှူး စမ်းသပ်လေ့လာချက် ဆိုသည်မှာ ပုံမှန်ဆဲလ်များထက် လျင်မြန်စွာ ကွဲထွက်ပြီး အလွန်ကွဲပြားပုံပေါ်သည့် ကင်ဆာဆဲလ်များစွာရှိနေခြင်းဖြစ်သည်။ ဤဆဲလ်များကို ကုသရန် ပို၍ခက်ခဲပြီး ၎င်းတို့သည် အသက်ရှင်သန်မှုနှုန်း နည်းပါးခြင်းနှင့် ဆက်နွှယ်လျက်ရှိသည်။ ၎င်းတို့သည် နေရာတစ်ခုတည်း (ဆုံချက်) တွင် ဖြစ်နိုင်သည် သို့မဟုတ် အကျိတ်တစ်လျှောက် ပျံ့နှံ့ (ပြန့်ကြဲ) နိုင်ပါသည်။
• မျိုးဗီဇအကြောင်းအရင်းများနှင့် အကျိတ်မော်လီကျူးအမှတ်အသားများ
• ကင်ဆာရောဂါ ပြန်လည်ဖြစ်ပွားခြင်းရှိ၊ မရှိ

သင့်ကလေး၏ ဆရာဝန်သည်  သင့်ကလေး၏ ကျန်းမာရေးကိစ္စ  နှင့်ပတ်သက်သည့် အကောင်းဆုံး အချက်အလက်ပေးနိုင်သူဖြစ်သည်။

ကျောက်ကပ်ဆဲလ် ကင်ဆာကျိတ်

ကျောက်ကပ်ဆဲလ်ကင်ဆာ၏ လက္ခဏာများ

RCC ၏ ယေဘုယျလက္ခဏာများတွင် အောက်ပါတို့ ပါဝင်ပါသည်-

• ဝမ်းဗိုက်ထဲတွင် အဖုအကျိတ်ဖြစ်ခြင်း သို့မဟုတ် ရောင်ရမ်းခြင်း
• ဆီးထဲသွေးပါခြင်း
• ဝမ်းဗိုက် နာကျင်ခြင်း

အခြား လက္ခဏာများတွင် အောက်ပါတို့ ပါဝင်နိုင်ပါသည်-

• သွေးတိုးခြင်း
• ဖျားခြင်း
• ခံတွင်းပျက်ခြင်း
• ကိုယ်အလေးချိန် ကျဆင်းခြင်း
• ဝမ်းချုပ်ခြင်း

ကျောက်ကပ်ဆဲလ်ကင်ဆာဖြစ်စေသည့် အန္တရာယ် အကြောင်းရင်းများ

မျိုးရိုးလိုက်သော အခြေအနေအချို့သည် ကလေးများတွင် ကျောက်ကပ်ဆဲလ် ကင်ဆာ ဖြစ်နိုင်ခြေကို ပိုများစေသည်။ ၎င်းတို့တွင် ပါဝင်သည်များမှာ-

• ကိုယ်တွင်းအင်္ဂါများတွင် အကျိတ်များဖြစ်ပေါ်လာခြင်းနှင့်ဆက်နွယ်သည့် မျိုးရိုးလိုက် ရောဂါ (Von Hippel-Lindau disease)
• ရှားပါးမျိုးရိုးဗီဇ ရောဂါ (Tuberous sclerosis)
• မျိုးရိုးလိုက်သော အရေပြားနှင့် သားအိမ်တွင် အဖုအကျိတ်များဖြစ်ခြင်း (leiomyomatosis) နှင့် ကျောက်ကပ်ဆဲလ် ကင်ဆာ ရောဂါလက္ခဏာစု (HLRCC)
• အခြားမျိုးရိုးဗီဇပြောင်းလဲမှုများသည် မိသားစုမျိုးရိုးလိုက်ခြင်းဖြစ်သည်

