အသားစယူ၍ စစ်ဆေးခြင်း

အသားစယူ၍ စစ်ဆေးခြင်းဆိုသည်မှာ အဘယ်နည်း။

အသားစယူ၍ စစ်ဆေးခြင်းဆိုသည်မှာ ဆရာဝန်များသည် ခန္ဓာကိုယ်မှ တစ်ရှူးအပိုင်းအစငယ်တစ်ခုကို ဖယ်ရှားပြီး အနီးကပ်ကြည့်ရှုသည့် လုပ်ထုံးလုပ်နည်းတစ်ခု ဖြစ်ပါသည်။ ကုသမှု၏ ပထမဆုံးအဆင့်များထဲမှ တစ်ခုမှာ ရောဂါရှာဖွေဖော်ထုတ်ခြင်း ဖြစ်ပါသည်။ ရောဂါများစွာကို ရောဂါရှာဖွေဖော်ထုတ်ခြင်းတွင် အသားစယူ၍ စစ်ဆေးခြင်း ပါဝင်ပါသည်။

ရောဂါဗေဒပညာရှင် ဟုခေါ်သော ဆရာဝန်တစ်ဦးသည် ဆဲလ်များမှာ ကျန်းမာသည့်ဆဲလ်များနှင့် ကွဲပြားမှု ရှိ၊ မရှိကို ကြည့်ရှုရန်အတွက် ထိုတစ်ရှူးကို အဏုကြည့်မှန်ပြောင်းအောက်တွင် ကြည့်ရှုပါသည်။ ၎င်းကို တစ်ရှူးတစ်ခု၏ တစ်ရှူးဗေဒ ဟုခေါ်ပါသည်။ ဆဲလ်များ၏ ပုံပန်းသဏ္ဌာန်သည် ရောဂါတစ်ခု၏ သီးခြားအမျိုးအစားနှင့် အဆင့်ဆိုင်ရာ အသေးစိတ်အချက်အလက်များကို ပေးပါသည်။

အသားစယူ၍ စစ်ဆေးခြင်းသည် မည်သို့လုပ်ဆောင်ပါသနည်း။

အသားစယူ၍ စစ်ဆေးခြင်းကို ပြုလုပ်ပုံနည်းလမ်းသည် တစ်ရှူး၏တည်ရှိရာနေရာ၊ လိုအပ်သော တစ်ရှူးပမာဏနှင့် စီစဉ်ထားသော အခြားလုပ်ထုံးလုပ်နည်းများပေါ်တွင် မူတည်ပါသည်။ လုပ်ထုံးလုပ်နည်းပေါ် မူတည်၍ သင့်ကလေးသည် ထုံဆေး သို့မဟုတ် အထွေထွေ မေ့ဆေးလိုအပ်နိုင်ပါသည်။

အသားစယူ၍ စစ်ဆေးခြင်းတွင် အပ်ဖြင့် အသားစယူ၍ စစ်ဆေးခြင်းနှင့် ခွဲစိတ်၍ အသားစယူ၍ စစ်ဆေးခြင်းတို့ ပါဝင်ပါသည်။

• အပ်ဖြင့် အသားစယူ၍ စစ်ဆေးခြင်း- ကြွက်သားများ၊ အရိုးများ သို့မဟုတ် အခြားအင်္ဂါများမှ တစ်ရှူး သို့မဟုတ် အရည်ကို ယူရန်အတွက် အပ်ကို အသုံးပြုပါသည်။ အပ်ဖြင့် အသားစယူ၍ စစ်ဆေးခြင်း ပြုလုပ်စဉ်အတွင်း သင်၏စောင့်ရှောက်မှုပေးသူသည် တစ်ရှူးနှင့် အပ်၏ တည်နေရာကိုကြည့်ရှုရန်အတွက် CT၊ MRIသို့မဟုတ် အာထရာဆောင်းပုံရိပ်ဖော်စစ်ဆေးခြင်း ကို အသုံးပြုနိုင်ပါသည်။
• ခွဲစိတ်၍ အသားစယူ၍ စစ်ဆေးခြင်း- ခွဲစိတ်၍ အသားစယူ၍ စစ်ဆေးခြင်းတွင်၊ သင်၏စောင့်ရှောက်မှုပေးသူသည် ခန္ဓာကိုယ်မှတစ်ရှူးကိုယူရန်အတွက် အရေပြားကို လှီးဖြတ်ရန် လိုအပ်နိုင်ပါသည်။ ၎င်းသည် အများအားဖြင့် တစ်ရှူး၏တည်နေရာကြောင့် ဖြစ်ပါသည်။ စောင့်ရှောက်မှုပေးသူသည် တစ်ရှူးကိုရှာဖွေရန်အတွက် MRI၊ CT သို့မဟုတ် အခြား ပုံရိပ်ဖော်စစ်ဆေးမှုများ ကို အသုံးပြုမည် ဖြစ်ပါသည်။ တစ်ခါတစ်ရံတွင် စောင့်ရှောက်မှုပေးသူသည် ခန္ဓာကိုယ်အတွင်းပိုင်းကိုကြည့်ရှုရန် ဗီဒီယိုကင်မရာအသေးစားကို အသုံးပြုပါသည်။

