ကလေးတစ်ဦး သေဆုံးပြီးနောက် ဝမ်းနည်းပူဆွေးမှု

ဝမ်းနည်းပူဆွေးနေသည့် မိသားစုများသည် မည်သည့်အရာကို မျှော်လင့်သင့်သနည်း။

ကလေးတစ်ဦး သေဆုံးခြင်းထက် မည်သည့်အရာကမှ ပို၍ဝမ်းနည်းစရာ မကောင်းပါ။  မိသားစုများသည် ဆုံးရှုံးမှုကို မည်သို့ကျော်လွှားနိုင်မည်ကို သိချင်ကြပါသည်။

မိဘများသည် ၎င်းတို့၏ ကလေးအကြောင်းကို တွေးတောနေခြင်း သို့မဟုတ် လွမ်းဆွတ်တမ်းတနေခြင်းကို ဘယ်တော့မှ ရပ်တန့်မည် မဟုတ်ပါ။ သို့သော် ဝမ်းနည်းပူဆွေးမှုသည် အချိန်နှင့်အမျှ ပြောင်းလဲတတ်ပါသည်။ အစောပိုင်းကာလများ၏ ပြင်းထန်၍ ကြမ်းတမ်းသည့် ဝမ်းနည်းပူဆွေးမှုသည် စီမံရန်လွယ်ကူသည့် စိတ်ခံစားမှုများသို့ လမ်းဖွင့်ပေးသည်ဟု မိဘများမှ ပြောပါသည်။ သို့သော် လူတစ်ဦးချင်းစီရဲ့ ဝမ်းနည်းပူဆွေးမှုသည် ကွဲပြားပါသည်။

ဝမ်းနည်းပူဆွေးမှုသည် ကြိုတင်၍ခန့်မှန်းနိုင်သော လမ်းကြောင်း သို့မဟုတ် ပုံစံ မရှိပါ။ တစ်နေ့နေ့တွင်တော့ တိုးတက်မှုကဲ့သို့ ခံစားရနိုင်ပါသည်။ နောက်တစ်နေ့တွင် အရိုးရှင်းဆုံးအလုပ်များသည် အားထုတ်မှုများစွာ လိုအပ်နိုင်ပါသည်။ အခြားအချိန်များ၌ မိသားစုဝင်များသည် ပြန်လည်ရယ်မောလာနိုင်သည့်အခါတွင် အံ့အားသင့်မိကြပြီး အနည်းငယ် အပြစ်ရှိသကဲ့သို့ပင် ခံစားရနိုင်ပါသည်။ အဆိုပါ ခံစားချက်များနှင့် တုံ့ပြန်ချက်များသည် ပုံမှန်ပင်ဖြစ်ပါသည်။

Ways to cope with grief

အကူအညီတောင်းခံရမည့်အချိန်ကို သိရှိပါ

စိတ်ပညာရှင်များ၊ အကြံပေးပုဂ္ဂိုလ်များနှင့် လူမှုလုပ်ငန်းဆောင်ရွက်သူများ အပါအဝင် စိတ်ကျန်းမာရေးပညာရှင်များသည် ဝမ်းနည်းပူဆွေးနေချိန်တွင် အကူအညီပေးနိုင်သည် အရေးကြီးသော အရင်းအမြစ်တစ်ခု ဖြစ်ပါသည်။ အကူအညီရှာဖွေခြင်းသည် လူတစ်ဦး၏ ဝမ်းနည်းပူဆွေးနေမှုပုံစံတွင် မှားယွင်းမှုတစ်စုံတစ်ရာရှိနေသည်ဟု ဆိုလိုခြင်းမဟုတ်ပါ။

