ကလေးများတွင်ဖြစ်သည့် ၀ - ၁၈ နှစ်အကြားဖြစ်သော ကလေးဘဝ ကင်ဆာရောဂါနာကျင်မှုအတွက် ဘိန်းပါသောဆေးများ- သင် သိထားသင့်သည့်အရာများ

ဘိန်းပါသောဆေးများသည် ကလေးများတွင်ဖြစ်သည့် ကင်ဆာနှင့် ဆက်နွယ်၍ဖြစ်လာသည့် နာကျင်မှုများအား ကုစားရန်အတွက် အရေးပါသည့်နေရာတွင်ရှိနေသည်။

နာကျင်မှုသည် ကင်ဆာရောဂါကုသနေစဉ်နှင့် ကုသမှုအပြီးတွင် ပုံမှန်အားဖြင့် ခံစားရတတ်သည်။ နာကျင်မှုအား စီမံခန့်ခွဲခြင်းသည် လူနာအား ပြုစုစောင့်ရှောက်သည့်အပိုင်း၏ အစိတ်ပိုင်းတစ်ခုဖြစ်သည်။ သို့သော် ကလေးကင်ဆာဝေဒနာရှင်များ၏ မိဘများသည် ၎င်းတို့၏ ကလေးငယ်များအား ဘိန်းပါသောဆေးများ အသုံးပြုကုသခြင်းနှင့်ပတ်သက်၍ စိုးရိမ်မကင်းဖြစ်တတ်ကြသည်။ ၎င်းဆေးများအား ကျယ်ကျယ်ပြန့်ပြန့်အသုံးပြုခြင်းနှင့် လွဲမှားစွာအသုံးပြုခြင်းတို့သည် နိုင်ငံအနှံ့ မူးယစ်ဆေးဝါးနှင့်ပတ်သက်သည့် ပဋိပက္ခတစ်ခုသို့ ဦးတည်သွားခဲ့ဖူးသည်။

သို့သော်လည်း ဘိန်းပါသောဆေးများသည် ကင်ဆာနှင့် အချို့သောကင်ဆာကုထုံးများနှင့်ဆက်နွယ်၍ ခံစားရသည့်နာကျင်မှုများအတွက် ထိရောက်သော ကုသမှုတစ်ခု ဖြစ်နိုင်သည်။

ဘိန်းပါသောဆေးများအား ၀ - ၁၈ နှစ်အကြားဖြစ်သော ကလေးဘဝ ကင်ဆာရောဂါရှင်များအတွက် မည်သို့အသုံးပြုသနည်း။

ဘိန်းပါသောဆေးများသည့် နာကျင်မှုအား သက်သာပျောက်ကင်းစေနိုင်သည့် ဆေးဝါးအမျိုးအစားဖြစ်ပြီး ထောက်ခံချက်ဖြင့် တရားဝင်အသုံးပြုနိုင်သည်။ ၎င်းဆေးများတွင်hydrocodone၊ oxycodone၊ morphine၊ fentanyl နှင့် methadoneတို့ပါဝင်သည်။

ဆေးညွှန်းစာဖြင့်သုံးနိုင်သည့် ဘိန်းပါသောဆေးများကို ပြင်းထန်သော သို့မဟုတ် နာတာရှည်ဖြစ်သော အသင့်အတင်နာကျင်မှုကို ရိုးရိုးပြင်းထန်သည့်နာကျင်မှုအဖြစ် လျှော့ချရာတွင် အသုံးပြုသည်။ ကိုယ်တွင်းအင်္ဂါထဲတွင်ဖြစ်သော နာကျင်မှုအတွက် ၎င်းတို့ကို ဆေးညွန်းပေးနိုင်သည်။ ၎င်းနာကျင်မှုမျိုးသည် ခွဲစိတ်မှုလုပ်ခြင်း သို့မဟုတ် ကိုယ်တွင်းအင်္ဂါတစ်ခုကို ဖိမိနေသည့် အကျိတ်စသည့် ရုပ်ပိုင်းဆိုရာ လှုံ့ဆော်မှုတစ်ခုကို တုံ့ပြန်ခြင်းကြောင့် ဖြစ်တတ်သည်။ ဘဝနေဝင်ခြင်း ပြုစုစောင့်ရှောက်မှု လုပ်စဉ်အတွင်း နာကျင်မှုကိုထိန်းချုပ်ရန်လည်း  ဘိန်းပါသော ဆေးများကို အသုံးပြုနိုင်သည်။

