ကလေးဘဝကင်ဆာအတွက် ဓာတ်ရောင်ခြည် ကုထုံး

ဓာတ်ရောင်ခြည်ကုထုံးဆိုသည်မှာ အဘယ်နည်း။

ဓာတ်ရောင်ခြည်ကုထုံး (ဓာတ်ရောင်ခြည် ကုထုံးဟုလည်း ခေါ်သည်) သည်အကျိတ်များကို ကျုံ့စေ၍ကင်ဆာဆဲလ်များကို သတ်ရန် မြင့်မားသောစွမ်းအင် x-rays (ဖိုတွန်) သို့မဟုတ် ပရိုတွန်များကို အသုံးပြုပါသည်။ ဓာတ်ရောင်ခြည်သည် ကင်ဆာဆဲလ်များကို ပျက်စီးစေသောကြောင့် ၎င်းတို့ ကြီးထွားခြင်းနှင့် ပွားခြင်းတို့ ရပ်တန့်သွားပါသည်။ 

တစ်ခါတစ်ရံတွင် ဓာတ်ရောင်ခြည်ကုထုံးသည် သင့်ကလေးလိုအပ်သည့် တစ်ခုတည်းသော ကုသမှု ဖြစ်နိုင်ပါသည်။ သို့မဟုတ် ဓာတ်ရောင်ခြည်ကုထုံးကို ခွဲစိတ်ခြင်းနှင့် ကင်ဆာဆေးသွင်းကုသခြင်းကဲ့သို့သော အခြားကုသမှုများနှင့် အတူ တွဲ၍ အသုံးပြုနိုင်ပါသည်။ 

ဓာတ်ရောင်ခြည်သည် ကင်ဆာကို ပစ်မှတ်ထားသော်လည်း ၎င်းသည် အနီးအနားရှိ ကျန်းမာသောတစ်ရှူးများကို ထိခိုက်စေပြီး ဘေးထွက်ဆိုးကျိုးများကို ဖြစ်စေနိုင်ပါသည်။ သင်၏ စောင့်ရှောက်မှုအဖွဲ့သည် ထိရောက်မှုနှင့် ဘေးကင်းမှုအတွက် ကုသမှုများကို စီစဉ်ပေးမည် ဖြစ်ပါသည်။ 

ဓာတ်ရောင်ခြည်ကုထုံး အမျိုးအစားများ

ဓာတ်ရောင်ခြည်ကုထုံးကို နည်းလမ်းအမျိုးမျိုးဖြင့် ပေးနိုင်ပါသည်။ အမျိုးအစားများတွင် အောက်ပါတို့ ပါဝင်ပါသည်- 

• ခန္ဓာကိုယ်ပြင်ပမှပေးသည့် ဓာတ်ရောင်ခြည်ကုထုံး- ခန္ဓာကိုယ်ပြင်ပမှ စက်တစ်ခုသည် ခန္ဓာကိုယ်၏ နေရာတစ်ခုသို့ မြင့်မားသောစွမ်းအင်ဖြင့် ဓာတ်ရောင်ခြည်များကို ပို့လွှတ်ပါသည်။ ပရိုတွန် ဓာတ်ရောင်ခြည်ပေးခြင်းကုထုံးသည် ခန္ဓာကိုယ်ပြင်ပမှပေးသည့် ဓာတ်ရောင်ခြည် ကုထုံးတစ်မျိုး ဖြစ်ပါသည်။ 
• ခန္ဓာကိုယ်အတွင်းပိုင်းမှပေးသည့် ဓာတ်ရောင်ခြည်ကုထုံး- ဓာတ်ရောင်ခြည်ကို ခန္ဓာကိုယ်အတွင်းပိုင်းသို့ ပေးနိုင်သည် သို့မဟုတ် ထည့်သွင်းနိုင်ပါသည်။ ဥပမာများတွင် brachytherapy နှင့် MIBG ကုထုံးတို့ ပါဝင်ပါသည်။   
• တစ်ကိုယ်လုံး ဓါတ်ရောင်ခြည်ကုထုံး- ဓါတ်ရောင်ခြည်ကို တစ်ခါတစ်ရံတွင် ခန္ဓာကိုယ်တစ်ခုလုံးသို့ တစ်ကိုယ်လုံး ဓါတ်ရောင်ခြည်ကုထုံး (TBI) သို့မဟုတ် ပြန်ရည်ကြောစနစ် ပြန်ရည်ကြောအားလုံး ဓာတ်ရောင်ခြည်ကုထုံးဖြင့် ပေးလေ့ရှိပါသည်။ ဤကုသမှုများသည် ပင်မဆဲလ် (ရိုးတွင်းခြင်ဆီ) အစားထိုးကုသမှုအချို့၏ တစ်စိတ်တစ်ပိုင်း ဖြစ်နိုင်ပါသည်။ 

