သင့်ကလေး၏အရေပြားကို မည်သို့ကာကွယ်ရမည်နည်း

အရေပြားသည် ခန္ဓာကိုယ်ကို ကာကွယ်ရန်နှင့် ကျန်းမာကြံ့ခိုင်သော ကြီးထွားမှုနှင့် ဖွံ့ဖြိုးတိုးတက်မှုကို ပံ့ပိုးပေးရန်အတွက် အရေးကြီးသည့် အခန်းကဏ္ဍတွင် ပါဝင်ပါသည်။ အရေပြားစောင့်ရှောက်မှုနှင့် ကာကွယ်မှုအတွက် ရိုးရှင်းသောအဆင့်များဖြင့် အရေပြားပြဿနာအများစုကို ကာကွယ်ပေးနိုင်ပါသည်။ 

အရေပြားသည် မည်သို့အလုပ်လုပ်သနည်း

အရေပြားသည် ခန္ဓာကိုယ်၏ အကြီးဆုံးအင်္ဂါအစိတ်အပိုင်း ဖြစ်ပါသည်။ ၎င်းတွင် အဓိကအလွှာ 3 လွှာ ရှိပါသည်-

1. အပေါ်ယံလွှာ- အရေပြား၏ အပေါ်ဆုံးအလွှာ ဖြစ်ပါသည်။ ဤအလွှာသည် ခန္ဓာကိုယ်အရည်များကို ထိန်းသိမ်းထားပြီး တခြားအရည်များ မဝင်အောင် ကာကွယ်ပေးပါသည်။ ၎င်းတွင် အရေပြား၏အရောင်ကို ဖြစ်စေသည့် မယ်လနင်ဒြပ်လည်း ပါဝင်ပါသည်။
2. ဒါးမစ်အလွှာ- အရေပြား၏ အလယ်ပိုင်းအလွှာ ဖြစ်ပါသည်။ ဤအလွှာတွင် ခိုင်မာသည့်တွယ်ဆက်တစ်ရှူးများ၊ ဆံပင်အမြစ်အိတ်လေးများနှင့် ချွေးဂလင်းများ ပါဝင်ပါသည်။
3. အရေပြားအောက်တစ်ရှူး (ဟိုက်ပိုဒါမစ်)- အရေပြား၏ အောက်ဆုံးအလွှာ ဖြစ်ပါသည်။ ဤအလွှာကို အခုအခံအဖြစ် ပံ့ပိုးပေးသည့် အဆီနှင့် တွယ်ဆက်တစ်ရှူးများဖြင့် ဖွဲ့စည်းထားပါသည်။

အရေပြားသည် ကိုယ်ခံအားစနစ်၏ အစိတ်အပိုင်းတစ်ခု ဖြစ်ပါသည်။ ၎င်းသည် ရောဂါပိုးမွှားများ ခန္ဓာကိုယ်ထဲသို့ ဝင်ရောက်ခြင်းနှင့် ရောဂါပိုးကူးစက်ခြင်းကို တားဆီးပေးသည့် ရုပ်ပိုင်းဆိုင်ရာ အတားအဆီးတစ်ခု ဖြစ်ပါသည်။ 

သင့်အရေပြားသည် ခန္ဓာကိုယ်ကို အောက်ပါအရေးကြီးသောနည်းလမ်းများစွာဖြင့် ကာကွယ်ပေးပါသည်- 

• ရေဓာတ်ခန်းခြောက်ခြင်းကို ကာကွယ်ပေးရန် ခန္ဓာကိုယ်အတွင်းရှိ အရည်ဓာတ်များကို ထိန်းသိမ်းပေးပါသည် 
• ပူနေသည့်အခါတွင် ချွေးထွက်စေခြင်းဖြင့် သင့်ကို အေးမြစေပါသည်
• သွေးလည်ပတ်မှုကို ထိန်းညှိခြင်းဖြင့် ခန္ဓာကိုယ်၏အပူချိန်ကို ထိန်းချုပ်ပါသည်
• အေးခြင်း၊ ပူခြင်း၊ ဖိအားများ၊ ယားယံခြင်းနှင့် နာကျင်ခြင်းကဲ့သို့သော အရာများကို ခံစားသိရှိခြင်း
• သင့်အရိုးနှင့် ကိုယ်ခံအားစနစ် သန်မာကောင်းမွန်စေရန်အတွက် နေရောင်ခြည်မှ ဗီတာမင် D ကို ထုတ်လုပ်ပေးပါသည်
• ခန္ဓာကိုယ်မှ စွမ်းအင်ကို အသုံးပြုနိုင်စေရန် ရေနှင့် အဆီများကို သိုလှောင်ပေးပါသည်

