အစာပြွန်နေရာတစ်ဝိုက်ရှိ အရေပြားစောင့်ရှောက်မှု

အစာပြွန်နေရာများအတွက် အထွေထွေစောင့်ရှောက်မှု

• ပြွန်တစ်ဝိုက်ရှိ အရေပြားကို သန့်ရှင်းပြီး ခြောက်သွေ့အောင် ထားပါ။
• ပြွန်ကို မစစ်ဆေးမီ သို့မဟုတ် ပြွန်မှတစ်ဆင့် အာဟာရ သို့မဟုတ် ဆေးဝါးများ ထည့်သွင်းခြင်းမပြုမီ အမြဲတမ်း လက်ကို ဆပ်ပြာနှင့် ရေဖြင့် ဆေးကြောပါ သို့မဟုတ် လက်သန့်ဆေးရည်ကို အသုံးပြုပါ။
• ပြွန်ပတ်လည်ရှိ အရေပြားအနေအထားပြောင်းလဲမှုများကို အနည်းဆုံး တစ်နေ့တစ်ကြိမ် စစ်ဆေးကြည့်ရှုပါ။ အနီကွက်ထခြင်း၊ ယားယံခြင်း၊ နာကျင်ခြင်း၊ သွေးထွက်ခြင်း သို့မဟုတ် အရည်ထွက်ခြင်း လက္ခဏာများကို စစ်ဆေးကြည့်ရှုပါ။
• အရေပြားပေါ်တွင် ပြွန်၏ဖိအားနှင့် ရွေ့လျားမှုတို့ကို နည်းနိုင်သမျှ နည်းအောင် ကန့်သတ်ပါ။
• အရေပြား စောင့်ရှောက်မှုနှင့် ကာကွယ်မှုတို့အတွက် သင့်စောင့်ရှောက်မှုအဖွဲ့၏ ညွှန်ကြားချက်များကို လိုက်နာဆောင်ရွက်ပါ။

နှာခေါင်းမှ အစာအိမ်သို့ ဆက်သွယ်သော (NG) ပြွန်နေရာများကို စောင့်ရှောက်မှု

နှာခေါင်းမှတဆင့်ထည့်ထားသော ပြွန်များ (NG၊ ND သို့မဟုတ် NJ ပြွန်များ) သည် နှာခေါင်းအတွင်းပိုင်းနှင့် ပြွန်ကို တိပ်ကပ်ထားသော အရေပြားကို ယားယံစေနိုင်ပါသည်။ သင့်စောင့်ရှောက်မှုအဖွဲ့သည် အရေပြားကွဲအက်ခြင်းကို ကာကွယ်ရန်အတွက် ပြွန်ပြောင်းလဲသည့်အခါတွင် နှာခေါင်းပေါက်များကို ပြောင်းလဲနိုင်ပါသည်။

နှာခေါင်းပိုက်များသည် တစ်ခါတစ်ရံတွင်ဖိအားကြောင့်ဖြစ်ပေါ်သော ဒဏ်ရာများကို ဖြစ်စေနိုင်ပါသည်။ ပြွန်မှ အရေပြားကို ဖိထားသည့်နေရာများ သို့မဟုတ် ပွတ်တိုက်မိသည့်နေရာတွင် နီရဲခြင်း သို့မဟုတ် ယားယံခြင်း ရှိ၊ မရှိကို စောင့်ကြည့်ပါ။

NG ပြွန်များကြောင့် ဖြစ်သည့် မသက်မသာဖြစ်မှုနှင့် အရေပြားပြဿနာများကို ကာကွယ်ရန် နည်းလမ်းများ

