အာရုံကြောထောက်ပံ့ဆဲလ်အကျိတ်

အာရုံကြောထောက်ပံ့ဆဲလ်အကျိတ် ဆိုတာ ဘာလဲ။

အာရုံကြောထောက်ပံ့ဆဲလ်အကျိတ်သည် ဦးနှောက်အကျိတ် ဟုလူသိများသော ဦးနှောက်အကျိတ် အမျိုးအစားတစ်ခုဖြစ်သည်။ ဤအကျိတ်သည် ဦးနှောက်အတွင်းရှိ အာရုံကြောများကို ဖုံးအုပ်ကာ ကာကွယ်ပေးသော ဆဲလ်များဖြစ်သည့် အာရုံကြောထောက်ပံ့ဆဲလ်အကျိတ်များမှ အမည်နာမကို ရရှိလာခြင်းဖြစ်သည်။ အာရုံကြောထောက်ပံ့ဆဲလ်အကျိတ် သည်  အဆင့်နိမ့်  ဦးနှောက်အကျိတ် တစ်ခု သို့မဟုတ်  အဆင့်မြင့် ဦးနှောက်အကျိတ်တစ်ခု ဖြစ်နိုင်ပါသည်။ 

အာရုံကြောထောက်ပံ့ဆဲလ်အကျိတ်များ သည် ‌‌‌အောက်ပါတို့တွင် အများဆုံး တွေ့ရသည် ဦးနှောက်ကြီး၏အဖြူရောင်အသားဓာတ်တွင်။ အဖြူရောင်အသားဓာတ်သည် ဦးနှောက်အတွင်းရှိ ဖျော့ အရောင်ဖျော့သော အာရုံကြောအမျှင်များ၏ ကွန်ရက်တစ်ခုဖြစ်သည်။ အဖြူရောင်အသားဓာတ်များ သည် ဦးနှောက်၏ အစိတ်အပိုင်းတစ်ခုမှ အခြားအစိတ်အပိုင်းတစ်ခုသို့ သတင်းစကားများ ပို့လွှတ်သည်။ 

အာရုံကြောထောက်ပံ့ဆဲလ်အကျိတ် အများစုသည် အရွယ်ရောက်ပြီးသူများတွင် ဖြစ်ပွားလေ့ရှိသည်။ ၎င်းတို့သည် ကလေးများနှင့် ဆယ်ကျော်သက်များတွင် ဖြစ်ပွားခဲသည်။ ဤအကျိတ်များသည် အသက် 14 နှစ်အောက် ကလေးများတွင် ဦးနှောက်အကျိတ်များ၏ 1% အောက်သာ ရှိပါသည်။

ကုသမှုတွင် အကျိတ်ကို တတ်နိုင်သမျှ ဖယ်ရှားရန်ခွဲစိတ်မှုပါဝင်သည်။ ကျန်ရှိနေသော ကင်ဆာဆဲလ်များကို သတ်ရန်အတွက်ဓာတ်ရောင်ခြည်ကုထုံးကို မကြာခဏ အသုံးပြုလေ့ရှိသည်။ဓာတုကုထုံးကိုလည်း အသုံးပြုနိုင်သည်။

 ကလေးသူငယ် အာရုံကြောထောက်ပံ့ဆဲလ်အကျိတ်၏ အသက်ရှင်နိုင်ခြေနှုန်းသည် အကျိတ်အဆင့်နှင့် ခွဲစိတ်မှုအောင်မြင်မှု အပေါ်တွင် မူတည်ပါသည်။ ခွဲစိတ်ကုသမှုဖြင့် အရှင်းဖယ်ထုတ်နိုင်ခဲ့သည့် အဆင့်နိမ့်အကျိတ် ဝေဒနာရှင်များ၏ အသက်ရှင်နိုင်ခြေ သည် 90%အထက်တွင်ရှိသည်။

သင့်ကလေး၏ ဆရာဝန်သည် သင့်ကလေး၏ ရောဂါ နှင့်ပတ်သက်သည့် အချက်အလက်များကို မေးမြန်းရန် အသင့်တော်ဆုံးပုဂ္ဂိုလ်ဖြစ်သည်။ 

