တုပ်ကွေး ကာကွယ်ဆေးများ

ကာကွယ်ဆေးသည် ရောဂါဝေဒနာများမှ ကာကွယ်ရန် ကိုယ်ခံအားစနစ်ကို မြှင့်တင်ပေးပါသည်။ တုပ်ကွေး ကာကွယ်ဆေးသည် လူများတွင် တုပ်ကွေးရောဂါ ဖြစ်ပွားခြင်းမှ ကာကွယ်ရန် ကူညီပေးပါသည်။ အချို့သောသူများသည် ကာကွယ်ဆေး ထိုးနှံပြီးသည့်တိုင် တုပ်ကွေးရောဂါ (Flu) ကူးစက်ခံရနိုင်ခြေ ရှိပါသေးသည်။ သို့သော်လည်း သင့်တွင် တုပ်ကွေးရောဂါ (Flu) အမှန်တကယ် ကူးစက်ခံရလျှင်ပင် ရောဂါဝေဒနာ ပြင်းထန်စွာ ခံစားရမည်မဟုတ်ပါ။ အကြောင်းမှာ ကာကွယ်ဆေး ထိုးနှံပြီးနောက် သင့်ခန္ဓာကိုယ်သည် ရောဂါပိုးကို ပိုမိုကောင်းမွန်စွာ ခုခံကာကွယ်နိုင်သောကြောင့် ဖြစ်ပါသည်။

တုပ်ကွေးမိသူ အများစုသည် ရက်အနည်းငယ်မှ 2 ပတ်အတွင်း ပြန်လည်သက်သာလာကြပါသည်။ သို့သော် အချို့သောသူများတွင် ပိုမိုပြင်းထန်သော နောက်ဆက်တွဲ ပြဿနာများ သို့မဟုတ် ရောဂါရှုပ်ထွေးမှုများ ဖြစ်ပွားတတ်ပါသည်။ အချို့သော ပြဿနာများသည် အသက်အန္တရာယ်ကိုပင် စိုးရိမ်ရနိုင်ပါသည်။

ထိပ်ကပ်နာ နှင့် နားတွင်းပိုးဝင်ခြင်းတို့သည် တုပ်ကွေးရောဂါ (Flu) ကြောင့် ဖြစ်ပွားတတ်သော နောက်ဆက်တွဲ ရောဂါရှုပ်ထွေးမှုများ၏ ဥပမာများ ဖြစ်ကြပါသည်။ အဆုတ်ရောင်ရောဂါ (Pneumonia) သည် ပြင်းထန်သော တုပ်ကွေးနောက်ဆက်တွဲ ရောဂါရှုပ်ထွေးမှုတစ်ခု၏ ဥပမာ ဖြစ်ပါသည်။

အောက်ပါတို့အပါအဝင် အချို့သော ကျန်းမာရေးအခြေအနေ သို့မဟုတ် ရောဂါအခံရှိသူများအတွက် တုပ်ကွေး ကာကွယ်ဆေး ထိုးနှံခြင်းသည် အထူးပင် အရေးကြီးပါသည်-

• ပန်းနာရင်ကျပ်ရောဂါ (Asthma)
• နှလုံးရောဂါ (Heart Disease)
• ဆီးချိုရောဂါ (Diabetes)

တုပ်ကွေးရောဂါ (Flu) သည် အဆိုပါ ကျန်းမာရေးပြဿနာများကို ပိုမိုဆိုးရွားလာစေနိုင်ပါသည်။ ဥပမာအားဖြင့်၊ ပန်းနာရင်ကျပ်ရောဂါ (Asthma) ရှိသူများသည် တုပ်ကွေး (Flu) မိနေစဉ်အတွင်း ပန်းနာရင်ကျပ်ရောဂါ (Asthma) အပြင်းအထန် ထဖောက်ခြင်းမျိုး ဖြစ်ပွားနိုင်ပါသည်။ နှလုံးရောဂါ (Heart Disease) ရှိသူများသည် တုပ်ကွေးရောဂါ (Flu) ကြောင့် နှလုံးဖောက်ပြန်မှုဖြစ်နိုင်ခြေ မြင့်တက်လာနိုင်ပါသည်။

