ကြိုဆိုပါသည်

Together သည် - လူနာများနှင့် မိဘများ၊ မိသားစုဝင်များနှင့် သူငယ်ချင်းများအပါအဝင် - ကလေးကင်ဆာကြောင့် ထိခိုက်မှုရှိသူတိုင်းအတွက် ရင်းမြစ်အသစ်တစ်ခု ဖြစ်ပါသည်။

ပိုမိုလေ့လာရန်

အသည်းကင်ဆာ

အသည်းကင်ဆာဆိုတာ ဘာလဲ။

အသည်းကင်ဆာကို ကလေးများနှင့် ဆယ်ကျော်သက်များတွင် တွေ့ရခဲသည်။ ၎င်းသည် ကလေးသူငယ် ကင်ဆာများ၏ ၁ မှ ၂ % တွင် တွေ့ရသည်။ ကလေးသူငယ်တွင်ဖြစ်ပွားသည့် အသည်းကင်ဆာအမျိုးအစားများတွင် ကလေးများတွင် အဖြစ်များသည့် အသည်းကင်ဆာ၊ အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာ၊ သန္ဓေသားလောင်း၏ အသည်းဖြစ်လာရမည့်ဆဲလ်များမှ အသည်းအဆင့်သို့ မဖွံဖြိုးလာဘဲ ကင်ဆာဖြစ်သွားသော ရှားပါးဆာကိုမာ အသည်းကင်ဆာတို့ပါဝင်သည်။  

  • ကလေးများတွင် အဖြစ်များသည့်အသည်းကင်ဆာ (HB) သည် မွေးကင်းစနှင့် အသက် ၃ နှစ်အောက်ကလေးငယ်များတွင် အများအားဖြင့်တွေ့ရသည့်ကင်ဆာအမျိုးအစား ဖြစ်သည်။ ၎င်းသည် အဖြစ်အများဆုံး ကလေး အသည်းကင်ဆာဖြစ်သည်။
  • အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာ (HCC) သည် ကလေးကြီးများနှင့် ဆယ်ကျော်သက်များတွင် ဖြစ်တတ်သည်။ ကလေးငယ်များတွင် အလွန်ဖြစ်ခဲသည်။ အသက် ၁၂ နှစ် − ၁၄ နှစ်အရွယ်ကလေးများတွင် အများအားဖြင့် တွေ့ရတတ်သည်။
  • သန္ဓေသားလောင်း၏ အသည်းဖြစ်လာရမည့်ဆဲလ်များမှ အသည်းအဆင့်သို့ မဖွံဖြိုးလာဘဲ ကင်ဆာဖြစ်သွားသော ရှားပါးဆာကိုမာ အသည်းကင်ဆာ (UES) သည် ဖြစ်ခဲသည့် အသည်းကင်ဆာဖြစ်ပြီး အသက် ၆ နှစ် − ၁၀ နှစ်ကြားအရွယ် ကလေးများတွင် အများအားဖြင့် တွေ့ရတတ်သည်။ ကလေးများတွင် အဖြစ်များသည့်အသည်းကင်ဆာနှင့် အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာပြီးနောက် တတိယအဖြစ်အများဆုံး ကလေးအသည်းကင်ဆာ အမျိုးအစားဖြစ်သည်။ ကလေး အသည်းကင်ဆာ၏ ၁၅% မှာ ၎င်းရောဂါဖြစ်သည်။

UES တွင်၊ သွေးရည်ကြည် AFP သည် အများအားဖြင့် ပုံမှန်သာဖြစ်သည်။ ၎င်းကင်ဆာအကျိတ်သည် ကင်ဆာဆေးသွင်းကုသခြင်းကို ပုံမှန်အားဖြင့် တုံ့ပြန်လေ့ရှိသည်။ သို့သော် ပျောက်ကင်းရန်အတွက် ခွဲစိတ်ဖယ်ရှားရန် လိုအပ်သေးသည်။

အသည်းသည်ဝမ်းဗိုက် ညာဖက်ထောင့်အပေါ်တွင်ရှိသည့် ကြီးမားသည့် အင်္ဂါအစိတ်အပိုင်းတစ်ခုဖြစ်သည်။ ၄င်းတွင် အရေးကြီးသည့်လုပ်ဆောင်ချက် အမျိုးမျိုးရှိသည်။ အသည်းသည် သွေးတွင်းရှိအညစ်အကြေးများ ရှင်းလင်းပေးခြင်း၊ သည်းခြေရည်ထုတ်၍ အစာခြေရာတွင် ကူညီခြင်းနှင့် ခန္ဓာကိုယ်အတွက် လိုအပ်သည့် စွမ်းအင်များ သိုလှောင်ပေးခြင်းတို့ ဆောင်ရွက်သည်။ အသည်းအသားစထဲတွင် ကင်ဆာဆဲလ်များကြောင့် ကင်ဆာအကျိတ်များ ဖြစ်ပေါ်လာသည့်အခါ အသည်းကင်ဆာဖြစ်ပွားသည်။

