အစာရေမျိုလမ်းကြောင်းကို အသုံးပြု၍ အာဟာရပံ့ပိုးခြင်း (ပြွန်ဖြင့် အစာကျွေးခြင်း)

အစာရေမျိုလမ်းကြောင်းကို အသုံးပြု၍ အာဟာရပံ့ပိုးခြင်းဆိုသည်မှာ အဘယ်နည်း။

ပြွန်ဖြင့် အစာကျွေးခြင်း သို့မဟုတ် အစာရေမျိုလမ်းကြောင်းကို အသုံးပြု၍ အာဟာရပံ့ပိုးခြင်းသည် အရည် သို့မဟုတ် ဖော်မြူလာပုံစံဖြင့် အာဟာရကို ပံ့ပိုးပေးပါသည်။ ၎င်းသည် ပါးစပ်ဖြင့် စားသောက်ခြင်းဖြင့် ကယ်လိုရီများ သို့မဟုတ် အာဟာရဓာတ်များ လုံလောက်စွာ မရရှိနိုင်သည့် ကလေးများကို ကူညီပေးပါသည်။ အချို့ဆေးဝါးများကိုလည်း အစာပြွန်မှတစ်ဆင့် တိုက်ကျွေးနိုင်ပါသည်။ 

အစာရေမျိုလမ်းကြောင်းကို အသုံးပြု၍ အာဟာရပံ့ပိုးခြင်းသည် သင့်ကလေး၏ အာဟာရအားလုံး သို့မဟုတ် တစ်စိတ်တစ်ပိုင်းကို ပံ့ပိုးပေးနိုင်ပါသည်။ အစာပြွန်ရှိသည့် ကလေးအများစုသည် ပါးစပ်ဖြင့်လည်း စားသောက်နိုင်ဆဲ ဖြစ်ပါသည်။     

အစာပြွန်တပ်ထားခြင်းသည် အပြစ်ပေးခြင်း မဟုတ်ကြောင်းကို သင့်ကလေးနားလည်စေရန် ကူညီပေးခြင်းမှာ အရေးကြီးပါသည် အာဟာရအထောက်အပံ့ လိုအပ်ခြင်းသည် ၎င်းတို့၏အပြစ် မဟုတ်ပါ။ ကောင်းမွန်သည့် အာဟာရသည် ဖွံ့ဖြိုးကြီးထွားမှု၊ စွမ်းအင်နှင့် သက်သာကောင်းမွန်ခြင်းတို့အတွက် အရေးကြီးပါသည်။ သင်၏အာဟာရဗေဒပညာရှင်သည် ပြွန်ဖြင့်အစာကျွေးခြင်းကို စီစဉ်ရန်အတွက် သင်နှင့် သင့်ကျန်းမာရေးစောင့်ရှောက်မှုပေးသူနှင့်အတူတကွ လုပ်ဆောင်ပါလိမ့်မည်။ အာဟာရဗေဒပညာရှင်သည် အစားအသောက်နှင့် အာဟာရဆိုင်ရာ အထူးလေ့ကျင့်မှုကိုရရှိထားသည့် ကျန်းမာရေးပညာရှင်တစ်ဦး ဖြစ်ပါသည်။  

အာဟာရဗေဒပညာရှင်သည် အောက်ပါတို့အတွက် သင့်ကလေး၏ လိုအပ်ချက်များအပေါ် အခြေခံ၍ အာဟာရဖော်မြူလာကို ညွှန်ကြားပေးပါလိမ့်မည်- 

• ကယ်လိုရီများ 
• ရေဓာတ် 
• ကစီဓာတ်များ 
• အဆီများ 
• အသားဓာတ် 
• ဗီတာမင်များနှင့် သတ္တုဓာတ်များ 

အစာရေမျိုလမ်းကြောင်းကို အသုံးပြု၍ အစာကျွေးခြင်းသည် မည်သို့ လုပ်ဆောင်ပါသနည်း

လူနာများစွာသည်  ပြွန်ဖြင့် အစာကျွေးရန်အတွက် ပြုလုပ်ထားသော  စံဖော်မြူလာများ  (အရည်ဖြင့်ရောနှောထားသည့် အာဟာရဓာတ်များ)  မှ  အာဟာရဓာတ်ကို  ရရှိနိုင်ပါသည်။ အခြားကလေးများသည် ဓာတ်မတည့်ခြင်းများ၊ ဆီးချိုရောဂါ သို့မဟုတ် အစာခြေစနစ် ပြဿနာများကဲ့သို့သော ဆေးဘက်ဆိုင်ရာအခြေအနေများအတွက် အထူးဖော်မြူလာများ လိုအပ်ပါသည်။  နို့စို့ကလေးငယ်များအတွက် မိခင်နို့ကို အများအားဖြင့် ဦးစားပေးပါသည်။