နာကျင်မှုအမျိုးအစားများနှင့် နာကျင်မှုအားစီမံခန့်ခွဲခြင်းအကြောင်းဆက်လက်ဖတ်ရှုပါန်။

ကင်ဆာနှင့် ဆက်နွယ်သည့် နာကျင်မှုအား ကုသရာတွင် အရေးပါသည့်ကုသနည်းများရှိပြီး ဘိန်းပါသောဆေးများသည် တစ်ခုတည်းသော ရွေးစရာနည်းလမ်းမဟုတ်ပါ။ ဘက်ပေါင်းစုံပါဝင်ခြင်း ဖြင့်ကုသသည့်နည်းလမ်းသည် အကောင်းဆုံးဖြစ်သည်ဟု မှတ်ချက်ပေးကြသည်။ ၎င်းတွင် အခြားဆေးဝါးများ နှင့် ဆေးဝါးမပါဝင်သည့် အခြား ကုထုံးအမျိုးအစားများ ပါဝင်နိုင်သည်။

ကျွန်ုပ်၏ကလေး ဘိန်းပါသောဆေးကို စွဲလန်းသွားနိုင်သလား။

ဘိန်းပါသောဆေးသည် စွဲလန်းရန် အလွန်လွယ်ကူသည့်ဆေးဝါးမျိုးဖြစ်သည်။ သို့သော်လည်း ပြုစုစောင့်ရှောက်ရေးအဖွဲ့သည် ဆေးစွဲခြင်းကို ကြိုတင်ကာကွယ်နိုင်မည့် နည်းလမ်းများ လုပ်ဆောင်လိမ့်မည်။ ဥပမာအားဖြင့် ပြုစုစောင့်ရှောက်ရေးအဖွဲ့သည် ဘိန်းပါသောဆေးများအား ကာလတိုအတွက်အသုံးပြုရန်သာ ညွှန်ကြားပြီး ၎င်းသည် လူနာ၏ ဆေးစွဲလန်းနိုင်မှုအား လျော့ကျစေနိုင်သည်။

ပြုစုစောင့်ရှောက်ရေးအဖွဲ့သည် စွဲလန်းနိုင်သည့်အချက်များအား စိစစ်အကဲဖြတ်နိုင်ပြီး လူနာသည် ဆေးစွဲနိုင်ခြေနည်းသလား၊ ဆေးစွဲနိုင်ခြေရှိသလား၊ သို့မဟုတ် ဆေးစွဲနိုင်ခြေများသလား စသဖြင့် ဆုံးဖြတ်နိုင်သည်။ ပြုစုစောင့်ရှောက်ရေးအဖွဲ့သည် ၎င်းသတင်းအချက်အလက်အားအသုံးပြု၍ နာကျင်မှုကိုကုသသည့် အစီအစဉ်တစ်ခုကို တီထွင်ဖော်ထုတ်နိုင်သည်။

ဘိန်းပါသောဆေးအား လွဲမှားစွာအသုံးပြုခြင်းနှင့် စွဲလန်းခြင်းတို့နှင့် ပတ်သက်၍ သတိပြုရမည့်အချက်များ

• မြီးကောင်ပေါက်များနှင့် လူငယ်များ — ဆယ်ကျော်သက်အရွယ်တွင် ဆေးအလွဲသုံးခြင်း ဖြစ်နိုင်ခြေ မြင့်တက်လေ့ရှိပြီးနှင့် လူငယ်အရွယ်တွင် ဖြစ်နိုင်ခြေ အမြင့်ဆုံး ဖြစ်လေ့ရှိသည်။
• ဘိန်းပါသောဆေးများနှင့် ထိတွေ့ရခြငး — ဘိန်းပါသောဆေးများကို ကြာရှည်စွာအသုံးပြုခြင်း နှင့်/သို့မဟုတ် အမျိုးအစားကွဲပြားသည့် ဘိန်းပါသောဆေးများကိုအသုံးပြုခြင်းသည် ဆေးစွဲရန် ဖြစ်နိုင်ခြေများကို တိုးမြင့်စေသည်။
• တကိုယ်ရည်၊ မိတ်ဆွေအပေါင်းသင်းများ သို့မဟုတ် မိသားစုများ၌ ဆေးပစ္စည်း အလွဲသုံးစားပြုလုပ်ခြင်း ရာဇဝင်
• အပြုအမူနှင့် ပညာသင်ကြားရေး ပြဿနာများ
• ကလေးဘဝတွင် လိင်ပိုင်းဆိုင်ရာမတရားပြုကျင့်ခံရခြင်း
• စိတ်ကျခြင်းနှင့် စိတ်ရှုပ်ထွေးခြင်း