ဓာတ်ရောင်ခြည်ကုထုံး၏ အကျိုးကျေးဇူးများ

ဓါတ်ရောင်ခြည်ကုထုံးသည် သင့်ကလေး၏ ရောဂါရှာဖွေဖော်ထုတ်မှုနှင့် ကုသမှုအစီအစဉ်ပေါ် မူတည်၍ ရည်မှန်းချက်များ ကွဲပြားနိုင်ပါသည်။ ၎င်းကို အောက်ပါတို့အတွက် အသုံးပြုနိုင်ပါသည်- 

• ကင်ဆာဆဲလ်များကို ပစ်မှတ်ထားရန်၊ ကျုံ့စေရန်နှင့် ဖျက်ဆီးရန်  
• ခွဲစိတ်မှုကို ပိုမိုလွယ်ကူစေရန် သို့မဟုတ် သင့်ကလေးသည် ခွဲစိတ်မှုကို ရှောင်ရှားနိုင်ရန်အတွက် ကူညီပေးရန် 
• အခြားကုသမှုများကို ပြုလုပ်ပြီးနောက်တွင် ကင်ဆာ ပြန်လည်ဖြစ်ပွားခြင်းကို ကာကွယ်ရန် 
• နာကျင်ခြင်း၊ သွေးထွက်ခြင်း သို့မဟုတ် အသက်ရှူမဝခြင်းကဲ့သို့သော ရောဂါလက္ခဏာများကို သက်သာစေရန် (ဝေဒနာသက်သက်မျှကိုသာ သက်သာပျောက်ကင်းစေသော ဓါတ်ရောင်ခြည်ကုထုံးဟု ခေါ်သည်) 
• ကင်ဆာဆေးသွင်းကုသခြင်းကဲ့သို့သော အခြားကုသမှုများနှင့်အတူ တွဲ၍ လုပ်ဆောင်ရန် 

ဓါတ်ရောင်ခြည်ကုထုံး မစတင်မီ

တိုင်ပင်ဆွေးနွေးခြင်း

သင်သည် ဓါတ်ရောင်ခြည်ကုထုံးအဖွဲ့ဝင်များနှင့် တွေ့ဆုံရပါမည်။ ၎င်းတို့သည် ကုသမှုလုပ်ငန်းစဉ်နှင့် ဘေးထွက်ဆိုးကျိုးများကို ရှင်းပြပေးပါလိမ့်မည်။ ၎င်းတို့သည် သင်၏မေးခွန်းများကိုလည်း ဖြေဆိုပေးပါလိမ့်မည်။ ရေးမှတ်ရန်အတွက် သင်နှင့်အတူ တစ်စုံတစ်ယောက်ကို ခေါ်ဆောင်လာခြင်းသည် အထောက်အကူဖြစ်စေနိုင်ပါသည်။ ချိန်းဆိုမှုပြီးနောက် သင့်တွင် မေးခွန်းများထပ်မံရှိခဲ့ပါက သင်၏စောင့်ရှောက်မှုအဖွဲ့သို့ ဆက်သွယ်နိုင်ပါသည်။ 