အာရုံကြောထောက်ပံ့ဆဲလ်အကျိတ်၏ ရောဂါလက္ခဏာများ

အာရုံကြောထောက်ပံ့ဆဲလ်အကျိတ် သည် ဖြည်းဖြည်းချင်း ကြီးထွားလေ့ရှိသည်။ ၎င်းသည် ပြဿနာများ မဖြစ်ပေါ်စေမီ နှစ်ပေါင်းများစွာ ကြာသည်အထိ ရှိနေနိုင်သည်။ အာရုံကြောထောက်ပံ့ဆဲလ်အကျိတ်၏ လက္ခဏာများနှင့် ရောဂါလက္ခဏာများသည် ကလေး၏ အသက်၊ အကျိတ် အရွယ်အစား နှင့် တည်နေရာနှင့် အကျိတ် မည်မျှမြန်မြန် ကြီးထွားသည် အပေါ် မူတည်ပါသည်။

အာရုံကြောထောက်ပံ့ဆဲလ်အကျိတ် လက္ခဏာများ နှင့် လက္ခဏာများတွင် အောက်ပါတို့ ပါဝင်နိုင်သည်-

• တက်ခြင်း (Seizures) (အဖြစ်အများဆုံး)
• ကိုယ်ရည်ကိုယ်သွေး သို့မဟုတ် အမူအကျင့်ပြောင်းလဲခြင်း
• ခေါင်းကိုက်ခြင်းများ
• အမြင်အာရုံပိုင်းတွင် ပြဿနာရှိခြင်း
• ခန္ဓာကိုယ်၏ တစ်ဖက်ခြမ်းတွင် အားနည်းခြင်း သို့မဟုတ် ထုံကျင်ခြင်း ဖြစ်ပေါ်ခြင်း

လူနာထက်ဝက်ခန့်သည် ရောဂါရှာဖွေခြင်း မရှိသေးခင် ရုတ်တရက်တက်ခြင်းများကို ခံစားရသည်။ လူနာအများစု (80% ခန့်)သည် ၎င်းတို့နာဖျားသည့် ကာလအတောအတွင်းတွင် အကျိတ်ကြောင့် ရုတ်တရက်တက်ခြင်းများကို ခံစားရနိုင်ခြေရှိပါသည်။

အာရုံကြောထောက်ပံ့ဆဲလ်အကျိတ် ဖြစ်ပွားနိုင်ခြေရှိသော အကြောင်းရင်းများ

အာရုံကြောထောက်ပံ့ဆဲလ်အကျိတ် ဖြစ်ရသည့် အကြောင်းရင်းကို မသိရှိရသေးပါ။ သို့သော် ဆဲလ်များအတွင်းရှိ အချို့သော မျိုးဗီဇပြောင်းလဲမှုများသည် ဤအကျိတ်များနှင့် ဆက်စပ်မှုရှိသည်။

အာရုံကြောထောက်ပံ့ဆဲလ်အကျိတ်များသည် များသောအားဖြင့် အရွယ်ရောက်ပြီးသူများတွင် ဖြစ်ပွားလေ့ရှိသည်။ ၎င်းတို့သည် အမျိုးသားများတွင် ပို၍အဖြစ်များသည်။ ကလေးသူငယ် အာရုံကြောထောက်ပံ့ဆဲလ်အကျိတ်များကို ဆယ်ကျော်သက်များနှင့် လူငယ်များတွင် အများဆုံးတွေ့ရလေ့ရှိသည်။

အာရုံကြောထောက်ပံ့ဆဲလ်အကျိတ်အား ရောဂါရှာဖွေခြင်း

 အာရုံကြောထောက်ပံ့ဆဲလ်အကျိတ် ရောဂါရှာဖွေရန် စစ်ဆေးမှုများတွင် အောက်ပါတို့ ပါဝင်သည်-

