ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများ

ကီမို ဦးနှောက်ဆိုတာ ဘာလဲ။

ကင်ဆာကုသနေစဉ် ကင်ဆာလူနာတချို့တွင် သိမှုဆိုင်ရာ လုပ်ငန်းလုပ်ဆောင်မှုများ ပြောင်းလဲသွားသည်။ စဉ်းစားခြင်း၊ အာရုံစိုက်ခြင်း သို့မဟုတ် မှတ်ဉာဏ်စသည်တို့ ပြောင်းလဲသွားသည်ကို လူနာများနှင့် မိသားစုဝင်တို့က သတိပြုမိနိုင်သည်။ ထိုသို့ပြောင်းလဲခြင်းကို ကင်ဆာလူနာများက “ကီမို ဦးနှောက်” သို့မဟုတ် “ဦးနှောက်မြူဖုံးနေခြင်း” ဟု ခေါ်ဆိုကြသည်။ ကင်ဆာကုသနေစဉ် သိမှုဆိုင်ရာ ပြောင်းလဲမှုများဖြစ်ပေါ်ခြင်းကို အပြည့်အဝ နားလည်သဘောပေါက်ထားခြင်းမရှိသေးပါ။ ကီမိုဆေးသွင်းကုသခြင်း၊ ဓာတ်ရောင်ခြည်ဖြင့်ကုသခြင်း၊ ခွဲစိတ်ကုသခြင်းသို့မဟုတ် ဦးခေါင်းထဲရေဝင်ခြင်းစသည်ဖြင့် မတူညီသော အကြောင်းရင်းများကြောင့် ဖြစ်နိုင်သည်။ သိမှုဆိုင်ရာ ပြောင်းလဲခြင်းတချို့မှာ ယာယီဖြစ်သော်လည်း တချို့မှာမူ အချိန်ကြာလာသည့်တိုင် ဆက်ဖြစ်နေနိုင်သည်။

ကလေးများနှင့် ဆယ်ကျော်သက်များတွင်တွေ့ရသော ကီမို ဦးနှောက်၏ လက္ခဏာရပ်များနှင့် သိမှုဆိုင်ရာ ဘေးထွက်ဆိုးကျိုးများ

ကင်ဆာဖြစ်နေစဉ် သိမှုဆိုင်ရာပြောင်းလဲမှုများ၏ လက္ခဏာရပ်များမှာ လူနာ၏ အသက်အရွယ်ပေါ်မူတည်နေသည်။ လူနာများသည် ၎င်းတို့၏ အတွေးများက နှေးနေသည် သို့မဟုတ် ၎င်းတို့၏ စိတ်များ ထိုင်းမှိုင်းကာ မြူများ ဖုံးနေသကဲ့သို့ ခံစားနေရနိုင်သည်။ ကီမိုဦးနှောက် သို့မဟုတ် သိမှုဆိုင်ရာပြဿနာများ၏ လက္ခဏာရပ်များတွင် အောက်ပါအချက်များ ပါဝင်နေနိုင်သည်-

• မှတ်ဉာဏ်မကောင်းခြင်း
• အာရုံစိုက်နိုင်သည့် ကာလတိုတောင်းခြင်း
• အာရုံစူးစိုက်မှု မရှိခြင်း သို့မဟုတ် အလွယ်တကူ အာရုံထွေပြားခြင်း
• စကားပြောနှေးခြင်း
• စကားပြောနေစဉ် မှန်ကန်သည့် စကားလုံးရှာရန် အခက်တွေ့ခြင်း
• စိတ်ရှုပ်ထွေးခြင်း
• အလုပ်ကိစ္စများပြီးစီးစေရန် ပုံမှန်ထက် အချိန်ပိုကြာခြင်း
• အတွေးများကို အစီအစဉ်တကျ မထားနိုင်ခြင်း
• စာသင်ကျောင်းနှင့်ပတ်သက်ပြီး စိုးရိမ်သောကရှိခြင်း သို့မဟုတ် စိတ်ပျက်နေခြင်း
• ကျောင်းစာ သို့မဟုတ် လုပ်ငန်းစွမ်းဆောင်ရည် ပြောင်းလဲသွားခြင်း
• စိတ်အာရုံစူးစိုက်ရသည့် လုပ်ဆောင်မှုများ သို့မဟုတ် စာဖတ်ခြင်း၊ ဂိမ်းဆော့ခြင်း စသည်တို့ကို စိတ်မဝင်စားတော့ခြင်း

