အာဟာရဗေဒပညာရှင်များနှင့် အာဟာရစောင့်ရှောက်မှု

အာဟာရဗေဒပညာရှင်များ ဆိုသည်မှာ အဘယ်နည်း။

အာဟာရဗေဒပညာရှင်သည် အစားအသောက်နှင့် အာဟာရဆိုင်ရာ အထူးလေ့ကျင့်မှုကိုရရှိထားသည့် ကျန်းမာရေးပညာရှင်တစ်ဦး ဖြစ်ပါသည်။ အာဟာရဗေဒပညာရှင်များသည် အာဟာရစောင့်ရှောက်မှုကို ပံ့ပိုးပေးပြီး လူနာများနှင့် မိသားစုများ၏ ကျန်းမာရေးကို တိုးတက်ကောင်းမွန်စေရန်နှင့် သက်သာကောင်းမွန်ခြင်းနှင့် ပြန်လည်ကောင်းမွန်လာစေရန်အတွက် ကူညီပေးသည့် ကျန်းမာရေးနှင့် ညီညွတ်သော စားသောက်မှုဆိုင်ရာအလေ့အကျင့်များနှင့် သက်ဆိုင်သည့် အကြံဉာဏ်များကို ပေးပါသည်။

ကလေးအာဟာရစောင့်ရှောက်မှု၏ အဓိကရည်မှန်းချက်များမှာ ကလေးများကို ကြီးထွားဖွံ့ဖြိုးစေပြီး ပုံမှန်လုပ်ဆောင်မှုများ လုပ်ဆောင်နိုင်ရန်အတွက် ကူညီပေးရန် ဖြစ်ပါသည်။ ကောင်းမွန်သည့်အာဟာရသည် ကျန်းမာရေးပြဿနာများကို ကာကွယ်ရန်နှင့် ဖျားနာမှု သို့မဟုတ် ကုသမှုခံယူနေစဉ်အတွင်း ဖြစ်ပေါ်သည့် နောက်ဆက်တွဲ ဘေးထွက်ဆိုးကျိုးများနှင့် အခြားပြဿနာများကို စီမံခန့်ခွဲရန် ကူညီပေးနိုင်ပါသည်။

အာဟာရဗေဒပညာရှင်သည် မည်သို့ကူညီပေးနိုင်သနည်း

အာဟာရဗေဒပညာရှင်တစ်ဦးသည် သင့်ကလေးလိုအပ်သည့် အာဟာရဓာတ်များကိုရရှိနိုင်ရန် ကူညီပေးနိုင်ပါသည်။ ဆေးလက်တွေ့ဆိုင်ရာ အာဟာရဗေဒပညာရှင်တစ်ဦးမှ ပံ့ပိုးပေးသည့် ဝန်ဆောင်မှုများမှာ-

• အာဟာရဆိုင်ရာ အကဲဖြတ်ခြင်း
• ကျန်းမာရေးနှင့် စိတ်ချမ်းသာကိုယ်ကျန်းမာရေးအတွက် တိုင်ပင်ဆွေးနွေးပေးခြင်း
• သီးခြားရောဂါများအတွက် အာဟာရစောင့်ရှောက်မှု ပေးခြင်း
• အစာကျွေးခြင်းဆိုင်ရာ ပြဿနာများအတွက် အကူအညီပေးခြင်း
• အာဟာရပျက်ယွင်းခြင်းနှင့် ကြီးထွားမှု ပုံမှန်မဟုတ်ခြင်းများအတွက် အကူအညီပေးခြင်း
• ကိုယ်အလေးချိန် ထိန်းသိမ်းမှု
• အစာခြေခြင်းဆိုင်ရာ ပြဿနာများ၊ အစားအစာ ဓာတ်မတည့်မှုများ၊ အစားအစာ ဘေးကင်းရေးနှင့် စားသောက်မှု အချိန်ဇယားများအတွက် အကူအညီပေးခြင်း
• ပျော့ပျောင်းသည့်အစားအစာများ၊ GVHD အစားအစာများနှင့် အရသာပေါ့သည့်အစားအစာများကဲ့သို့သော အထူးအစားအစာများကို ညွှန်ကြားခြင်း
• ဗီတာမင်များနှင့် အာဟာရဖြည့်စွက်စာများကို အကြံပြုခြင်း
• ပါးစပ်ဖြင့် စားသုံးခြင်း၊ ပြွန်ဖြင့် အစာကျွေးခြင်းနှင့် IV ဖြင့် အာဟာရပံ့ပိုးခြင်းများအတွက် အာဟာရဆိုင်ရာပံ့ပိုးမှု ဆောင်ရွက်ပေးခြင်း