အချို့သော အသားစယူ၍ စစ်ဆေးခြင်းများသည် သေးငယ်သော ဖြတ်တောက်မှုများသာ လိုအပ်ပါသည်။ အခြားအသားစယူ၍ စစ်ဆေးခြင်းများတွင် ကြီးမားသည့် ဖြတ်တောက်မှုများ လိုအပ်ပါသည်။ အချို့ကိစ္စများတွင် ဆရာဝန်များသည် အသားစယူစဉ်တွင် ရောဂါရှိသောတစ်ရှူးကို တစ်ပြိုင်နက်တည်း ဖယ်ရှားပစ်နိုင်ပါသည်။ သင်၏စောင့်ရှောက်မှုပေးသူသည် ရောဂါပျံ့နှံ့သွားခြင်း ရှိ၊ မရှိကို ကြည့်ရှုရန် အနီးနားရှိ ပြန်ရည်ကျိတ်များနှင့် အခြားတစ်ရှူးများကိုလည်း ကြည့်ရှုနိုင်ပါသည်။

မေ့ဆေးပေး၍ စစ်ဆေးခြင်း

အချို့ကိစ္စများတွင် ဆရာဝန်များသည် စစ်ဆေးရန် သို့မဟုတ် တစ်ရှူးအသားစယူ၍ စစ်ဆေးရန်အတွက် အထွေထွေမေ့ဆေးကို အသုံးပြုနိုင်ပါသည်။ ထိုလုပ်ငန်းစဉ်ကို EUA- မေ့ဆေးပေး၍ စစ်ဆေးခြင်းဟု ခေါ်ပါသည်။ အထွေထွေမေ့ဆေးပေးထားစဉ် စောင့်ရှောက်မှုပေးသူသည် လူနာများကို စောင့်ကြည့်ရမည်ဖြစ်သောကြောင့် ၎င်းတို့သည် မေ့ဆေးဆရာဝန်နှင့်အတူ ခွဲစိတ်ခန်းထဲတွင် EUA များကို ပြုလုပ်ကြပါသည်.

ကလေးဘဝကင်ဆာ သို့မဟုတ် ရောဂါတွင် EUA ကို မျက်စိကင်ဆာတစ်မျိုးဖြစ်သည့် မျက်စိအမြင်လွှာ ကင်ဆာကို ရောဂါရှာဖွေဖော်ထုတ်ရန် အသုံးပြုလေ့ရှိပါသည်။ တစ်ခါတစ်ရံတွင် စောင့်ရှောက်မှုပေးသူများသည် တင်ပါးဆုံရိုးစစ်ဆေးမှုများကဲ့သို့သော အခြားစစ်ဆေးမှုများအတွက်လည်း EUA များကို ပြုလုပ်ကြပါသည်။

ဆရာဝန်များသည် ဖြစ်နိုင်ပါက အထွေထွေမေ့ဆေးအသုံးပြုခြင်းကို ကန့်သတ်ရန် ကြိုးစားပါသည်။ သို့သော်လည်း စမ်းသပ်စစ်ဆေးမှုအချို့တွင် ကလေးသည် လုံးဝငြိမ်နေရန် လိုအပ်ပါသည်။ စမ်းသပ်စစ်ဆေးမှုအမျိုးအစား၊ ကလေး၏အသက်အရွယ်နှင့် ဖြစ်နိုင်ချေရှိသည့် ရုပ်ပိုင်းဆိုင်ရာ သို့မဟုတ် စိတ်ပိုင်းဆိုင်ရာ မသက်မသာဖြစ်မှုများကြောင့် အထွေထွေမေ့ဆေးအသုံးပြုရန် လိုအပ်နိုင်ပါသည်။

အသားစယူ၍ စစ်ဆေးစဉ် မျှော်လင့်ထားရမည့်အရာများ

ပုံမှန်အားဖြင့် အသားစယူ၍ စစ်ဆေးခြင်းသည် နာကျင်မှုမရှိပါ။ သို့သော်လည်း စောင့်ရှောက်မှုအဖွဲ့သည် နာကျင်မှု သို့မဟုတ် မသက်မသာဖြစ်မှုကို လျှော့ချရန် သင့်ကလေးကို ဆေးပေးနိုင်ပါသည်။  