အသည်းကင်ဆာအား အဓိကအားဖြင့် ခွဲစိတ်ကုသသည်။ ခွဲစိတ်ကုသခြင်း၏ ရည်ရွယ်ချက်မှာ အသည်းအတွင်းရှိ ကင်ဆာအကျိတ်ကို တတ်နိုင်သမျှ ခွဲစိတ်ဖယ်ရှားရန်ဖြစ်သည်။ ကင်ဆာအကျိတ်များလုံးဝဖယ်ရှားပြီးသည့် လူနာများသည် ပျောက်ကင်းအောင် ကုသနိုင်သည့်အခွင့်အရေးကောင်းရှိသည်။

အသည်းကင်ဆာ အကျိတ်အား ခွဲစိတ်ကုသခြင်း မပြုမီ ကျုံ့သွားအောင် သို့မဟုတ် ခွဲစိတ်ပြီးနောက် ကင်ဆာဆဲလ်များ ရပ်တန့်သွားအောင် သို့မဟုတ် ကြီးထွားနှုန်း နှေးသွားအောင် ကင်ဆာဆေးသွင်းကုသခြင်းကုထုံးကို အသုံးပြုနိုင်ပါသည်။ အသည်းကင်ဆာဝေဒနာခံစားရပါက အသက်ရှင်နိုင်စွမ်းသည် ကင်ဆာအကျိတ်အား ဖယ်ရှား၍ ရနိုင်၊ မနိုင်အပေါ်မူတည်ပြီးကင်ဆာရောဂါကိုအသည်းအပြင်ဖက်အား ပျံ့နှံ့သွားခြင်း ရှိ၊ မရှိအပေါ်လည်း မူတည်သည်။

လမ်းလျှောက်တတ်ခါစ ကလေးငယ်တစ်ဦး၏ ခန္ဓာကိုယ် အစိတ်အပိုင်းများနှင့် အသည်းအား ဖော်ပြ၊ စာတန်းထိုးထားသည့်ပုံ

အသည်းသည် ဝမ်းဗိုက် ညာဖက်ထောင့်အပေါ်တွင်ရှိပြီး ကြီးမားသည့် အင်္ဂါအစိတ်အပိုင်းတစ်ခုဖြစ်သည်။ အသည်းသည် သွေးတွင်းရှိအညစ်အကြေးများ ရှင်းလင်းပေးခြင်း၊ သည်းခြေရည်ထုတ်၍ အစာခြေရာတွင် ကူညီခြင်းနှင့် ခန္ဓာကိုယ်အတွက် လိုအပ်သည့် စွမ်းအင်များ သိုလှောင်ပေးခြင်းတို့ ဆောင်ရွက်သည်။

အသည်းကင်ဆာရောဂါ ရှေ့ပြေးလက္ခဏာများနှင့်ရောဂါလက္ခဏာများ

အသည်းကင်ဆာရောဂါ ရှေ့ပြေးလက္ခဏာများနှင့် ရောဂါလက္ခဏာများသည် ကင်ဆာအကျိတ် အရွယ်အစားနှင့် ၎င်းကင်ဆာသည် အသည်းအပြင်ဖက်အား ပျံ့နှံ့သွားခြင်း ရှိ၊ မရှိအပေါ် မူတည်သည်။ အသည်းကင်ဆာရောဂါလက္ခဏာများမှာ-

  • မကြာခဏဆိုသလို လက္ခဏာမပြဘဲ ဝမ်းဗိုက် (ရင်ခေါင်းအောက်) တွင် အစိုင်အခဲတည်ခြင်း သို့မဟုတ် ဖူးရောင်ခြင်း
  • ဝမ်းဗိုက်ပိုင်း သို့မဟုတ် ကျောဘက်တွင် နာကျင်ကိုက်ခဲခြင်း
  • စားချင်စိတ်မရှိခြင်း
  • ကိုယ်အလေးချိန်ချခြင်း
  • အရေပြားယားယံခြင်း
  • မျက်လုံး နှင့်/သို့မဟုတ် အရေပြား အဝါရောင်ဖြစ်ခြင်း (အသားဝါခြင်း)
  • နှုတ်ခမ်းနှင့် အရေပြားဖြူဖျော့နေခြင်း (သွေးအားနည်းရောဂါဖြစ်နိုင်ခြင်း)
  • ပျို့ခြင်းနှင့် အန်ခြင်း
  • အဖျား