• ရောဂါလက္ခဏာများ၊ ယေဘုယျ ကျန်းမာရေးအခြေအနေ၊ ယခင်ကဖြစ်ပွားခဲ့သော ရောဂါများနှင့် ဖြစ်ပွားနိုင်ခြေရှိသော အကြောင်းရင်းများကို သိရှိနိုင်ရန် ခန္ဓာကိုယ်ကို စစ်ဆေးခြင်းနှင့် ကျန်းမာရေးမှတ်တမ်းကို မေးမြန်းစစ်ဆေးခြင်း။
• ဦးနှောက်လုပ်ဆောင်ချက်ကို တိုင်းတာရန် အာရုံကြောဆိုင်ရာ စစ်ဆေးမှု။ ယင်းစစ်ဆေးမှုတွင် မှတ်ဉာဏ်၊ အမြင်အာရုံ၊ အကြားအာရုံ၊ ကြွက်သားသန်စွမ်းမှု၊ ဟန်ချက်ညီမှု၊ လှုပ်ရှားမှု ညှိနှိုင်းနိုင်မှု၊ တုံ့ပြန်မှုများတို့ ပါဝင်သည်။
• ဦးနှောက်လှိုင်း မှတ်တမ်းတင်ဓာတ်မှန်စစ်ဆေးခြင်း (EEG)သည် ဦးနှောက်၏ လျှပ်စစ်လှုပ်ရှားမှုကို တိုင်းတာပေးပါသည်။
•  အကျိတ်ကို ရှာဖွေဖော်ထုတ်ခြင်း၊ ၎င်း၏ အရွယ်အစားနှင့် တည်နေရာကိုသိရှိနိုင်ရန်အတွက်သံလိုက်ဓာတ်မှန်ရိုက်ခြင်း(MRI) ကဲ့သို့သောပုံရိပ်ဖော်စစ်ဆေးမှုများပြုလုပ်ခြင်း။ 
• ပုံမှန်မဟုတ်သော ဆဲလ်များ ရှိ၊ မရှိ စစ်ဆေးရန်အတွက်အသားစစစ်ဆေးခြင်း။ ရောဂါဗေဒပညာရှင်တစ်ဦးသည် ဦးနှောက်အကျိတ်၏ အမျိုးအစားနှင့် အဆင့်ကို  ဖော်ထုတ် ရန်အတွက် ထိုနမူနာကို အဏုကြည့်မှန်ဘီလူးဖြင့် စစ်ဆေးသည်။
•  ပစ်မှတ်ထားကုထုံးအတွက် ဖြစ်နိုင်ခြေရှိသော ပစ်မှတ်များ ကိုပြသရန် အကျိတ်၏ အခြားမျိုးရိုးဗီဇ နှင့် မော်လီကျူး စစ်ဆေးမှု။

ဆရာဝန်များသည် အကျိတ် ဆဲလ်များတွင် ဖြစ်ပွားသော မော်လီကျူးပြောင်းလဲမှုများနှင့် မျိုးဗီဇပြောင်းလဲမှုများ (DNA ပြောင်းလဲမှုများ) အကြောင်း ပိုမိုလေ့လာနေကြသည်။ အာရုံကြောထောက်ပံ့ဆဲလ်အကျိတ် အများစုတွင် ရောဂါရှာဖွေရာတွင် အထောက်အကူပြုသည့် မျိုးဗီဇပြောင်းလဲမှု ရှိသည်။ ဤပြောင်းလဲမှုများသည် IDH မျိုးရိုးဗီဇပြောင်းလဲမှု (IDH1 သို့မဟုတ် IDH2) နှင့် 1p19q codeletion ဖြစ်သည်။ အကျိတ်ဆဲလ်များတွင် ဖြစ်ပေါ်နေသော ပြောင်းလဲမှုများကို နားလည်သဘောပေါက်ခြင်းသည် ဆရာဝန်များအတွက် ကုသမှုအစီအစဉ်များ ရေးဆွဲရာတွင် အထောက်အကူပြုသည်။

အာရုံကြောထောက်ပံ့ဆဲလ်အကျိတ် အား အဆင့်သတ်မှတ်ခြင်း

အာရုံကြောထောက်ပံ့ဆဲလ်အကျိတ်များကို အဏုကြည့်မှန်ဘီလူးအောက်တွင် မြင်ရသည့်ပုံစံအပေါ် မူတည်၍ အုပ်စုခွဲပါသည်။ ဆဲလ်များ ပိုမိုပုံမှန်မဟုတ်လေလေ အဆင့် ပိုမြင့်လေလေ ဖြစ်သည်။ အာရုံကြောထောက်ပံ့ဆဲလ်အကျိတ်များသည် ပုံမှန်အားဖြင့် အဆင့် 2 သို့မဟုတ် 3 ဖြစ်ကြသည်။