ခန္ဓာကိုယ် ကြီးထွားဖွံ့ဖြိုးလာသည်နှင့်အမျှ အရေပြားသည် မည်သို့ပြောင်းလဲသွားသနည်း 

ကလေးငယ်များ မွေးဖွားချိန်တွင် ၎င်းတို့၏ အရေပြားသည် ပါးလွှာပြီး ဖွံ့ဖြိုးမှုနည်းကာ ထိခိုက်ရန် ပိုမိုလွယ်ကူပါသည်။ ၎င်းသည် လူကြီးအရေပြားကဲ့သို့ ပိုးမွှားများနှင့် ရောဂါပိုးများကို ကောင်းစွာကာကွယ်ပေးနိုင်ခြင်း မရှိပါ။ 

ကလေးဘဝအစောပိုင်းတွင် သင့်ကလေး၏ အရေပြားသည်-

• ဆပ်ပြာများ၊ လိုးရှင်းများနှင့် သန့်ရှင်းရေးပစ္စည်းများတွင် ပါဝင်သည့် ဓာတုပစ္စည်းများကြောင့် ပိုမိုထိခိုက်လွယ်ပါသည်
• နေရောင်ထဲတွင် ပိုမိုလွယ်ကူစွာ နေပူလောင်ဒဏ်ခံရနိုင်ပါသည်
• ကြမ်းတမ်းသည့် အဝတ်အစားများ၊ ကုတ်ခြစ်ခြင်းနှင့် ပွတ်ခြင်းကဲ့သို့သော အရေပြားကို ထိမိသည့် အရာများကြောင့် ပိုမိုလွယ်ကူစွာ ထိခိုက်နိုင်ပါသည်။
• အပူချိန်ကိုလည်း ကောင်းစွာ ထိန်းချုပ်နိုင်ခြင်း မရှိပါ
• အလွယ်တကူ ခြောက်သွေ့နိုင်ပါသည်
• ခရင်မ်နှင့် ဆေးဝါးများကို ပိုမိုမြန်ဆန်စွာ စုပ်ယူနိုင်ပါသည်

 အသက် 6 နှစ်ရောက်သည့်အခါတွင် ကလေး၏အရေပြားသည် ပိုမိုထူလာပြီး ပိုသန်မာလာပါသည်။ သို့သော်လည်း ၎င်းသည် စောင့်ရှောက်မှုနှင့် ကာကွယ်မှုများ လိုအပ်နေပါသေးသည်။

သင့်ကလေး၏ အရေပြားကို မည်သို့စောင့်ရှောက်ရမည်နည်း 

အရေပြားကို သန့်ရှင်း၍ အစိုဓာတ်ရှိအောင် ထိန်းထားပါ

ပုံမှန်ရေချိုးခြင်းသည် အရေပြားကိုစောင့်ရှောက်ရန် အရေးကြီးသော အစိတ်အပိုင်းတစ်ခု ဖြစ်ပါသည်။ သို့သော်လည်း အလွန်အကျွံဆေးကြောခြင်း သို့မဟုတ် ဆပ်ပြာအပြင်းများကို အသုံးပြုခြင်းသည် အရေပြားကို ခြောက်သွေ့စေနိုင်ပါသည်။ သင့်ကလေး၏ အရေပြားကို ကျန်းမာကောင်းမွန်စေရန်အတွက်- 

• သင့်ကလေးကို တစ်နေ့တစ်ကြိမ် ရေချိုးပေးပါ။
• ရေပူအစား ကြက်သီးနွေးရေကို အသုံးပြုပါ။
• pH မျှတပြီး အမွှေးရနံ့ကင်းသည့် နူးညံ့သောဆပ်ပြာကို အသုံးပြုပါ။
• အရေပြားကို အလွန်အကျွံပွတ်တိုက်ခြင်းမှ ရှောင်ကြဉ်ပါ။
• အရေပြားကို ခြောက်အောင်သုတ်ရန် တဘက်ကို အသုံးပြုပါ။ အရေပြားကို တဘက်နှင့် မပွတ်ပါနှင့်။
• အသားအရေခြောက်သည့်အခါ အစိုဓာတ်ထိန်းခရင်မ်များ လိမ်းပါ။ 
• လက်ရှည်ရှပ်အင်္ကျီများ ကဲ့သို့သော သင့်ကလေး၏အရေပြားကို ပိုမိုဖုံးအုပ်ပေးသည့် အဝတ်အစားများကို ဝတ်ဆင်ပေးပါ။ ၎င်းသည် အရေပြားကို သန့်ရှင်းစေပြီး အစိုဓာတ်ဆုံးရှုံးမှုမှ ကာကွယ်ပေးပါလိမ့်မည်။

