ပြင်းထန်သောဝေဒနာများခံစားနေရသည့် ကလေးများအတွက် ယောဂကျင့်စဉ်

ယောဂကျင့်ခြင်းသည် စိတ်သက်သာမှုနှင့် နိုးကြားသတိရှိမှုကို မြှင့်တင်ပေးရန် မွေ့လျော်ဖွယ်ကောင်းသော နည်းလမ်းဖြစ်သည်။ ၎င်းသည် ခန္ဓာကိုယ်အား ထိုးဖောက်မှုမရှိဘဲ ဘေးကင်းစိတ်ချရသော၊ သင့်ကလေးများနှင့်အတူ လုပ်ဆောင်နိုင်သည့် လှုပ်ရှားမှုတစ်ခုဖြစ်သည်။ အသက်အရွယ်နှင့် လုပ်ဆောင်နိုင်စွမ်း ကွဲပြားသည့် ကလေးများအနေဖြင့် ယောဂကျင့်နိုင်ပြီး ယောဂကျင့်စဉ်ကို လိုအပ်သလို ပိုမိုလွယ်ကူအောင် သို့မဟုတ် ပိုမိုခက်ခဲအောင် ပြုလုပ်နိုင်သည်။

ယောဂကျင့်ခြင်းသည် ကင်ဆာ၊ သွေးတံစဉ်ဆဲလ်ရောဂါနှင့် အခြားပြင်းထန်သော ဝေဒနာများအတွက် ကုသမှုခံယူစဉ် ကလေးများ ကြုံတွေ့ရသည့် ရောဂါလက္ခဏာများကို လျော့ပါးသက်သာစေနိုင်သည်။

ယောဂကျင့်ခြင်း၏ ကောင်းကျိုးအချို့တွင် ပါဝင်သည်များ-

• အကိုက်အခဲ သက်သာလျော့ပါးခြင်း
• စိတ်သက်သာရာရခြင်း
• ခန္ဓာကိုယ် ပိုမိုပျော့ပျောင်းလာခြင်း
• ကိုယ်လက်ကြံ့ခိုင်မှု ပိုမိုကောင်းမွန်လာခြင်း
• ပို၍ ခံနိုင်ရည်အားကောင်းလာခြင်း
• လဲကျနိုင်ခြေ လျော့နည်းသွားခြင်း
• ပင်ပန်းနွမ်းနယ်မှု လျော့နည်းသွားခြင်း
  

ပြင်းထန်သော ဝေဒနာများခံစားနေရသည့် ကလေးများအတွက် ဆရာဝန်များ သို့မဟုတ် ကျန်းမာရေးစောင့်ရှောက်မှုပေးသူများထံမှ ကုသမှုများ သို့မဟုတ် အကြံပြုချက်များကို ယောဂကျင့်စဉ်နှင့် အစားမထိုးသင့်ပါ။

ယောဂကျင့်စဉ်အပါအဝင် – မည်သည့်လှုပ်ရှားမှုအသစ်ကိုမျှ – သင့်ကလေး၏ ဆရာဝန်နှင့် ဆွေးနွေးတိုင်ပင်မှုမရှိဘဲ မစတင်ပါနှင့်။ ယောဂကျင့်စဉ်နှင့် အခြားရွေးချယ်စရာများအကြောင်းကို သင့်ကလေး၏ ကာယကုထုံးပညာရှင်၊ ဆရာဝန် သို့မဟုတ် ပြုစုကုသရေးအဖွဲ့ထံ မေးမြန်းနိုင်သည်။

ကလေးများနှင့် မိဘများအတွက် ယောဂထိုင်နည်းပုံစံများ

ယောဂကျင့်ခြင်းသည် မိဘများနှင့် အခြားစောင့်ရှောက်မှုပေးသူများအတွက်လည်း အကျိုးကျေးဇူးရရှိနိုင်သည်။ ၎င်းသည် စိတ်ဖိစီးမှုထိန်းချုပ်ရာတွင် ကူညီပေးပြီး ကိုယ်စိတ်နှစ်ပါး ပိုမိုကျန်းမာပျော်ရွှင်စေရေးအတွက် အထောက်အကူပြုနိုင်သည်။

ထိုင်နည်းပုံစံများသည် ယောဂကျင့်နေစဉ် သင့်ခန္ဓာကိုယ်ကို ထားရှိရမည့် ကိုယ်နေဟန်ထားပုံစံများ ဖြစ်သည်။ သင်နှင့် သင့်ကလေးသည် ယောဂကျင့်ခြင်းကို စမ်းလုပ်ကြည့်လိုပါက စတင်လုပ်ဆောင်ရန် အသုံးများသည့် ထိုင်နည်းပုံစံများကို ဤတွင်ဖော်ပြထားပါသည်။

အဆိုပါထိုင်နည်းပုံစံများကို ညွှန်ကြားချက်များနှင့်အညီ ပြုလုပ်လျှင် အကောင်းဆုံးဖြစ်ပါသည်။ ထိုင်နည်းပုံစံများကို စာအုပ်တွင် ကြည့်နိုင်သည် သို့မဟုတ် ၎င်းတို့ကို မြင်တွေ့နိုင်ရန် အွန်လိုင်းဗီဒီယိုများတွင်လည်း ကြည့်ရှုနိုင်သည်။ ထိုင်နည်းပုံစံတစ်ခုခုက ထိခိုက်နာကျင်မှုရှိစေပါက ၎င်းကို ချက်ချင်းရပ်တန့်ပြီး ဆရာဝန်နှင့် ဆွေးနွေးတိုင်ပင်ပါ။

ကလေးများအတွက် ယောဂကျင့်စာအုပ်များ

• ABC Yoga (ABC ယောဂ)- A Pose-by-Pose Wake Up Story (ယောဂထိုင်နည်းအဆင့်ဆင့် နိုးကြားမှုဇာတ်လမ်း) ရေးသူ Christiane Engel
• Zoo Zen- A Yoga Story for Kids (ကလေးများအတွက် ယောဂကျင့်စဉ်ပုံပြင်) ရေးသူ Kristen Fischer နှင့် Susi Schaefer
• You Are a Lion! And Other Fun Yoga Poses (သင်ဟာ ခြင်္သေ့တစ်ကောင်ပါနှင့် အခြားသော ပျော်စရာ ယောဂထိုင်နည်းများ) ရေးသူ Taeeun Yoo
• Good Morning Yoga (ယောဂကျင့်စဉ်နှင့် တစ်မနက်တာ)- A Pose-by-Pose Wake Up Story (ယောဂထိုင်နည်းအဆင့်ဆင့် နိုးကြားမှုဇာတ်လမ်း) ရေးသူ Mariam Gates နှင့် Sarah Jane Hinder