• ပြွန်ကို လုံခြုံစွာထား၍ အရေပြားနှင့် ထိနေသည့်နေရာတွင် ပြွန်လှုပ်ရှားမှုကို ကန့်သတ်ပါ။
• စောင့်ရှောက်မှုအဖွဲ့မှ ခွင့်ပြုထားသည့် တိပ်နှင့် ပတ်တီးစများကိုသာ အသုံးပြုပါ။
• စောင့်ရှောက်မှုအဖွဲ့မှ အကြံပြုထားသည့် အရေပြား ကာကွယ်သောပစ္စည်းကို အသုံးပြုပါ။
• အရေပြားကို မထိခိုက်စေရန် တိပ်နှင့် ပတ်တီးများကို ဖယ်ရှားသည့်အခါတွင် သတိပြုပါ။ လိုအပ်ပါက ကော်ခွာသည့်အရည်ကို အသုံးပြုပါ။
• ပြွန်ပတ်လည်ရှိ အရေပြားကို ရေနွေးနှင့် နူးညံ့သောအဝတ်စဖြင့် ညင်သာစွာ သန့်စင်ပါ။ လိုအပ်ပါက ဆပ်ပြာအပျော့စားကို အသုံးပြုပါ။
• အကယ်၍ တိပ် သို့မဟုတ် ကော်ကြောင့် အရေပြားယားယံပါက အရေပြားပြန်လည်ကောင်းမွန်လာစေရန်အတွက် တိပ်၏နေရာကို ပြောင်းလဲပါ။
• အသုံးမပြုသည့်အခါ ပြွန်၏အဆုံးကို တိပ်ဖြင့် ခိုင်မြဲစွာ ကပ်ထားပါ။ ပြွန်ကို ဆွဲထုတ်လိုက်ခြင်းမှ ကာကွယ်ရန် ဂရုစိုက်ပါ။

နှာခေါင်းမှ အစာအိမ်သို့ ဆက်သွယ်သော (NG) ပြွန် စောင့်ရှောက်မှုအကြောင်းကို ပိုမိုလေ့လာပါ။

G-tube အပေါက် နေရာများကို မည်သို့စောင့်ရှောက်ရမည်နည်း။

အစာအိမ်ထဲသို့ အစာတိုက်ရိုက်ထည့်သော (G) ပြွန်များ၊ အစာအိမ်နှင့် အူသိမ်ကို အပေါက်ဖောက်ပြီး အစာထည့်သော (GJ) ပြွန်များနှင့် အူသိမ်ကို အပေါက်ဖောက်ပြီး အစာထည့်သော (J) ပြွန်များသည် ဝမ်းဗိုက်နံရံတွင် ပြုလုပ်ထားသော အပေါက်ငယ် (အပေါက်) မှတစ်ဆင့် ထည့်သွင်းတပ်ဆင်သော အစာပြွန်များ ဖြစ်ပါသည်။ ၎င်းတို့သည် ပြွန်အရှည်များ(သို့မဟုတ်) low-profile ပြွန်များ ဖြစ်နိုင်ပါသည်။

အနာကျက်သွားသည်နှင့် ပြွန်တစ်ဝိုက်ရှိ အရေပြားသည် နာကျင်မှု မရှိတော့ပါ။ အပေါက်၏ အရွယ်အစားနှင့် ပုံသဏ္ဍာန်သည် အစာပြွန်၏အရွယ်အစားနှင့် သင့်တော်ကိုက်ညီရပါမည်။ ကျန်းမာကောင်းမွန်သော G-tube တပ်ဆင်ထားသည့် နေရာများသည် အပိုစောင့်ရှောက်မှုများစွာ မလိုအပ်ပါ။ များသောအားဖြင့် ဆပ်ပြာနှင့် ရေဖြင့် နေ့စဉ်ရေချိုးခြင်းသည် ထိုနေရာကို သန့်ရှင်းစွာထားရန်အတွက် လိုအပ်သည့်အရာ ဖြစ်ပါသည်။

အစာကျွေးပြွန်အပေါက်နေရာများအတွက် အထွေထွေစောင့်ရှောက်မှုဆိုင်ရာ အကြံပြုချက်များတွင် အောက်ပါတို့ပါဝင်ပါသည်-