ကလေးများတွင် အဖြစ်များသောအသည်းကင်ဆာသည် ၎င်း၏ ကင်ဆာအကျိတ်မှ ဟော်မုန်း ထုတ်လွှတ်သည့်အတွက် စောစီးစွာ အရွယ်ရောက်ခြင်း လက္ခဏာများ (ပုံမှန်ထက်စော၍ အရွယ်ရောက်ခြင်း)နှင့် ဆက်စပ်နိုင်ပါသည်။

အသည်းကင်ဆာ ရောဂါရှာဖွေခြင်း

ဆရာဝန်များသည် အသည်းကင်ဆာအကျိတ် ရှိ၊ မရှိ သိရှိနိုင်စေရန် စမ်းသပ်မှုအမျိုးမျိုးပြုလုပ်၍ ရောဂါရှာဖွေရသည်။ ဤစမ်းသပ်မှုများတွင် အောက်ပါအချက်များ ပါဝင်ပါသည်။

  • ရောဂါလက္ခဏာတွေနဲ့ပတ်သက်လို့ သိရှိဖို့ ကျန်းမာရေးမှတ်တမ်းနဲ့ ရုပ်ပိုင်းစစ်ဆေးမှု၊ ယေဘုယျကျန်းမာရေး၊ ယခင် ရောဂါဖြစ်ပွားမှုများနဲ့ ဖြစ်ပွားရတဲ့အကြောင်းအရင်းများ ဖြစ်ပါတယ်။ မျိုးရိုးလိုက်တဲ့အခြေအနေတစ်ခု ဟုတ်မဟုတ်ကို ဆုံးဖြတ်ဖို့ မိသားစုရာဇဝင်က အရေးကြီးပါတယ်။
  • သွေးနဲ့ဆီးကို အသုံးပြုတဲ့ ဓါတ်ခွဲလေ့လာမှုတွေမှာ-
    • သွေးနီဥဆဲလ်များသွေးဖြူဥဆဲလ်များနှင့် သွေးဥမွှားများအရေအတွက် ပြည့်စုံစွာစစ်ဆေးခြင်း၊ သွေးနီဥအတွင်းရှိ ဟေမိုဂလိုဘင်ဓာတ် ပမာဏစစ်ဆေးခြင်း၊ သွေးအတွင်း သွေးနီဥ အချိုးအစားပမာဏ စစ်ဆေးခြင်းတို့ဖြစ်သည်။
    • အသည်းလုပ်ဆောင်ချက်အား ကြည့်ရှုရန်နှင့် (အသည်းရောင်ရောဂါ) အသည်းရောင်ခြင်း သို့မဟုတ် ပိုးဝင်ခြင်း စမ်းသပ်စစ်ဆေးရန် အတွက် အခြားသွေးစစ်ခြင်းများကို ပြုလုပ်ပါသည်။ 
    • Alpha-fetoprotein (AFP) ပမာဏ မြင့်မားခြင်း ကို စစ်ဆေးသည်။ ကလေးများတွင် အဖြစ်များသောအသည်းကင်ဆာဖြစ်လျှင် ပုံမှန်အားဖြင့် AFP ပမာဏ မြင့်မားနေကြောင်း တွေ့ရတတ်သည်။ အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာဖြစ်ပွားနေသည့် လူနာများတွင်မူ AFP မြင့်နေတတ်သော်လည်း ထိုသို့ ဖြစ်ခဲသည်။ UES ဖြစ်နေသည့် ကလေးများတွင် AFP သည် အများအားဖြင့် ပုံမှန်ပမာဏသာဖြစ်သည်။
  • ကင်ဆာရှိ၊ မရှိ၊ ကင်ဆာအကျိတ် အရွယ်အစားနှင့် အဆုတ်ကဲ့သို့ အခြားအစိတ်အပိုင်းများသို့ ကင်ဆာပျံ့နှံ့နေခြင်း ရှိ၊ မရှိ ကြည့်ရှုရန် ပုံရိပ်ဖော်စစ်ဆေးခြင်းပြုလုပ်ပါသည်။ 
    • ကွန်ပျူတာဓါတ်မှတ်ရိုက်ခြင်း (CT Scan) သည် ခန္ဓာကိုယ်အတွင်းရှိ အစိတ်အပိုင်းများနှင့် တစ်ရှူးများကို ဓာတ်မှန်အသုံးပြု၍ ပုံရိပ်များဖန်တီးပါသည်။ 
    • သံလိုက်စက်ကွင်းဓါတ်မှန် (MRI)သည် ရေဒီယိုလှိုင်းများနှင့် သံလိုက်များ အားအသုံးပြု၍ ခန္ဓာကိုယ်ပုံအသေးစိတ်အား ပုံရိပ်ဖန်တီးပါသည်။
    • အာထရာဆောင်း သည် ခန္ဓာကိုယ်တွင်းရှိ အင်္ဂါများနှင့် တစ်ရှူးများ၏ ပုံရိပ်ကို ဖမ်းရန် အသံလှိုင်းများကို အသုံးပြုပါသည်။
  • အကျိတ်မှ အသားစယူပြီး ၎င်းဆဲလ်များအတွင်းတွင် ကင်ဆာရှိသည့် လက္ခဏာရှိ၊ မရှိစစ်ဆေးကာ တစ်ရှူးဗေဒ အားပို၍လေ့လာကြည့်ပါ။ ဆဲလ်များအား အဏုကြည့်မှန်ဘီလူးဖြင့်ကြည့်လျှင် မည်သို့ဖြစ်နေသည် ဆိုသည့်အပေါ် မူတည်၍ ရောဂါရှာဖွေခြင်းနှင့် ကုသရန် စီစဉ်ရခြင်းဖြစ်သည့်အတွက် ၎င်းရလဒ်သည်အရေးကြီးသည်။ အလွန်ငယ်ရွယ်ပြီး AFP မြင့်နေသည့် ကလေးငယ်အတွက် အသားစယူ၍ စစ်ဆေးခြင်း လိုအပ်လိမ့်မည်မဟုတ်။