ပြွန်နှင့် IV တို့ဖြင့် အာဟာရပံ့ပိုးခြင်း

ပါးစပ်ဖြင့် မစားနိုင်သည့် သို့မဟုတ် မသောက်သုံးနိုင်သည့် လူနာများသည် အာဟာရပံ့ပိုးမှု လိုအပ်နိုင်ပါသည်။ ဤပံ့ပိုးမှုတွင် အစာရေမျိုလမ်းကြောင်းကို အသုံးပြု၍ အာဟာရပံ့ပိုးခြင်း (ပြွန်ဖြင့် အစာကျွေးခြင်း) နှင့် သွေးကြောမှတဆင့် အာဟာရပံ့ပိုးခြင်း (IV ဖြင့် အာဟာရပံ့ပိုးခြင်း) တို့ ပါဝင်သည်။ အာဟာရဆိုင်ရာ ပံ့ပိုးမှုဆိုသည်မှာ စားသုံးခြင်း သို့မဟုတ် သောက်သုံးခြင်းဖြင့် အာဟာရလုံလောက်စွာမရရှိသည့် ကလေးများအတွက် ကုသမှုတစ်ခု ဖြစ်ပါသည်။

ကုသမှုနှင့် ၎င်း၏ဘေးထွက်ဆိုးကျိုးများသည် သင့်ကလေး၏ အစာစားချင်စိတ်ကို သက်ရောက်မှုရှိစေနိုင်ပါသည်။ ဤဘေးထွက်ဆိုးကျိုးများတွင် မအီမသာဖြစ်ခြင်း၊ ပျို့အန်ခြင်းနှင့် မျိုချရန်ခက်ခဲခြင်းတို့ ပါဝင်ပါသည်။ ဖျားနာနေသည့် ကလေးများသည် အစာစားချင်စိတ် ရှိမည်မဟုတ်ပါ။ အချို့ကုသမှုများသည် အစားအစာများ၏ အရသာကို ပြောင်းလဲစေနိုင်ပါသည်။ အာဟာရဗေဒပညာရှင်တစ်ဦးသည် သင့်ကလေး၏ လိုအပ်ချက်များကို အကဲဖြတ်စစ်ဆေးပြီး သင့်ကလေးအတွက် အကောင်းဆုံး အာဟာရဆိုင်ရာကုထုံးကို အကြံပြုပေးနိုင်ပါသည်။

ဗီတာမင်နှင့် အာဟာရဖြည့်စွက်စာများ

ကောင်းမွန်သည့်အာဟာရသည် ကြီးထွားမှုနှင့် ဖွံ့ဖြိုးတိုးတက်မှုအတွက် အရေးကြီးပါသည်။ အကယ်၍ သင့်ကလေးသည် အာဟာရလိုအပ်ချက်များနှင့် မပြည့်မီပါက သင့်အာဟာရဗေဒပညာရှင်သည် ဖြည့်စွက်စာတစ်ခုကို အကြံပြုပေးနိုင်ပါသည်။ သို့သော်လည်း ကျန်းမာရေးအရ လိုအပ်ချက်မရှိပါက ဗီတာမင်၊ သတ္တုဓာတ် သို့မဟုတ် အာဟာရဖြည့်စွက်စာများကို အများအားဖြင့် အကြံပြုပေးလေ့မရှိပါ။

• ဗီတာမင်များ၊ သတ္တုဓာတ်များနှင့် တိုင်းရင်းဆေးဖက်ဝင်အပင်အချို့သည် ဆေးဝါးများကို မှန်ကန်စွာ အလုပ်မလုပ်နိုင်အောင် တားဆီးနိုင်ပါသည်။ အာဟာရဆိုင်ရာ ထုတ်ကုန်အချို့သည် အန္တရာယ်ကို ဖြစ်စေနိုင်သည်။ အစားအစာအပြည့်အစုံ၊ သဘာဝအတိုင်း၊ ကျန်းမာရေးနှင့် ညီညွတ်သည်၊ သန့်စင်သည် သို့မဟုတ် သဘာဝမြေဩဇာသုံးဟု အညွှန်းတပ်ထားသည့် ထုတ်ကုန်များသည် အမြဲတမ်း ဘေးကင်းသည် သို့မဟုတ် အထောက်အကူဖြစ်စေသည် မဟုတ်ပါ။
• အောက်ပါတို့ကို အသုံးမပြုမီ သင့်ကလေး၏ စောင့်ရှောက်မှုအဖွဲ့ကို မေးမြန်းတိုင်ပင်ပါ-
  • အာဟာရ မှုန့်များ၊ ဖျော်ရည်များ၊ ဘားများ သို့မဟုတ် ပီကေများ
  • ဗီတာမင်ပေါင်းစုံများ၊ ဗီတာမင်များ သို့မဟုတ် သတ္တုဓာတ် ဖြည့်စွက်စာများ
  • အင်ဖြည့်အချိုရည်များ
  • ဆေးဖက်ဝင်အပင် ဖြည့်စွက်စာများ
  • ပရီဘိုင်အိုတစ် (Prebiotics) နှင့် ပရိုဘိုင်အိုတစ်များ (Probiotics)