အရေပြားကို နေရောင်ခြည်မှ ကာကွယ်ပါ 

နေရောင်ခြည်သည် အရေပြားကို ပျက်စီးစေပြီး နေလောင်ခြင်းကို ဖြစ်စေနိုင်ပါသည်။ သင့်ကလေး အပြင်တွင်ရှိနေချိန်၌ အရေပြားကို ကာကွယ်ရန်အတွက်-

• SPF 30 နှင့် အထက် နေရောင်ကာခရင်မ်ကို အသုံးပြုပါ။
• နေရောင်ကာခရင်မ်ကို 2 နာရီခြားတစ်ခါ ပြန်လိမ်းပါ။
• ရေကူးပြီးနောက် သို့မဟုတ် ချွေးထွက်ပြီးပါက နေရောင်ကာခရင်မ်ကို ပြန်လိမ်းပါ။
• သင့်ကလေးကို အင်္ကျီလက်ရှည်နှင့် ဦးထုပ် ဆောင်းပေးပါ။
• သူတို့ကို နေရောင်ခြည် အပြင်းဆုံးအချိန်ဖြစ်သည့် မနက် 10 နာရီမှ နေ့လည် 3 နာရီအတွင်း အိမ်ထဲမှာပဲ ထားပါ။

အရေပြားဆိုင်ရာ ပြောင်းလဲမှုများကို စောင့်ကြည့်ပါ

သင့်ကလေး၏ အရေပြားတွင် ပြောင်းလဲမှုများ သို့မဟုတ် ပြဿနာများ ရှိ၊ မရှိကို ပုံမှန်စစ်ဆေးပါ။ ၎င်းတွင် အောက်ပါတို့ပါဝင်သည်-

• အရေပြား ကွာကျခြင်း သို့မဟုတ် ကြမ်းတမ်းခြင်း
• အကွဲကြောင်းများ သို့မဟုတ် ပြတ်ရှရာများ
• အရည်ကြည်ဖုများ သို့မဟုတ် အနီကွက်များ
• အရေပြား အရောင်ပြောင်းလဲမှုများ
• နာကျင်ခြင်း၊ ထုံခြင်း၊ ပူလောင်ခြင်း သို့မဟုတ် ကျင်ခြင်း
• ဖျားခြင်း၊ ရောင်ရမ်းခြင်း၊ ထိမိပါက နာကျင်ခြင်း၊ နီရဲခြင်း သို့မဟုတ် ပြည်တည်ခြင်းကဲ့သို့သော ရောဂါပိုးဝင်ခြင်း၏ လက္ခဏာများ  

အကယ်၍ သင့်ကလေးတွင် ပိုဆိုးလာသည့် သို့မဟုတ် မသက်သာလာသည့် အရေပြားပြောင်းလဲမှုများရှိပါက သင့်ကျန်းမာရေးစောင့်ရှောက်မှုပေးသူထံသို့ ဆက်သွယ်ပါ။

သင့်ကလေး၏ အရေပြားပြဿနာများ ဖြစ်နိုင်ခြေအန္တရာယ်ကို သိရှိပါ

အချို့သော ဆေးပညာဆိုင်ရာ အခြေအနေများနှင့် ကုသမှုများသည် အရေပြားပြဿနာများကို ဖြစ်စေနိုင်ပါသည်။ ၎င်းတို့တွင် ဓာတ်မတည့်မှုများ၊ ကိုယ်ခံအားစနစ်ချို့ယွင်းသည့်ရောဂါများ၊ နာတာရှည်ရောဂါများနှင့် ကင်ဆာဆေးဝါးများနှင့် ကုသမှုများ၏ နောက်ဆက်တွဲဘေးထွက်ဆိုးကျိုးများ ပါဝင်ပါသည်။ သင့်ကလေး၏ ဖြစ်နိုင်ခြေအန္တရာယ်နှင့် မည်သည်တို့ကို စောင့်ကြည့်ရမည်ဆိုသည်ကို သင်၏စောင့်ရှောက်မှုအဖွဲ့နှင့် တိုင်ပင်ဆွေးနွေးပါ။