အသည်းကင်ဆာကို အဆင့်ခွဲခြားခြင်း

ဆရာဝန်သည် အများအားဖြင့် လူနာအား မကုသခင် ကင်ဆာရှိသည့် အသည်းအကျိတ်အား အဆင့်ခွဲခြားပါသည်။ အဆိုပါ စနစ်အား မကုသမီရောဂါအခြေအနေစစ်ဆေးခြင်း(PRETEXT) ဟုခေါ်သည်။ အသည်း၏ မည်သည့်အပိုင်းများတွင် ကင်ဆာဖြစ်နေသည်အပေါ်မူတည်ပြီး PRETEXT အုပ်စု (I II III IV) ဟူ၍ ခွဲခြားသည်။ အုပ်စုမြင့်လေ၊ အသည်းတွင် ကင်ဆာအကျိတ်ဖြစ်နေသည့်အပိုင်း ပိုများလေဖြစ်သည်။ 

PRETEXT အုပ်စု အသည်းတွင်ဖြစ်နေသည့်အပိုင်း ပမာဏ
PRETEXT အုပ်စု I
 အသည်းအပိုင်းတစ်ပိုင်းတွင် ဖြစ်နေသည်။                                                                                 
PRETEXT အုပ်စု II  အသည်းအပိုင်းတစ်ပိုင်း သို့မဟုတ် နှစ်ပိုင်းတွင် ဖြစ်နေသည်။
PRETEXT အုပ်စု III  အသည်းအပိုင်းနှစ်ပိုင်း သို့မဟုတ် သုံးပိုင်းတွင် ဖြစ်နေသည်။
PRETEXT အုပ်စု IV
 အသည်း၏အပိုင်း လေးခုလုံးတွင် ဖြစ်နေသည်။

ခွဲစိတ်ကုသနည်းသည် အသည်းကင်ဆာများအား ကုသရန် အဓိကနည်းလမ်းဖြစ်သည်။ ကင်ဆာအကျိတ်များလုံးဝဖယ်ရှားပြီးသည့် လူနာများသည် ပျောက်ကင်းအောင် ကုသနိုင်သည့်အခွင့်အရေးကောင်းရှိသည်။

အသည်းကင်ဆာ အမျိုးအစားများ

  1. ကလေးများတွင် အဖြစ်များသည့်အသည်းကင်ဆာသည် ရှားပါးသော်လည်း ကလေးများတွင် အတွေ့အများဆုံး အသည်းကင်ဆာအမျိုးအစားဖြစ်သည်။ မွေးကင်းစနှင့် ၃ နှစ်အောက် ကလေးငယ်များတွင် တွေ့ရလေ့ရှိသည်။ 

    ကလေးများတွင် အဖြစ်များသည့်အသည်းကင်ဆာ ဖြစ်နိုင်ချေအကြောင်းတရားနှင့် ဖြစ်ပွားရသည့်အကြောင်းအရင်းများ