ဓာတ်ရောင်ခြည်ဆိုင်ရာ သရုပ်ဖော်စမ်းသပ်ဆောင်ရွက်ခြင်း

ဓာတ်ရောင်ခြည်ဆိုင်ရာ သရုပ်ဖော်စမ်းသပ်ဆောင်ရွက်ခြင်းသည် သင့်ကလေး၏ ဓာတ်ရောင်ခြည်ကုသမှုကို စီစဉ်ရာတွင် ပထမဆုံးအဆင့် ဖြစ်ပါသည်။ သင့်ကလေးသည် CT စကန်  သို့မဟုတ် MRI ကဲ့သို့သော ပုံရိပ်ဖော်စစ်ဆေးမှုများကို ပြုလုပ်ရမည် ဖြစ်ပါသည်။ ၎င်းသည် သင့်အဖွဲ့အား အကျိတ်၏တည်နေရာ (သို့မဟုတ် ရှိခဲ့သည့်) ကို မြင်တွေ့ရန် ကူညီပေးနိုင်ပြီး ကုသမှုအတွက် သင့်ကလေးအား မည်သို့နေရာချထားရမည်ကို သိရှိစေပါသည်။ 

စောင့်ရှောက်မှုအဖွဲ့သည် ဓာတ်ရောင်ခြည်ကုသမှုအတွက် နေရာချထားရန် သင့်ကလေးကို အမှတ်အသားငယ်များ သို့မဟုတ် တက်တူးများကို ပြုလုပ်ပေးမည် ဖြစ်ပါသည်။ ကုသမှုခံယူနေစဉ်အတွင်းတွင် သင့်ကလေးသည် မှန်ကန်သောအနေအထားဖြင့် ငြိမ်ငြိမ်လေးနေနိုင်စေရန် ၎င်းတို့သည် မျက်နှာဖုံး သို့မဟုတ် ခန္ဓာကိုယ်ပုံစံခွက်ကိုလည်း ပြုလုပ်နိုင်ပါသည်။ 

ကုသမှု အစီအစဉ်ဆွဲခြင်း 

ဓာတ်ရောင်ခြည်ဆိုင်ရာ ကင်ဆာအထူးကုဆရာဝန်သည် ဓာတ်ရောင်ခြည် ကုထုံးကို ဦးဆောင်သည့် ဆရာဝန်ဖြစ်ပါသည်။ ၎င်းတို့သည် သင့်ကလေးအတွက် ကုသမှုအစီအစဉ်တစ်ခုကို ရေးဆွဲရန် ဓာတ်ရောင်ခြည်ကုထုံးအဖွဲ့နှင့် ပူးပေါင်းလုပ်ဆောင်ကြပါသည်။ ကုသမှုအစီအစဉ်တွင် အောက်ပါတို့ ပါဝင်မည်ဖြစ်ပါသည်- 

• သင့်ကလေး ရရှိမည့် စုစုပေါင်းဓာတ်ရောင်ခြည်ပမာဏ 
• သင့်ကလေးသည် ဓာတ်ရောင်ခြည်ကုထုံးကို မည်မျှမကြာခဏ ခံယူရမည်နည်း 
• ဓာတ်ရောင်ခြည်ကို မည်သည့်နေရာသို့ ပစ်မှတ်ထားမည့်နည်း 

ကုသမှုအစီအစဉ်ကို ဆွေးနွေးခြင်း 

ဓာတ်ရောင်ခြည်ဆိုင်ရာ ကင်ဆာအထူးကုဆရာဝန်သည် အောက်ပါတို့ကို ရှင်းပြမည် ဖြစ်ပါသည်-­  

• ကုသမှုတစ်ခုစီသည် မည်မျှကြာမည်နည်း 
• ကုသမှုသည် အကြိမ်မည်မျှ လိုအပ်ပါသနည်း (များသောအားဖြင့် တစ်ပတ်လျှင် 5 ရက်ဖြင့် 1–7 ပတ်) 
• ကုသမှုများကြားရှိ အနားယူချိန်များ 
• ငြိမ်ငြိမ်လေးနေခြင်းသည် မည်သည့်အတွက်ကြောင့် အရေးကြီးသနည်း 
• မည်သည့်ဘေးထွက်ဆိုးကျိုးများကို သတိထားကြည့်ရမည်နည်း 
• ဓာတ်ရောင်ခြည်ကုထုံးခံယူနေစဉ်အတွင်း သင့်ကလေးကို ဘေးကင်းလုံခြုံစေပြီး သက်တောင့်သက်သာရှိစေရန်အတွက် အောက်ပါတို့ပါဝင်နိုင်သည့် စိတ်ကြိုက်ပြင်ဆင်ထားသော အစီအစဉ်တစ်ခု- 
  • မေ့ဆေး 
  • စိတ်ငြိမ်ဆေးများ 
  • အခြား သက်သောင့်သက်သာဖြစ်စေနိုင်မည့် နည်းစနစ်များ