မိသားစုအချို့အတွက် စိတ်ကျန်းမာရေးပညာရှင်တစ်ဦးသည် အပိုပံ့ပိုးမှုကို ရိုးရှင်းစွာဖြင့် ပေးနိုင်ပါသည်။ ဝမ်းနည်းပူဆွေးနေသော မိဘများနှင့် မွေးချင်းမောင်နှမများသည် ၎င်းတို့၏ ဝမ်းနည်းပူဆွေးမှုအကြောင်း ကြားရ၍ မိတ်ဆွေများနှင့် မိသားစုဝင်များ ငြီးငွေ့သွားမည်ကို မကြာခဏ စိုးရိမ်တတ်ကြပါသည်။ ၎င်းတို့သည် အကြံပေးပုဂ္ဂိုလ်တစ်ဦးနှင့်အတူ ထိုစိုးရိမ်မှုမရှိစေဘဲ လွတ်လပ်စွာဖြင့် မျှဝေနိုင်ပါသည်။ စိတ်ကျန်းမာရေးပညာရှင်တစ်ဦးသည် ခံစားချက်များအကြောင်းနှင့် ပတ်သက်၍ ပြောဆိုရန် ဘေးကင်းသောနေရာတစ်ခုကို ပံ့ပိုးပေးနိုင်ပါသည်။ ၎င်းတို့သည် မိဘများနှင့် မောင်နှမများကို ပိုမိုထိရောက်စွာ ရင်ဆိုင်ဖြေရှင်းရာတွင် ကူညီပေးရန် အရင်းအမြစ်များကို ပံ့ပိုးပေးနိုင်ပါသည်။

တစ်ခါတစ်ရံတွင် မိသားစုဝင်များသည် စိုးရိမ်စိတ်၊ စိတ်ကျရောဂါ သို့မဟုတ် ထိခိုက်ဒဏ်ရာရပြီး စိတ်ဖိအားများခြင်းရောဂါ (PTSD) ကဲ့သို့သော စိတ်ကျန်းမာရေးချို့ယွင်းမှုများ၏ လက္ခဏာများ ရှိနိုင်ပါသည်။ စိတ်ကျန်းမာရေးပညာရှင်တစ်ဦးနှင့် တိုင်ပင်ဆွေးနွေးသင့်သည့် သီးခြားအတွေးများနှင့် ခံစားချက်များတွင် အောက်ပါတို့ ပါဝင်ပါသည်-

• သေဆုံးသွားသည့် ကလေးနှင့် လိုက်သွားလိုသည့် အတွေးစိတ်ကူးများ
• မိမိကိုယ်ကို သို့မဟုတ် အခြားတစ်ဦးဦးကို ထိခိုက်နာကျင်စေလိုသော အတွေးစိတ်ကူးများ
• တန်ဖိုးမဲ့သွားသည့် စိတ်ခံစားချက်များ
• လှုပ်ရှားမှုများ နှေးကွေးသွားခြင်း သို့မဟုတ် အလွန်အမင်း ပင်ပန်းနွမ်းနယ်ခြင်း
• အခြားသူများ မမြင်တွေ့ရသည့်အရာများကို ကြားရခြင်း သို့မဟုတ် မြင်ရခြင်း
• စိတ်ဆင်းရဲမှု သို့မဟုတ် စိုးရိမ်ပူပန်မှု ပြင်းထန်ခြင်း
• အိပ်စက်မှုဆိုင်ရာ ပြဿနာများ၊ အိမ်မက်ဆိုးများ မက်ခြင်း
• နေ့စဉ်လုပ်ငန်းဆောင်တာများကို လုပ်ဆောင်ရာတွင် အခက်အခဲရှိခြင်း
• သေဆုံးမှုနှင့် ပတ်သက်၍ မယုံကြည်နိုင်ခြင်း
• ကလေးအား သတိရစေနိုင်သည့်အရာများကို ရှောင်ရှားခြင်း
• ဒေါသထွက် မကျေမနပ်ဖြစ်ခြင်း
• ကလေးဆုံးရှုံးရပြီးကတည်းက ဘဝသည် ရည်ရွယ်ချက် ဒါမှမဟုတ် အဓိပ္ပာယ်မရှိတော့ဘူးလို့ တွေးတောမိခြင်း
• အထီးကျန်သလို ခံစားချက်များ ဖြစ်ပေါ်ခြင်း
• ရုတ်တရက် စိတ်အနှောင့်အယှက်ဖြစ်စေသည့် အမှတ်တရများကို ပြန်အမှတ်ရသလို ခံစားမိခြင်း

ဆက်စပ် အကြောင်းအရာများ