    အသည်းကင်ဆာဖြစ်နေသည့်ကလေးအများစုတွင် ကင်ဆာဖြစ်ရသည့် အကြောင်းအရင်းကို မသိပါ။။ သို့သော် အချို့လူနာများတွင် အကြောင်းတရားအချို့ကြောင့် ဖြစ်ပွားနိုင်ချေပိုများနိုင်ပါသည်။ ကလေးများတွင် အဖြစ်များသည့်အသည်းကင်ဆာ ဖြစ်နိုင်ချေ အကြောင်းတရားများမှာ

    • ကလေးအား ကိုယ်အလေးချိန်အလွန်နည်းပြီး မွေးရမည့်ရက်ထက်စောမွေးဖွားခြင်း
    • ခန္ဓာကိုယ်ကြီးထွားမှုမမျှတခြင်း (တစ်ဖက်ကြီးတစ်ဖက်သေး) ခန္ဓာကိုယ်၏တစ်ခြမ်းသည် ကျန်တစ်ခြမ်းထက် ပိုလျင်မြန်စွာ ကြီးထွားသည့်အခြေအနေ
    • မိခင်အရက်သောက်ခြင်းကြောင့် သန္ဓေသား ထိခိုက်ခြင်း လက္ခဏာစု
    • မျိုးရိုးလိုက်၍ အသားပို အလုံးတည်ခြင်း (FAP)၊ အူမကြီးအတွင်း အသားပိုအလုံးတည်သည့် မျိုးရိုးလိုက်သည့်အခြေအနေ
    • Beckwith-Wiedemann ရောဂါလက္ခဏာ၊ ရှားပါးဖြစ်စဉ်ဖြစ်သည့် မွေးဖွားချိန်တွင် ခန္ဓာကိုယ်အရွယ်အစား သာမန်ထက်ပိုကြီးလွန်းခြင်း၊ သွေးအတွင်းသကြားဓာတ် လျော့နည်းနေခြင်းနှင့် အခြားရုပ်ပိုင်းဆိုင်ရာပြဿနာများ
    • Li-Fraumeni ရောဂါလက္ခဏာ၊ ကင်ဆာဖြစ်နိုင်ချေနှင့် ဆက်စပ်နေသည့် မျိုးရိုးလိုက်သည့်အခြေအနေ
    • ကလာပ်စည်းကွဲ ချို့ယွင်းမှု ၁၈၊ရုပ်ပိုင်းဆိုင်ရာ ချို့ယွင်းမှုများနှင့် ကျန်းမာရေးအခြေအနေအမျိုးမျိုးနှင့်ဆက်စပ်သည့် မျိုးရိုးဗီဇအခြေအနေ

    ကလေးအသည်းကင်ဆာ ရောဂါအခြေအနေသုံးသပ်ချက်

    ကလေးအသည်းကင်ဆာမှ ပြန်လည်ကောင်းမွန်လာရန် ကင်ဆာအကျိတ်အားလုံးကို အောင်မြင်စွာဖယ်ရှားနိုင်ခြင်းအပေါ် မူတည်သည်။ ၎င်းသည် လူနာ ၃ ဦးလျှင် ၁ ဦးနှုန်း အောင်မြင်နိုင်သည်။ ခွဲစိတ်မှုအောင်မြင်စေရန် အတွက် ကင်ဆာဆေးသွင်းကုသခြင်းကုထုံး က အထောက်အကူပြုခြင်းသည် ကျန်လူနာ ၃ ဦးလျှင် ၁ ဦးနှုန်း ဖြစ်သည်။ တစ်ခါတရံတွင် အသည်းအစားထိုးရန်အတွက် ကင်ဆာအကျိတ်အားလုံးကို ဖယ်ရှားပစ်ရန်လိုအပ်သည်။

    ကင်ဆာအကျိတ်အား အောင်မြင်စွာခွဲစိတ်နိုင်လျှင် ကလေးများတွင် အဖြစ်များသည့်အသည်းကင်ဆာမှ ၅ နှစ်အတွင်း ပြန်လည်ကောင်းမွန်ပြီး အသက်ရှင်နှုန်းသည် ၇၀% နီးပါးဖြစ်သည်။ အကယ်၍ ကင်ဆာအဆင့်နောက်ဆုံး (PRETEXT IV) ဖြစ်လျှင် သို့မဟုတ် အသည်းအပြင်ဖက်အထိ ပျံ့နှံ့နေလျှင် လူနာသည် ကုသပျောက်ကင်းနိုင်စွမ်း အခွင့်အရေးနည်းသည်။ 