ကလေးဘဝအထောက်အပံ့ပညာရှင်သည် သင့်ကလေးနားလည်မည့်နည်းလမ်းဖြင့် သင့်ကလေးအား ဓာတ်ရောင်ခြည်ကုထုံးကို ရှင်းပြရန် ကူညီပေးနိုင်ပါသည်။ 

ဓာတ်ရောင်ခြည်ကုထုံးခံယူနေစဉ်အတွင်း မျှော်လင့်ထားရမည့်အရာများ

ပုံမှန်အားဖြင့် ဓာတ်ရောင်ခြည်ကုသမှုကို ပြင်ပလူနာအဖြစ် ပေးလေ့ရှိသောကြောင့် သင့်ကလေးသည် ဆေးရုံတက်၍ ညအိပ်ရန် မလိုအပ်ပါ။ အကယ်၍ မေ့ဆေးလိုအပ်ပါက သင့်ကလေးသည် မေ့ဆေးပေးရန်အတွက် သီးခြားပြသချိန်းဆိုမှုတစ်ခု ရှိမည်ဖြစ်ပါသည်။  

မှတ်ပုံတင်ခြင်းနှင့် စာရင်းသွင်းခြင်းအတွက် သင့်စောင့်ရှောက်မှုစင်တာ၏ အဆင့်များကို လိုက်နာဆောင်ရွက်ပါ။ မှတ်ပုံတင်ခြင်း ပြုလုပ်နေစဉ်အတွင်း သင်သည် အောက်ပါတို့ကို လုပ်ဆောင်ရနိုင်ပါသည်- 

• မှတ်ပုံတင်ကောင်တာတွင် စာရင်းသွင်းပါ။ 
• ကုသမှုပြုလုပ်မည့်အခန်းသို့ ဝန်ထမ်းတစ်ဦးနှင့် အတူ သွားပါ။ 
• မေ့ဆေးပေးရန်လိုအပ်ပါက မေ့ဆေးအဖွဲ့နှင့် တွေ့ဆုံဆွေးနွေးပါ။ 

သင့်ကလေးသည် ကုကုသမှုပြုလုပ်မည့်အခန်းထဲသို့ ရောက်ရှိသည်နှင့်- 

• အဖွဲ့သည် သရုပ်ဖော်စမ်းသပ်ဆောင်ရွက်ခြင်းအတွင်း ပြုလုပ်ထားသည့် အမှတ်အသားများ၊ မျက်နှာဖုံး သို့မဟုတ် ခန္ဓာကိုယ်ပုံစံခွက်များကို အသုံးပြု၍ သင့်ကလေးကို စားပွဲပေါ်တွင် နေရာချပေးမည် ဖြစ်ပါသည်။ သင့်ကလေးကို နေရာချထားခြင်းသည် တကယ့်ဓာတ်ရောင်ခြည်ကုသမှုထက် အချိန်ပိုကြာလေ့ရှိပါသည်။  
• ကုထုံးပညာရှင်သည် ကုသမှုစတင်ရန်အတွက် အခန်းမှ ထွက်ခွာသွားမည် ဖြစ်ပါသည်။ ၎င်းတို့သည် သင့်ကလေးကို အချိန်ပြည့် မြင်တွေ့၍ စကားပြောဆိုနိုင်ပါသည်။ 
• ဓာတ်ရောင်ခြည်စက်သည် ကုသမှုနေရာကို ပစ်မှတ်ထားရန်အတွက် နေရာယူပါလိမ့်မည်။ သင့်ကလေးသည် နေရာချထားရန် အထောက်အကူဖြစ်စေသည့် လေဆာအစက်များကို မြင်တွေ့ရနိုင်ပါသည်။ သူတို့သည် ၎င်းတို့ကို ခံစားမိမည် မဟုတ်ပါ။ 
• သင့်ကလေးသည် ဓာတ်ရောင်ခြည်ကို ခံစားရမည် သို့မဟုတ် တွေ့မြင်ရမည် မဟုတ်ပါ။ ၎င်းသည် နာကျင်မှုမရှိပါ။ သင့်ကလေးသည် စက်မှ အသံတစ်ခုခုကို ကြားရနိုင်ပါသည်။ 