ကီမိုဦးနှောက်နှင့် သိမှုဆိုင်ရာ ဘေးထွက်ဆိုးကျိုးများ ဖြစ်ပွားရသည့် အကြောင်းရင်းများ

ကီမိုဆေးသွင်းကုသခြင်းနှင့် ဓာတ်ရောင်ခြည်ဖြင့်ကုသခြင်းတို့ကြောင့်ဖြစ်သော သိမှုဆိုင်ရာ ဘေးထွက်ဆိုးကျိုးတို့ကို ဖြစ်စေသည့်အကြောင်းရင်း များစွာရှိနိုင်သည်။ ကင်ဆာကုသမှုများသည် ဦးနှောက်၏ ဆဲလ်ကြီးထွားမှု၊ ရောင်ရမ်းမှုနှင့် သွေးပေးပို့မှုစသည်တို့ကို တိုက်ရိုက်ထိခိုက်စေနိုင်သည်။

အခြားအချက်များကြောင့်လည်း ကင်ဆာလူနာများ၏ စဉ်းစားခြင်း၊ အာရုံစိုက်မှုနှင့် မှတ်ဉာဏ်တို့ကို ထိခိုက်စေနိုင်သည်။ ၎င်းတို့တွင် အောက်ပါတို့ပါဝင်သည်-

• ပျို့အန်ခြင်းကို သက်သာစေသည့်ဆေးများ၊ နာကျင်မှုသက်သာစေသည့် ဆေးများနှင့် ကော်တီကိုစတီးရွိုက် ပါဝင်သောဆေးများ
• ခွဲစိတ်ကုသခြင်းနှင့် မေ့ဆေးပေးခြင်း
• ကူးစက်ရောဂါ
• သွေးဆဲလ်အရေအတွက်နည်းခြင်း
• ဟော်မုန်းများပြောင်းလဲသွားခြင်း
• စိတ်ဖိစီးမှု၊ စိုးရိမ်သောက သို့မဟုတ် စိတ်ကျခြင်း
• နေ့စဉ်လုပ်ဆောင်မှုနှင့် မိမိ၏ပတ်ဝန်းကျင် ပြောင်းလဲသွားခြင်း
• အိပ်ခြင်းနှင့်ဆိုင်သော ပြဿနာများနှင့် နုံးခွေခြင်း
• အစာအာဟာရ မပြည့်ဝခြင်း
• အကြားအာရုံ သို့မဟုတ် အမြင်အာရုံတို့တွင် ပြဿနာများရှိနေခြင်း

ကင်ဆာရောဂါကုသမှုများနှင့် သက်ဆိုင်ခြင်းမရှိဘဲ သိမှုဆိုင်ရာ ပြဿနာများဖြစ်လာနိုင်ကြောင်းကိုလည်း မိသားစုဝင်များ သိရှိထားရန် အရေးကြီးသည်။ ရောဂါလက္ခဏာများသည် ကင်ဆာကုသမှုနှင့် မသက်ဆိုင်ဘဲ လူနာ၏ဖွံ့ဖြိုးမှုဆိုင်ရာ ပြဿနာများ သို့မဟုတ် မိသားစုနှင့်ဆက်နွှယ်နေသော ပြဿနာများ ဖြစ်နေနိုင်သည်။ (ဥပမာ။ ။ စာဖတ်ရန်ခက်ခဲသည့်ရောဂါ သို့မဟုတ် ADHD(ကလေးများ အာရုံစူးစိုက်နိုင်မှုမရှိဘဲ အတက်ကြွလွန်သော ရောဂါ)။ တိကျသည့်ပြဿနာများရှာဖွေခြင်း၊ ဖြစ်ပွားစေသည့်အကြောင်းရင်းခံများကိုသတ်မှတ်ခြင်းနှင့် လူနာနှင့်ကိုက်ညီသည့် အကောင်းဆုံးကုသမှုများပေးနိုင်ရန် ဦးနှောက်အာရုံကြောနှင့်စိတ်ပိုင်းဆိုင်ရာ စမ်းသပ်မှုများပြုလုပ်နိုင်သည်။

ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများကို သက်သာစေခြင်း- မိသားစုဝင်များအတွက် အကြံပြုချက်များ

ကင်ဆာကုသမှုများကြောင့်ဖြစ်သော သိမှုဆိုင်ရာ ပြောင်းလဲမှုများသည် ခဏတာ သို့မဟုတ် ကြာရှည်စွာ ဖြစ်နေနိုင်သည်။ သို့သော်လည်း သိမှုဆိုင်ရာ ဘေးထွက်ဆိုးကျိုးများကို ကုသပေးပြီး၊ သိမှုဆိုင်ရာ ကျန်မာရေးအခြေအနေတို့ တိုးတက်ကောင်းမွန်လာစေရန် မိသားစုဝင်များ လုပ်ဆောင်နိုင်သည့်အရာများလည်း ရှိပါသည်။

• သိမှုဆိုင်ရာပြောင်းလဲမှုများကို သတိထားစောင့်ကြည့်ပါ။ ကင်ဆာကုသမှုများနှင့်ပတ်သက်သော ဘေးထွက်ဆိုးကျိုးများဖြစ်လာနိုင်ခြေနှင့် ရေရှည်အကျိုးသက်ရောက်နိုင်မှုတို့ကို သင့်အားကုသပေးနေသည့်အဖွဲ့ကို မေးမြန်းပါ။ သိမှုဆိုင်ရာပြဿနာများ၏ လက္ခဏာရပ်များကို စောင့်ကြည့်နေပါ။ ကလေးများနားလည်စေရန် ရောဂါလက္ခဏာရပ်များအကြောင်းကို ရှင်းပြပေးပါ။ သိမှုဆိုင်ရာပြောင်းလဲမှုများသည် ကြောက်စရာကောင်းနေနိုင်သည်။ အထူးသဖြင့် ဖြစ်လာမည့်အရာကို သင်ကြိုတင်မသိရှိထားပါက ပိုဆိုးတတ်သည်။
• သိမှုဆိုင်ရာ ပြဿနာများအတွက် အကူအညီတောင်းခံပါ။ ဦးနှောက်အာရုံကြောနှင့်စိတ်ကုသပေးသူများ၊ စိတ်ကျန်းမာရေးဆရာဝန်များ၊ သင်ကြားမှုဆိုင်ရာအထူးကုများ စသူတို့က ပြဿနာများကို ရှာဖွေဆန်းစစ်ရာတွင် ကူညီပေးနိုင်ပြီး၊ စာသင်ကျောင်း သို့မဟုတ် အလုပ်တို့အတွက် လမ်းညွှန်ပေးနိုင်သည်။ အထူးသဖြင့် နောင်အခါတွင် သိမှုအားထိခိုက်နိုင်ခြေမြင့်မားနိုင်သည့် လူနာများအတွက် စောစောစီးစီးကုသမှု ပြုလုပ်ရန် အရေးကြီးသည်။ အထူးသဖြင့် အာရုံစိုက်မှုနှင့် အာရုံစူးစိုက်မှုတို့ကိုကုရာတွင် လူနာတချို့မှာ ဆေးဝါးကုသမှုများကြောင့် သက်သာသွားနိုင်သည်။ ကင်ဆာလူနာများတွင် သိမှုဆိုင်ရာ လုပ်ငန်းစွမ်းဆောင်မှုကို တိုးတက်လာစေနိုင်သည့် ဆေးများတွင် methylphenidate (မယ်သဖီလ်နဒိတ်) (Ritalin®) နှင့် modafinil (မာဒါဖီနေးလ်) (Provigil®) ဆေးတို့ ပါဝင်သည်။
• ကျန်းမာရေးနှင့် ညီညွတ်သော အလေ့အထကောင်းများကို ကျင့်သုံးပါ။ ကိုယ်ခန္ဓာကျန်းမာစေသည့် အလေ့အထများမှာ စိတ်ကျန်းမာရေးကိုသာမက သိမှုဆိုင်ရာ လုပ်ငန်းစွမ်းဆောင်မှုတို့အတွက်ပါ ကောင်းမွန်စေသည်။
  • အားကစားလုပ်ခြင်းနှင့် တက်ကြွစွာနေခြင်း။
  • ကျန်းမာရေးနှင့် ညီညွတ်စွာ စားခြင်း။
  • ကောင်းမွန်သော အိပ်စက်သည့် အလေ့အထများ ရှိခြင်း။
  • စိတ်ဖိစီးမှုကို ထိန်းချုပ်ခြင်း။
• စာသင်ကျောင်း အထောက်အကူအတွက် စီစဉ်ခြင်း။ ကလေးများနှင့် ဆယ်ကျော်သက်တို့သည် ကင်ဆာကုသပြီးနောက်ပိုင်း ကျောင်းသွားရာတွင် စိန်ခေါ်မှုများစွာကို ရင်ဆိုင်ရနိုင်သည်။ ပညာရေးနှင့်ပတ်သက်သော အကြံပြုချက်များနှင့် လေ့လာဖတ်ရှုနိုင်သည့် စာအုပ်စာတမ်းတို့အကြောင်းကို ဆရာ/ဆရာမ၊ ကျောင်းအုပ်ချုပ်ရေးအဖွဲ့တို့နှင့် ဆွေးနွေးပြောဆိုပါ။ ကျောင်းသားတစ်ဦးချင်း၏ လိုအပ်ချက်များနှင့် ကိုက်ညီမှုရှိစေမည့် အစီအစဉ်တစ်ခုကို ရေးဆွဲပါ။

ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများ သက်သာစေရန် လက်တွေ့လုပ်ဆောင်နိုင်သည့် နည်းလမ်းများ

လူနာအများစုအတွက် သိမှုဆိုင်ရာလုပ်ငန်းများသည် အချိန်ကြာလာသည်နှင့်အမျှ တိုးတက်ကောင်းမွန်လာပါလိမ့်မည်။ သို့သော်လည်း ကီမို ဦးနှောက်နှင့် သိမှုဆိုင်ရာ ပြဿနာများကို နေ့စဉ်ဖြေရှင်းရာတွင် လက်တွေ့ လုပ်ဆောင်နိုင်သည့် နည်းလမ်းတချို့လည်း ရှိနေပါသည်။ လူနာများနှင့် မိသားစုဝင်များက ၎င်းတို့၏လိုအပ်ချက်များနှင့်ကိုက်ညီသည့် နည်းဗျူဟာများကို အတူတကွ ဖော်ထုတ်နိုင်သည်။ အသက်အရွယ်နှင့် သင့်တော်သော နည်းဗျူဟာများ ဖြစ်ပါစေ။ အစီအစဉ်ချမှတ်ရာတွင် လူနာများ၏ ပြောဆိုချက်များလည်း ပါဝင်ပါစေ။

မှတ်ဉာဏ်အထောက်အကူပြု ပစ္စည်းများ အသုံးပြုပါ။ ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများတွင် မှတ်ဉာဏ်ပြဿနာများကို အတွေ့ရများသည်။ ပြက္ခဒိန်များ၊ မှတ်စုများ၊ လုပ်ဆောင်ရမည့်စာရင်းများနှင့် မကြာခဏ အသိပေးချက်များ စသည်တို့ကို အသုံးပြုခြင်းအားဖြင့် လူနာများသည် ၎င်းတို့၏တစ်နေ့တာကို ကောင်းစွာစီမံနိုင်ပြီး အလုပ်တာဝန်များ ပြီးမြောက်အောင်မြင်စေပါသည်။

• လုပ်ဆောင်ရမည့်စာရင်းတစ်ခု ပြုစုထားပြီး လုပ်ဆောင်ပြီးစီးပါက အမှန်ခြစ်လိုက်ပါ။
• ဆေးသောက်ရန် သို့မဟုတ် အလုပ်တာဝန်များလုပ်ဆောင်ရန် အသိပေးနိုင်ရန် နှိုးစက်ပေးထားပါ။
• စာအုပ် သို့မဟုတ် ပြက္ခဒိန်ထဲတွင် အသေးစိတ်အစီအစဉ်တစ်ခု ဆွဲထားပါ။ ပြက္ခဒိန်ထဲတွင် လုပ်ဆောင်ချက်များရေးမှတ်ရန် မိသားစုဝင်တိုင်းအတွက် သီးသန့်ကွက်လပ် ထားပေးပါ။
• သင်ခန်းစာများနှင့် အိမ်စာများအတွက် မှတ်စုအားလုံးရှိနေစေရန် ဆရာ/ဆရာမတို့နှင့် လက်တွဲလုပ်ဆောင်ပါ။
• အချိန်ဇယားအပြောင်းအလဲများနှင့် အခြားအရေးကြီး သတင်းအချက်အလက်များအတွက် စာဖြင့်သတိပေးချက်ကို သုံးပါ။