တုပ်ကွေး ကာကွယ်ဆေး အမျိုးအစားများ

တုပ်ကွေး ကာကွယ်ဆေး ကို အဓိကအားဖြင့် နည်းလမ်း 2 မျိုးဖြင့် ပေးနိုင်ပါသည်-

တုပ်ကွေး ကာကွယ်ဆေး (အပ်ဖြင့် ထိုးနှံခြင်း)-

• တုပ်ကွေး ကာကွယ်ဆေးများတွင် အမျိုးအစားအမျိုးမျိုး ရှိပါသည်။ အများစုသည် လက်မောင်းအပေါ်ပိုင်း ကြွက်သားအတွင်းသို့ ထိုးနှံလေ့ရှိပါသည်။ နို့စို့ကလေးငယ်များနှင့် အလွန်ငယ်ရွယ်သော ကလေးငယ်များကိုမူ ပေါင်အပေါ်ပိုင်း ကြွက်သားအတွင်းသို့ တုပ်ကွေး ကာကွယ်ဆေး ထိုးနှံပေးနိုင်ပါသည်။
• တုပ်ကွေး ကာကွယ်ဆေးအား သေဆုံးနေသော (အသက်မဲ့အောင် ပြုလုပ်ထားသော) တုပ်ကွေးဗိုင်းရပ်စ်များဖြင့် ပြုလုပ်ထားခြင်း ဖြစ်ပါသည်။
• အဆိုပါ တုပ်ကွေး ကာကွယ်ဆေးသည် ကိုယ်ခံအားစနစ် အားနည်းနေသူများအတွက် ဘေးကင်းစိတ်ချရပါသည်။
• အကယ်၍ သင့်ကလေးတွင် ကိုယ်ခံအားစနစ် အားနည်းနေပါက ကာကွယ်ဆေး၏ အကောင်းဆုံး တုံ့ပြန်မှုကို ရရှိစေရန်အတွက် ဓာတုကုထုံး မစတင်မီ အနည်းဆုံး 2 ပတ်အလိုတွင် ကာကွယ်ဆေးကို ထိုးနှံနိုင်ပါသည်။ သို့မဟုတ်ပါက ၎င်းတို့အား ဓာတုကုထုံး အလှည့်ကျကုသမှု ကာလများအကြားတွင် ထိုးနှံပေးနိုင်ပါသည်။ တုပ်ကွေးရောဂါ (Flu) ကူးစက်ပြန့်ပွားနေသည့် အခြေအနေမျိုးတွင် သင့်ကလေးသည် မဆိုင်းမတွဘဲ တုပ်ကွေး ကာကွယ်ဆေး ကို အမြန်ဆုံး ထိုးနှံသင့်ပါသည်။

နှာခေါင်းဖျန်းဆေး (ဖလူမစ် (Flumist)^®)-

• နှာခေါင်းဖျန်းဆေးပုံစံဖြင့် လာသော တုပ်ကွေး ကာကွယ်ဆေး တွင်မူ အားနည်းအောင် ပြုလုပ်ထားသည့် အသက်ရှိ တုပ်ကွေးဗိုင်းရပ်စ်ပုံစံ ပါဝင်ပါသည်။
• အကယ်၍ သင့်ကလေးတွင် ကိုယ်ခံအားစနစ် အားနည်းနေပါက ၎င်းတို့အနေဖြင့် နှာခေါင်းဖျန်းဆေးပုံစံ ကာကွယ်ဆေးကို အသုံးမပြုသင့်ပါ။ သင့်ကလေးနှင့် တစ်အိမ်တည်း အတူနေထိုင်သူများသည်လည်း နှာခေါင်းဖျန်းဆေးပုံစံ ကာကွယ်ဆေးကို အသုံးမပြုသင့်ပါ။

သင့်ကျန်းမာရေးစောင့်ရှောက်မှုပေးသူက သင့်ကလေးအတွက် အကောင်းဆုံးဖြစ်မည့် တုပ်ကွေး ကာကွယ်ဆေး အမျိုးအစားကို လမ်းညွှန်အကြံပြုပေးပါလိမ့်မည်။

တုပ်ကွေး ကာကွယ်ဆေး၏ ဖြစ်နိုင်ခြေရှိသော ဘေးထွက်ဆိုးကျိုးများ

တုပ်ကွေး ကာကွယ်ဆေး ထိုးနှံပြီးနောက် အပျော့စား ဘေးထွက်ဆိုးကျိုးများ ဖြစ်ပွားခြင်းမှာ ပုံမှန်ပင် ဖြစ်ပါသည်။ ရောဂါလက္ခဏာများတွင် အောက်ပါတို့ ပါဝင်နိုင်ပါသည်-

• ဆေးထိုးထားသည့် နေရာတွင် နီမြန်းခြင်း သို့မဟုတ် ရောင်ရမ်းခြင်း
• ခေါင်းကိုက်ခြင်း
• ဖျားခြင်း
• မောပန်းနွမ်းနယ်ခြင်း
• ပျို့အန်ချင်ခြင်း
• ကိုယ်လက်ကိုက်ခဲခြင်း

