သွေးကြောမှတစ်ဆင့် အာဟာရထည့်သွင်းခြင်း

သွေးကြောမှတစ်ဆင့် အာဟာရထည့်သွင်းခြင်းဆိုသည်မှာ အဘယ်နည်း။

သွေးကြောမှတစ်ဆင့် အာဟာရထည့်သွင်းခြင်း (PN) သည် သွေးပြန်ကြောထဲတွင် ထည့်ထားသော ပြွန်မှတစ်ဆင့် ထည့်သွင်းသော IV အာဟာရ ဖြစ်ပါသည်။ လူနာသည် အာဟာရဓာတ်များအားလုံးကို မရနိုင်သည့်အခါတွင် အသုံးပြုပါသည် ၎င်းတို့သည် ပါးစပ်ဖြင့် သို့မဟုတ် အူလမ်းကြောင်းသို့တိုက်ရိုက် (အစာပြွန်) အစာကျွေးခြင်းလိုအပ်ပါသည်။ သွေးကြောမှတစ်ဆင့် အာဟာရထည့်သွင်းခြင်းသည် သွေးကြောထဲသို့ အရည်အဖြစ် တိုက်ရိုက်ထည့်သွင်းပါသည်။ ၎င်းသည် လူနာတစ်ဦးလိုအပ်သည့် ကယ်လိုရီများ နှင့် အာဟာရဓာတ်များကို ပံ့ပိုးပေးနိုင်ပါသည်။

သွေးကြောမှတစ်ဆင့် အာဟာရထည့်သွင်းခြင်းကို တစ်စိတ်တစ်ပိုင်း သို့မဟုတ် အပြည့်အဝ အာဟာရပံ့ပိုးမှုအတွက် အသုံးပြုနိုင်ပါသည်။ အပြည့်အဝ အာဟာရပံ့ပိုးမှုကို သွေးကြောမှတစ်ဆင့် စုစုပေါင်းအာဟာရထည့်သွင်းခြင်း (TPN) ဟုလည်း သိကြပါသည်။

သွေးကြောမှတစ်ဆင့် အာဟာရထည့်သွင်းခြင်းအတွက် IV ပြွန်မျိုးစုံကို အသုံးပြုနိုင်ပါသည်။ ၎င်းတို့တွင် အောက်ပါတို့ ပါဝင်ပါသည်-

• အစွန်အဖျား သွေးပြန်ကြောထဲသို့ ထည့်သွင်းထားသည့် ပြွန်ပိုက်။ ကာလတို သွေးကြောမှတစ်ဆင့် အာဟာရထည့်သွင်းခြင်းအတွက် လက်မောင်းတွင်ရှိသော သွေးပြန်ကြောအတွင်းသို့ ပြွန်ပိုက်ကို ထည့်သွင်းနိုင်ပါသည်။ ၎င်းကို IV သို့မဟုတ် အစွန်အဖျား IV ဟုလည်း ခေါ်ပါသည်။
• ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်။ ပြွန်ပိုက်ကို ခွဲစိတ်ဆရာဝန်ဖြင့် နှလုံးသို့သွားသည့် သွေးပြန်ကြောမကြီးအတွင်းသို့ ထည့်သွင်းနိုင်ပါသည်။ ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်များတွင် PICC လိုင်းများ၊ ဗဟိုပိုက်လိုင်းများနှင့် အပေါက်စက်ကိရိယာများ ပါဝင်ပါသည်။ ကလေးများစွာတွင် ကင်ဆာကုသမှုများအတွက် ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်တစ်ခုရှိပြီး ၎င်းတို့သည် ပြွန်နှင့် ချိတ်ဆက်ထားသော ပြွန်အတွင်းပိုင်း မှတစ်ဆင့် အာဟာရဓာတ်ကို ရရှိနိုင်ပါသည်။ ကာလရှည် သွေးကြောမှတစ်ဆင့် အာဟာရထည့်သွင်းခြင်းအတွက် ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်များကို ပိုမိုအသုံးပြုကြသည်။