• အဆင့် 2 ကို နိမ့်သော အဆင့်ဟု ယူဆသည်။ ၎င်းဆဲလ်များသည် ပုံမှန်ဆဲလ်များနှင့် အလားသဏ္ဍာန်ပိုတူပြီး ကြီးထွားနှုန်းပိုနှေးတတ်ပါသည်။ အဆင့်နိမ့် အကျိတ်များသည် ဦးနှောက်၏ အခြားအပိုင်းများသို့ ပျံ့နိုင်ခြေနည်းသည်။
• အဆင့် 3 ကို မြင့်မားသော အဆင့်ဟု ယူဆသည်။ ဤအကျိတ်များကို ဆဲလ်ပုံသဏ္ဌာန် ပျက်ယွင်းသော အာရုံကြောထောက်ပံ့ဆဲလ်အကျိတ်များ ဟုခေါ်ကြသည်။ ၎င်းတို့သည် ပိုမိုပြင်းထန်ပြီး ပိုမိုလွယ်ကူစွာ ပျံ့နှံ့နိုင်သည်။

အာရုံကြောထောက်ပံ့ဆဲလ်အကျိတ်အား ကုသခြင်း

အာရုံကြောထောက်ပံ့ဆဲလ်အကျိတ်အား ကုသခြင်းသည် အောက်ပါတို့ အပေါ်တွင် မူတည်သည်-

• အကျိတ် အမျိုးအစား
• အကျိတ်၏ တည်နေရာ
• ပျံ့နှံ့သွားခြင်း ရှိ၊ မရှိ သို့မဟုတ် ပြန်လည်ဖြစ်ပွားလာခြင်း ရှိ၊ မရှိ

ပြင်းထန်သောအကျိတ်များအတွက် ပိုမိုပြင်းထန်သည့် ကုသမှုများ လိုအပ်ပါသည်။ ဆရာဝန်များသည် လူနာ၏အသက်အရွယ်ကိုလည်း ထည့်သွင်းစဥ်းစားပါသည်။

အာရုံကြောထောက်ပံ့ဆဲလ်အကျိတ် အတွက် ခွဲစိတ်ကုသမှု

ခွဲစိတ်ကုသမှုသည် အာရုံကြောထောက်ပံ့ဆဲလ်အကျိတ် အတွက် အဓိကကုသမှုဖြစ်သည်။ ပန်းတိုင်မှာ အကျိတ်ကို အကြွင်းမဲ့ ဖယ်ရှားပစ်ရန်  (ခွဲစိတ်မှုဖြင့် အလုံးစုံထုတ်ယူခြင်း) ဖြစ်သည်။ သို့သော် ဦးနှောက်ကို ထိခိုက်ပျက်စီးနိုင်သည့် အန္တရာယ် ရှိသောကြောင့် အကျိတ်တစ်ခုလုံးကို ဖယ်ရှားပေးရန် အမြဲတမ်း မဖြစ်နိုင်ပါ။

အချို့သောဖြစ်ရပ်များတွင် အကျိတ်တည်နေရာကြောင့် ခွဲထုတ်၍ မရနိုင်ခြင်းမျိုးလည်း ရှိတတ်သည်။ အဆင့်နိမ့်အကျိတ်ရှိသော လူနာအချို့သည် ခွဲစိတ်ကုသမှုခံယူပြီးနောက် စောင့်ကြည့်ခြင်းခံရနိုင်သည်။ အခြားလူနာများသည် ခွဲစိတ်ကုသမှုခံယူပြီးနောက် ဓာတ်ရောင်ခြည်ကုထုံး နှင့်/သို့မဟုတ် ဓာတုကုထုံးဖြင့် ကုသခံရနိုင်သည်။