ဓာတ်ရောင်ခြည်ကုသမှုအတွက် ပြင်ဆင်မှုဆိုင်ရာ အကြံပြုချက်များ 

• ပြသမှုများအတွက် အချိန်မှန် သို့မဟုတ် မိနစ်အနည်းငယ်စော၍ ရောက်ရှိအောင်ပြုလုပ်ပါ။ နောက်ကျပါက ပို၍ကြာအောင် စောင့်ရနိုင်ပါသည်။ 
• ဓာတ်ရောင်ခြည် ကုသမှုကာလအတွင်း မျက်နှာဖုံးကို အသုံးပြုပါက သင့်ကလေး၏ ဆံပင်ပုံစံသည် မျက်နှာဖုံးပြုလုပ်ချိန်ကအတိုင်း အတူတူပင်ဖြစ်ရမည်။   
• သင့်ကလေးကို တီရှပ်နှင့် ဘောင်းဘီအပွ၊ ညအိပ်ဘောင်းဘီအောက်ခံ သို့မဟုတ် အခြားဆွဲသားဘောင်းဘီကဲ့သို့သော ချောင်ချောင်ချိချိနှင့် သက်တောင့်သက်သာရှိသော အဝတ်အစားများကို ဝတ်ဆင်စေပါ။ 
• စောင့်ရှောက်မှုစင်တာများသည် ကုထုံးဆိုင်ရာအပိုင်းများကို ကြည့်ရှုခြင်းနှင့် ပတ်သက်သည့် စည်းမျဉ်းများသည် မတူညီပါ။ အချို့သည် ပြုစုစောင့်ရှောက်သူများအား အနီးနားရှိအခန်းမှ ကြည့်ရှုခွင့်ပေးပါသည်၊ သို့မဟုတ် သင်သည် စောင့်ဆိုင်းရန်နေရာတွင် စောင့်ဆိုင်းရန် လိုအပ်နိုင်ပါသည်။ အများအားဖြင့် မောင်နှမများသည် လူကြီးတစ်ဦးနှင့်အတူ စောင့်ဆိုင်းရန်နေရာတွင် နေထိုင်ရန် လိုအပ်နိုင်သောကြောင့် ၎င်းတို့ကို ပြုစုစောင့်ရှောက်ရန်အတွက်လည်း ကြိုတင်စီစဉ်ထားပါ။   

ဓာတ်ရောင်ခြည် ကုထုံးပြီးနောက်တွင်

အကယ်၍ မေ့ဆေးမသုံးပါက သင့်ကလေးသည် ကုသမှုပြီးဆုံးသည်နှင့် ၎င်းတို့၏ပုံမှန်လုပ်ငန်းဆောင်တာများကို ပြန်လည်လုပ်ဆောင်နိုင်ပါသည်။ အကယ်၍ မေ့ဆေးသုံးခဲ့ပါက သင့်ကလေးသည် နိုးလာ၍ ပြန်လည်ကောင်းမွန်လာရန် အချိန်လိုအပ်ပါလိမ့်မည်။  

ဓာတ်ရောင်ခြည်ကုထုံး အမျိုးအစားအများစုအတွက် ကုသမှုပြီးနောက် ထိတွေ့မှု (ပွေ့ဖက်ခြင်း၊ ထိတွေ့ခြင်း၊ ကလေးကို ပြုစုစောင့်ရှောက်ခြင်း) ဆိုင်ရာအတွက် ကန့်သတ်ချက်မရှိပါ။ အကယ်၍ စောင့်ရှောက်မှုအဖွဲ့မှ အဆင်ပြေသည်ဟု ပြောပါက သင့်ကလေးသည် ဓာတ်ရောင်ခြည်ကုထုံးပြီးပြီးချင်းတွင် ကျောင်းပြန်တက်၍ ပုံမှန်လှုပ်ရှားမှုများကို ပြုလုပ်နိုင်ပါသည်။ 