ဖြစ်နိုင်ပါက ပါးစပ် သို့မဟုတ် ပြွန်ပိုက်ဖြင့် အစာသွင်းခြင်းနည်းဖြင့် အာဟာရ ပံ့ပိုးခြင်းသည် အကောင်းဆုံးဖြစ်ပါသည်။ ဤနည်းလမ်းများသည် အစာချေညက်ခြင်း ကို ပိုမိုသဘာဝကျသောနည်းလမ်းဖြင့် ပြုလုပ်စေနိုင်ပါသည်။ ကင်ဆာဝေဒနာသည်ကလေးများတွင် ၎င်းသည် အမြဲတမ်း မဖြစ်နိုင်ပါ။ အောက်ပါအခြေအနေများတွင် သွေးကြောမှတစ်ဆင့် အာဟာရထည့်သွင်းခြင်းကို လိုအပ်နိုင်ပါသည်-

• ကလေး၏ အစာချေစနစ် သည် အာဟာရဓာတ်များကို စုပ်ယူရန် ကောင်းကောင်း အလုပ်လုပ်ခြင်း မရှိသည့်အခါ။
• ကလေး၏ အစာခြေစနစ်ကို ခွဲစိတ်မှု ပြုလုပ်ထားသည့်အခါ။
• ကလေး၏ အူများ ပိတ်နေသောအခါ။
• ကလေးသည် ပြင်းထန်သည့် ပျို့အန်ခြင်း သို့မဟုတ် ဝမ်းလျှောခြင်း ဖြစ်နေသောအခါ။
• ကလေးတွင် အူလမ်းကြောင်းသို့တိုက်ရိုက် အာဟာရထည့်သွင်းခြင်း (ပြွန်ဖြင့် အစာသွင်းခြင်း) နှင့် ပတ်သက်၍ ပြဿနာများ ရှိသည့်အခါ။

သွေးကြောမှတစ်ဆင့် အာဟာရထည့်သွင်းသည့် ဆေးရည်တွင်ပါဝင်သော အာဟာရဓာတ်များ

PN အာဟာရဖျော်ရည်ကို ဆေးဆိုင်တွင် ပြင်ဆင်ပါသည်။ ၎င်းသည် အဓိကအာဟာရဓာတ်များ ရောနှောပါဝင်သော ပိုးမွှားကင်းစင်သည့် အရည် ဖြစ်ပါသည်။ ဖော်စပ်ပုံကို အသက်၊ ကိုယ်အလေးချိန်နှင့် ကျန်းမာရေးကဲ့သို့ အချက်များပေါ်တွင် မူတည်၍ လူနာ၏ အာဟာရလိုအပ်ချက်ကို ဖြည့်ဆည်းပေးရန် စိတ်ကြိုက်ပြုလုပ်ထားသည်။

ကစီဓာတ်၊ အသားဓာတ်နှင့် အဆီဓတို့သည် စွမ်းအင်အတွက် ကယ်လိုရီများ ဖြည့်ဆည်းပေးသော အဓိကအာဟာရဓာတ် 3 မျိုးဖြစ်ပြီး ခန္ဓာကိုယ်လုပ်ဆောင်ချက် အမျိုးမျိုးတွင် အသုံးပြုပါသည်။

• ကစီဓာတ်သည် ခန္ဓာကိုယ်တွင် စွမ်းအင်အတွက် ကယ်လိုရီများကို ပံ့ပိုးပေးပါသည်။ PN တွင် ကစီဓာတ်ကို ဒက်စ်ထရို့စ် (dextrose) ပုံစံဖြင့် ဂလူးကို့စ် (သကြား) အဖြစ် ပံ့ပိုးပေးပါသည်။
• အသားဓာတ်သည် ကြွက်သားများ ကြီးထွားရန်၊ တစ်ရှူးကို ပြုပြင်ရန်၊ ရောဂါပိုးကူးစက်မှုကို ခုခံရန်နှင့် ဆဲလ်များကို ပုံမှန်အလုပ်လုပ်စေရန်အတွက် အရေးကြီးပါသည်။ အသားဓာတ်သည် ခန္ဓာကိုယ်အတွက် စွမ်းအင်ပေးစွမ်းနိုင်သည့် ကယ်လိုရီများကိုလည်း ပံ့ပိုးပေးပါသည်။ အသားဓာတ်ကို အမိုင်နိုအက်ဆစ်များဖြင့် ပြုလုပ်ထားပါသည်။ အမိုင်နိုင်အက်ဆစ်အချို့ကို ခန္ဓာကိုယ်မှ ပြုလုပ်ပေးနိုင်ပြီး အခြားအမိုင်နိုင်အက်ဆစ်များကို အစားအစာမှ ရရှိပါသည်။
• အဆီများ (အဆီဓာတ်များ) သည် ကယ်လိုရီနှင့် စွမ်းအင်တို့ကို ပံ့ပိုးပေးပြီး ဆဲလ်လုပ်ဆောင်ချက်မျိုးစုံအတွက် အသုံးပြုပါသည်။ PN တွင် ပံ့ပိုးပေးသည့် အဆီများသည် မရှိမဖြစ်လိုအပ်သောအဆီအက်ဆစ် ချို့တဲ့မှုကို ကာကွယ်ရန်အတွက် အရေးကြီးပါသည်။။ အဆီများသည် ခန္ဓာကိုယ်၏ အစိတ်အပိုင်းများကို ကာကွယ်ပေးသည်၊ ခန္ဓာကိုယ် အပူချိန်ကို ထိန်းထားရန် ကူညီပြီး ခန္ဓာကိုယ်က စုပ်ယူနိုင်စေရန် ဗီတာမင်အချို့ကိုလည်း သိုလှောင်ပေးပါသည်။