ကင်ဆာဆေးသွင်းကုသခြင်းနှင့် ဓာတ်ရောင်ခြည်ကုထုံး

ကင်ဆာဆေးသွင်းကုသခြင်းနှင့် ဓာတ်ရောင်ခြည်ကုထုံးသည် လူနာအချို့တွင် အရေပြားပြဿနာများကို ဖြစ်စေနိုင်ပါသည်။ သင့်ကလေး၏အရေပြားသည် ထိခိုက်လွယ်ခြင်း၊ ခြောက်သွေ့ခြင်း၊ နီရဲခြင်း သို့မဟုတ် ယားယံခြင်းများ ဖြစ်နိုင်ပါသည်။ အရေပြားသည် ကွာကျခြင်း သို့မဟုတ် အရောင်မည်းလာခြင်းတို့ ဖြစ်နိုင်ပါသည်။ 

အရေပြားပြဿနာများကို ကူညီကာကွယ်ရန်-

• သင့်ကလေး၏ အရေပြားကို သန့်ရှင်းအောင်ထားပါ။ 
• အစိုဓာတ်ထိန်းခရင်မ်ကို သင့်စောင့်ရှောက်မှုအဖွဲ့မှ ညွှန်ကြားထားသည့်အတိုင်း အသုံးပြုပါ။ 
• သင့်စောင့်ရှောက်မှုအဖွဲ့မှ အတည်ပြုထားသည့် အရေပြားထိန်းသိမ်းမှုထုတ်ကုန်များကိုသာ အသုံးပြုပါ။
• သင့်ကလေး၏ အရေပြားကို နေရောင်ကာခရင်မ်နှင့် အဝတ်အစားများဖြင့် နေရောင်ခြည်မှ ကာကွယ်ပါ။
• အရေပြားကို ပွတ်တိုက်ခြင်း သို့မဟုတ် ပွတ်ခြင်းမှ ရှောင်ကြဉ်ပါ။
• အရေပြားတွင် အဖုအပိမ့်အင်ပြင်များ၊ အရေခွံကွာခြင်း၊ အက်ခြင်း သို့မဟုတ် ကွဲခြင်းများ၊ သို့မဟုတ် အခြားအရေပြားပြောင်းလဲမှုများကို သတိပြုပါ။

အရေပြားဆိုင်ရာ ဘေးထွက်ဆိုးကျိုးများသည် ကုသမှုပြီးဆုံးပြီးနောက်တွင် သက်သာပျောက်ကင်းသွားလေ့ရှိပါသည်။ သို့သော်လည်း အရေပြားသည် အချိန်အတော်ကြာအထိ ထိခိုက်လွယ်နိုင်ပါသည်။ ကလေးကင်ဆာရောဂါမှ သက်သာပျောက်ကင်းသူအချို့သည် နောင်တစ်ချိန်တွင် နာတာရှည်အရေပြားပြဿနာများ သို့မဟုတ် အရေပြားကင်ဆာရောဂါ ဖြစ်နိုင်ခြေရှိပါသည်။ သင့်ကလေး၏ အန္တရာယ်အကြောင်းကို သင့်စောင့်ရှောက်မှုအဖွဲ့နှင့် တိုင်ပင်ဆွေးနွေးပါ။

စတီးရွိုက်ဆေးဝါးများ

စတီးရွိုက်ဆေးများကို ရောင်ရမ်းမှု လျှော့ချရန်နှင့် အခြားရောဂါလက္ခဏာများနှင့် ဘေးထွက်ဆိုးကျိုးများကို ကုသရန်ကဲ့သို့သော အကြောင်းပြချက်များစွာဖြင့် အသုံးပြုကြပါသည်။ သို့သော် စတီးရွိုက်ဆေးများသည် အရေပြားကို ပိုမိုပါးလွှာစေပြီး ပို၍ပျက်စီးလွယ်စေနိုင်ပါသည်။ ၎င်းသည် ရောဂါပိုးဝင်နိုင်ခြေကို မြင့်တက်စေပြီး အနာသက်သာခြင်းကို နှောင့်နှေးစေနိုင်ပါသည်။

သင့်ကလေး စတီးရွိုက်ဆေးသောက်နေချိန်တွင် အရေပြားကို ကာကွယ်ရန်-

• အရေပြားကို သန့်ရှင်း၍ ခြောက်သွေ့အောင် ထားပါ။
• စောင့်ရှောက်မှုအဖွဲ့မှ ညွှန်ကြားသည့်အတိုင်း အစိုဓာတ်ထိန်းခရင်မ်ကို အသုံးပြုပါ။
• ပြတ်ရှခြင်း သို့မဟုတ် ခြစ်ရာများကို ဖြစ်စေနိုင်သည့် လုပ်ဆောင်ချက်များကို ရှောင်ကြဉ်ပါ။ 