    ရလဒ်ဆိုးဝါးစေသည့် အကြောင်းတရားများရှိပြီး ၎င်းတို့မှာ

    • အသက်ကြီးမှ (အသက် ၈ နှစ်ကျော်မှ) ရောဂါရှာဖွေတွေ့ရှိခြင်း
    • အAlpha-fetoprotein (AFP) ၁၀၀ ng/mL အောက်လျော့နည်းနေခြင်း
    • တစ်သျှူးဗေဒ အရ ဆဲလ်များသည် သေးငယ်နေခြင်းတို့ဖြစ်သည်။

    တစ်သျှူးဗေဒအရ ပို၍ငယ်ရွယ်ပြီး၊ သန္ဓေသား ကလာပ်စည်း အခြေအနေရှိသည့် ကလေးငယ်လူနာများသည် ပျောက်ကင်းကုသနိုင်သည့် အခြေအနေ ပိုရှိသည်။

    ကလေးများတွင် အဖြစ်များသည့်အသည်းကင်ဆာ ကုသခြင်း

    အသည်းကင်ဆာအား အဓိကအားဖြင့် ခွဲစိတ်ကုသသည်။ 

    ကလေးများတွင် အဖြစ်များသည့် အသည်းကင်ဆာအား မခွဲစိတ်မီ ကင်ဆာအကျိတ်ကျုံ့၍ ဖယ်ရှားရလွယ်ကူစေရန် ကင်ဆာဆေးသွင်းကုသခြင်းကုထုံး ကို အသုံးပြုသည်။ Cisplatinသည် ကလေးများတွင် အဖြစ်များသည့်အသည်းကင်ဆာအတွက် အဓိကကင်ဆာဆေးဝါးဖြစ်သည်။ ပေါင်းစပ်ကုထုံး (ကင်ဆာဆေးသွင်း ကုသခြင်းဖြင့်ကုသခြင်းကို ကင်ဆာဆေးတစ်မျိုးထက်ပို၍) ပေါင်းစပ်ကုသခြင်းကိုလည်း အသုံးပြုသည်။

  2. အသည်းထဲရှိ ဆဲလ်များမှစတင်ဖြစ်ပွားသော ကလေးအသည်းကင်ဆာသည် တွေ့ရခဲပါသည်။ ပုံမှန်အားဖြင့် အသက် ၁၂ နှစ်မှ ၁၄ နှစ်ကြား ကလေးများတွင် တွေ့ရတတ်ပြီး အသက် ၅ နှစ်အောက်ကလေးများတွင် မတွေ့ရပါ။

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာ ဖြစ်နိုင်ချေအကြောင်းတရားများနှင့် ဖြစ်ပွားရသည့်အကြောင်းအရင်းများ

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာကို အရွယ်ရောက်ပြီးသူများတွင် အသည်းရောဂါ သို့မဟုတ် ရောဂါပိုးကူးစက်ခံရခြင်း ကြောင့် အသည်းပျက်စီးခြင်း (အသည်းခြောက်ခြင်း)၊ ကျန်းမာရေးအခြေအနေတစ်ခုခုကြောင့် သို့မဟုတ် ဆေးနှင့်အရက်သောက်သုံးခြင်းကြောင့် အသည်း ပျက်စီးခြင်း တို့ကြောင့် ဖြစ်ပွားလေ့ရှိပါသည်။ အသက်ကြီးသည့်ကလေးများနှင့် ဆယ်ကျော်သက်များတွင် အဆိုပါကင်ဆာဖြစ်ပွားနိုင်သည်။ သို့သော်လည်း အများစုသည် ဖြစ်နိုင်ချေအကြောင်းတရား မသိရပါ။ အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာဖြစ်သည့် ကလေး ၃ ဦးလျှင် ၁ ဦးတွင် အဆိုပါကင်ဆာ ဖြစ်နိုင်ချေရှိသည့်အကြောင်းတရားကို သိရပါသည်။ ၎င်းတို့တွင် အောက်ပါတို့ပါဝင်သည်-