PN တွင် အောက်ပါတို့လည်း ပါဝင်သည်-

• အရိုး၊ အာရုံကြော၊ အင်္ဂါအစိတ်အပိုင်းနှင့် ကြွက်သားလုပ်ဆောင်ချက်အတွက် အလွန်အရေးပါသော ဓာတ်ဆားဓာတ်များ။ TPN တွင် ပါဝင်နိုင်သော ဓာတ်ဆားဓာတ်များမှာ ကယ်လ်စီယမ်၊ ပိုတက်စီယမ်၊ ဖော့ဖရပ်စ်၊ မဂ္ဂနီဆီယမ်၊ ဆိုဒီယမ်၊ ကလိုရိုဒ်နှင့် အက်စစ်တိတ်တို့ ဖြစ်ပါသည်။
• သင့်ကလေး ကြီးထွားစေရန်နှင့် ကျန်းမာသန်စွမ်းစေရန် ကူညီပေးသော ဗီတာမင်များ။ TPN တွင် ယေဘုယျအားဖြင့် ဗီတာမင် A၊ B၊ C၊ D၊ E နှင့် K တို့ပါဝင်သည့် မလ်တီဗီတာမင် ပါဝင်ပါသည်။
• ကြီးထွားရန်နှင့် ခန္ဓာကိုယ်လုပ်ဆောင်ချက်အတွက် အရေးကြီးသော သတ္တုဓာတ်နှင့် ခန္ဓာကိုယ်အတွက် အနည်းငယ်မျှသာလိုသော ဒြပ်စင်များ။ ၎င်းတို့တွင် သွပ်၊ သံ၊ ကြေးနီ၊ ခရိုမီယမ်၊ မန်းဂနိစ်နှင့် ဆယ်လီနီယမ်ဓာတ်တို့ ပါဝင်နိုင်ပါသည်။
• ပုံမှန်ရေဓာတ်ကိုထိန်းထားရန် မှန်ကန်သော အရည်ပမာဏရှိကြောင်း သေချာစေသော ရေဓာတ်။

သွေးကြောမှတစ်ဆင့် အာဟာရထည့်သွင်းခြင်းကို မည်သို့ပေးသနည်း

သွေးကြောမှတစ်ဆင့် အာဟာရထည့်သွင်းခြင်းကို အများအားဖြင့် ဆေးရုံတွင် စတင်လုပ်ဆောင်သည်။ ဆရာဝန်၊ ဆေးဝါးကျွမ်းကျင်ပညာရှင်နှင့် မှတ်ပုံတင်ထားသော အာဟာရဗေဒပညာရှင်တို့သည် လူနာနေ့စဉ်လိုအပ်သည့် ကယ်လိုရီနှင့် အခြားအာဟာရဓာတ်ပမာဏကို ဆုံးဖြတ်ရန် အတူတူလုပ်ဆောင်ပါသည်။ PN အား တုံ့ပြန်ပုံကို စောင့်ကြည့်ရန် သွေးစစ်ဆေးမှုများကို လုပ်ဆောင်ပါသည်။ PN အရောအနှောကို လိုအပ်သလို ချိန်ညှိသည်။