ပျံ့ပွားမြန်သော ရှားပါးကျောက်ကပ်ကင်ဆာ (Renal medullary carcinoma) သည် မွေးရာပါ သွေးနီဥဆဲလ် မူမမှန်သော သွေးအားနည်းရောဂါနှင့် ဆက်နွှယ်နိုင်သည့် ရှားပါး ကျောက်ကပ်ဆဲလ်ကင်ဆာတစ်မျိုးဖြစ်သည်။

ကလေးကင်ဆာရောဂါများကို ဓာတ်ရောင်ခြည်ကုထုံး သို့မဟုတ် ဓာတုဆေးသွင်းကုထုံးဖြင့် ယခင်ကကုသထားဖူးခြင်းသည် ကျောက်ကပ်အကျိတ်များ၊ အထူးသဖြင့် ကျောက်ကပ်ဆဲလ်ကင်ဆာဖြစ်ပွားစေနိုင်သည့် အန္တရာယ် အကြောင်းရင်းတစ်ခုဖြစ်ပါသည်။

ကျောက်ကပ်ဆဲလ် ကင်ဆာကုသမှု

ကျောက်ကပ်နှင့် ကင်ဆာဆဲလ်ပျံ့နေသည့် ပြန်ရည်ကျိတ်များကိုဖယ်ရှားရန် ခွဲစိတ်ခြင်းသည် ကျောက်ဆဲလ်ကင်ဆာအတွက် အဓိကကုသမှုဖြစ်ပါသည်။

RCC သည် ဓာတ်ရောင်ခြည်ကုထုံး သို့မဟုတ် ဓာတုဆေးသွင်းကုထုံးကို ကောင်းစွာ မတုံ့ပြန်ပါ။ ဤကင်ဆာရောဂါအတွက် ဓာတုဆေးသွင်းကုထုံး သို့မဟုတ် ဓာတ်ရောင်ခြည်ကုထုံးကို အသုံးပြုလေ့မရှိပါ။

အကျိတ်ငယ်များကို ကင်ဆာဆဲလ်များ လောင်ကျွမ်းစေခြင်း သို့မဟုတ် အေးခဲစေခြင်းဖြင့် ဖျက်ဆီးပစ်သည့် ကုထုံးဖြင့် ကုသနိုင်သည်။

ပျံ့ပွား RCC ဝေဒနာရှင်များ သို့မဟုတ် ပစ်မှတ်ထားကုသနိုင်သည့် ကင်ဆာအကျိတ်ရှိပြီး ခွဲစိတ်ခြင်းဖြင့် လုံးလုံး ခွဲထုတ်၍မရသော RCC ဝေဒနာရှင်များအတွက် ကိုယ်ခံအားကုထုံးကို အသုံးပြုနိုင်သည်။ 

အချို့သော ပစ်မှတ်ထားကုထုံးများကိုလည်း ပျံ့ပွား RCC ခံစားနေရသော လူကြီးများတွင် အသုံးပြုခဲ့သော်လည်း ကလေးများတွင် ကျယ်ကျယ်ပြန့်ပြန့် မလေ့လာရသေးပါ။

သတ်မှတ်ချက်ပြည့်မီသော လူနာများသည်  လက်တွေ့ကုသ စမ်းသပ်မှုတွင် ပါဝင်ရန် စဉ်းစားနိုင်ပါသည်။

ကျောက်ကပ်ဆဲလ်ကင်ဆာအတွက် ခန့်မှန်းချက်

ကျောက်ကပ်ဆဲလ်ကင်ဆာရှိသော လူနာများအတွက် ပျောက်ကင်းနိုင်ခြေသည် အောက်ပါတို့အပေါ်တွင် မူတည်သည်-

• ရောဂါတွေ့ရှိချိန်တွင် ကင်ဆာအဆင့်-
  • အဆင့် 1- 90%
  • အဆင့် 2- 80%
  • အဆင့် 3- 70%
  • အဆင့် 4- 15%
• ခွဲစိတ်မှုက အကျိတ်ကို လုံးဝဖယ်ရှားနိုင်ခြင်းရှိမရှိ
• ကင်ဆာ ပြန်ဖြစ်မဖြစ် (ပြန်ပေါ်ခြင်းရှိ၊ မရှိ)
• သင့်ကလေး၏ ဆရာဝန်သည် သင့်ကလေး၏ ရောဂါနှင့်ပတ်သက်သည့်  အချက်အလက်များကို မေးမြန်းရန် အသင့်တော်ဆုံးပုဂ္ဂိုလ်ဖြစ်သည်။

