စစ်ဆေးမှုရလဒ်များကို စောင့်ဆိုင်းခြင်း- စကန်ဖတ်စစ်ဆေးစမ်းသပ်ခြင်းနှင့်ဆက်နွှယ်သော စိုးရိမ်သောကကို မည်သည့်စီမံခန့်ခွဲရမည်နည်း

စစ်ဆေးမှုရလဒ်များကို စောင့်ဆိုင်းနေစဉ်အတွင်း စိတ်ဖိစီးမှုနှင့် စိုးရိမ်ပူပန်မှုများကို ခံစားရခြင်းသည် ပုံမှန်ပင် ဖြစ်ပါသည်။ ဆေးဘက်ဆိုင်ရာ စစ်ဆေးမှုတစ်ခုပြီးနောက်တွင် စောင့်ဆိုင်းချိန်သည် နာရီပိုင်းမှ ရက်သတ္တပတ်များအထိ ကြာမြင့်နိုင်ပါသည်။ လူအများမှ စစ်ဆေးမှုရလဒ်များကို စောင့်ဆိုင်းခြင်းသည် ပြင်းထန်သောရောဂါတစ်ခုအတွက် ရောဂါရှာဖွေဖော်ထုတ်ခြင်း၊ ကုသမှုနှင့် နောက်ဆက်တွဲ ပြသမှုများ၏ စိတ်ဖိစီးမှုအများဆုံး အပိုင်းများထဲမှ တစ်ခုဖြစ်သည်ဟု ဆိုကြပါသည်။ 

"စကန်ဖတ်စစ်ဆေးစမ်းသပ်ခြင်းနှင့်ဆက်နွှယ်သော စိုးရိမ်သောက" ဆိုသည်မှာ အဘယ်နည်း။

စစ်ဆေးမှုများနှင့် ပုံရိပ်ဖော်စစ်ဆေးမှု သို့မဟုတ် စကင်န်ဖတ်စစ်ဆေးမှု ရလဒ်များကို စောင့်ဆိုင်းရခြင်းနှင့် ပတ်သက်၍ စိုးရိမ်ပူပန်မှုတွင် တရားဝင်မဟုတ်သော အမည်တစ်ခု ရှိပါသည် — “စကန်ဖတ်စစ်ဆေးစမ်းသပ်ခြင်းနှင့်ဆက်နွှယ်သော စိုးရိမ်သောက”။

စကန်ဖတ်စစ်ဆေးစမ်းသပ်ခြင်းဆိုင်ရာ စိုးရိမ်သောက သို့မဟုတ် စကန်ဖတ်စစ်ဆေးစမ်းသပ်ခြင်းနှင့်ဆက်နွှယ်သော စိုးရိမ်သောကသည် ကင်ဆာ သို့မဟုတ် အခြားပြဿနာများကို ရှာဖွေရန်အသုံးပြုသည့် ပုံရိပ်ဖော်စစ်ဆေးမှုများနှင့် ပတ်သက်သည့် စိတ်ဖိစီးမှု ဖြစ်ပါသည်။ ပိုမိုကျယ်ပြန့်သည့် အဓိပ္ပာယ်ဖြင့်ဆိုရလျှင် ဤဝေါဟာရသည် မည်သည့်ဆေးစစ်ချက် သို့မဟုတ် စစ်ဆေးမှုကိုမဆို မပြုလုပ်မီ၊ လုပ်ဆောင်နေစဉ်နှင့် လုပ်ဆောင်ပြီးနောက်တွင် ဖြစ်ပေါ်သည့် စိုးရိမ်ပူပန်မှုကို ဆိုလိုပါသည်။

စစ်ဆေးမှုရလဒ်များသည် မည်သည့်အတွက်ကြောင့် အချိန်ကြာရသနည်း

ပုံရိပ်ဖော်စစ်ဆေးမှု ရလဒ်များ

 ပုံရိပ်ဖော်စစ်ဆေးမှုများ အတွက်၊ ဓာတ်မှန်ကျွမ်းကျင်ပညာရှင်များ  သည်ပုံရိပ်များကို ဖတ်ရှု၍ ခွဲခြမ်းစိတ်ဖြာပေးပါသည်။ ဤ ဓာတ်မှန်ကျွမ်းကျင်ပညာရှင် ဆိုသည်မှာ ရောဂါရှာဖွေဖော်ထုတ်ခြင်းနှင့် ကုသမှုအတွက် ပုံရိပ်ဖော်စစ်ဆေးမှုများကို အသုံးပြုခြင်းတွင် အထူးလေ့ကျင့်ထားသည့် ဆရာဝန်တစ်ဦး ဖြစ်ပါသည်။ ထို့နောက် ဓာတ်မှန်ကျွမ်းကျင်ပညာရှင်သည် အစီရင်ခံစာတစ်စောင်ကို အသင့်ပြင်ဆင်ပါမည်။ ဤလုပ်ငန်းစဉ်သည် ရက်ပေါင်းများစွာ အချိန်ကြာမြင့်နိုင်ပါသည်။