ပြွန်ဖြင့် အစာကျွေးရန်အတွက် အဓိကနည်းလမ်း 3 ခု  ရှိပါသည်- 

• အစာအများအပြားကျွေးခြင်း- လူနာများသည် ဖော်မြူလာပမာဏများစွာကို တစ်နေ့လျှင် အကြိမ်များစွာ ရရှိကြပါသည်။ အစာကျွေး ချိန် သည် ပုံမှန်စားသောက်မှု လုပ်ရိုးလုပ်စဉ်နှင့် နီးစပ်ပါသည်။
• စဉ်ဆက်မပြတ်အစာကျွေးခြင်း-  အီလက်ထရွန်းနစ်ပန့်စက်သည်  ဖော်မြူလာပမာဏ အနည်းငယ်ကို  တစ်နေ့လျှင် 24 နာရီကြာအထိ  အချိန်ကြာရှည်စွာ ပေးပါသည်။ ကလေးအချို့သည်  မအီမသာဖြစ်ခြင်းနှင့်  ပျို့အန်ခြင်းကို  လျှော့ချရန်အတွက်  ဤအစာကျွေးခြင်းအမျိုးအစားကို  လိုအပ်နိုင်ပါသည်။
• အစက်ချ၍ အစာကျွေးခြင်း-  ဖော်မြူလာကို IV တိုင်ပေါ်ရှိ အစာအိတ်မှတစ်ဆင့် တဖြည်းဖြည်းချင်း ကျစေပါသည်။  အစက်ချ၍ အစာကျွေးရန်အတွက်  အသုံးပြုသည့် အချိန်ပမာဏသည်  လူနာအလိုက် ကွဲပြားပါသည်။ အစက်ချ၍  အစာကျွေးခြင်းသည်  အိမ်တွင်  ကောင်းစွာပြုလုပ်နိုင်သည့်  နည်းပညာနိမ့်၊ ကိုယ်တိုင်ပြုလုပ်နိုင်သော ရွေးချယ်မှုတစ်ခု ဖြစ်ပါသည်။

ပြွန်ဖြင့် အစာကျွေးခြင်း၏ ဘေးထွက်ဆိုးကျိုးများ

ပြွန်ဖြင့် အစာကျွေးခြင်း၏ အဖြစ်အများဆုံး ဘေးထွက်ဆိုးကျိုးများမှာ မအီမသာဖြစ်ခြင်းနှင့် ပျို့အန်ခြင်း၊ ဗိုက်အောင့်ခြင်း၊ ဝမ်းလျှောခြင်း၊ ဝမ်းချုပ်ခြင်းနှင့် လေပွခြင်းတို့ ဖြစ်ပါသည်။ 

အခြားဖြစ်နိုင်သော ဘေးထွက်ဆိုးကျိုးများတွင် အောက်ပါတို့ ပါဝင်နိုင်ပါသည်- 

• ပြွန်ရှိသည့်နေရာတွင် ပိုးဝင်ခြင်း သို့မဟုတ် ယာယံခြင်း 
• ပြွန်နေရာရွေ့သွားခြင်း သို့မဟုတ် ပြုတ်ထွက်သွားခြင်း 
• အဆုတ်ထဲသို့ ဖော်မြူလာအရည်များ ဝင်သွားခြင်း 

သင်သည် စောင့်ရှောက်မှုနှင့် အစာကျွေးခြင်းဆိုင်ရာ ညွှန်ကြားချက်များကို လိုက်နာဆောင်ရွက်ခြင်းဖြင့် ဘေးထွက်ဆိုးကျိုးအများစုကို ကာကွယ်နိုင်ပါသည်။ ယာယံခြင်း သို့မဟုတ် ပိုးဝင်ခြင်းမှ ကာကွယ်ရန် ပြွန်အနီးတဝိုက်ရှိ အရေပြားကို ထိန်းသိမ်းရန်အတွက် လမ်းညွှန်ချက်များကို လိုက်နာဆောင်ရွက်ပါ။ သင့်ကလေးသည် ပြွန်ကို မကိုင်မထိမိစေရန် သို့မဟုတ် ဆွဲမထုတ်မိစေရန် သေချာအောင် ပြုလုပ်ပါ။  