• ပြွန်နေရာကို သန့်ရှင်းစွာထားပါ- အပေါက်ပတ်လည်ရှိ နေရာကို အနည်းဆုံး တစ်နေ့တစ်ကြိမ်နှင့် အရည်ထွက်သည့်အခါတိုင်းတွင် ဆပ်ပြာနှင့် ရေဖြင့် သန့်စင်ပါ။ ပြွန်ထည့်ထားသော နေရာတစ်ဝိုက်ကို သန့်ရှင်းရေးလုပ်ရန် ဂွမ်းစကို အသုံးပြုပါ။ ထိုနေရာကို သန့်ရှင်းသော ပတ်တီးစဖြင့် ခြောက်သွေ့အောင်သုတ်ပါ။
• နေရာတစ်ဝိုက်ရှိ အရေပြားကို ခြောက်သွေ့အောင်ထားပါ- ညွှန်ကြားချက်မရှိပါက လိုးရှင်းများ၊ ခရင်မ်များ သို့မဟုတ် လိမ်းဆေးအဆီများကို အသုံးမပြုပါနှင့်။
• အကြံပြုထားသည့်အတိုင်း ပြွန်များကို လှည့်ပေးပါ- G-tubes နှင့် ခလုတ်ပြွန်များကို တစ်နေ့လျှင် တစ်ကြိမ် 1 ပတ်အပြည့် (360 ဒီဂရီ) လှည့်ပေးသင့်ပါသည်။ သင့်ကလေးတွင် GJ-tube ရှိပါက ပြွန်ကို လှည့်ခြင်းသည် ပြွန်ကို နေရာရွေ့သွားစေပြီး မှန်ကန်စွာ လုပ်ဆောင်နိုင်ခြင်း မရှိအောင် ထိခိုက်စေသောကြောင့် မည်သည့်အခါမှ မလှည့်ပါနဲ့။ သင့်ကလေး၏ပြွန်ကို မည်သည့်အခါတွင် မည်သို့လှည့်သင့်ကြောင်းကို မေးမြန်းပါ။
• အပေါက်အသစ်များအတွက် စောင့်ရှောက်မှုဆိုင်ရာညွှန်ကြားချက်များကို လိုက်နာဆောင်ရွက်ပါ- ပြွန်ထည့်ပြီးနောက်တွင် နေရာကို ပတ်တီးစဖြင့် ဖုံးအုပ်ထားမည် ဖြစ်ပါသည်။ ဂွမ်းစနှင့် တိပ်များကို 24 နာရီ ကြာပြီးနောက် သို့မဟုတ် စောင့်ရှောက်မှုအဖွဲ့မှ ညွှန်ကြားချက်အတိုင်း ဖယ်ရှားသင့်ပါသည်။ နေရာကို ညင်သာစွာဖြင့် သန့်စင်ရန် ပိုးသတ်ထားသည့်ရေသုတ်ပုဝါကို အသုံးပြုပါ။ ထို့နောက် သန့်ရှင်းသည့် ဂွမ်းစဖြင့် ခြောက်သွေ့အောင် သုတ်ပါ။ ပြွန်ကို ခိုင်ခံ့စေရန် တိပ်အသစ်ဖြင့် ကပ်ပါ။

G-tubes ကြောင့် ဖြစ်ပွားနိုင်သည့် အရေပြားဆိုင်ရာ ပြဿနာများ

ပြွန်တစ်ဝိုက်တွင် ယိုစိမ့်ခြင်းကြောင့် အရေပြား ယားယံခြင်း

ပြွန်တစ်ဝိုက်တွင် ယိုစိမ့်မှု ဖြစ်ပေါ်နိုင်ပါသည်။ အစာအိမ်ထဲရှိ အရည်များ၏ အစိုဓာတ်နှင့် အက်ဆစ်ဓာတ်သည် အရေပြားကို နီရဲ၍ ယားယံခြင်းကို ဖြစ်စေနိုင်ပါသည်။ ထိုသို့ဖြစ်ပါက အရေပြားကို တစ်နေ့လျှင် အကြိမ်ပေါင်းများစွာ သို့မဟုတ် လိုအပ်ပါ ပို၍မကြာခဏ ရေဖြင့် သန့်စင်ပါ။ သန့်ရှင်းမှုပြုလုပ်ပြီးပါက အရေပြားကို ညင်သာစွာဖြင့် ခြောက်သွေ့အောင် ပြုလုပ်ပါ။ သင်၏စောင့်ရှောက်မှုအဖွဲ့သည် အရေပြားကာကွယ်ပေးသည့်အမှုန့် (barrier powder) သို့မဟုတ် လိမ်းဆေးအဆီကို အကြံပြုနိုင်ပါသည်။

အစာအိမ်ထဲရှိ အစာချေသည့် အက်စစ်များကို ထိန်းချုပ်သည့် ဆေးဝါးများ သို့မဟုတ် အစာအိမ်ထဲမှ အစာများကို မြန်မြန်ကုန်စေသော ဆေးဝါးများသည် ယိုစိမ့်မူကြောင့်ဖြစ်သော ပျက်စီးမှုကို လျှော့ချရန် ကူညီပေးနိုင်ပါသည်။ အကယ်၍ အရေပြားသည် သက်သာခြင်းမရှိပါက သို့မဟုတ် ယိုစိမ့်မှု ဆက်လက်ဖြစ်ပေါ်နေပါက သို့မဟုတ် အရည်စိမ့်ထွက်သည့် ပမာဏများပါက သင်၏စောင့်ရှောက်မှုအဖွဲ့ကို ဆက်သွယ်ပါ။