ဘိန်းပါသောဆေးအသုံးပြုရန်အတွက် ညွှန်ကြားခံရပါက ကလေးကင်ဆာကုသသည့်စင်တာများသည် လူနာများနှင့် လူနာ၏ မိဘများအား ဆေးပစ္စည်းတစ်ခုအသုံးပြုခြင်းနှင့်ပတ်သက်၍ စာချုပ် သို့မဟုတ် သဘောတူညီချက် အား ဘိန်းပါသောဆေးများ စတင်အသုံးမပြုခင် လက်မှတ်ရေးထိုးခိုင်းကြသည်။ ၎င်းစာရွက်စာတမ်းတွင် လူနာနှင့် မိသားစုဝင်များ၏ အခန်းကဏ္ဍနှင့် တာဝန်များ၊ ဘိန်းပါသောဆေးနှင့် ကုသမှုကို ရပ်ဆိုင်းနိုင်သည့် အခြေအနေသတ်မှတ်ချက်များနှင့် ပြုစုစောင့်ရှောက်မှု ဝန်ဆောင်မှုပေးသူများ၏ တာဝန်များအကြောင်းကို ဖော်ပြထားသည်။

သဘောတူညီချက်စာချုပ်များသည် ပြုစုစောင့်ရှောက်မှု ဝန်ဆောင်မှုပေးသူများနှင့် လူနာမိသားစုများအား ဘိန်းပါသောဆေးပေးကုသခြင်းအကြောင်း ရှင်းလင်းပြောပြရာတွင်နှင့် မေးခွန်းများနှင့် စိုးရိမ်မှုများကို ဖြေရှင်းရာတို့တွင် အထောက်အကူ ဖြစ်စေနိုင်သည်။

ဘိန်းပါသောဆေးအသုံးပြုမှုအား ကြီးကြပ်စိစစ်ခြင်း

ပြုစုစောင့်ရှောက်ရေးအဖွဲ့သည် လူနာအား ဘိန်းပါသောဆေးများ မှန်မှန်ကန်ကန်အသုံးပြုမှု ရှိမရှိကို နည်းလမ်းများစွာအသုံးပြု၍ ကြီးကြပ်နိုင်သည်။

• ပြုစုစောင့်ရှောက်ရေးအဖွဲ့သည် ဆေးပြားအရေအတွက်အား ထိန်းချုပ်စစ်ဆေးသည်။ အဖွဲ့ဝင်တစ်ဦးသည် လူနာ၏ ဆေးသုံးစွဲမှုအားစောင့်ကြည့်ပြီး ညွှန်ကြားချက်ထက်ပို၍ သုံးစွဲခြင်းမရှိအောင် သို့မဟုတ် ၎င်းဆေးများ လူနာအတွက် ထောက်ပံ့ပေးသည့်နေရာမှ ခိုးယူခံရခြင်းမရှိအောင် သေချာစေရန်အတွက် ဆေးပြားများကို အခါအားလျော်စွာ ရေတွက်နိုင်သည်။
• လူနာ၏ ဆီးကို ဆေးစစ်ခြင်းဖြင့် ပြုစုစောင့်ရှောက်ရေးအဖွဲ့သည် လူနာတွင် ဆေးဝါးများနှင့် အခြားဆေးပစ္စည်းများ အသုံးပြုခြင်းရှိမရှိကို စောင့်ကြည့်နိုင်သည်။
• ပြုစုစောင့်ရှောက်ရေးအဖွဲ့သည် လူနာများနှင့် ၎င်းတို့၏ မိသားစုများအား နာကျင်မှုနှင့်ပတ်သက်သည့် မှတ်တမ်းမျိုးထားရှိပြီး လူနာအနေဖြင့် နေ့စဉ် ဆေးပြားမည်မျှ သောက်သုံးသည်၊ မည်သည့်အချိန်တွင်သောက်သုံးသည်ကို မှတ်တမ်းပြုလုပ်ထားရန်အတွက် အကူအညီတောင်းလေ့ရှိသည်။