သင်၏ အာဟာရဗေဒပညာရှင်နှင့် နီးကပ်စွာ အတူတကွလက်တွဲလုပ်ဆောင်ရန်မှာ အရေးကြီးပါသည်။ အာဟာရလိုအပ်ချက်များသည် ကျန်းမာရေးအခြေအနေနှင့် အန်ခြင်း သို့မဟုတ် ဝမ်းလျှောခြင်းကဲ့သို့ ဘေးထွက်ဆိုးကျိုးများ ပေါ်မူတည်၍ ပြောင်းလဲနိုင်ပါသည်။ 

အိမ်တွင် ပြွန်ဖြင့် အစာကျွေးခြင်း

သင့်ကလေးသည် အစာပြွန်ဖြင့် အိမ်သို့ ပြန်နိုင်ပါသည်။ စောင့်ရှောက်မှုအဖွဲ့မှ သင်သည် အောက်ပါတို့ကို မည်သို့ပြုလုပ်ရမည်ဆိုသည်ကို သိရှိကြောင်း သေချာအောင် ပြုလုပ်ပါလိမ့်မည်- 

• သင့်ကလေး၏ ဖော်မြူလာကို ရောမွှေခြင်း 
• အစာကျွေးခြင်း 
• အစာပြွန်ကို ဂရုစိုက်ခြင်း 

လိုအပ်သော အထောက်အကူပစ္စည်းများ

• ဖော်မြူလာအစာ- ဖော်မြူလာအများစုသည် အသင့်သုံး ဖြစ်ပါသည်။ အချို့ဖော်မြူလာများသည် ရေနှင့် ရောစပ်ရသည့် အမှုန့် သို့မဟုတ် အရည်ဖြင့် လာပါသည်။
• ဆေးထိုးပြွန်-  အစာပြွန်နှင့် ချိတ်ဆက်သည့်  အပ်မပါသော ဆေးထိုးပြွန် (ENFit ဆေးထိုးပြွန်)
• စဉ်ဆက်မပြတ် သို့မဟုတ် အစက်ချ၍ အစာကျွေးခြင်းကို အသုံးပြုပါက အစာကျွေးသည့် ပန့်စက်
• စဉ်ဆက်မပြတ် သို့မဟုတ် အစက်ချ၍ အစာကျွေးခြင်းကို အသုံးပြုပါက ပြွန်ပါသည့် ဖော်မြူလာအိတ်
• စဉ်ဆက်မပြတ် သို့မဟုတ် အစက်ချ၍ အစာကျွေးခြင်းကို အသုံးပြုပါက IV တိုင်
• သင့်ကလေးတွင် "ခလုတ်" G-tube ရှိပါက အစာကျွေးသည့် တစ်ဆင့်ခံပြွန်