အစာပြွန်တစ်ဝိုက်တွင် ယိုစိမ့်ခြင်းကို ဖြစ်စေသည့် အကြောင်းရင်းများမှာ-

• အစာကို အလွန်အကျွံ သို့မဟုတ် မြန်မြန်ကျွေးခြင်း။ တခါတရံတွင် ဘိုလပ်စ် (bolus) ဖြင့် အစာကျွေးနေစဉ် ပြွန်မှ ယိုစိမ့်နိုင်ပါသည်။ အစာကျွေးသည့်နှုန်းကို လျှော့ချခြင်း သို့မဟုတ် မတူညီသော အစာကျွေးသည့်အချိန်ဇယားကို အသုံးပြုခြင်းသည် အထောက်အကူ ဖြစ်စေနိုင်ပါသည်။ သင့်ကလေး၏ အာဟာရဆိုင်ရာ မည်သည့်ပြောင်းလဲမှုမျိုးကိုမဆို မပြုလုပ်မီ အာဟာရပညာရှင် သို့မဟုတ် အခြားကျန်းမာရေးစောင့်ရှောက်မှုအဖွဲ့ဝင်တစ်ဦးနှင့် တိုင်ပင်ဆွေးနွေးပါ။
• ပြွန်ထဲရှိ နေရာမရွေ့စေရန် ထိန်းပေးသော ရေဖြည့်ထားသည့် ပူဖောင်း၌ ပြဿနာများဖြစ်ပေါ်ခြင်း။ ပူဖောင်းထဲရှိ ရေပမာဏကို စစ်ဆေးပါ။ အကယ်၍ ရှိသင့်သည့် ရေပမာဏထက် နည်းနေပါက သင့်လျော်သည့် ရေပမာဏကို ပြန်လည်ဖြည့်တင်းပါ။ နောက်ရက်တွင် ပူဖောင်းကို ပြန်လည်စစ်ဆေးပါ။ အကယ်၍ ပူဖောင်းသည် ဆက်လက်၍ လျော့နည်းနေပါက ယိုစိမ့်မှု ရှိနိုင်ပါသည်။ ညွှန်ကြားချက်များအတွက် စောင့်ရှောက်မှုအဖွဲ့သို့ ဆက်သွယ်ပါ။ ပူဖောင်းထဲရှိ ရေပမာဏကို စစ်ဆေးရန်-
  • ပူဖောင်း ပေါ့တ် (balloon port) တွင် ဆေးထိုးပြွန်ကို တပ်ပါ။
  • ပူဖောင်းထဲမှ ရေအားလုံးကို ထုတ်ရန် ပြွန်တံကို နောက်သို့ပြန်ဆွဲဆုတ်ပါ။
  • လိုအပ်ပါက ဆေးထိုးပြွန်ထဲသို့ ရေပမာဏကို မှန်ကန်စွာထည့်၍ ရေကို ပူဖောင်းထဲသို့ ပြန်ထိုးထည့်ပါ။
  • ဆေးထိုးပြွန်ကို ဖြုတ်ပါ။
• ပြွန်သည် အပေါက်နှင့် မကိုက်ညီခြင်း။ ကလေး၏ ကိုယ်အလေးချိန်တက်ခြင်း သို့မဟုတ် လျော့ကျခြင်းကြောင့် ၎င်းသည် တစ်ခါတစ်ရံတွင် ဖြစ်ပွားနိုင်သည်။ ကိုယ်အလေးချိန်တိုးလာပါက ထိုင်လိုက်သောအခါ ပြွန်သည် အစာအိမ်ပတ်လည်ရှိ အရေပြားခေါက်များကြားတွင် မြုပ်သွားနိုင်ပါသည်။ ပြွန်၏ အလယ်ပိုင်းကိုယ်ထည်ကို ပြွန်ခလုတ်၏အောက်တွင် တွေ့ရပါက ပြွန်သည် သင့်ကလေးအတွက် အလွန်ရှည်လွန်းနေနိုင်ပါသည်။ ပြွန်သည် မှန်ကန်သော အရွယ်အစား မဟုတ်တော့ပါက အစားထိုးလဲလှယ်ရန် လိုအပ်နိုင်ပါသည်။
• အစာအိမ် သို့မဟုတ် ပြွန်ပေါ်တွင် ဖိအားဖြစ်ခြင်း။ အကယ်၍ သင့်ကလေးသည် ဗိုက်ဖြင့်မှောက်အိပ်ပါက ၎င်းသည် ပြွန်ပေါ်တွင် ဖိအားဖြစ်စေနိုင်ပါသည်။ ဘေးတစ်စောင်း သို့မဟုတ် ပက်လက်အိပ်ခြင်းသည် ဖိအားကို လျှော့ချရန် အထောက်အကူဖြစ်စေနိုင်ပါသည်။
• လေပွခြင်းနှင့် ဝမ်းချုပ်ခြင်း။ လေပွခြင်းနှင့် ဝမ်းချုပ်ခြင်းသည် အစာချေဖျက်သည့် လမ်းကြောင်းကို ဗိုက်ပြည့်ခြင်းနှင့် ဖိအားကို ဖြစ်စေနိုင်သည်။ တက်ကြွစွာ ကိုယ်လက်လှုပ်ရှားခြင်းနှင့် ရေဓာတ်ပြည့်ဝစွာ နေထိုင်ခြင်းသည် ဤရောဂါလက္ခဏာများကို သက်သာစေရန် ကူညီပေးနိုင်ပါသည်။ သင့်စောင့်ရှောက်မှုအဖွဲ့သည် ဆေးဝါးများ သို့မဟုတ် အာဟာရဆိုင်ရာ ပြောင်းလဲမှုများကိုလည်း အကြံပြုနိုင်ပါသည်။ ပြွန်အမျိုးအစားအချို့အတွက်၊ ပိုလျှံနေသည့်လေကို ဖယ်ရှားရန်အတွက် လေထွက်အောင် ပြုလုပ်ခြင်း သို့မဟုတ် လေချဉ်တက်စေခြင်းတို့ လိုအပ်နိုင်ပါသည်။