အာရုံကြောထောက်ပံ့ဆဲလ်အကျိတ် အတွက် ဓာတ်ရောင်ခြည်ကုထုံး

ခွဲစိတ်မှုပြုလုပ်ပြီးနောက်တွင် ကင်ဆာဆဲလ် အကြွင်းအကျန်များအား သတ်ရန် ဓာတ်ရောင်ခြည်ကုထုံးကို သုံးလေ့ရှိပါသည်။ ဓာတ်ရောင်ခြည်ကုထုံးသည် အကျိတ်အမျိုးအစားနှင့် တည်နေရာနှင့် ကလေး၏ အသက်အရွယ်ပေါ် မူတည်ပါသည်။ ဘေးထွက်ဆိုးကျိုးများ ဖြစ်ပေါ်နိုင်သည့် အန္တရာယ်ရှိသောကြောင့် ကလေးငယ်များတွင် ၎င်းကို အသုံးမပြုပါ။

အာရုံကြောထောက်ပံ့ဆဲလ်အကျိတ် အတွက် ဓာတုကုထုံး

ဓာတုကုထုံးကို ခွဲစိတ်ကုသခြင်းနှင့် ဓာတ်ရောင်ခြည်ကုသခြင်းတို့နှင့်အတူ တွဲဖက်၍ အသုံးပြုလေ့ရှိပြီး၊ အထူးသဖြင့် ပြင်းထန်သော အကျိတ်အမျိုးအစားများ အတွက် အသုံးပြုပါသည်။

အာရုံကြောထောက်ပံ့ဆဲလ်အကျိတ် အတွက် အသုံးပြုသော ဓာတုကုထုံးတွင် အောက်ပါတို့ ပါဝင်သည်-

• PCV ကုထုံး- ပရိုကာဘရာဇင် (Procarbazine)၊ လိုမပ်စတင် (Lomustine) (CCNU ဟုလည်းခေါ်သည်)၊ နှင့် ဗင်ခရစ္စတင်း (Vincristine) ဟုခေါ်သော ကင်ဆာဆေးဝါးများ ပါဝင်သည်
• တမ်မိုဇိုလိုမိုက်ဒ် (Temozolomide)
•  ဗော်ရာစီဒီနစ်ဘ် (Vorasidenib) ကဲ့သို့သော IDH မျိုးရိုးဗီဇပြောင်းလဲမှုများအတွက် ပစ်မှတ်ထားကုထုံး

အထူးသဖြင့်ဆေးဝါးစမ်းသပ်မှုများတွင် အခြားသော ကင်ဆာဆေးသွင်းကုသမှု အမျိုးအစားများကိုလည်း အသုံးပြုနိုင်ပါသည်။

အာရုံကြောထောက်ပံ့ဆဲလ်အကျိတ်များကို ကုသရန်အသုံးပြုသော ဆေးဝါးအချို့သည်မျိုးအောင်နိုင်စွမ်း ပြဿနာများကို ဖြစ်စေနိုင်သည်။ မျိုးအောင်နိုင်စွမ်းကို ကာကွယ်ရန် ရွေးချယ်စရာများအကြောင်း သင့်ကလေး၏ ပြုစုစောင့်ရှောက်မှုအဖွဲ့နှင့် ဆွေးနွေးပါ။

အာရုံကြောထောက်ပံ့ဆဲလ်အကျိတ်များအတွက် ပစ်မှတ်ထား ကုထုံး

ပစ်မှတ်ထားကုထုံးများသည် အကျိတ်ဆဲလ်များ၏ ထူးခြားသောလက္ခဏာရပ်များကို ပစ်မှတ်ထား၍ သော်လည်းကောင်း၊ ထိုလက္ခဏာများအပေါ် သက်ရောက်မှုပြု၍ သော်လည်းကောင်း လုပ်ဆောင်ကြခြင်းဖြစ်သည်။  မျိုးရိုးဗီဇ နှင့် ပရိုတင်းဓာတ်များတွင် ဖြစ်ပေါ်သော အပြောင်းအလဲများသည် အကျိတ်ဆဲလ်များ၏ ကြီးထွားမှုနှင့် ပွားများမှုကို ထိန်းချုပ်ပေးနိုင်သည်။ သင့်ကလေး၏ ပြုစုစောင့်ရှောက်မှုအဖွဲ့သည် သင့်ကလေး၏ ရောဂါကို ကုသရာတွင် အထောက်အကူဖြစ်စေပါက ပစ်မှတ်ထားကုထုံးကို အကြံပြုနိုင်ပါသည်။ 