အကယ်၍ သင့်ကလေးသည် MIBG ကုထုံးကဲ့သို့သော ခန္ဓာကိုယ်အတွင်းပိုင်းမှပေးသည့် ဓာတ်ရောင်ခြည်ကုထုံးကို ခံယူပါက ကုသမှုပြီးနောက်တွင် အခြားသူများနှင့် နီးကပ်စွာထိတွေ့ခြင်းကို ရှောင်ရှားခြင်းဆိုင်ရာ စည်းမျဉ်းများ ရှိပါမည်။ အထူးသဖြင့် ကလေးငယ်များနှင့် ကိုယ်ဝန်ဆောင်အမျိုးသမီးများနှင့် ထိတွေ့မှုဆိုင်ရာအတွက် ၎င်းသည် မှန်ကန်ပါသည်။ သင့်ကလေးအတွက် သီးခြားလမ်းညွှန်ချက်များအကြောင်းကို သင်၏စောင့်ရှောက်မှုအဖွဲ့ကို မေးမြန်းပါ။  

ဓာတ်ရောင်ခြည်ကုထုံးပြီးနောက် သင့်ကလေးကို ပြုစုစောင့်ရှောက်ခြင်း 

အရေပြားကို ထိန်းသိမ်းစောင့်ရှောက်ခြင်း- သင့်ကလေး၏ အရေပြားပြောင်းလဲမှုများသည် နောက်ဆုံးဓာတ်ရောင်ခြည်ကုသမှုခံယူပြီနောက် 7–10 ရက်အတွင်း ပိုဆိုးလာနိုင်ပါသည်။ ဤအချိန်တွင် အရေပြားကို သေချာဂရုစိုက်ရန် အရေးကြီးပါသည်။  

စားခြင်းနှင့် သောက်သုံးခြင်း- ဓာတ်ရောင်ခြည်ကုသမှုပြီးနောက် သင့်ကလေးသည် ရက်သတ္တပတ်အနည်းငယ်အထိ ပုံမှန်ကဲ့သို့ ဗိုက်ဆာမည် မဟုတ်ပါ။ သင့်ကလေးသည် ကျန်းမာရေးနှင့် ညီညွတ်သည့် အစားအစာများကိုစားပြီး ရေများများသောက်ရန် အရေးကြီးပါသည်။ ၎င်းတို့သည် မအီမသာဖြစ်ခြင်း သို့မဟုတ် ပျို့အန်ခြင်းရှိပါက ညွှန်ကြားထားသည့် အအန်ပျောက်ဆေးကို တိုက်ကျွေးပါ။ အကယ်၍ ဆေးဝါးသည် မသက်သာစေပါက စောင့်ရှောက်မှုအဖွဲ့ကို ခေါ်ဆိုပါ။ 

အနားယူခြင်းနှင့် လှုပ်ရှားဆောင်ရွက်မှုများ- ကုသမှုပြီးဆုံးပြီးနောက် သင့်ကလေးသည် ရက်သတ္တပတ် သို့မဟုတ် လပေါင်းများစွာကြာသည့်အထိ အင်အားကုန်ခမ်းနေနိုင်ပါသည်။ ၎င်းတို့၏ ခန္ဓာကိုယ်သည် သူ့အလိုလို ပြန်လည်ပြုပြင်ဖို့ ကြိုးစားနေသည့်အတွက် လုံလောက်သည့် အနားယူမှု လိုအပ်ပါသည်။  