အသားနုတစ်ရှူး

အသားနုတစ်ရှူးသည် အပေါက်ငယ်တစ်ဝိုက်တွင် ဖြစ်လာသည့် အသားပိုအရေပြားတစ်ရှူး ဖြစ်ပါသည်။ အသားနုတစ်ရှူးတက်ခြင်းသည် အဖြစ်များပါသည်။ ၎င်းသည် များသောအားဖြင့် အနီရောင်နှင့် စိုစွတ်သည့် ပုံစံရှိ၍ ပါးစပ်ထဲရှိ အရေပြားနှင့် ဆင်တူသည်။ ယင်းတစ်ရှူးသည် နှုးညံပြီး သွေးထွက်ခြင်း သို့မဟုတ် အရည်ထွက်ခြင်း အချို့ရှိနိုင်ပါသည်။ အသားနုတစ်ရှူးသည် ပြွန်သည် အရေပြားနှင့် ပွတ်တိုက်သောကြောင့် ဖြစ်ပေါ်သည့် ပွတ်တိုက်မှုကြောင့် ဖြစ်ပေါ်လာနိုင်သည်။

အသားနုတစ်ရှူးဖြစ်ပေါ်ခြင်းကို ကာကွယ်ရန် နည်းလမ်းများမှာ နေရာကို ခြောက်သွေ့အောင် ထားရှိခြင်း၊ ပြွန်အား လှုပ်ရှားမှုမဖြစ်ပေါ်စေရန် ကန့်သတ်ခြင်းနှင့် ပြွန်နှင့် အပေါက်တို့ကို ကိုက်ညီအောင် ပြုလုပ်ခြင်းတို့ ဖြစ်ပါသည်။ အသားနုတစ်ရှူးကို silver nitrate လိမ်းခြင်းဖြင့် ကုသနိုင်ပါသည်။