အိမ်တွင် ပြွန်ဖြင့် အစာကျွေးခြင်းအတွက် အကြံပြုချက်များ

အိမ်တွင် ပြွန်ဖြင့် အစာကျွေးသည့်အခါတွင် အောက်ပါအကြံပြုချက်များကို သတိရပါ- 

• အစာမကျွေးမီနှင့် ကျွေးပြီးနောက် သို့မဟုတ် အစာပြွန်ကို ဂရုစိုက်ခြင်းအတွက် လက်ကို ဆပ်ပြာနှင့် ရေဖြင့် အမြဲဆေးပါ သို့မဟုတ် လက်သန့်ဆေးရည်ကို အသုံးပြုပါ။ 
• သင့်ကလေး၏ ခေါင်းသည် အစာအိမ်ထက် မြင့်နေ‌စေရန်အတွက် အစာကျွေးသည့်အခါတွင် ထိုင်လျက် သို့မဟုတ် အနည်းငယ်စောင်း၍ ထားပါ။ 
• အစာကျွေးနေစဉ်အတွင်း ဆေးထိုးပြွန် သို့မဟုတ် အိတ်ကို အလုံးစုံ မကုန်သွားပါစေနှင့်။ အစာပြွန်ထဲသို့ လေဝင်သွားပါက ဗိုက်ပွခြင်း သို့မဟုတ် မအီမသာဖြစ်ခြင်းကို ဖြစ်စေနိုင်ပါသည်။ 
• မအီမသာဖြစ်ခြင်း၊ ပျို့အန်ခြင်း၊ အစာအိမ်ရောင်ရမ်းခြင်း သို့မဟုတ် စိတ်မသက်မသာဖြစ်ခြင်း လက္ခဏာတို့ကို စောင့်ကြည့်ပါ။ အကယ်၍ ထိုအရာများဖြစ်ပေါ်ပါက အစာကျွေးခြင်းကို ရပ်တန့်၍ သင်၏ကျန်းမာရေးစောင့်ရှောက်မှုပေးသူကို ဆက်သွယ်ပါ။ 
• ပြွန်အနီးတဝိုက်ရှိ အရေပြားတွင် ယားယံခြင်း သို့မဟုတ် ရောဂါပိုးဝင်ခြင်း လက္ခဏာများကို စစ်ဆေးပါ။ 
• ဆေးထိုးပြွန် (နှင့် အသုံးပြုပါက တစ်ဆင့်ခံခေါင်း) ကို အသုံးပြုပြီးတိုင်း ရေနွေးနှင့် ပန်းကန်ဆေးဆပ်ပြာဖြင့် ဆေးကြောပါ။ 
• ဖော်မြူလာကို ညွှန်ကြားထားသည့်အတိုင်း ပြင်ဆင်ပြီး သိမ်းဆည်းပါ-   
  • ရောစပ်ထားသည့် ဖော်မြူလာကို ရေခဲသေတ္တာထဲတွင် သိမ်းထားပြီး 24 နာရီကျော်သွားပါက လွှင့်ပစ်ပါ။  
  • အသင့်ကျွေးနိုင်သည့် ဖော်မြူလာများအား ၎င်းတို့ကို မဖွင့်မချင်း ရေခဲသေတ္တာထဲတွင် သိမ်းဆည်းထားရန် မလိုအပ်ပါ။ ဖွင့်ပြီးသည်နှင့် ၎င်းတို့သည် 24 နာရီသာ အသုံးပြု၍ ကောင်းပါသည်။  
  • ဖွင့်ထားပြီး ရေခဲသေတ္တာထဲတွင် 24 နာရီ သို့မဟုတ် ထိုထက်ပို၍ သိမ်းဆည်းထားသော အသင့်ကျွေးနိုင်သည့် သို့မဟုတ် ပြင်ဆင်ထားသည့် ဖော်မြူလာများကို လွှင့်ပစ်ပါ။ 

ကျန်းမာရေးနှင့် ညီညွတ်သည့် စားသောက်ချိန် လုပ်ရိုးလုပ်စဉ်များကို ထိန်းသိမ်းခြင်း

အစာကျွေးခြင်းကို စိတ်သက်တောင့်သက်သာဖြစ်စေရန် ကြိုးစားပါ။ သင့်ကလေးနှင့် စကားပြောဆို၍ ပျော်ပျော်ရွှင်ရွှင် နေထိုင်ပါ။ ၎င်းသည် သင့်ကလေးကို အစာကျွေးခြင်းနှင့် ပတ်သက်၍ ပိုမိုလိုက်လျောညီထွေဖြစ်၍ စိတ်ခံစားမှုကောင်းမွန်စေရန် ကူညီပေးပါလိမ့်မည်။ 

အောက်ပါတို့မှာ ပုံမှန်စားသောက်မှုလုပ်ရိုးလုပ်စဉ်များကို ထိန်းသိမ်းရန် အသက်အရွယ်အုပ်စုအမျိုးမျိုးအတွက် အကြံပြုချက်များ ဖြစ်ပါသည်- 

• ကလေးငယ်များ- အစာကျွေးနေစဉ်အတွင်း သင့်ကလေးကို သင့်ရင်ခွင်ထဲတွင် ချီထားပါ။ သင့်ကလေးနှင့် စကားပြောဆို၍ သို့မဟုတ် သီချင်းဆို၍ မျက်လုံးချင်းဆုံပြီး အထူးနှောင်ဖွဲ့မှုကို ပြုလုပ်ပါ။ 
• လမ်းလျှောက်တတ်စ ကလေးများ- အစာပြွန်ပိုက်မထည့်မီ သင့်ကလေးကို ၎င်းတို့ထိုင်နေကျ ထိုင်ခုံတွင် ထိုင်ခိုင်းပါ။ သူတို့ကို မီးဖိုချောင်သုံးပစ္စည်းများအား ကိုင်ထားစေပါ သို့မဟုတ် အစားအစာအရုပ်များဖြင့် ဆော့ကစားခွင့်ပြုပါ။ 
• အသက်ကြီးသည့် ကလေးများ- ထမင်းစားချိန်များတွင် သင့်ကလေးကို မိသားစုနှင့်အတူ ထိုင်ခိုင်းပါ။ အစားအစာများ စီစဉ်ပြင်ဆင်ခြင်းတွင် သင့်ကလေးကို ပါဝင်ဆောင်ရွက်ခိုင်းပါ။ တစ်ဦးနှင့် တစ်ဦး ပြောဆိုနှောင်ဖွဲ့နိုင်ရန် အထူးအချိန်တစ်ခုကို ဖန်တီးပါ။ 