အန္တရာယ်ရှိကြွက်သားစင်း (Rhabdoid) ကျောက်ကပ်အကျိတ်

အန္တရာယ်ရှိ ကြွက်သားစင်း (Rhabdoid) အကျိတ် (MRT) သည် ငယ်ရွယ်သော ကလေးများနှင့် နို့စို့ကလေးများတွင် အဖြစ်များဆုံးဖြစ်သည်။ ဤအကျိတ်များကို များသောအားဖြင့် ရောဂါအဆင့် ပြင်းထန်လာမှု မရှိမချင်း စစ်ဆေးတွေ့ရှိရခြင်း မရှိနိုင်ပါ။

ကြွက်သားစင်း (Rhabdoid) ကျောက်ကပ်အကျိတ်သည် ဦးနှောက်နှင့် အဆုတ်များဆီသို့ ပျံ့နှံ့နိုင်ပါသည်။

ရံဖန်ရံခါတွင် ကြွက်သားစင်း (Rhabdoid) ကျောက်ကပ်အကျိတ်သည်  ဦးနှောက်တစ်ရှူးများတွင် ကင်ဆာဆဲလ်များဖြစ်ပေါ်လာသည့် ကြွက်သားစင်း (Rhabdoid) အကျိတ်ဟုခေါ်သော ဦးနှောက် အကျိတ်အဖြစ် တစ်ချိန်တည်းတွင် ဖြစ်ပေါ်လာမည်ဖြစ်သည်။

ကြွက်သားစင်း (Rhabdoid) အကျိတ်များတွင် မျိုးရိုးဗီဇ ပြောင်းလဲမှု အဖြစ်များသည်။ မျိုးရိုးဗီဇ စစ်ဆေးခြင်းသည် ရောဂါရှာဖွေတွေ့ရှိပြီးနောက် သင့်မိသားစုအတွက် ရွေးချယ်စရာတစ်ခု ဖြစ်နိုင်ပါသည်။

ကလေးများတွင် ၎င်းတို့၏ ခန္ဓာကိုယ်ထဲရှိ ဆဲလ်တိုင်း၌ ဤပြောင်းလဲမှု ရှိနိုင်ပါသည်။

သင့်ကလေးတွင် ကြွက်သားစင်း (Rhabdoid) အကျိတ်ရှိပါက သင်သည် မျိုးရိုးဗီဇ အကြံပေးနှင့် တွေ့ဆုံနိုင်ပြီး ထိုအကျိတ်များ ကြီးထွားလာစေနိုင်သည့် မျိုးဗီဇ ပြောင်းလဲခြင်းများ ဖြစ်လာနိုင်ခြေရှိ၊ မရှိကို သိရှိရန် အကျိတ်နှင့် ကျန်းမာသော ဆဲလ်နှစ်မျိုးလုံးကို စစ်ဆေးကြည့်ရန် ဆွေးနွေးနိုင်ပါသည်။

MRT သည် ခွဲစိတ်မှု လိုအပ်ပါသည်။ ဓာတုဆေးသွင်းကုထုံး ဆေးများကို အသုံးပြုနိုင်ပါသည်။ အချို့သောလူနာများတွင် ဓာတ်ရောင်ခြည်ကုထုံးကိုလည်း အသုံးပြုနိုင်ပါသည်။ သို့သော် ခွဲစိတ်မှုသည် အဓိက ကုသမှုဖြစ်သည်။ သုတေသီများသည် လက်တွေ့ကုသ စမ်းသပ်မှုများမှတစ်ဆင့် အခြားရွေးချယ်စရာများကို အနီးကပ်စောင့်ကြည့်လျက်ရှိပါသည်။