ဘိန်းပါသောဆေးအား လွဲမှားစွာအသုံးပြုမှု၏ လက္ခဏာများ

ပြုစုစောင့်ရှောက်ရေးအဖွဲ့သည် လူနာအား ဘိန်းပါသောဆေး လွဲမှားစွာအသုံးပြုသည့် လက္ခဏာပြမပြ အနီးကပ်စောင့်ကြည့်မည် ဖြစ်သည်။ မိဘများအနေဖြင့် ဤကဲ့သို့လက္ခဏာများ လေ့လာတွေ့ရှိရပါက ပြုစုစောင့်ရှောက်ရေးအဖွဲ့အား ပြောကြားသင့်သည်-

• ဘိန်းပါသောဆေးအသုံးပြုခြင်းကြောင့် ပုံမှန်ပြုလုပ်နိုင်သည့် အရာများအား ပြုလုပ်နိုင်စွမ်းလျော့ကျခြင်း
• နာကျင်မှုအတွက် သုံးစွဲရမည့် ဆေးဝါးများအား နာကျင်မှုမဖြစ်သည့် လက္ခဏာများကို ကုသရန် အသုံးပြုခြင်း
• လူနာ၏ ဘိန်းပါသောဆေးအသုံးပြုမှုနှင့်ပတ်သက်၍ တတိယအဖွဲ့ အစည်းမှ စိုးရိမ်မကင်းဖြစ်ကြောင်း ပြသခြင်း
• ဆေးဝါးများ လှောင်ထားခြင်း
• ဥပဒေအရပိတ်ပင်ထားသည့်ဆေးဝါးများအားအသုံးပြုခြင်း
• ဆေးစာဖြင့်အသုံးပြုရသည့် မူးယစ်စေသောဆေးများအား ခိုးယူခြင်း သို့မဟုတ် ရောင်းချခြင်း
• ဆေးစာအတု ပြုလုပ်ခြင်း သို့မဟုတ် အခြားမမှန်မကန်ပြုလုပ်ခြင်း
• ဆေးဘက်ဆိုင်ရာနှင့်မသက်ဆိုင်သည့်နေရာများမှ ဘိန်းပါသောဆေးများအားရယူခြင်း
• ဆေးပြား အရေအတွက် မတူညီခြင်း
• နာကျင်မှုနှင့်ပတ်သက်၍ ပြုစုစောင့်ရှောက်ပေးသည့်သူနှင့် လူနာမှ တွေ့ဆုံရန်ပျက်ကွက်မှု များလာခြင်း
• လူနာမှ ဆရာဝန်အများအပြားထံမှ နာကျင်မှုအားကုသမှု ခံယူရန် ကြိုးစားခြင်း
• ချိန်းဆိုခြင်းမရှိဘဲ ဆေးပြန်ဖြည့်နိုင်ရန်အတွက် မကြာခဏ ကြိုးပမ်းခြင်း
• ဆေးဝါးများ ပျောက်ဆုံးခြင်း/ခိုးယူခံရခြင်း
• ဆေးဝါးများအား တံဆိပ်နာမည် သို့မဟုတ် လမ်းနာမည်ဖြင့် တောင်းခံခြင်း
• နာကျင်မှု ကုသမည့်အစီအစဉ်ပြောင်းလဲမှုအား လက်မခံခြင်း
• ခွင့်ပြုခြင်းမရှိဘဲ ဆေးပစ္စည်များအား ပြောင်းလဲခြင်း သို့မဟုတ် ထပ်ပေါင်းစပ်ခြင်း
• နာကျင်မှုသက်သာရန်အတွက် အခြားဆေးပစ္စည်းများအား အသုံးပြုခြင်း
• မူးယဇ်၍ စိတ်"ကြွ" လာစေရန်အတွက် ဆေးဝါးများအား အသုံးပြုခြင်း

အကယ်၍ ဆေးဝါးအလွဲသုံးပြုမှုဖြစ်ပေါ်လာပါက မိဘများနှင့် ပြုစုစောင့်ရှောက်ရေးအဖွဲ့တို့လက်တွဲ၍ ဖြေရှင်းရမည့်နည်းလမ်းများကို အတူတကွရှာဖွေနိုင်သည်။

ဘိန်းပါသောဆေးသုံးစွဲမှုနှင့်ပတ်သက်၍ စိုးရိမ်မကင်းစိတ်ဖြစ်လာပါက ပြုစုစောင့်ရှောက်ရေးအဖွဲ့ မှ အဖွဲ့ဝင်များအား ပွင့်လင်းစွာ ပြောဆို တိုင်ပင်ပါ။