သွေးထွက်ခြင်း

အပေါက်တစ်ဝိုက်တွင် သွေးထွက်ခြင်းသည် အကြောင်းအရင်းများစွာ ရှိနိုင်ပါသည်။ ပြွန်လဲလှယ်ပြီးသည့်အခါတွင် ထိုနေရာမှ သွေးထွက်နိုင်ပါသည်။ သွေးထွက်ခြင်းသည် အရေပြားကို ပိုမိုပျက်စီးလွယ်အောင် ပြုလုပ်နိုင်သည့် အသားနုတစ်ရှူးများကြောင့်လည်း ဖြစ်စေနိုင်ပါသည်။ သွေးအနည်းငယ်ထွက်ခြင်းသည် စိုးရိမ်စရာမရှိပါ။

သွေးထွက်ခြင်းသည် မိနစ်အနည်းငယ်ကြာသည်အထိ မရပ်ပါက သို့မဟုတ် ပို၍ဆိုးလာပါက ထိုနေရာကို ဖိထားပြီး စောင့်ရှောက်မှုအဖွဲ့ကို ချက်ချင်းခေါ်ဆိုပါ။

ရောဂါပိုးဝင်ခြင်း

ကျန်းမာသောကလေးတစ်ဦးတွင် အပေါက် သို့မဟုတ် အပေါက်ပတ်လည်ရှိ အရေပြားသို့ ရောဂါပိုးဝင်ခြင်းသည် ရှားပါးပါသည်။ သို့သော်လည်း ကိုယ်ခံအားစနစ် အားနည်းသည့် ကလေးများတွင် ပြွန်ထည့်ထားသည့်နေရာအား ရောဂါပိုးဝင်နိုင်ခြေ ပိုများပါသည်။ ရောဂါပိုးဝင်ခြင်း၏ လက္ခဏာများတွင် အောက်ပါတို့ ပါဝင်ပါသည်-

• အထူးသဖြင့် ယိုစိမ့်မှုမရှိဘဲ အပေါက်တစ်ဝိုက်တွင် အရေပြားနီရဲမှု ပိုဆိုးလာခြင်း
• ဖျားခြင်း
• နာကျင်ခြင်း၊ ထိလျှင်နာခြင်း သို့မဟုတ် ရောင်ရမ်းခြင်း
• ပြည် သို့မဟုတ် အနံ့ဆိုးထွက်ခြင်း

အရေပြားနီရဲခြင်းနှင့် အရည်ထွက်ခြင်းသည် ရောဂါပိုးဝင်ရောက်ခြင်း၏ လက္ခဏာများဖြစ်သော်လည်း ၎င်းတို့သည် အခြားသော အကြောင်းအရင်းများကြောင့်လည်း ဖြစ်နိုင်ပါသည်။ တခါတရံတွင် အစာအိမ်အတွင်းရှိ အရာများနှင့် အရေပြားပေါ်ရှိ ဘက်တီးရီးယားများ ရောနှောသွားပြီး အနံ့ဆိုးသည့် အရည်ထွက်ခြင်း ဖြစ်စေနိုင်ပါသည်။ ယိုစိမ့်မှုကြောင့် ဖြစ်သည့် အရေပြားနီရဲခြင်းကို အရေပြားအား မကြာခဏ သန့်စင်ပေးခြင်းဖြင့် ကုသနိုင်ပါသည်။

သွေးတွင်း နျူထရိုဖီးလ်သွေးဖြူဥ အရေအတွက်နည်းခြင်း (neutropenia) ကြောင့်ဖြစ်သော အရေပြားပြောင်းလဲမှုများ

သွေးတွင်း နျူထရိုဖီးလ်သွေးဖြူဥ အရေအတွက်နည်းခြင်း (Neutropenia) သည် ပကတိနျူထရိုဖီးလ်အရေအတွက် (ANC) သည် 500 ထက် နည်းသောအခါတွင် ဖြစ်ပွားပါသည်။ ကိုယ်ခံအားစနစ် အားနည်းသောကြောင့် ခန္ဓာကိုယ်သည် ရောဂါပိုးများကို တိုက်ထုတ်နိုင်စွမ်း အားနည်းပြီး သက်သာပျောက်ကင်းမှုလည်း နှေးကွေးလာနိုင်ပါသည်။ ၎င်းသည် အပေါက်နေရာ (stoma) ကို စိုစွတ်နေခြင်း၊ အရည်ယိုစိမ့်ခြင်းနှင့် နာကျင်ခြင်းတို့ကို ဖြစ်စေနိုင်ပါသည်။ ဘက်တီးရီးယားများ ပွားများလာပြီး ရောဂါပိုးကူးစက်ခြင်းကို ဖြစ်စေနိုင်ပါသည်။ အချို့အခြေအနေများတွင် အပေါက်နေရာ (stoma) သည် ပိုကြီးလာနိုင်ပါသည်။