အာရုံကြောထောက်ပံ့ဆဲလ်အကျိတ် အတွက် ရောဂါခန့်မှန်းချက်

အာရုံကြောထောက်ပံ့ဆဲလ်အကျိတ်သည် ကလေးများထက် လူကြီးများတွင် ပိုမိုအဖြစ်များပါသည်။  ငယ်ရွယ်သောလူနာများအတွက် ရောဂါခန့်မှန်းချက်အကြောင်း အနည်းငယ်သာ သိရှိရပါသည်။ ခြုံငုံပြောရလျှင် ကလေးများသည် လူကြီးများထက် ရလဒ်များ ပိုမိုကောင်းမွန်ပါသည်။

ကလေးသူငယ် အာရုံကြောထောက်ပံ့ဆဲလ်အကျိတ် အတွက် 5 နှစ်ကြာ အသက်ရှင်နိုင်ခြေနှုန်းမှာ 80% ထက်ပိုပါသည်။ သို့သော် ကုသမှုရလဒ်များသည် ခွဲစိတ်မှုအောင်မြင်ခြင်း၊ ရောဂါရှာဖွေချိန်ရှိ အသက်၊ အကျိတ်၏ လက္ခဏာများနှင့် အခြားအချက်များ အပေါ် မူတည်ပြီး ကွဲပြားနိုင်ပါသည်။ ရောဂါပျောက်ကင်းသူများ အကြားတွင်ပင် ရောဂါပြန်လည်ဖြစ်ပွားခြင်းမှာ ဖြစ်လေ့ဖြစ်ထရှိသော အခြေအနေတစ်ခုဖြစ်သည်။

ရလဒ်များသည် အောက်ပါအချက်များ အပေါ် မူတည်ပြီး ကွဲပြားသည်-

• အကျိတ်အမျိုးအစားနှင့် အဆင့်- အဆင့်နိမ့် အာရုံကြောထောက်ပံ့ဆဲလ်အကျိတ်များသည် ဖြည်းဖြည်းချင်းကြီးထွားပြီး ပြန်လည်ဖြစ်ပွားနိုင်ခြေ နည်းပါးပါသည်။ အဆင့်မြင့် အကျိတ်များသည် ကုရခက်သလို မကြာခဏ ပြန်ဖြစ်တတ်သည်။
• ခွဲစိတ်ကုသမှုဖြင့် အကျိတ်ကို လုံးဝဖယ်ရှားနိုင်ခြင်း ရှိ၊ မရှိ-ခွဲစိတ်ကုသမှုအပြီးတွင် အကျိတ်လုံးဝမမြင်ရတော့သည့် ကလေးငယ်များသည် ရောဂါပျောက်ကင်းရန် အကောင်းဆုံးအခွင့်အရေးရှိသည်။
•  ကင်ဆာရောဂါ (Cancer) ပျံ့နှံ့သွားခြင်း ရှိ၊ မရှိ- ဦးနှောက်၏ အခြားအစိတ်အပိုင်းများသို့ ပျံ့နှံ့သွားသော ကင်ဆာရောဂါ (Cancer)သည် ကုသရန် ပိုမိုခက်ခဲသည်။
• အကျိတ်၏တည်နေရာ-ဦးနှောက်ကြီး သို့မဟုတ် ဦးနှောက်ငယ်ရှိ အကျိတ်များသည် ဦးနှောက် သို့မဟုတ် ဦးနှောက်ပင်စည်အလယ်ရှိ အကျိတ်များထက် ပျောက်ကင်းနိုင်ခြေ ပိုမိုကောင်းမွန်သည်။ ၎င်းတို့ကို ခွဲစိတ်ကုသမှုဖြင့် ဖယ်ရှားရန် ပိုမိုလွယ်ကူသောကြောင့်ဖြစ်သည်။
• ကင်ဆာရောဂါ (Cancer) ပြန်လည်ဖြစ်ပွားခြင်း ရှိ၊ မရှိ- ပြန်လည်ဖြစ်ပွားလာသော ရောဂါသည် ကုသရန် ပိုမိုခက်ခဲသည်။
• အကျိတ်၏ မော်လီကျူး သို့မဟုတ် မျိုးရိုးဗီဇဆိုင်ရာ အချက်များ- သိပ္ပံပညာရှင်များသည် အကျိတ်၏ မျိုးဗီဇနှင့် ဆဲလ်များရှိ အချို့သောပြောင်းလဲမှုများသည် ရောဂါကို ပစ်မှတ်ထားကုထုံးဖြင့် ကုသရန် ပိုမိုလွယ်ကူစေနိုင်ခြင်း ရှိ၊ မရှိကို လေ့လာနေကြသည်။

