ဖျားခြင်းနှင့် ရောဂါပိုးကူးစက်မှု၏ လက္ခဏာများ

ဖျားနာခြင်းနှင့် နျူထရိုဖီးလ် အရေအတွက်နည်းခြင်း (Neutropenia)

နျူထရိုဖီးလ် အရေအတွက်နည်းခြင်း (Neutropenia) ဖြစ်စေသော ကင်ဆာရောဂါ သို့မဟုတ် အခြား ရောဂါတစ်မျိုးမျိုး ရှိသော ကလေးများတွင် ရောဂါပိုးကူးစက်မှုသည် အသက်အန္တရာယ် ဖြစ်စေနိုင်သည်။ နျူထရိုဖီးလ် အရေအတွက်နည်းခြင်း (Neutropenia) သည် ရောဂါပိုးကူးစက်မှုကို တိုက်ဖျက်ပေးသော သွေးဖြူဥများ (နျူထရိုဖီးလ်များ) ၏ အရေအတွက် နည်းပါးနေသော အခြေအနေတစ်ခု ဖြစ်သည်။

နျူထရိုဖီးလ် အရေအတွက်နည်းခြင်း (Neutropenia) ရှိသော လူနာများသည် ရောဂါပိုးကူးစက်မှုများကို ကောင်းစွာ မတိုက်ဖျက်နိုင်ပါ။ ၎င်းတို့သည် အချိန်တိုအတွင်း ပြင်းထန်စွာ ဖျားနာနိုင်ပါသည်။ သင့်ကလေးတွင် နျူထရိုဖီးလ် အရေအတွက်နည်းခြင်း (Neutropenia) ရှိပါက၊ ဖျားနာခြင်းသို့မဟုတ် ရောဂါပိုးကူးစက်မှု၏ အခြားလက္ခဏာများကို သေချာစွာ စောင့်ကြည့်ရန် အရေးကြီးပါသည်။ နျူထရိုဖီးလ် အရေအတွက်နည်းခြင်း (Neutropenia) ရှိသော လူနာတစ်ဦးတွင် ဖျားနာခြင်း သို့မဟုတ် ရောဂါပိုးကူးစက်မှုဖြစ်ပွားခြင်းသည် အရေးပေါ် ဆေးဘက်ဆိုင်ရာ အခြေအနေတစ်ခု ဖြစ်သည်။

သင့်ကလေးတွင် ဖျားနာခြင်း သို့မဟုတ် ရောဂါပိုးကူးစက်မှု၏ လက္ခဏာများ ရှိပါက ဘာလုပ်သင့်သနည်း။

သင့်ကလေးတွင် ဖျားနာခြင်း သို့မဟုတ် ရောဂါပိုးကူးစက်မှု၏ အခြားလက္ခဏာများကို သတိပြုမိပါက၊ သင့်ကျန်းမာရေး စောင့်ရှောက်မှုပေးသူထံ ဆက်သွယ်ပါ သို့မဟုတ် အရေးပေါ်ကုသရေးဌာနသို့ ချက်ချင်း သွားပါ။

• နေ့အချိန် ဖြစ်ပြီး သင့်ကလေး ကုသမှုခံယူနေသော ဆေးရုံအနားတွင် ရှိနေပါက၊ သင့်ကလေး၏ ကျန်းမာရေး စောင့်ရှောက်မှုအဖွဲ့ သို့မဟုတ် အဓိက ကုသမှုပေးသော ဆေးခန်းသို့ ဖုန်းခေါ်ပါ။
• အလုပ်ချိန်ပြင်ပ သို့မဟုတ် စနေ၊ တနင်္ဂနွေ ရက်များ ဖြစ်ပါက၊ သင့်ဆေးရုံ၏ အလုပ်ချိန်ပြင်ပ အရေးပေါ် အခြေအနေဆိုင်ရာ လုပ်ထုံးလုပ်နည်းများကို လိုက်နာပါ။ သင့်ကလေးတွင် ဖျားနာခြင်းရှိကြောင်း သိရှိသည်နှင့် တပြိုင်နက် အဓိက ကုသမှုပေးသော ဆေးခန်း သို့မဟုတ် တာဝန်ကျဆရာဝန်ထံ အမြန်ဆုံး အသိပေးပါ။
• သင့်ကလေး ကုသမှုခံယူနေသော ဆေးရုံအနားတွင် မရှိပါက၊ ဒေသခံ ကျန်းမာရေး စောင့်ရှောက်မှုပေးသူထံ ဆက်သွယ်ပါ သို့မဟုတ် ဒေသခံဆေးရုံ၏ အရေးပေါ်ကုသရေးဌာနသို့ သွားပါ။

အိမ်အနီးရှိ ဆရာဝန်ထံ သို့မဟုတ် ဆေးရုံသို့ သွားရောက်ပါက၊ သင့်ကလေး၏ အခြေအနေအကြောင်းကို အဓိက ကုသမှုပေးသော ဆေးခန်း သို့မဟုတ် ကျန်းမာရေး စောင့်ရှောက်မှုအဖွဲ့ထံ အမြန်ဆုံး အသိပေးပါ။