အများအားဖြင့် လူနာများသည် တစ်နေ့လျှင် PN အာဟာရဖျော်ရည် တစ်အိတ်ထည့်သွင်းပါသည်။ PN အာဟာရဖျော်ရည်ကို 2-in-1 (ဒက်စ်ထရို့စ်နှင့် အမိုင်နိုအက်ဆစ်များ) နှင့် 3-in-1 (ဒက်စ်ထရို့စ်၊ အမိုင်နိုအက်ဆစ်များနှင့် အဆီဓာတ်များ) ပုံစံဖြင့် ရရှိနိုင်ပါသည်။ အကယ်၍ အာဟာရဖျော်ရည်တွင် အဆီဓာတ်များပါဝင်ပါက အိတ်တွင် သီးခြားအပိုင်းများ ပါဝင်မည် ဖြစ်ပါသည်။ အာဟာရဓာတ်များကို မထည့်သွင်းမီ ပိုင်းခြားထားသည့် အပြားကိုခွာ၍ ညင်သာစွာ ဆုပ်နယ်ပေးခြင်းဖြင့် ရောနှောရန် လိုအပ်ပါသည်။ အိတ်ကို လူနာ၏ IV သို့မဟုတ် ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်သို့ ချိတ်ဆက်ခြင်းနှင့် သွေးအတွင်းသို့ ထည့်သွင်းသည့် ပန့်စက်ကို အသုံးပြု၍ အာဟာရဖျော်ရည်ကို ထည့်သွင်းပါသည်။ ပန့်စက်ကို သတ်မှတ်ထားသည့် အချိန်ဇယားအတိုင်း အာဟာရဖျော်ရည်ကိုပေးရန် သတ်မှတ်ထားပါသည်။

စဉ်ဆက်မပြတ် PN ကို အချိန်တိုင်း ပေးထားပါသည်။ PN ကို စတင်အသုံးပြုသည့်အခါတွင် ထိုနည်းလမ်းကို အသုံးပြုပါသည်။ ၎င်းသည် လိုအပ်သည့်အာဟာရဓာတ်များ ပြည့်မီရရှိကြောင်း သေချာစေရန် ခန္ဓာကိုယ်အား ချိန်ညှိနိုင်စေပါသည်။

စက်ဝန်းသတ်မှတ်ထားသည့် PN ကို တစ်ရက်လျှင် 24 နာရီထက် လျော့နည်း၍ သတ်မှတ်ထားသည့် အချိန်ကာလတွင်း ထည့်သွင်းပေးပါသည်။ စက်ဝန်းတစ်ခုတွင် 20၊ 16၊ သို့မဟုတ် 12 နာရီကဲ့သို့ သတ်မှတ်ထားသော ကြာချိန်နာရီများအတွက် PN ကို ထည့်သွင်းပေးရန် ပန့်စက်ကို သတ်မှတ်ထားပါသည်။ စက်ဝန်းအချိန်သည် လျော့နည်းသွားသည်နှင့် ထည့်သွင်းနှုန်း တိုးလာသောကြောင့် PN သည် ခြုံငုံကြည့်ပါက တည်ငြိမ်သောနှုန်းဖြင့် ထည့်သွင်းပေးနေပါသည်။

စက်ဝန်းသတ်မှတ်ထားသည့် PN ၏ အကျိုးကျေးဇူးများ-

• ပန့်စက်နားချိန်ရှိသောကြောင့် လူနာသည် လှုပ်ရှားရန်နှင့် လုပ်ဆောင်ချက်များတွင် ပိုမိုလွယ်ကူစွာ ပါဝင်ဆောင်ရွက်နိုင်ပါသည်။
• စက်ဝန်းသတ်မှတ်ထားသည့် PN သည် ဆာလောင်မှုခံစားချက်များကို ရရှိစေနိုင်ပါသည်။ အဆက်မပြတ် PN သည် ဆာလောင်မှုကို တားဆီးပေးပြီး ၎င်းသည် ပါးစပ်မှတစ်ဆင့် အစာကျွေးခြင်းသို့ ပြောင်းလဲရာတွင် ပို၍ခက်ခဲစေသည်။
• စက်ဝန်းသတ်မှတ်ထားသည့် PN သည် အစားစာချိန်များတွင် ဖြစ်ပေါ်သော ဟော်မုန်းတုံ့ပြန်မှုကို ပိုမိုသဘာဝကျစေပါသည်။
• သည်းခြေစီးဆင်းမှု လျော့နည်းခြင်း သို့မဟုတ် ရပ်တန့်ခြင်းကို ဖြစ်စေသော ကျန်းမာရေးအခြေအနေတစ်ခုဖြစ်သည့် PN ကြောင့်ဖြစ်ပေါ်သော သည်းခြေရည်စီးဆင်းမှု ပျက်ယွင်းခြင်း ဖြစ်နိုင်ခြေ ပိုနည်းပါသည်။