နောက်ဆက်တွဲ ကျန်းမာရေး အခြေအနေစစ်ဆေးရန် ပြသခြင်း 

သင့်ကလေးသည် နောက်ဆက်တွဲ ကျန်းမာရေးအခြေအနေကို စစ်ဆေးရန်အတွက် ဓာတ်ရောင်ခြည် ကင်ဆာအထူးကုဆရာဝန်နှင့် ပုံမှန်ပြသရန် လိုအပ်ပါလိမ့်မည်။ ၎င်းတို့တွင် ကင်ဆာသည် ကုသမှုအား မည်မျှကောင်းမွန်စွာ တုံ့ပြန်ကြောင်းကို စောင့်ကြည့်ရန် CT၊ PET စကင်န်များ သို့မဟုတ် MRI များကဲ့သို့သော ရောဂါရှာဖွေရေးဆိုင်ရာ ပုံရိပ်ဖော်စစ်ဆေးမှုများ ပါဝင်နိုင်ပါသည်။ 

ဓာတ်ရောင်ခြည်ကုထုံး၏ ဖြစ်နိုင်ချေရှိသည့် အန္တရာယ်များ

ဓာတ်ရောင်ခြည်ကုထုံးသည် အောက်ပါတို့အပါအဝင် ဘေးထွက်ဆိုးကျိုးများကို  ဖြစ်စေနိုင်ပါသည်-

• မောပန်းနွမ်းနယ်ခြင်း
• ပျို့အန်ချင်လာခြင်းနှင့် အန်ခြင်း
• အရေပြား ပြောင်းလဲမှုများ 
• ဆံပင်ကျွတ်ခြင်း
•  ခံတွင်း ပျက်ခြင်း

ဤဘေးထွက်ဆိုးကျိုးများသည် ဓာတ်ရောင်ခြည်ပေးသည့်နေရာပေါ်တွင် မူတည်ပါသည်။ အချို့ဘေးထွက်ဆိုးကျိုးများသည် ရက်သတ္တပတ် သို့မဟုတ် ရှားပါးအနဖြင့် လပေါင်းများစွာအထိ ကြာရှည်နိုင်ပါသည်။ အများစုသည် အချိန်ကြာသည်နှင့်အမျှ သက်သာပျောက်ကင်းသွားကြပါသည်။  

ဓာတ်ရောင်ခြည်၏ ရေရှည် အကျိုးသက်ရောက်မှုများ

ဓာတ်ရောင်ခြည်သည် ရေရှည်နှင့် နောင်တွင်ဖြစ်ပေါ်မည့် ဆိုးကျိုးများကို ဖြစ်စေနိုင်ပါသည်။ ဤသည်တို့မှာ ဘဝ၏ နောက်ပိုင်းတွင် ဖြစ်ပေါ်လာတတ်သည့် ဘေးထွက်ဆိုးကျိုးများ ဖြစ်ပါသည်။ 

ရှားပါးသည့် နောင်တွင်ဖြစ်ပေါ်မည့် ဆိုးကျိုးတစ်ခုမှာ ကုသထားသောနေရာတွင် ကင်ဆာဖြစ်ခြင်း ဖြစ်ပါသည်။ ကင်ဆာရောဂါရှိ၊ မရှိကို စစ်ဆေးရန်အတွက် နောက်ဆက်တွဲ ပုံမှန်ပြသစစ်ဆေးမှုများကို ပြုလုပ်ခြင်းသည် အရေးကြီးပါသည်။  