ဆေးဘက်ဆိုင်ရာပစ္စည်းများ

IV လိုင်းများ၊ အပေါက်များ သို့မဟုတ် ပတ်တီးများကဲ့သို့သော ဆေးဘက်ဆိုင်ရာပစ္စည်းများသည် အရေပြားကို ယားယံစေခြင်း သို့မဟုတ် ဖိအားကြောင့်ဖြစ်သည့် ဒဏ်ရာများကို ဖြစ်စေနိုင်ပါသည်။ အရေပြားပြဿနာများ ဖြစ်နိုင်ခြေအန္တရာယ်ကို လျှော့ချရန်-

• ပစ္စည်းများအနီးတဝိုက်ရှိ အရေပြားတွင် အနီကွက်များ၊ ရောင်ရမ်းခြင်း သို့မဟုတ် ယားယံခြင်းတို့ ရှိ၊ မရှိ နေ့စဉ် စစ်ဆေးပါ။
• နေရာကို သန့်ရှင်း၍ ခြောက်သွေ့အောင် ထားပါ။
• အရေပြားကို သန့်ရှင်းခြင်းနှင့် ကာကွယ်ခြင်းတို့အတွက် စောင့်ရှောက်မှုအဖွဲ့မှ ညွှန်ကြားချက်များကို လိုက်နာဆောင်ရွက်ပါ။

ဖိအားကြောင့်ဖြစ်သည့် ဒဏ်ရာများ

ကလေးတစ်ဦးသည် အနေအထား 1 ခုတည်းတွင် အချိန်ကြာမြင့်စွာနေပါက ဖိအားကြောင့်ဖြစ်သည့် ဒဏ်ရာများ (အိပ်ရာပူနာများ) ဖြစ်ပွားနိုင်ပါသည်။ ၎င်းတို့သည် ကျော၊ တင်ပါးဆုံရိုးများ သို့မဟုတ် ခြေဖနောင့်ကဲ့သို့သော အရေပြားသည် အရိုးနှင့် နီးသောနေရာများတွင် မကြာခဏ ဖြစ်ပွားလေ့ရှိပါသည်။ ဖိအားကြောင့်ဖြစ်သည့် ဒဏ်ရာများသည် အရေပြားပေါ်တွင်ဖိထားသည့် ဆေးဘက်ဆိုင်ရာပစ္စည်းများကြောင့်လည်း ဖြစ်ပေါ်နိုင်ပါသည်။

သင့်ကလေး၏အရေပြားကို ကာကွယ်နိုင်မည့် နည်းလမ်းများအကြောင်းကို သင့်ကျန်းမာရေးစောင့်ရှောက်မှုပေးသူနှင့် တိုင်ပင်ဆွေးနွေးပါ။ အရေပြားစောင့်ရှောက်မှုနှင့် သင့်ကလေးအတွက် ဘေးကင်းသည့် ထုတ်ကုန်များအတွက် သင့်စောင့်ရှောက်မှုအဖွဲ့၏ ညွှန်ကြားချက်များကို အမြဲလိုက်နာဆောင်ရွက်ပါ။

သင်၏ ကုသရေးအဖွဲ့ကို မေးရန် မေးခွန်းများ

• ကျွန်မ၏ကလေးအတွက် မည်သည့်ဆပ်ပြာ သို့မဟုတ် အစိုဓာတ်ထိန်းခရင်မ်အမျိုးအစားများကို အသုံးပြုသင့်သနည်း။
• အစိုဓာတ်ထိန်းခရင်မ်ကို ကလေး၏အရေပြားတွင် ဘယ်နှစ်ကြိမ် လိမ်းသင့်ပါသနည်း။
• မည်သည့်နေရောင်ကာခရင်မ်သည် ကျွန်မ၏ကလေးအတွက် အကောင်းဆုံးဖြစ်ပါသနည်း။
• ကျွန်မကလေး၏ ကုသမှုကာလအတွင်း မည်သည့်အသားအရေထိန်းသိမ်းမှုပစ္စည်းများကို ရှောင်ရှားသင့်ပါသနည်း။
• အရေပြားပြဿနာ၏ မည်သည့်လက္ခဏာများကို သတိထားသင့်ပါသနည်း။

ဆက်စပ် အကြောင်းအရာများ