ကြွက်သားစင်း (Rhabdoid) အကျိတ်များရှိသည့် အသက်ကြီးသော လူနာများသည် ကျန်းမာရေး ပြန်လည်ကောင်းမွန်နိုင်ခြေ ပိုများနိုင်သည်။ MRT ရှိသည့် ကလေးများအတွက် ယေဘုယျ အသက်ရှင်နိုင်ခြေနှုန်းသည် 50% အောက်ဖြစ်သည်။ ခန္ဓာကိုယ်အနှံ့ရောဂါ ပျံ့နှံ့နေသော ကလေးများသည် ရေရှည်တွင် ကျန်းမာရေးအခြေအနေ ဆိုးရွားလာနိုင်သည်ဟု သုံးသပ်ထားသည်။

သင့်ကလေး၏ ဆရာဝန်သည် သင့်ကလေး၏ ရောဂါနှင့်ပတ်သက်သည့်  အချက်အလက်များကို မေးမြန်းရန် အသင့်တော်ဆုံးပုဂ္ဂိုလ်ဖြစ်သည်။ 

ဆာကိုးမားဆဲလ်အကြည် ကျောက်ကပ်ကင်ဆာ

ကြည်လင်ဆဲလ် ကျောက်ကပ်ဆာကိုးမားကင်ဆာ (CCSK) သည် အလွန်ရှားပါသည်။ ၎င်းသည် ကလေး ကျောက်ကပ် အကျိတ်များဖြစ်ပွားမှုအနက် 3% အောက်မျှပင်ရှိသည်။ နှစ်စဉ် အမေရိကန်ပြည်ထောင်စုတွင် ကြည်လင်ဆဲလ် ဆာကိုးမား (clear cell sarcoma) ကင်ဆာရောဂါ စစ်ဆေးတွေ့ရှိသည့် ကလေးပေါင်း 20 ခန့်သာ ရှိပါသည်။

အသက် 1–4 နှစ်အရွယ် ကလေးများတွင် အတွေ့ရအများဆုံးဖြစ်သည်။ ယောက်ျားလေးများတွင် ပို၍အဖြစ်များသည်။

အခြားကျောက်ကပ်အကျိတ်များနှင့် နှိုင်းယှဉ်သည့်အခါ CCSK သည် အရိုးတွင်းသို့ ပိုမိုပျံ့နှံ့နိုင်ခြေရှိသည်။ သို့သော် ရောဂါစစ်ဆေးတွေ့ရှိချိန်တွင် လူနာများ၏ 5% အောက်တွင်သာ ကင်ဆာပျံ့နှံ့မှု ဖြစ်ပွားသည်။

ရောဂါပျံ့နှံ့မှု အများဆုံးနေရာများတွင် အောက်ပါတို့ ပါဝင်ပါသည်-

• အဆုတ်
• အရိုးတွင်း
• ဦးနှောက်
• တစ်ရှူးပျော့

CCSK ကုသမှုတွင် ကျောက်ကပ်ထုတ်ရန် ခွဲစိတ်ခြင်း ပါဝင်ပါသည်။ ခွဲစိတ်ပြီးနောက် ကုသမှုတွင် ဓာတုဆေးသွင်းကုထုံးနှင့် ဓာတ်ရောင်ခြည်ကုထုံးတို့လည်း ပါဝင်နိုင်ပါသည်။ နောင်အနာဂတ်တွင် ပစ်မှတ်ထားသည့် ကုထုံးများကဲ့သို့ အခြားကုသမှု နည်းလမ်းများကို ရွေးချယ်ကောင်း ရွေးချယ်နိုင်ပါသည်။

CCSK အတွက် ကုသမှုခံယူထားသော ကလေးများသည် နောက်ပိုင်းဘဝတွင် အကျိတ်ပြန်ဖြစ်လာနိုင်ခြေရှိပါသည်။ ရောဂါပြန်အဖြစ်အများဆုံး နေရာများမှာ ဦးနှောက်တွင် အဆုတ်များတွင် ဖြစ်သည်။