 ပါးစပ် နှင့် မျက်နှာလှုပ်ရှားမှုများကို လေ့ကျင့်ခြင်း

သင့်ကလေးသည် ပါးစပ်ဖြင့် အစာစားသည့်အခါတွင် သက်တောင့်သက်သာဖြစ်စေရန် ၎င်းတို့၏ ပါးစပ်နှင့် နှုတ်ခမ်းများကို ဆက်လက်အသုံးပြုနိုင်စေရန် ကူညီပေးပါ။ အထိအတွေ့၊ ကစားခြင်းနှင့် အသက်အရွယ်နှင့် ညီမျှသည့် လှုပ်ရှားမှုများကို အသုံးပြုခြင်းသည် ပါးစပ်ဆိုင်ရာ ကျွမ်းကျင်မှုနှင့် နိုးကြားတက်ကြွမှုကို တည်ဆောက်ပေးပါသည်။ ၎င်းသည် နောက်ပိုင်းတွင် သင့်ကလေးကို ပိုပြီးလွယ်ကူစွာ ပြန်လည်စားသောက်နိုင်စေရန် ကူညီပေးနိုင်ပါသည်။   

• ကလေးငယ်များ- သင့်ကလေးကို ချိုလိမ်၊ အရုပ် သို့မဟုတ် တုန်ခါသည့် သွားဖုံးကိုက်အရုပ်လေးများ ပေးပါ။ အစာကျွေးနေစဉ်အတွင်း သင့်ကလေး၏ နှုတ်ခမ်း၊ ပါးစပ်နှင့် သွားဖုံးများကို ထိကိုင်ပေးပါ။ သင်တို့အတူတူ သီချင်းဆိုရင်း သို့မဟုတ် ချော့မြူသံများကို ပြုလုပ်ရင်း သင့်ကလေးကို ထိကိုင်ခြင်း၊ ပွတ်သပ်ခြင်း သို့မဟုတ် ပုတ်ပေးခြင်းတို့ကိုလည်း ပြုလုပ်ပေးနိုင်ပါသည်။ 
• လမ်းလျှောက်တတ်စ ကလေးများ- အစာကျွေးနေစဉ်အတွင်း သင့်ကလေး၏ နှုတ်ခမ်း၊ ပါးစပ်နှင့် သွားဖုံးများကို ထိကိုင်ပေးပါ။ သင့်ကလေးကို ပါးစပ်ထဲ ထည့်ကိုက်လို့ရသည့်အရုပ်များ ပေးပါ။ ကလေးများကို ပါးစပ်လှုပ်ရှားမှုအမျိုးမျိုး အသုံးပြုရသည့် ပျော်ရွှင်ဖွယ်အသံများ လုပ်ခိုင်းပါ။ အစာကျွေးနေစဉ်အတွင်း သင့်ကလေး၏မျက်နှာကို မတူညီသော ချောမွေ့မှုရှိသည့် ပစ္စည်းများဖြင့် ပွတ်ပေးပါ။ 
• မူကြိုနှင့် ကျောင်းနေအရွယ်ကလေးများ- အစာကျွေးနေစဉ်အတွင်း သင့်ကလေးကို ပူဖောင်းများ မှုတ်ခိုင်းပါ သို့မဟုတ် သီချင်းတူရိယာများ တီးခိုင်းပါ။ 

စကားပြောနှင့် ဘာသာစကားဆိုင်ရာ ရောဂါဗေဒပညာရှင်တစ်ဦးသည် သင့်ကလေး၏ အစာစားခြင်းနှင့် မျိုချခြင်းတို့အတွက် လိုအပ်သည့် ကျွမ်းကျင်မှုများတွင် ကူညီရန်အတွက် ပါးစပ်လှုပ်ရှားမှုကို လှုံ့ဆော်ပေးသည့် ကိရိယာများ သို့မဟုတ် စကားပြောဆိုခြင်းကုထုံးဆိုင်ရာ လှုပ်ရှားမှုများကို အကြံပြုပေးနိုင်ပါသည်။ 