သွေးဆဲလ်အရေအတွက် တဖန်ပြန်မတက်လာမချင်း ယင်းအပေါက် (stoma) သည် အခြေအနေပိုကောင်းလာမည် မဟုတ်ပါ။ တစ်ခါတစ်ရံတွင် ၎င်းနေရာသည် ပြန်လည်ကောင်းမွန်မလာမီ အခြေအနေ ပိုမိုဆိုးရွားလာသကဲ့သို့ ဖြစ်နေနိုင်ပါသည်။ ဤသို့ဖြစ်ပွားပါက နေရာကို စောင့်ရှောက်မှုအဖွဲ့မှ အကြံပြုထားသည့်အတိုင်း ကုသပါ။

နေရာကို သန့်ရှင်းခြောက်သွေ့စွာထားရှိခြင်းသည် ပျောက်ကင်းသက်သာမှုလုပ်ငန်းစဉ်အား အထောက်အကူဖြစ်စေကြောင်းကို သတိပြုပါ။

စောင့်ရှောက်မှု အဖွဲ့ကို ဆက်သွယ်ရမည့် အချိန် 

သင်သည် အောက်ပါတို့မှ တစ်ခုခုကို သတိပြုမိပါက သင်၏ စောင့်ရှောက်မှုအဖွဲ့ကို ဆက်သွယ်ပါ-

• ပိုဆိုးလာသည့် သို့မဟုတ် ပျံ့နှံ့သွားသည့် ဖျားခြင်း၊ ပြည်တည်ခြင်း၊ အနံ့ဆိုးထွက်ခြင်း၊ ရောင်ခြင်း၊ နာကျင်ခြင်း သို့မဟုတ် နီရဲခြင်းကဲ့သို့သော ရောဂါပိုးဝင်ခြင်း လက္ခဏာများ 
• သင့်ကလေး၏ နေ့စဉ်လုပ်ငန်းဆောင်တာများကို အနှောင့်အယှက်ဖြစ်စေသော သို့မဟုတ် မကောင်းမွန်လာသေးသော ယားယံခြင်း၊ နာကျင်ခြင်း သို့မဟုတ် နာကျင်ကိုက်ခဲခြင်း
• မကြာခဏ ပမာဏများပြားသည့် သို့မဟုတ် ရပ်တန့်မသွားသည့် သွေးထွက်ခြင်း သို့မဟုတ် အရည်ယိုစိမ့်ခြင်း
• ပြွန်ကို လုံခြုံစွာထားရန် အခက်အခဲရှိခြင်း 

သင်၏ ကုသရေးအဖွဲ့ကို မေးရန် မေးခွန်းများ

• အစာပြွန်အနီးတဝိုက်ရှိ အရေပြားကို မည်ကဲ့သို့ သန့်စင်သင့်သနည်း။
• အစာပြွန်အနီးတဝိုက်ရှိ အရေပြားသည် နီရဲလာပါက၊ ယားယံလာပါက၊ ကြမ်းတမ်းလာပါက သို့မဟုတ် နာကျင်လာပါက ကျွန်ုပ်တို့ ဘာလုပ်သင့်သနည်း။
• အရေပြားပြဿနာများကို ကာကွယ်ပေးနိုင်သည့် သို့မဟုတ် ကုသပေးနိုင်သည့် လိမ်းဆေးအဆီ သို့မဟုတ် ခရင်မ်များ ရှိပါသလား။
• အစာပြွန်ကို မည်ကဲ့သို့ လုံခြုံအောင်ထား၍ အရေပြားအား ပွတ်တိုက်မိခြင်း သို့မဟုတ် ဆွဲတင်းမိခြင်းမှ မည်သို့ကာကွယ်နိုင်မည်နည်း။
• အသားနုတစ်ရှူး ဆိုသည်မှာ အဘယ်နည်း၊ ၎င်းကို မည်သို့ကာကွယ်နိုင်မည်နည်း။
• ကျွန်ုပ်တို့သည် မည်သည့်အရေပြားပြဿနာများကို သတိထားသင့်၍ မည်သည့်အချိန်တွင် ဆေးကုသမှုခံယူသင့်ပါသနည်း။

ဆက်စပ် အကြောင်းအရာများ