နေ့စဉ်လုပ်ဆောင်နေကျကိစ္စများကို ပုံမှန်လုပ်ဆောင်ပါ။ မှတ်ဉာဏ်နှင့် အာရုံစိုက်မှုပိုကောင်းလာစေရန် စဉ်ဆက်မပြတ်လုပ်ဆောင်ခြင်းကသာ အခရာဖြစ်သည်ကို မိသားစုဝင်များက တွေ့ရှိထားသည်။ ပြောင်းလဲမှုမရှိသော နေ့စဉ်ပုံမှန်လုပ်ဆောင်မှုတစ်ခုသည် စိတ်ဖိစီးမှုနှင့် စိုးရိမ်သောကတို့ကို လျော့ပါးစေသည်။ အဘယ်ကြောင့်ဆိုသော် ကလေးများသည် ၎င်းတို့ဘာကိုမျှော်လင့်ထားရမည်ကို ကြိုတင်သိရှိထားသောကြောင့် ဖြစ်သည်။

• နေ့စဉ်နေ့တိုင်း အချိန်မှန်မှန် အိပ်ယာထပါ။ အိပ်ယာဝင်ပါ။
• အိမ်စာလုပ်ချိန်၊ ကစားချိန်၊ အစာစားချိန်၊ အိပ်ချိန် သတ်မှတ်ထားပါ။
• လမ်းလျှောက်ခြင်း၊ စက်ဘီးစီးခြင်း သို့မဟုတ် ကားမောင်းခြင်း တို့အတွက် တူညီသောလမ်းကြောင်းကိုသာ အသုံးပြုပါ။
• ဆေးသောက်ချိန်များနှင့် ကုသမှုနှင့်ဆိုင်သော လုပ်ဆောင်မှုများကို နေ့စဉ်နေ့တိုင်း အချိန်တသမတ်တည်း ထား၍ လုပ်ဆောင်ပါ။
• အသုံးအဆောင်များကို ထားနေကျနေရာမှာ ထားပါ။ အထားမှားလေ့ရှိသည့် ပစ္စည်းများကို အပိုဆောင်ထားပါ (ဖိနပ်များ၊ ကုတ်အင်္ကျီများ၊ ဖတ်စာအုပ်များ၊ သော့များ)။

တစ်ကြိမ်လျှင် အကြောင်းအရာတစ်ခုကိုသာ အာရုံစိုက်ထားပါ။ ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများကို ရင်ဆိုင်ဖြေရှင်းနေရသည့် လူနာများအတွက် အလုပ်တာဝန်များစွာကို တစ်ပြိုင်နက်လုပ်‌ဆောင်ရပါက ခက်ခဲနိုင်သည်။ တစ်ခုခုလုပ်နေစဉ် အာရုံလွဲသွားစေနိုင်သည့် ကိစ္စတို့ကို ကန့်သတ်ထားပါ။ အလုပ်တာဝန်များကို ရှင်းလင်းလွယ်ကူသော အဆင့်ငယ်လေးများအဖြစ် ခွဲခြမ်းလိုက်ပါ။ တစ်ကြိမ်ကို အဆင့်တစ်ခု လုပ်ဆောင်ပါ။

• အိမ်စာလုပ်ခြင်း၊ စာဖတ်ခြင်း သို့မဟုတ် ပရောဂျက်လုပ်ခြင်းတို့အတွက် ဆိတ်ငြိမ်သည့်နေရာတစ်ခု ဖန်တီးထားပါ။
• ကျောင်းသွားချိန် သို့မဟုတ် အိပ်ယာဝင်ချိန်ရောက်လျှင် တီဗွီ၊ သီချင်းတို့ကို ပိတ်လိုက်ပါ။
• ရှုပ်ထွေးသောအလုပ်တာဝန်များအတွက် လမ်းညွှန်ချက်များ ချရေးထားပါ။
• စာသင်ခန်းတွင် နေရာချရန် ဥပမာ။ ။ ရှေ့ဆုံးတန်းတွင်ထိုင်ခြင်း၊ စာမေးပွဲများနှင့် တစ်ဦးချင်း လုပ်ဆောင်မှုများတွင် အချိန်ပိုပေးခြင်း၊ တစ်ဦးတည်းသီးသန့်ထားခြင်း စသည့်ကိစ္စရပ်များအတွက် ဆရာ/ဆရာမများနှင့် လက်တွဲလုပ်ဆောင်ပါ။