လူနာအများစုတွင် နေ့အချိန်၌ ပုံမှန်လုပ်ဆောင်ချက် နာရီအနည်းငယ် ပြုလုပ်နိုင်ရန် စက်ဝန်းသက်မှတ်ထားသည့် PN ကို တစ်ညလုံး ထားရှိကြပါသည်။ စက်ပစ္စည်းပေါ် မူတည်၍ PN ထည့်သွင်းစဉ်တွင် ပိုမိုလွတ်လပ်စွာ လှုပ်ရှားနိုင်ရန်အတွက် ဆေးသွင်းသည့်ပန့်စက်ကို ကျောပိုးအိတ်ထဲတွင် သယ်ဆောင်ထားနိုင်ပါသည်။

သွေးကြောမှတစ်ဆင့် အာဟာရထည့်သွင်းခြင်း၏ ပြဿနာများနှင့် ဘေးထွက်ဆိုးကျိုးများ

မှန်ကန်သည့် အာဟာရကို ရရှိစေရန်နှင့် ပြင်းထန်သော ဘေးထွက်ဆိုးကျိုးများမှ ကာကွယ်ရန်အလို့ငှာ ဂရုတစိုက်စောင့်ကြည့်ရန် လိုအပ်ပါသည်။ PN ကြောင့် ဖြစ်ပေါ်သည့် ပြဿနာတော်တော်များများကို PN ၏ ဖော်မြူလာ သို့မဟုတ် အချိန်ဇယားကို ချိန်ညှိခြင်းဖြင့် ဖြေရှင်းနိုင်ပါသည်။ ပိုးဝင်ခြင်းမှ ကာကွယ်ရန်အတွက် ဗဟိုသွေးပြန်ကြောထဲသို့ ထည့်သွင်းထားသည့် ပြွန်ပိုက်ကို သေချာဂရုစိုက်ရန်မှာလည်း အရေးကြီးပါသည်။ PN ကို ချိတ်ဆက်ခြင်းနှင့် ဖြုတ်ခြင်းကို လုပ်ဆောင်သောအခါတွင် လက်ကို စနစ်တကျဆေးကြောခြင်းနှင့် ပိုးသတ်နည်းစနစ်ကို အသုံးပြုခြင်းတို့သည် အရေးကြီးပါသည်။

PN ၏ ဖြစ်နိုင်ချေရှိသော နောက်ဆက်တွဲပြဿနာများတွင် ပုံမှန်မဟုတ်သော ဂလူးကို့စ်သကြားဓာတ်ပမာဏများ၊ အသည်းပြဿနာများ၊ ဓာတ်ဆား ပြောင်းလဲမှုများ၊ ဗီတာမင် သို့မဟုတ် သတ္တုဓာတ် ချို့တဲ့ခြင်းများနှင့် ရောဂါပိုးဝင်ခြင်း၊ သွေးကြောအတွင်း သွေးခဲခြင်းနှင့် ပြွန်ပိတ်ဆို့ခြင်း အပါအဝင် ပြွန်ပိုက်နှင့် သက်ဆိုင်သော ပြဿနာများ ပါဝင်ပါသည်။ PN သည် အချို့ဆေးဝါးများ၏ အာနိသင်ကိုလည်း ပြောင်းလဲစေနိုင်ပါသည်။