    • အသည်းရောင်အသားဝါ ဘီ သို့မဟုတ် စီ ကူးစက်ခံရခြင်း
    • အီသနော (အရက်)နှင့် ထိတွေ့ခြင်း
    • Vinyl Chloride နှင့် ထိတွေ့ခြင်း
    • Aflatoxin B1နှင့် ထိတွေ့ခြင်း
    • ကျားဟော်မုန်း ဇီဝဖြစ်စဉ် စတီးရွိုက်အသုံးပြုခြင်း
    • ဆီးချိုရောဂါဖြစ်ခြင်း
    • မျိုးရိုးလိုက်ခြင်း သို့မဟုတ် မွေးရာပါ ရောဂါပါလာခြင်း
      • အမိုင်နိုအက်စစ် (Tyrosine) နည်းသောရောဂါ နှင့် ဂလိုက်ကိုဂျင်စုပုံလာသည့်ရောဂါ အပါအဝင် ဇီဝဖြစ်စဉ်အခြေအနေများ
      • သည်းခြေပြွန်တဖြည်းဖြည်းကျဉ်းခြင်းနှင့် အသားဝါခြင်းတို့ဖြစ်စေသော မျိုးရိုးလိုက် လက္ခဏာစု နှင့် သည်းခြေပြွန်ပိတ်ခြင်းကဲ့သို့ မျိုးရိုးလိုက်၍ သည်းခြေရည်စီးဆင်းမှု ပျက်စီးခြင်းလက္ခဏာများ
      • အာရုံကြောအားဖုံးထားသော အမျှင်တစ်ရှူးမှဖြစ်သည့် အဖုအကျိတ် မွေးရာပါရောဂါ
      • Ataxia-telangiectasia (အာရုံကြောစနစ်၊ ခုခံအားစနစ်နှင့် အခြားခန္ဓာကိုယ်စနစ်များကို ထိခိုက်စေပြီး ခန္ဓာကိုယ်၏ ဆက်စပ်လှုပ်ရှားမှုများကို ထိလိုက်စေသော ရှားပါးမျိုးရိုးလိုက်ရောဂါတစ်မျိုး)
      • မျိုးရိုးလိုက်တတ်သောသော သွေးအားနည်းရောဂါတစ်မျိုး

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာ ရောဂါအလားအလ

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာသည် ကင်ဆာဆေးဝါးဖြင့်ကုသရာတွင် ပျောက်ကင်းလေ့မရှိသည့်အတွက် ကုသရပိုမိုခက်ခဲသည်။ ကင်ဆာအကျိတ်အား ခွဲစိတ်၍ လုံးဝဖယ်ရှားပစ်ခြင်း သို့မဟုတ် အသည်းတစ်ခုလုံး အစားထိုးလဲလှယ်ခြင်းသည်သာ ပျောက်ကင်းစေရန် အခွင့်အလမ်းများသည့် အကောင်းဆုံး ကုသနည်းလမ်းများဖြစ်သည်။ ပျောက်ကင်း၍ အသက်ရှင်နိုင်ချေနှုန်းသည် ၃၀% အောက်သာရှိသည်။ ပြန်လည်ကောင်းမွန်လာစေနိုင်သည့် အခွင့်အလမ်းများကို လွှမ်းမိုးထားသည့် အချက်များမှာ 

    • အခြားခန္ဓာကိုယ်အစိတ်အပိုင်းများသို့ ကင်ဆာပျံ့နှံ့နေခြင်း ရှိ၊ မရှိ၊
    • ခွဲစိတ်၍ ၎င်းကင်ဆာအား လုံးဝဖယ်ရှားနိုင်ခြင်း ရှိ၊ မရှိတို့ ဖြစ်ကြသည်။

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာအားကုသခြင်း

    အသည်းထဲရှိ ဆဲလ်များမှစတင်ဖြစ်ပွားသော အသည်းကင်ဆာအား ခွဲစိတ်၍သာ ကုသနိုင်သည်။ ကင်ဆာအကျိတ်အား လုံးဝဖယ်ရှားပစ်နိုင်သည့် ပမာဏအထိကျုံ့သွားစေရန် ကင်ဆာဆေးသွင်းကုသခြင်းကုထုံး ကိုအသုံးပြုသည်။ သို့သော် အဆိုပါကင်ဆာသည် ကင်ဆာဆေးသွင်းကုသခြင်းကုထုံးကြောင့် သက်ရောက်မှုသိပ်မရှိပါ။ 
    အကယ်၍ ရောဂါတွေ့ရှိချိန်တွင် ကင်ဆာအကျိတ်သည် အသည်းအပြင်ဖက်အထိ ပျံ့နှံ့နေသည်ဆိုပါက ကင်ဆာဆေးသွင်းကုသခြင်းကုထုံးဖြင့် သို့မဟုတ် ဒေသန္တရကုထုံးများဖြင့် ကုသကြည့်နိုင်ပါသည်။