တုပ်ကွေး ကာကွယ်ဆေးများသည် သင့်အား တုပ်ကွေးရောဂါ (Flu) အမှန်တကယ် ဖြစ်ပွားစေခြင်း မရှိပါ။ ဘေးထွက်ဆိုးကျိုးများသည် ပုံမှန်အားဖြင့် အပျော့စားသာ ဖြစ်ပြီး ရက်အနည်းငယ်ကြာပြီးနောက် ပျောက်ကွယ်သွားတတ်ပါသည်။ ၎င်းသည် ကိုယ်ခံအားစနစ်က ကာကွယ်ဆေးအပေါ် တုံ့ပြန်နေသောကြောင့် ဖြစ်ပါသည်။ ခန္ဓာကိုယ်သည် တုပ်ကွေးရောဂါ (Flu) ကို တိုက်ထုတ်ရန် ကိုယ်တွင်းပဋိပစ္စည်းများကို ထုတ်လုပ်နေခြင်း ဖြစ်ပါသည်။

တုပ်ကွေး ကာကွယ်ဆေးကို မည်သည့်အချိန်တွင် ထိုးနှံရမည်နည်း

ဖြစ်နိုင်ပါက တုပ်ကွေး ကာကွယ်ဆေး ကို စက်တင်ဘာလ သို့မဟုတ် အောက်တိုဘာလတွင် ထိုးနှံပါ၊ သို့မဟုတ် ကာကွယ်ဆေး စတင်ရရှိနိုင်သည်နှင့် တစ်ပြိုင်နက် အမြန်ဆုံး ထိုးနှံပါ။ အကယ်၍ သင်သည် တုပ်ကွေး ကာကွယ်ဆေး ကို စောစောစီးစီး မထိုးနှံဖြစ်ခဲ့ပါက တုပ်ကွေးရာသီအတွင်း မည်သည့်အချိန်တွင်မဆို ထိုးနှံခြင်းက သင့်အား ကာကွယ်ရန် ကူညီပေးပါလိမ့်မည်။ ယေဘုယျအားဖြင့် အမေရိကန်ပြည်ထောင်စုတွင် တုပ်ကွေးဖြစ်ပွားမှုနှုန်းသည် အောက်တိုဘာလတွင် စတင်မြင့်တက်လာပြီး ဒီဇင်ဘာလမှ ဖေဖော်ဝါရီလအတွင်း အမြင့်ဆုံးသို့ ရောက်ရှိလေ့ရှိကာ မေလအထိ ကြာမြင့်နိုင်ပါသည်။

တုပ်ကွေး ကာကွယ်ဆေး ထိုးနှံပြီးနောက် ကိုယ်ခံအားတုံ့ပြန်မှု ထွက်ပေါ်လာရန် 2 ပတ်ခန့် ကြာမြင့်ပါသည်။ အချို့သော အခြေအနေများတွင် ကလေးငယ်များသည် တုပ်ကွေး ကာကွယ်ဆေး ကို 2 ကြိမ် ထိုးနှံရန် လိုအပ်နိုင်ပါသည်။ နောက်ထပ်တစ်ကြိမ် ထိုးနှံရန် လိုအပ်ခြင်း ရှိ၊ မရှိကို သင့်ကျန်းမာရေးစောင့်ရှောက်မှုပေးသူက သင့်အား ပြောကြားပေးပါလိမ့်မည်။

တုပ်ကွေး ကာကွယ်ဆေးနှင့် ကြက်ဥဓာတ်မတည့်ခြင်း

အမေရိကန် ရောဂါထိန်းချုပ်ရေးနှင့် ကာကွယ်ရေးစင်တာ မှ ကြက်ဥဓာတ်မတည့်မှု ရှိသော အသက် 6 လနှင့်အထက် လူတိုင်း တုပ်ကွေး ကာကွယ်ဆေး ထိုးနှံသင့်ကြောင်း လမ်းညွှန်ထောက်ခံထားပါသည်။ မည်သည့် တုပ်ကွေး ကာကွယ်ဆေး မဆို (ကြက်ဥ အခြေခံ ပြုလုပ်ထားသည်ဖြစ်စေ၊ ကြက်ဥ အခြေခံ မဟုတ်ဘဲ ပြုလုပ်ထားသည်ဖြစ်စေ) အသုံးပြုနိုင်ပါသည်။

တုပ်ကွေးရောဂါ (Flu) နှင့် ကိုဗစ်-19 ရောဂါ (COVID-19)