အသားစယူ၍ စစ်ဆေးခြင်း ပြုလုပ်ပြီးနောက်

ရောဂါဗေဒပညာရှင်တစ်ဦးသည် အသားစမှ ဆဲလ်များကိုကြည့်ရှုရန် အဏုကြည့်မှန်ပြောင်းကို အသုံးပြုပါသည်။ ရောဂါရှာဖွေဖော်ထုတ်ခြင်းသည် ဆဲလ်များ၏ ပုံပန်းသဏ္ဌာန်၊ ၎င်းတို့ ကြီးထွားနှုန်း မည်မျှမြန်ဆန်သည်နှင့် ဆဲလ်များ မည်မျှပျံ့နှံ့နေသည်တို့ပေါ်တွင် မူတည်ပါသည်။ ရောဂါရှာဖွေဖော်ထုတ်ခြင်းသည် ရောဂါ သို့မဟုတ် ကင်ဆာ၏ ပျံ့နှံ့မှုအဆင့်နှင့် အဆင့်သတ်မှတ်ချက်ကို ပြောပြပါသည်။ ဤအချက်အလက်ကို ရောဂါဗေဒဆိုင်ရာအစီရင်ခံစာတွင် ဖော်ပြထားပါသည်။

• ပျံ့နှံ့မှုအဆင့် ဆိုသည်မှာ ခန္ဓာကိုယ်ထဲတွင် ရောဂါ သို့မဟုတ် ကင်ဆာသည် မည်သည့်နေရာတွင်ရှိနေသည်ကို ရည်ညွှန်းပါသည်။ ၎င်းတွင် ရောဂါစတင်ခဲ့သည့် နေရာနှင့် ပျံ့နှံ့သွားသည့်နေရာတို့ ပါဝင်ပါသည်။
• အဆင့်သတ်မှတ်ချက် အုပ်စုသည် ၎င်းဆဲလ်များက ကျန်းမာသောဆဲလ်များနှင့် မည်သို့ကွာခြားပုံ၊ ဆဲလ်များ မည်မျှမြန်ဆန်စွာ ကြီးထွားပုံနှင့် ပျံ့နှံ့နိုင်ခြေ မည်မျှရှိပုံတို့ကို ဖော်ပြသည်။

သင်၏ ကျန်းမာရေးစောင့်ရှောက်မှုအဖွဲ့သည် ကုသမှုကိုစီစဉ်ရန်အတွက် တစ်ရှူးစစ်ဆေးမှုမှ အသေးစိတ်အချက်အလက်များကို အသုံးပြုမည် ဖြစ်ပါသည်။ ၎င်းတို့သည် အောက်ပါတို့ကိုလည်း ထည့်သွင်းစဉ်းစားကြပါသည်-

• ကင်ဆာ သို့မဟုတ် ရောဂါ အမျိုးအစား
• အကျိတ် အရွယ်အစား
• ပြန်ရည်အကျိတ်များ သို့မဟုတ် အခြားခန္ဓာကိုယ်အစိတ်အပိုင်းများသို့ ကင်ဆာဆဲလ်များ ပျံ့နှံ့ခြင်း ရှိ၊ မရှိ

ကင်ဆာ ရောဂါရှာဖွေဖော်ထုတ်ခြင်းနှင့် ကုသခြင်းအကြောင်း နောက်ထပ်လေ့လာပါ။

လုပ်ထုံးလုပ်နည်းကို ပြုလုပ်ပြီးနောက်၊ ရောင်ရမ်းနာကျင်ကိုက်ခဲမှု သို့မဟုတ် နာကျင်မှုကို မည်သို့စီမံခန့်ခွဲရမည်နှင့် ပတ်သက်သည့် သင့်စောင့်ရှောက်မှုအဖွဲ့၏ ညွှန်ကြားချက်များကို လိုက်နာဆောင်ရွက်ပါ။ ၎င်းတို့သည် ရောဂါပိုးဝင်ခြင်းကို ကာကွယ်ရန် အသားစယူ၍ စစ်ဆေးသည့်နေရာအား မည်သို့ဂရုစိုက်ရမည်ဆိုသည်ကိုလည်း ပြောပြပေးမည် ဖြစ်ပါသည်။  