အာဟာရဗေဒပညာရှင်တစ်ဦးကို မည်သို့ရှာဖွေရမည်နည်း

ကျန်းမာရေး စောင့်ရှောက်မှုနယ်ပယ်ရှိ အာဟာရပညာရှင်အများစုသည် မှတ်ပုံတင်ထားသော အာဟာရဗေဒပညာရှင်များ (RDs) သို့မဟုတ် မှတ်ပုံတင်ထားသော အစားအသောက်ဆိုင်ရာ အာဟာရဗေဒပညာရှင်များ (RDNs) ဖြစ်ကြပါသည်။ ၎င်းတို့သည် အာဟာရနှင့် လူနာစောင့်ရှောက်မှုဆိုင်ရာ အဆင့်မြင့်ပညာရေးနှင့် လေ့ကျင့်မှုများ ခံယူရရှိထားပါသည်။ မှတ်ပုံတင်ထားသော အာဟာရဗေဒပညာရှင်များသည် နိုင်ငံမှစာမေးပွဲကိုလည်း ဖြေဆိုအောင်မြင်ထားပြီး ဖြစ်ပါသည်။

ပြည်နယ်များစွာတွင် အသိအမှတ်ပြုလက်မှတ်ရ အစားအသောက်ဆိုင်ရာ အာဟာရဗေဒပညာရှင်များ (CDN) နှင့် လိုင်စင်ရ အစားအသောက်ဆိုင်ရာ အာဟာရဗေဒပညာရှင်များ (LDN) ကဲ့သို့သော အာဟာရပညာရှင်များအတွက် လိုင်စင်များ လိုအပ်ပါသည်။ အချို့သော အာဟာရဗေဒပညာရှင်များသည် ကလေးဆိုင်ရာ (CSP) သို့မဟုတ် ကင်ဆာ‌ရောဂါဆိုင်ရာ (CSO) ကဲ့သို့သော အထူးပြုနယ်ပယ်များတွင် အသိအမှတ်ပြုလက်မှတ်များ ရှိပါသည်။

သင့်စောင့်ရှောက်မှုအဖွဲ့သည် ကလေးများနှင့် အတူတကွ လုပ်ဆောင်နိုင်သော သို့မဟုတ် အချို့သောကျန်းမာရေးအခြေအနေရှိသည့် လူနာများ၏ ကျန်းမာရေးဆိုင်ရာ လိုအပ်ချက်များကို ဖြည့်ဆည်းရာတွင် အထူးပြုကျွမ်းကျင်သည့် အာဟာရဗေဒပညာရှင်ထံသို့ သင့်ကို ညွှန်းဆိုလွှဲပြောင်းပေးနိုင်ပါသည်။

စောင့်ရှောက်မှုအသင်းကို မေးမြန်းရန် မေးခွန်းများ

• ကျွန်ုပ်ကလေး၏ အာဟာရဆိုင်ရာလိုအပ်ချက်များမှာ အဘယ်နည်း။
• ကျွန်ုပ်ကလေးအတွက် မည်သည့်အစားအစာမျိုးကို အကြံပြုပါသနည်း။
• ရှောင်ရမည့် အစားအစာများ ရှိပါသလား။
• ကျွန်ုပ်ကလေး အစားစားစေရန် မည်သို့လုပ်ဆောင်ရမည်နည်း။
• ကျွန်ုပ်ကလေးကို ဗီတာမင်အားဆေးများ တိုက်လို့ရပါသလား။

ထပ်ဆောင်းသတင်းအချက်အလက်များ အတွက်

ဆက်စပ် အကြောင်းအရာများ