ကျန်းမာရေး စောင့်ရှောက်မှုပေးသူများအား သင့်ကလေး၏ ကျန်းမာရေး အခြေအနေနှင့် မည်သည့်နေရာတွင် ကုသမှု ခံယူနေကြောင်းကို သေချာစွာ ပြောပြပါ။ ၎င်းတို့သည် သင့်ကလေးတွင် ဗဟိုသွေးပြန်ကြောပိုက် (Central Venous Catheter) (central line) ရှိ၊ မရှိနှင့် ဓာတုဆေးဝါးကုထုံး (Chemotherapy) သို့မဟုတ် ကိုယ်ခံအားစနစ်ကို အားနည်းစေသော အခြားဆေးဝါးများ ခံယူနေခြင်း ရှိ၊ မရှိကိုလည်း သိရှိရန် လိုအပ်ပါသည်။‌

ဖျားနာခြင်းနှင့် ဆစ်ကယ်လ်-ဆဲလ် ရောဂါ (Sickle Cell Disease)

ဆစ်ကယ်လ်-ဆဲလ် ရောဂါ (Sickle Cell Disease) ရှိသော ကလေးများနှင့် ဆယ်ကျော်သက်များသည် ရောဂါပိုးကူးစက်မှု ဖြစ်ပွားနိုင်ခြေ ပိုမိုမြင့်မားပါသည်။ ဖျားနာခြင်းသည် ဆစ်ကယ်လ်-ဆဲလ် ရောဂါ (Sickle Cell Disease) ရှိသူများအတွက် အရေးပေါ် ဆေးဘက်ဆိုင်ရာ အခြေအနေတစ်ခု ဖြစ်သည်။ 

အသက် 2 လကျော်သော ဆစ်ကယ်လ်-ဆဲလ် ရောဂါ (Sickle Cell Disease) ရှိသည့် ကလေးများတွင်၊ အောက်ပါ အခြေအနေများ ဖြစ်ပေါ်ပါက ဆေးကုသမှု ချက်ချင်းခံယူပါ-

• ပါးစပ်မှ တိုင်းတာသော အပူချိန် (Oral) သည် 101°F (38.3°C) သို့မဟုတ် ၎င်းထက် မြင့်မားခြင်း
• ချိုင်းအောက်မှ တိုင်းတာသော အပူချိန် (Axillary) သည် 100°F (37.8°C) သို့မဟုတ် ၎င်းထက် မြင့်မားခြင်း

အသက် 2 လအောက် ဆစ်ကယ်လ်-ဆဲလ် ရောဂါ (Sickle Cell Disease) ရှိသော ကလေးများတွင်၊ ချိုင်းအောက်မှ တိုင်းတာသော အပူချိန်သည် 100.4°F (38.0°C) သို့မဟုတ် ၎င်းထက် မြင့်မားပါက ဖျားနာခြင်းဟု သတ်မှတ်ပါသည်။   

ဖျားနာခြင်းနှင့် ရောဂါပိုးကူးစက်မှု၏ လက္ခဏာများနှင့် ပတ်သက်သော အဓိကအချက်များ

• ဖျားနာခြင်းသည် အများအားဖြင့် ရောဂါပိုးကူးစက်မှုကြောင့် ဖြစ်ပွားသော ခန္ဓာကိုယ် အပူချိန် မြင့်တက်လာခြင်း ဖြစ်သည်။
• အသက် 2 လနှင့်အထက် ကလေးများတွင်၊ ဖျားနာခြင်းကို ပါးစပ်မှ တိုင်းတာသော အပူချိန် (Oral) သည် 100.9°F (38.3°C) သို့မဟုတ် ၎င်းထက် မြင့်မားခြင်း၊ သို့မဟုတ် ပါးစပ်မှ တိုင်းတာသော အပူချိန် (Oral) သည် 100.4°F (38.0°C) သို့မဟုတ် ၎င်းထက် မြင့်မားပြီး 1 နာရီကြာ ဆက်လက်ရှိနေခြင်းဟု သတ်မှတ်သည်။
• အပူချိန် တိုင်းတာနည်းနှင့် ဖျားနာခြင်း ဖြစ်ပွားသည့်အခါ မည်သည့်အချိန်တွင် ဆေးကုသမှုခံယူသင့်သည်တို့ အပါအဝင် ဖျားနာခြင်းဆိုင်ရာ လမ်းညွှန်ချက်များအတွက် သင့်ကျန်းမာရေး စောင့်ရှောက်မှုအဖွဲ့၏ ညွှန်ကြားချက်များကို လိုက်နာပါ။
• လက်များကို မကြာခဏ ဆေးကြောခြင်း၊ နေထိုင်ရာ ပတ်ဝန်းကျင်ကို သန့်ရှင်းစွာ ထားရှိခြင်း၊ ဖျားနာနေသူများနှင့် ဝေးဝေးနေခြင်းနှင့် အကြံပြုထားသော ကာကွယ်ဆေးများ ထိုးခြင်းတို့ဖြင့် ရောဂါပိုးကူးစက်မှုကို ကာကွယ်နိုင်ရန် ကူညီပါ။
• သင့်ကလေးတွင် ဖျားနာခြင်း သို့မဟုတ် ရောဂါပိုးကူးစက်မှု၏ အခြား လက္ခဏာများ ရှိပါက သင့်ကျန်းမာရေး စောင့်ရှောက်မှုအဖွဲ့ထံ ဆက်သွယ်ပါ။