အသားစစစ်ဆေးမှုရလဒ်များကို မည်သည့်အချိန်တွင် မည်ကဲ့သို့ရရှိမည်ဆိုသည်ကို သင့်ကျန်းမာရေးစောင့်ရှောက်မှုအဖွဲ့နှင့် တိုင်ပင်ဆွေးနွေးပါ။ 

အသားစယူ၍ စစ်ဆေးခြင်း၏ ဖြစ်နိုင်ခြေရှိသည့် အန္တရာယ်များ

သင်၏ ကျန်းမာရေးစောင့်ရှောက်မှုအဖွဲ့သည် သင့်ကလေး၏ အသားစယူ၍ စစ်ဆေးခြင်းသည် မည်သည့်နောက်ဆက်တွဲပြဿနာများကိုမျှ မဖြစ်စေရန် ကြိုးစားပါသည်။ အသားစယူ၍ စစ်ဆေးခြင်း၏ အန္တရာယ်များတွင် သွေးထွက်ခြင်း၊ စစ်ဆေးသည့်နေရာတွင် ရောဂါပိုးဝင်ခြင်းနှင့် အမာရွတ်ထင်ခြင်းတို့ ပါဝင်ပါသည်။ အသားစယူ၍ စစ်ဆေးသည့်နေရာပေါ်တွင် မူတည်၍ အခြားအန္တရာယ်များလည်း ရှိနိုင်ပါသည်။ ဤအကြောင်းကို သင်၏ကျန်းမာရေးစောင့်ရှောက်မှုအဖွဲ့နှင့် တိုင်ပင်ဆွေးနွေးပါ။

စစ်ဆေးသည့်နေရာတွင် ရောဂါပိုးဝင်ခြင်းကို ကာကွယ်ရန်အတွက် သင့်ကလေး၏ အသားစယူ၍ စစ်ဆေးမှုပြီးနောက် စောင့်ရှောက်မှုအတွက် သင့်အဖွဲ့၏ ညွှန်ကြားချက်များကို လိုက်နာဆောင်ရွက်ပါ။ အကယ်၍ သင့်ကလေးတွင် အောက်ပါတို့အပါအဝင် ရောဂါပိုးဝင်ခြင်း လက္ခဏာများ တွေ့ရှိရပါက သင့်စောင့်ရှောက်မှုအဖွဲ့ထံ ဆက်သွယ်ပါ-

• ဖျားခြင်း သို့မဟုတ် ချမ်းတုန်ခြင်း
• စစ်ဆေးသည့်နေရာတွင် သွေးဆက်တိုက်ထွက်နေခြင်း
• စစ်ဆေးသည့်နေရာတွင် နီရဲခြင်း၊ ရောင်ရမ်းခြင်း၊ သွေးစိမ့်ထွက်ခြင်း သို့မဟုတ် အနံ့ဆိုးထွက်ခြင်း

သင်၏ စောင့်ရှောက်မှုအဖွဲ့ကို မေးရန် မေးခွန်းများ

• သင်သည် အသားစယူ၍ စစ်ဆေးခြင်းမှ မည်သည်တို့ကို သိရှိမည်ဟု မျှော်လင့်ပါသနည်း။
  
• သင်သည် ဤအချက်အလက်များကို တခြားနည်းလမ်းများဖြင့် သိရှိနိုင်ပါသလား။
• အသားစယူ၍ စစ်ဆေးခြင်းကို ဆေးခန်းတွင် ပြုလုပ်မှာလား သို့မဟုတ် ဆေးရုံတွင် ပြုလုပ်မှာလား။
• ကျွန်ုပ်ကလေး၏ အသားစယူ၍ စစ်ဆေးခြင်းကို မည်သို့လုပ်ဆောင်မည်နည်း။
• အသားစယူ၍ စစ်ဆေးနေစဉ်အတွင်း နမူနာကို မည်မျှယူမည်နည်း။
• ကျွန်ုပ်ကလေးသည် အသားစယူ၍ စစ်ဆေးနေစဉ် သို့မဟုတ် စစ်ဆေးပြီးနောက်တွင် နာကျင်မှု ခံစားရမည်လား။
• အသားစယူ၍ စစ်ဆေးပြီးနောက် ကျွန်ုပ်တို့တွင် မေးခွန်းများ သို့မဟုတ် ပြဿနာများရှိပါက မည်သူ့ကို ဆက်သွယ်သင့်ပါသနည်း။ 
• ကျွန်ုပ်တို့သည် အသားစယူ၍ စစ်ဆေးမှုရလဒ်များကို မည်သည့်အချိန်တွင် မည်ကဲ့သို့ သိရှိနိုင်မည်နည်း။

ဆက်စပ်အကြောင်းအရာများ