စောင့်ရှောက်မှု  အဖွဲ့ကို   ဆက်သွယ်ရမည့်  အချိန်

သင်သည် အောက်ပါတို့ကို သတိပြုမိပါက သင့်ကလေး၏ စောင့်ရှောက်မှုအဖွဲ့ထံ ဖုန်းခေါ်ဆိုပါ-

• ပျို့အန်ခြင်း သို့မဟုတ် ဝမ်းလျှောခြင်းတို့ မရပ်ခြင်း
• ပုံမှန်မဟုတ်ဟု ခံစားရသည့် ကိုယ်အလေးချိန်ကျခြင်း သို့မဟုတ် ကိုယ်အလေးချိန်တက်ခြင်း
•  ရေဓာတ်ခန်းခြောက်ခြင်း  လက္ခဏာများ (ပါးစပ်ခြောက်ခြင်း၊  ဆီးသွားနည်း၍ အနှီးခြောက် ခြင်း၊  အဝါရင့်ရောင် ဆီးသွားခြင်း)
• ပြွန်နေရာတစ်ဝိုက်တွင် နီရဲခြင်း၊ ရောင်ရမ်းခြင်း သို့မဟုတ် အရည်ယိုစိမ့်ခြင်း
• ဖျားနာခြင်း သို့မဟုတ် ရောဂါပိုးဝင်သည့် လက္ခဏာများ
• ပြွန်ပြုတ်ထွက်ခြင်း၊ အရည်ယိုစိမ့်ခြင်း သို့မဟုတ် ပိတ်ခြင်းကဲ့သို့သော ပြွန်ပြဿနာများ
• ပြွန် သို့မဟုတ် နှာခေါင်းမှ ဖော်မြူလာယိုစိမ့်ခြင်း
• အစာကျွေးနေစဉ်တွင် ချောင်းဆိုးခြင်း၊ ဆို့နင်ခြင်း သို့မဟုတ် အသက်ရှူရခက်ခဲခြင်း
• အစာကျွေးနေစဉ် သို့မဟုတ် အစာကျွေးပြီးနောက် ဗိုက်အောင့်ခြင်း၊ လေပွခြင်း သို့မဟုတ် စိတ်တိုလွယ်ခြင်း
• ပို၍ပင်ပန်းလာခြင်း၊ ဂျီကျခြင်း သို့မဟုတ် ပုံမှန်ထက် လှုပ်ရှားမှုနည်းခြင်း ကဲ့သို့သော အပြုအမူပြောင်းလဲမှုများ

သင်၏ ကုသရေးအဖွဲ့ကို မေးရန် မေးခွန်းများ

• ကျွန်ုပ်ကလေးသည် မည်သည့်အတွက်ကြောင့် အစာပြွန်ကို လိုအပ်ပါသနည်း။
• ကျွန်ုပ်ကလေးသည် ပြွန်ဖြင့်  အစာကျွေးခြင်းကို မည်သည့်အချိန်အထိ လိုအပ်နိုင်သနည်း။
• ကျွန်ုပ်ကလေးသည် ပါးစပ်ဖြင့် စားသောက်၍ ရနိုင်ပါသေးသလား။
• ကျွန်ုပ်ကလေးအတွက် မည်သည့်ဖော်မြူလာအမျိုးအစားသည် အကောင်းဆုံးဖြစ်ပါသနည်း။
• ကျွန်ုပ်ကလေးသည် အာဟာရလုံလောက်စွာရရှိမှု ရှိ၊ မရှိကို မည်သို့သိနိုင်မည်နည်း။
• ကျွန်ုပ်ကလေးတွင် အန်ခြင်း သို့မဟုတ် ဝမ်းလျှောခြင်းကဲ့သို့သော ဘေးထွက်ဆိုးကျိုးများ ခံစားရပါက ကျွန်ုပ် ဘာလုပ်သင့်ပါသနည်း။
• အိမ်တွင် အစာပြွန်ကို မည်သို့ဂရုစိုက်ရမည်နည်း။
• ကျွန်ုပ်သည် မည်သည့်အထောက်အပံ့ပစ္စည်းများ လိုအပ်ပါသနည်း။
• ကျွန်ုပ်တွင် မေးခွန်းများ သို့မဟုတ် စိုးရိမ်ပူပန်မှုများရှိပါက မည်သူ့ကို ဆက်သွယ်ရမည်နည်း။

ဆက်စပ် အကြောင်းအရာ