PN တွင် အဖြစ်များသော ပြဿနာတစ်ခုမှာ သွေးတွင်း အချိုဓာတ်များခြင်း၊ သို့မဟုတ် သွေးတွင်းသကြားဓာတ်မြင့်တက်ခြင်း ဖြစ်ပါသည်။ ခန္ဓာကိုယ်သည် ဂလူးကို့စ်သကြားဓာတ်ကို ကောင်းစွာ အသုံးမပြုနိုင်ဘဲ သွေးတွင်း သကြားဓာတ်သည် ပုံမှန်ထက်မြင့်လာသောအခါတွင် သွေးတွင်း အချိုဓာတ်များခြင်းကို ဖြစ်ပွားနိုင်ပါသည်။ PN ကို အလွန်လျင်မြန်စွာ ထည့်သွင်းသောကြောင့် ခန္ဓာကိုယ်သည် သကြားဓာတ်ကို အသုံးမချနိုင်သော အခြေအနေမျိုးတွင် ထိုသို့ဖြစ်နိုင်ပါသည်။ ၎င်းသည် ရောဂါပိုးဝင်ခြင်း သို့မဟုတ် စတီးရွိုက်ဆေးကဲ့သို့ ဆေးဝါးကြောင့်လည်း ဖြစ်နိုင်ပါသည်။ သွေးတွင်း အချိုဓာတ်များခြင်း၏ လက္ခဏာများတွင် ခေါင်းကိုက်ခြင်း၊ ရေဆာခြင်း၊ အားနည်းခြင်းနှင့် မအီမသာဖြစ်ခြင်းတို့ ပါဝင်ပါသည်။ သွေးတွင်း အချိုဓာတ်များခြင်းကဲ့သို့သော ပြဿနာများကိုကာကွယ်ရန် PN ရှိ ကစီဓာတ် (ဒက်စ်ထရို့စ်) ပမာဏကို ရက်အတော်ကြာအတွင်း တဖြည်းဖြည်း တိုးပေးသွားပါသည်။ သွေးတွင်း အချိုဓာတ်နည်းခြင်း၊ သို့မဟုတ် သွေးအတွင်း သကြားဓာတ်နည်းခြင်းသည် အဖြစ်နည်းသော်လည်း PN ကို ရုတ်တရက်ရပ်လိုက်ပါက ဖြစ်ပွားနိုင်ပါသည်။

PN ထိုးသွင်းစဉ်ကာလအတွင်း စောင့်ကြည့်ရာ၌ အောက်ပါတို့ကို တိုင်းတာရန် စစ်ဆေးမှုများ ပါဝင်နိုင်သည်-

• သွေး သို့မဟုတ် ဆီးအတွင်းရှိ ဂလူးကို့စ်သကြားဓာတ် ပမာဏများ
• သွေးအတွင်းရှိ ဓာတ်ဆားဓာတ် ပမာဏများ
• အသည်း လုပ်ဆောင်ချက် စစ်ဆေးမှုများ
• သွေးတွင်း သဘာဝအဆီဓာတ် ပမာဏများ
• ဆီးထွက်ရှိမှုပမာဏ
• ကိုယ်အလေးချိန်

အိမ်တွင် သွေးကြောမှတစ်ဆင့် အာဟာရထည့်သွင်းခြင်း

လူနာများသည် အိမ်တွင် PN ကို ထည့်သွင်းနိုင်ပါသည်။ အိမ်သို့မပြန်မီ မိသားစုအတွင်းမှ ပြုစုပေးမည့်သူများအား အောက်ပါတို့ကို လုပ်ဆောင်နည်းများအား သင်ကြားပေးပါမည်-

• PN အာဟာရဖျော်ရည်ကို သိမ်းဆည်းပုံ၊ ကိုင်တွယ်ပုံနှင့် ဖွင့်ဖေါက် (ညင်သာစွာ ဆုပ်နယ်) ပုံ
• အာဟာရဖျော်ရည် ထည့်သွင်းသည့်အိတ်ထဲသို့ ဗီတာမင်များ နှင့်/ သို့မဟုတ် ဆေးဝါးများကို ထည့်သွင်းပုံ
• ပန့်စက်နှင့် ချိတ်ဆက်ပုံနှင့် ဖြုတ်ပုံ
• ထည့်သွင်းသည့်ပန့်စက်အား အသုံးပြုပုံ
• ပြွန်ပိုက်ကို ထိန်းသိမ်းပုံ
• ရောဂါပိုးဝင်ခြင်းမှ ကာကွယ်ရန် ပိုးမွှားသန့်စင်သည့် နည်းစနစ်ကို အသုံးပြုပုံ
• သွေး နှင့်/ သို့မဟုတ် ဆီးကို ဂလူးကို့စ်သကြားဓာတ် တိုင်းပုံ
• ဖြစ်ပွားနိုင်ခြေရှိသော ပြဿနာများကို ကိုင်တွယ်ဖြေရှင်းပုံ
• အရေးပေါ်အခြေအနေတွင် ဆေးဘက်ဆိုင်ရာ အကူအညီရယူပုံ