စိတ်ပိုင်းဆိုင်ရာ ကျွမ်းကျင်မှုရှိစေရန် လေ့ကျင့်ခြင်း။ ကီမို ဦးနှောက်နှင့် သိမှုဆိုင်ရာ ဘေးထွက်ဆိုးကျိုးများ၏ သက်ရောက်မှုမှာ တစ်ယောက်စီတွင် မတူညီကြပါ။ လူနာတချို့တွင် မှတ်ဉာဏ်ပိုင်းကို ပိုထိခိုက်မိသော်လည်း တချို့တွင်မူ အာရုံစူးစိုက်မှုအပိုင်းကို ပိုထိခိုက်မိနိုင်သည်။ ဂိမ်းများ၊ ပဟေဠိများ၊ လုပ်ဆောင်မှုများ စသည်တို့ပြုလုပ်ခြင်းဖြင့် စိတ်ကိုလေ့ကျင့်ပါ။ ကျွမ်းကျင်မှုများရလာစေရန် ပျော်စရာကောင်းသည့် နည်းလမ်းများရှာဖွေပါ။ အသက်အရွယ်အလိုက်၊ စွမ်းဆောင်ရည်အလိုက် ကိုက်ညီမှုရှိသော နည်းလမ်းတို့ကိုသာ ရွေးချယ်ပါ။

• မှတ်ဉာဏ်၊ နည်းဗျူဟာ သို့မဟုတ် ‌ဆင်ခြင်တွေးခေါ်မှုတို့ကို အသုံးချရသည့် ဂိမ်းကစားနည်းမျိုးစုံကို စမ်းသပ်ကြည့်ပါ။
• စိတ်နှင့် ကိုယ် လိုက်လျောညီထွေလုပ်ဆောင်ရသော ကိုယ်လက်လှုပ်ရှားမှုများ လုပ်ပါ။
• စကားလုံးရှာဖွေခြင်းတွင် အထောက်အကူဖြစ်စေရန်နှင့် ဝေါဟာရကြွယ်ဝလာစေရန် စကားလုံးဂိမ်းများ ကစားပါ။
• လုပ်ဆောင်မှုများသည် ပျော်ရွှင်စရာကောင်းပါစေ။ စိတ်ဖိစီးစေသည့် ကစားမှုများ မဖြစ်ပါစေနှင့်။ စိုးရိမ်သောက၊ နုံးခွေခြင်း သို့မဟုတ် စိတ်ပျက်လက်ပျက်ဖြစ်ခြင်းတို့ ရှိမရှိ စောင့်ကြည့်နေပါ။

ကီမို ဦးနှောက်နှင့် သိမှုဆိုင်ရာ လုပ်ငန်းတို့နှင့်ပတ်သက်သော သတင်းအချက်အလက်များကို ထပ်မံရှာဖွေပါ

• ကင်ဆာကုသပြီးနောက် သင်ယူမှု ပြဿနာများ
  
• လူနာများအတွက် သတင်းအချက်အလက်နှင့် ရင်းမြစ်များ စင်တာ
• ကျောင်းတွင်နေရာချထားခြင်းအတွက် လူနာထံမှ ပေးစာနမူနာ
• စိတ်ပိုင်းဆိုင်ရာကြွက်သားများ အကြောလျော့စေခြင်း
• သိမှုနှင့် ဦးနှောက်ကင်ဆာအလုံးများ
• ကလေးဦးနှောက်ကင်ဆာအလုံး ဖောင်ဒေးရှင်း
• မှတ်ဉာဏ် သို့မဟုတ် အာရုံစူးစိုက်ခြင်းဆိုင်ရာ ပြဿနာများနှင့် ကင်ဆာကုသမှု