ကိစ္စရပ်တိုင်းသည် မတူညီကြပါ။ သင့်ကလေး၏ ကျန်းမာရေးအခြေအနေနှင့် ပတ်သက်သည့် အသေးစိတ်အချက်အလက်များကို သင်၏ ကုသပေးနေသော ဆရာဝန် သို့မဟုတ် သင့်ပြုစုကုသရေးအဖွဲ့ထံမှ ရယူနိုင်ပါသည်။

အာရုံကြောထောက်ပံ့ဆဲလ်အကျိတ် ရှိသူများအတွက် ပံ့ပိုးမှု

ကုသမှုခံယူပြီးနောက်တွင်လည်း သင့်ကလေးအနေဖြင့် ရောဂါပြန်လည်ဖြစ်ပွားခြင်း သို့မဟုတ် ရောဂါအခြေအနေ ဆက်လက်ဆိုးရွားလာခြင်း ရှိ၊ မရှိ စောင့်ကြည့်ရန်အတွက် ဆက်လက်၍ ဆရာဝန်နှင့် ပြသခြင်း၊ သွေးစစ်ခြင်းကဲ့သို့သော ဓာတ်ခွဲခန်းစမ်းသပ်မှုများ ပြုလုပ်ခြင်းနှင့် ပုံမှန် MRI ရိုက်ခြင်းတို့ကို လိုအပ်မည်ဖြစ်သည်။ လူနာများသည် စတီးရွိုက်များနှင့် တက်ခြင်းကို ဆန့်ကျင်သည့်ဆေးဝါးများ အချိန်အတိုင်းအတာ တစ်ခုအထိ လိုအပ်နိုင်သည်။

ကလေးများနှင့် ဆယ်ကျော်သက်များတွင် အာရုံကြောထောက်ပံ့ဆဲလ်အကျိတ်၏ ပြန်လည်ကောင်းမွန်လာမှုနှင့် ရေရှည်ဆိုးကျိုးများသည် အကျိတ်၏ လက္ခဏာများနှင့် ရရှိသောကုသမှုများပေါ်တွင် မူတည်သည်။ အာရုံကြောထောက်ပံ့ဆဲလ်အကျိတ်မှ ရောဂါပျောက်ကင်းသူများသည်  ကုသမှု၏ နောက်ဆက်တွဲဆိုးကျိုးများရှိ၊ မရှိကိုလည်း စောင့်ကြည့်စစ်ဆေးမှုများ ခံယူသင့်သည်။.

ကုသမှုပြီးဆုံးပြီးနောက် သင့်ကလေး၏ ပြုစုကုသရေးအဖွဲ့သည် သင့်အား ရှင်သန်မှုစောင့်ရှောက်မှုအစီအစဉ် ပေးလိမ့်မည်။ ဤအစီရင်ခံစာတွင် ကျန်းမာသော လူနေမှုပုံစံအတွက် လိုအပ်သောစစ်ဆေးမှုများနှင့် အကြံပြုချက်များ ပါဝင်သည်။ သင့်စောင့်ရှောက်မှုအစီအစဉ်တွင် အာရုံကြောဆိုင်ရာရောဂါဗေဒ၊ ပြန်လည်ထူထောင်ရေးကုထုံး၊ ကျောင်းဝန်ဆောင်မှုများ၊ နှင့် စိတ်ပညာကဲ့သို့သော ပံ့ပိုးမှုဝန်ဆောင်မှုများသို့ ရည်ညွှန်းချက်များလည်း ပါဝင်သင့်သည်။

ကင်ဆာရောဂါ (Cancer) မှ ရောဂါပျောက်ကင်းသူအားလုံးသည် ကျန်းမာသော လူနေမှုပုံစံအလေ့အထများကို လက်ခံကျင့်သုံးသင့်သည်။ အခြေခံစောင့်ရှောက်မှု ဆရာဝန်တစ်ဦးထံ ပုံမှန်ဆေးစစ်မှုများ ခံယူရန် အရေးကြီးပါသည်။