    Sorafenibဆေးသည် အဆိုပါကင်ဆာရောဂါအား နှေးကွေးစေရန် အသုံးပြုနိုင်သည်။ Sorafenib ဆေး ယခင်က သုံးစွဲဖူးသည့်လူနာများဖြစ်ပါက Regorafenibဆေးအား သုံးစွဲနိုင်သည်။ Cisplatinကဲ့သို့ ကင်ဆာဆေးဝါးများသည် အရွယ်ရောက်ပြီးသူများထက် ကလေးများတွင် ပို၍ထိရောက်နိုင်ပါသည်။

    ဒေသန္တရ ကုထုံးများသည် အသည်းအစားထိုးကုသရန် စောင့်ဆိုင်းနေသည့် လူနာအား ကူညီနိုင်ပါသည်။ ၎င်းကုထုံးများ၏ အဓိကရည်မှန်းချက်မှာ ကင်ဆာဆဲလ်များ ကြီးထွားနှုန်း နှေးကွေးစေပြီး အသက်ရှည်စေရန်ဖြစ်ပြီး ပျောက်ကင်းအောင်ကုသပေးရန်မဟုတ်ပေ။

အသည်းကင်ဆာကုသပြီးနောက်ပိုင်းဘဝ

အသည်းအစားထိုးခြင်း

အသည်းအစားထိုးကုသထားသည့်လူနာများသည် ကျန်ဘဝသက်တမ်းတစ်လျှောက်လုံးတွင် ခုခံစွမ်းအားစနစ် ထိန်းချုပ် သည့် ဆေးများသုံးစွဲရန်လိုအပ်ပါသည်။ အဆိုပါဆေးများသည် ခန္ဓာကိုယ်မှ အသည်းအသစ်ကို တိုက်ခိုက်ခြင်း သို့မဟုတ် ခုခံငြင်းဆန်ခြင်းမှ ထိန်းသိမ်းပေးပါသည်။ အဆိုပါဆေးဝါးများသည် ခန္ဓာကိုယ်၏ သဘာဝ ခုခံစွမ်းအားကို ကျဆင်းစေသည့်အတွက် လူနာသည် ရောဂါပိုးမွှား ကူးစက်ခံရနိုင်ချေ မြင့်တက်လာနိုင်ပါသည်။ သို့သော် အင်္ဂါအစိတ်အပိုင်း အစားထိုးပြီးသူတော်တော်များများသည် အစားထိုးပြီးနောက် ပုံမှန် ကျန်းမာသည့်ဘဝအား ပိုင်ဆိုင်ကြပါသည်။ ပုံမှန်ဆေးစစ်မှုခံယူရန်နှင့် ဆရာဝန်ညွှန်းသည့်အတိုင်း ဆေးသောက်ရန် အရေးကြီးပါသည်။

ကုသမှု၏နောက်ပိုင်းသက်ရောက်မှုများ

အထွေထွေကျန်းမာရေးနှင့် ရောဂါ ကာကွယ်ခြင်းအတွက် ကင်ဆာရောဂါပျောက်ကင်းသူ အားလုံးသည် ကျန်းမာသော နေထိုင်မှုပုံစံနှင့် စားသောက်မှု အလေ့အထများကို မွေးမြူသင့်ပါသည်။ ထို့ပြင် မူလအစကတည်းက ပြသခဲ့သော ဆရာဝန်ထံတွင် ပုံမှန် ရုပ်ပိုင်းဆိုင်ရာ ကျန်းမာရေးစစ်ဆေးမှုများနှင့် စမ်းသပ်စစ်ဆေးမှုများကိုလည်း အနည်းဆုံး တစ်နှစ်တစ်ကြိမ် ဆက်လက်လုပ်ဆောင်သင့်ပါသည်။ တစ်ကိုယ်လုံးပျံ့နှံ့အောင် ၀ - ၁၈ နှစ်အကြားဖြစ်သော ကလေးဘဝ ကင်ဆာဆေးသွင်း၍ ကုသပျောက်ကင်းထားသည့် ကလေးကင်ဆာလူနာများသည် ကုထုံး၏ ရေတိုနှင့် ရေရှည်ဘေးထွက်သက်ရောက်မှုများကို စောင့်ကြည့်ပြီး လေ့လာကုသမှုခံယူသင့်သည်။ ဖြစ်နိုင်ချေရှိသည့် ကျန်းမာရေးချို့ယွင်းမှုများမှာ အကြားအာရုံ ချို့တဲ့ခြင်းကျောက်ကပ်ပြဿနာများ(Cisplatin)နှင့် နှလုံးပြဿနာများ (Anthracylcines)တို့ဖြစ်သည်။

---
ပြန်လည်သုံးသပ်ခဲ့သည့်ရက်စွဲ- ဇွန်လ 2018