သင်၏ စောင့်ရှောက်မှုအဖွဲ့ကို မည်သည့်အချိန်တွင် ခေါ်ဆိုရမည်နည်း

သင့်ကလေးတွင် အောက်ပါတို့ ရှိပါက သင်၏စောင့်ရှောက်မှုအဖွဲ့ကို ချက်ချင်းခေါ်ဆိုပါ-

• ဖျားနာခြင်း  သို့မဟုတ် ရောဂါပိုးဝင်ခြင်း၏ ရောဂါလက္ခဏာများ
• ဓာတ်ရောင်ခြည်ကုသမှု ခံယူခဲ့သည့် အရေပြားတွင် အနီရောင်ဖြစ်ခြင်း၊ ရောင်ရမ်းခြင်း သို့မဟုတ် နာကျင်ခြင်း၊ အထူးသဖြင့် ၎င်းသည် ပိုးဝင်သည့် ပုံရပါက (ပူနွေးနေခြင်း၊ အရည်စိမ့်ထွက်ခြင်း သို့မဟုတ် အရည်ကြည်ဖုများရှိနေခြင်း)
• အသက်ရှူရန် ခက်ခဲခြင်း သို့မဟုတ် အသက်ရှူမဝခြင်း 
• ဆေးဝါးဖြင့် မသက်သာသည့် နာကျင်မှုအသစ် သို့မဟုတ် ပိုဆိုးလာသည့် နာကျင်မှု
• မရပ်သော သို့မဟုတ် သင့်ကလေးကို  အစာစားခြင်း  သို့မဟုတ် ရေသောက်ခြင်းကို  မလုပ်နိုင်အောင် တားဆီးနေသော  ပျို့အန်ခြင်း သို့မဟုတ်  ဝမ်းလျှောခြင်း   
• မျိုချရန် သို့မဟုတ် အစာစားရန် ခက်ခဲခြင်း 
• ခေါင်းကိုက်ခြင်း၊ စိတ်ရှုပ်ထွေးခြင်း၊  အလွန်အမင်း ပင်ပန်းနွမ်းနယ်ခြင်း  သို့မဟုတ် အပြုအမူဆိုင်ရာ ပြောင်းလဲခြင်း (ဥပမာ- အလွန်အမင်းအိပ်ငိုက်ခြင်း၊ စိတ်တိုလွယ်ခြင်း သို့မဟုတ် ပုံမှန်ကဲ့သို့ တုံ့ပြန်မှုမရှိခြင်း) 
• သွေးထွက်ခြင်း (နှာခေါင်းသွေးလျှံခြင်း၊ ဆီး သို့မဟုတ် ဝမ်းတွင် သွေးပါခြင်း၊ သို့မဟုတ် ပါးစပ်မှ သွေးယိုခြင်း)
•  ရေဓာတ်ခန်းခြောက်ခြင်း ၏ ရောဂါလက္ခဏာများ (ပါးစပ်ခြောက်ခြင်း၊ ဆီးများများမသွားခြင်း၊ မျက်ရည်မထွက်ဘဲ ငိုခြင်း သို့မဟုတ် မျက်လုံးများ ချိုင့်ဝင်ခြင်း)
• သင့်အား စိုးရိမ်ပူပန်စေသည့် သို့မဟုတ် သင့်ကလေး၏ အခြေအနေနှင့် ပတ်သက်၍ သင်သေချာမသိသည့် မည်သည့်အရာမဆို

သင်၏ ကျန်းမာရေး စောင့်ရှောက်မှုအဖွဲ့ကို မေးရန် မေးခွန်းများ

• ကျွန်ုပ်ကလေးသည် မည်သည့်အတွက်ကြောင့် ဓါတ်ရောင်ခြည်ကုထုံးကို လိုအပ်ပါသနည်း။
• ကျွန်ုပ်ကလေးသည် မည်သည့်ဓာတ်ရောင်ခြည်ကုထုံးမျိုးကို ခံယူရမည်နည်း။
• ကုသမှု၏ ရည်မှန်းချက်များမှာ မည်သည်တို့ဖြစ်သနည်း။
• ဓာတ်ရောင်ခြည်ကုထုံးသည် မည်သို့အလုပ်လုပ်ပါသနည်း။
• အခြားရွေးချယ်နိုင်သည့် ကုသမှုများ ရှိပါသလား။
• ကျွန်ုပ်တို့သည် ဓာတ်ရောင်ခြည်ကုထုံးနှင့်  ပတ်သက်၍  မည်သည်တို့ကို မျှော်လင့်ထားသင့်သနည်း။
• ကုသမှုခံယူနေစဉ်အတွင်း ကျွန်ုပ်သည် ကလေးနှင့်အတူ နေနိုင်ပါသလား။
• ဓာတ်ရောင်ခြည်ကုထုံး၏ အန္တရာယ် နှင့် ဘေးထွက်ဆိုးကျိုးများ မှာ မည်သည်တို့ ဖြစ်သနည်း။
• မည်သည့်အချိန်တွင် စောင့်ရှောက်မှုအဖွဲ့ကို ဆက်သွယ်သင့်ပါသနည်း။