ကလေးများတွင် ဖြစ်ပွားတတ်သည့် အာရုံကြောထောက်ပံ့ဆဲလ်အကျိတ်သည် ရေရှည်ကုသမှုခံယူရသည့် ရောဂါတစ်ခုဖြစ်သည်။

အချို့သော အာရုံကြောထောက်ပံ့ဆဲလ်အကျိတ် အပါအဝင် အဆင့်နိမ့် ဦးနှောက်အကျိတ်များသည် နာတာရှည် သို့မဟုတ် ရေရှည်ကုသမှုခံယူရသည့် ရောဂါတစ်ခု ဖြစ်လေ့ရှိသည်။ အဆင့်နိမ့် ဦးနှောက်အကျိတ်သည် ရေရှည်အသက်ရှင်နိုင်ခြေ မြင့်မားသော်လည်း အချိန်ကြာလာသည်နှင့်အမျှ အကျိတ်သည် ပြန်လည်ဖြစ်ပွားလာခြင်း သို့မဟုတ် ရောဂါအခြေအနေ ပိုမိုဆိုးရွားလာခြင်းတို့ မကြာခဏ ဖြစ်တတ်ပါသည်။

သင့်ကလေးအနေဖြင့် နှစ်ပေါင်းများစွာကြာအောင် ပြန်လည်စောင့်ကြည့်ကုသမှု ခံယူရသည့်ကာလအတွင်း ထပ်မံ၍ ကုသမှုများ လိုအပ်ကောင်း လိုအပ်နိုင်ပါသည်။ ဆိုလိုသည်မှာ အကျိတ် သို့မဟုတ် ကုသမှုနှင့် ဆက်စပ်သော နောက်ဆက်တွဲပြဿနာများအတွက် အန္တရာယ်ပိုမိုမြင့်မားပါသည်။ စကင်ဖတ် ကြည့်သည့်အခါ အကျိတ်အရွယ်အစား ကြီးထွားလာသည်ကို တွေ့ရသော်လည်း၊ ကုသမှုချက်ချင်းပေးမည့်အစား စောင့်ကြည့်ရန် ကုသရေးအဖွဲ့မှ အကြံပြုသည့်အချိန်မျိုးလည်း ရှိနိုင်ပါသည်။

ကောင်းမွန်သော ဆက်သွယ်ရေး နှင့် သင့်မိသားစု၊ သင့်ကလေးနှင့် စောင့်ရှောက်မှုအဖွဲ့အကြား ယုံကြည်မှုသည် အရေးကြီးပါသည်။

နောက်ထပ်- ဦးနှောက်အကျိတ်ကုသမှုခံယူပြီး နောက်ပိုင်း ဘဝဖြတ်သန်းမှု

သင်၏ ကျန်းမာရေး စောင့်ရှောက်မှုအဖွဲ့ကို မေးရန် မေးခွန်းများ

• ကျွန်ုပ်ကလေး၏ အကျိတ်သည် အဆင့်မြင့် သို့မဟုတ် အဆင့်နိမ့်လား။
• ကျွန်ုပ်တို့၏ ကုသမှုနည်းလမ်းများသည် အဘယ်နည်း။
• ကုသမှုတစ်မျိုးချင်းစီ၏ ဖြစ်နိုင်သော နောက်ဆက်တွဲဆိုးကျိုးများသည် အဘယ်နည်း။
• နောက်ဆက်တွဲဆိုးကျိုးများကို စီမံခန့်ခွဲရန် မည်သည့်အရာများကို လုပ်ဆောင်နိုင်သနည်း။
• ကျွန်ုပ်တို့ ဆေးဘက်ဆိုင်ရာ စမ်းသပ်သုတေသနတွင် ပါဝင်ရန် စဉ်းစားသင့်ပါသလား။
• ကျွန်ုပ်ကလေး၏ အာရုံကြောထောက်ပံ့ဆဲလ်အကျိတ် အတွက် ရောဂါခန့်မှန်းချက်က ဘာလဲ။
• မည်ကဲ့သို့သော နောက်ဆက်တွဲစောင့်ရှောက်မှုနှင့် စောင့်ကြည့်စစ်ဆေးမှုများ လိုအပ်မည်နည်း။