မိသားစုများအတွက် အကြံပြုချက်များ

• PN အာဟာရဖျော်ရည်ကို သယ်ယူရန်နှင့် သိမ်းဆည်းရန်အတွက် စီစဉ်ပါ။ အိမ်၌ ထည့်သွင်းသည့်ဝန်ဆောင်မှုများသည် တစ်ကြိမ်လျှင် တစ်ပတ်စာ PN အာဟာရဖျော်ရည် (7 အိတ်အထိ) ကို ပေးပို့နိုင်ပါသည်။ ရေခဲသေတ္တာတွင် လုံလောက်သော နေရာလွတ်ရှိပြီး သန့်ရှင်းမှုရှိကြောင်း သေချာပါစေ။ တစ်အိတ်နှင့် တစ်အိတ်ထပ်ကာ 3 အိတ်ထက်ပို၍ မသိမ်းဆည်းပါနှင့်။
• PN အိတ်များအားလုံးကို ရေခဲသေတ္တာထဲတွင် သိမ်းဆည်းပြီး အလင်းရောင်နှင့် ထိတွေ့ခြင်းမရှိအောင် ထားရှိရမည်။ ရေခဲသေတ္တာ၏ အပူချိန်သည် 36°F မှ 46°F ကြားတွင် ရှိသင့်ပါသည်။ PN အာဟာရဖျော်ရည်သည် အခန်းအပူချိန်တွင် 24 နာရီသာ ကောင်းမွန်ပါသည်။ မှန်ကန်စွာ မသိမ်းဆည်းပါက အိတ်ထဲတွင် ဘက်တီးရီယားများ ပေါက်ဖွားနိုင်သည်။
• PN အိတ်ကို အသုံးမပြုမီ 2 နာရီခန့် ကြိုတင်၍ ရေခဲသေတ္တာထဲမှ ထုတ်ယူပါ။
• PN ကို ပြင်ဆင်ရန်အတွက် နေရာတစ်ခုကို သတ်မှတ်ရွေးချယ်ပါ။ သင်လုပ်ဆောင်သည့်နေရာကို ရှုပ်ပွနေခြင်းမရှိအောင် ထားပါ။ အလွယ်တကူ သန့်ရှင်းရေးလုပ်နိုင်သည့် မျက်နှာပြင်အမာကို အသုံးပြုပါ။
• PN ကို ညတိုင်း တူညီသောအချိန်၌သာ ချိတ်ဆက်ထည့်သွင်းပါ။
• အထောက်အပံ့ပစ္စည်းများစာရင်းကို ပြုစုထားပါ။ သင့်တွင်ရှိသော ပစ္စည်းအရေအတွက်နှင့် မှာယူရမည့်အချိန်ကို သိရှိပါ။
• သင်သည် လိုအပ်သည်ကို အလွယ်တကူ ရှာတွေ့နိုင်စေရန် အထောက်အပံ့များကို သတ်မှတ်ထားသော နေရာတွင် သိမ်းဆည်းပါ။
• သင့်ဆရာဝန်၊ ဆေးဝါးပညာရှင်၊ အာဟာရသိပ္ပံပညာပါရဂူနှင့် အိမ်တွင်း သွေးအတွင်းသို့ ထည့်သွင်းပေးသည့်ကုမ္ပဏီအပါအဝင် ဆက်သွယ်ရန်အချက်အလက်များကို စာရင်းပြုစုထားပါ။
• သင်သည် PN နှင့် ခရီးသွားရန်လိုအပ်ပါက ကြိုတင်စီစဉ်ပါ။ သင်သည် အာဟာရဖျော်ရည်ကို ရေခဲသေတ္တာ သို့မဟုတ် အအေးခံစက်ထဲတွင် သိမ်းဆည်းရန် လိုအပ်ပါသည်။ သင်သည် ခရီးသွားနေသည့်ကာလအတွက် အာဟာရအထောက်အပံ့ အလုံအလောက်ရှိစေရန် သေချာလုပ်ဆောင်ပြီး ပန့်စက်ဘက်ထရီကို အားသွင်းနိုင်မည့်နည်းလမ်းအား ထည့်သွင်းစဉ်းစားပါ။

ဆက်စပ်သည့် အကြောင်းအရာ