တုပ်ကွေးရောဂါ (Flu) နှင့်ကိုဗစ်-19 ရောဂါ (COVID-19)နှစ်ခုစလုံးကို တစ်ချိန်တည်းတွင် တစ်ပြိုင်နက်တည်း ခံစားရခြင်းမျိုး ဖြစ်နိုင်ပါသည်။ ကိုဗစ်-19 ရောဂါ (COVID-19) နှင့် တုပ်ကွေးရောဂါ (Flu) နှစ်ခုစလုံးသည် အသက်ရှူလမ်းကြောင်းဆိုင်ရာ ကူးစက်ရောဂါများ ဖြစ်ကြပါသည်။ ကိုဗစ်-19 ရောဂါ (COVID-19) နှင့် တုပ်ကွေးရောဂါ (Flu) ၏ ရောဂါလက္ခဏာများသည် ထပ်တူဖြစ်နေနိုင်ပါသည်။

တုပ်ကွေး ကာကွယ်ဆေးသည် သင့်အား ကိုဗစ်-19 ရောဂါ (COVID-19) မှ ကာကွယ်ပေးလိမ့်မည် မဟုတ်ပါ။ ထို့အတူ ကိုဗစ်-19 ရောဂါ (COVID-19) ကာကွယ်ဆေးသည်လည်း သင့်အား တုပ်ကွေးရောဂါ (Flu) မှ ကာကွယ်ပေးလိမ့်မည် မဟုတ်ပါ။

အကယ်၍ သင့်တွင် ရောဂါလက္ခဏာများ ရှိနေပါက သင့်ပြုစုစောင့်ရှောက်မှုအဖွဲ့သည် ရောဂါနှစ်ခုစလုံးအတွက် ဓာတ်ခွဲစမ်းသပ်မှု ပြုလုပ်ပေးပါလိမ့်မည်။ ဓာတ်ခွဲစမ်းသပ်မှု ရလဒ်များသည် သင့်ပြုစုစောင့်ရှောက်မှုအဖွဲ့ အနေဖြင့် အကောင်းဆုံး ကုသမှုအစီအစဉ်ကို ဆုံးဖြတ်နိုင်ရန် ကူညီပေးနိုင်ပါသည်။

တုပ်ကွေး ကာကွယ်ဆေးများ နှင့်ပတ်သက်၍ သင့်ပြုစုစောင့်ရှောက်မှုအဖွဲ့အား မေးမြန်းရမည့် မေးခွန်းများ

• တုပ်ကွေး ကာကွယ်ဆေး သည် ကျွန်ုပ် ကလေးအတွက် ဘေးကင်းစိတ်ချရပါသလား။
• ကျွန်ုပ် ကလေးအတွက် မည်သည့် တုပ်ကွေး ကာကွယ်ဆေး အမျိုးအစားက အကောင်းဆုံး ဖြစ်ပါသနည်း။
• ကျွန်ုပ် ကလေးအနေဖြင့် မထိုးနှံသင့်သော ကာကွယ်ဆေးများ ရှိပါသလား။
• ကျွန်ုပ် ကလေးသည် တုပ်ကွေး ကာကွယ်ဆေး ကို 2 ကြိမ် ထိုးနှံရန် လိုအပ်ပါသလား။
• တုပ်ကွေး ကာကွယ်ဆေး၏ ဘေးထွက်ဆိုးကျိုးများမှာ ဘာလဲ။
• တုပ်ကွေး ကာကွယ်ဆေး မထိုးနှံမီ၊ ထိုးနှံစဉ်နှင့် ထိုးနှံပြီးနောက် အချိန်များတွင် ကျွန်ုပ်တို့ မည်သည့်အရာများကို မျှော်လင့်ထားရမည်နည်း။
• ကျွန်ုပ် သတိပြုစောင့်ကြည့်ရမည့် ပြင်းထန်သော ဘေးထွက်ဆိုးကျိုးများ၏ သတိပေးလက္ခဏာများ ရှိပါသလား။
• အကယ်၍ ကျွန်ုပ်ကလေးသည် ပြင်းထန်သော ရောဂါဝေဒနာတစ်ခုအတွက် ကုသမှုခံယူနေရပါက ကျွန်ုပ်ကလေးနှင့် မိသားစုဝင်များ တုပ်ကွေး ကာကွယ်ဆေး ထိုးနှံရန် အကောင်းဆုံးအချိန်မှာ မည်သည့်အချိန် ဖြစ်ပါသနည်း။
• အကယ်၍ ကျွန်ုပ် ကလေးသည် တုပ်ကွေး ကာကွယ်ဆေး မထိုးနှံနိုင်ပါက ၎င်းအား မည်သို့ ကာကွယ်ပေးနိုင်ပါသနည်း။

နောက်ထပ် အချက်အလက်များ ရှာဖွေရန်

ဆက်စပ်အကြောင်းအရာများ