ရောဂါတွေ့ရှိချိန်တွင် အသက်ငယ်ရွယ်ခြင်းနှင့် ရောဂါပြင်းထန်နေခြင်းသည် ကုသမှုတွင် အားရစရာမရှိသော ရလဒ်များ ထွက်လာစေနိုင်သည်။ သင့်ကလေး၏ ဆရာဝန်သည် သင့်ကလေး၏ ရောဂါနှင့်ပတ်သက်သည့်  အချက်အလက်များကို မေးမြန်းရန် အသင့်တော်ဆုံးပုဂ္ဂိုလ်ဖြစ်သည်။

ရှားပါး ကလေးကျောက်ကပ်အကျိတ် သို့မဟုတ် မွေးရာပါ ကျောက်ကပ်အကျိတ်

ရှားပါး ကလေးကျောက်ကပ်အကျိတ်သည် မွေးကင်းစကလေးများနှင့် နို့စို့ကလေးများတွင် အဖြစ်များဆုံးဖြစ်သည်။ အဓိက ရောဂါလက္ခဏာမှာ ဝမ်းဗိုက်အတွင်း အလုံး သို့မဟုတ် အကျိတ်ဖြစ်လာခြင်းဖြစ်သည်။

လူနာများ၏ 90% ခန့်သည် အသက် 1 နှစ်မပြည့်မီ ရောဂါကို စစ်ဆေးတွေ့ရှိသည်။ ယောက်ျားလေးများတွင် ပိုအဖြစ်များပါသည်။ တစ်ခါတစ်ရံ ကလေးမမွေးဖွားမီ ကိုယ်ဝန်အာထရာဆောင်း ရိုက်ချိန်တွင် ရောဂါကို တွေ့ရှိတတ်သည်။

ရှားပါး ကလေးကျောက်ကပ်အကျိတ်ရှိသော လူနာများတွင် အသက်ပိုငယ်လေ (3 လအောက်) ကုသမှုရလဒ် ပိုကောင်းလေဖြစ်သည်။

ရှားပါး ကလေးကျောက်ကပ်အကျိတ်ဆိုင်ရာ အဓိက အမျိုးအစား 2 မျိုးရှိသည်-

• ရိုးရိုး ရှားပါး ကလေးကျောက်ကပ်အကျိတ် - ကလေးမမွေးမီ သို့မဟုတ် အသက် 3 လ မတိုင်မီ ရောဂါကို ရှာဖွေတွေ့ရှိသည်။
• ဆဲလ်လူလာ ရှားပါး ကလေးကျောက်ကပ်အကျိတ် - မျိုးရိုးဗီဇ မူမမှန်လွဲမှားခြင်းနှင့် ဆက်စပ်သည်။ ၎င်းတွင် ရောဂါပြန်ဖြစ်နိုင်ခြေပိုများပါသည်။

ကျောက်ကပ်ကိုထုတ်ရန် ခွဲစိတ်ခြင်းသည် အဓိက ကုသမှုဖြစ်ပါသည်။ အချို့လူနာများတွင် ဓာတုဆေးသွင်းကုထုံးကိုလည်း အသုံးပြုနိုင်ပါသည်။ 

မျိုးဗီဇအကြောင်းရင်းများနှင့်ဆိုင်သည့် အကျိတ်များအတွက် ပစ်မှတ်ထားကုထုံးများကို လက်တွေ့ကုသ စမ်းသပ်မှုများတွင် လေ့လာနေဆဲဖြစ်ပါသည်။

ရှားပါး ကလေးကျောက်ကပ်အကျိတ်အတွက် အသက်ရှင်နိုင်ခြေနှုန်းသည် 95% ကျော်ပါသည်။ သင့်ကလေး၏ ဆရာဝန်သည် သင့်ကလေး၏ ရောဂါနှင့်ပတ်သက်သည့်  အချက်အလက်များကို မေးမြန်းရန် အသင့်တော်ဆုံးပုဂ္ဂိုလ်ဖြစ်သည်။