ပုံရိပ်ဖော်စစ်ဆေးမှုများ၏ ဥပမာများတွင် အောက်ပါတို့ ပါဝင်ပါသည်-

• ဓာတ်မှန်
• အာထရာဆောင်း စစ်ဆေးမှု (Ultrasound)
• ကွန်ပျုတာဓာတ်မှန်များ  (CT)
• သံလိုက်ဓာတ်မှန်  (MRI)

အသားစယူ၍ စစ်ဆေးခြင်း ရလဒ်များ

အသားစယူ၍ စစ်ဆေးခြင်း ရလဒ်များ ကိုရရှိရန် ရက်အနည်းငယ်မှ ရက်သတ္တပတ်အနည်းငယ်အထိ ကြာနိုင်ပါသည်။ တစ်ရှူးစနမူနာကို ဓာတ်ခွဲခန်းသို့ ယူဆောင်သွားပါသည်။ ရောဂါဗေဒဆိုင်ရာ ဆရာဝန်များ (Pathologists) သည် နမူနာကို ခွဲခြမ်းစိတ်ဖြာစစ်ဆေးပြီး အစီရင်ခံစာများကို ပြင်ဆင်ပါ။ ရောဂါဗေဒပညာရှင်ဆိုသည်မှာ ရောဂါများကို ခွဲခြားသတ်မှတ်ရန်အတွက် အဏုကြည့်မှန်ပြောင်းအောက်တွင် ဆဲလ်များကို လေ့လာစစ်ဆေးသည့် ဆရာဝန်တစ်ဦး ဖြစ်ပါသည်။

သွေးစစ်ဆေးမှုနှင့် မျိုးရိုးဗီဇဆိုင်ရာ စစ်ဆေးမှု ရလဒ်များ

သင်၏စောင့်ရှောက်မှုအဖွဲ့သည်လည်း သွေးစစ်ဆေးမှုများ၊ သွေးပိုးမွေး၍ စစ်ဆေးခြင်း သို့မဟုတ် မျိုးရိုးဗီဇဆိုင်ရာ စစ်ဆေးမှုများကို ပြုလုပ်နိုင်ပါသည်။ အသားစစစ်ဆေးမှုကဲ့သို့ပင်၊ ဤစစ်ဆေးမှုရလဒ်များကို ရရှိရန် ရက်အနည်းငယ်မှ ရက်သတ္တပတ်အနည်းငယ်အထိ ကြာမြင့်နိုင်ပါသည်။

သင်၏စောင့်ရှောက်မှုပေးသူသည် ရလဒ်များအကြောင်းကိုဆွေးနွေးရန်အတွက် စစ်ဆေးမှုရလဒ်များအားလုံးကိုရသည်အထိ စောင့်ဆိုင်းနိုင်ပါသည်။ စစ်ဆေးမှုတစ်ခု၏ ရလဒ်များကို သင့်ကလေး၏ အခြားစစ်ဆေးမှုများနှင့် ဆက်စပ်၍ ပြန်လည်သုံးသပ်ခြင်းမရှိပါက စစ်ဆေးမှုတစ်ခု၏ ရလဒ်များသည့် အဖြေများစွာကို ပေးနိုင်မည် မဟုတ်ပါ။ အချို့ကိစ္စများတွင်၊ စစ်ဆေးမှုရလဒ်များကို ကျန်းမာရေးစောင့်ရှောက်မှုပေးသူအဖွဲ့တစ်ဖွဲ့မှ ပြန်လည်သုံးသပ်နိုင်ပါသည်။ သို့မဟုတ် သင်၏စောင့်ရှောက်မှုအဖွဲ့သည် ရောဂါရှာဖွေဖော်ထုတ်ရန် သို့မဟုတ် ရောဂါတစ်ခုကို ဖယ်ထုတ်ရန်အတွက် အခြားစစ်ဆေးမှုများကို လိုအပ်ကြောင်း ဆုံးဖြတ်နိုင်ပါသည်။

စိုးရိမ်သောက၏ ရောဂါလက္ခဏာများ

လူတစ်ဦးချင်းစီသည် စိတ်ဖိစီးမှုနှင့် စိုးရိမ်ပူပန်မှုများကို ကွဲပြားစွာဖြင့် ခံစားရလေ့ရှိပါသည်။ စကန်ဖတ်စစ်ဆေးစမ်းသပ်ခြင်းနှင့် ဆက်နွှယ်သော စိုးရိမ်သောကနှင့် ပတ်သက်၍ လူနာတစ်ဦး၏ အတွေ့အကြုံသည် စောင့်ရှောက်သူ၏ အတွေ့အကြုံနှင့် အတော်လေး ကွာခြားနိုင်ပါသည်။ စိုးရိမ်သောက၏ ရောဂါလက္ခဏာများတွင် အောက်ပါတို့ ပါဝင်နိုင်ပါသည်-

• ကြောက်ရွံ့ခြင်း သို့မဟုတ် ထပ်ခါတလဲလဲ တွေးတောမိခြင်း
• နှလုံးခုန်နှုန်းမြန်ခြင်း
• မအီမသာဖြစ်ခြင်း
• လက်ဖဝါးများ ချွေးစေးထွက်ခြင်း
• နှစ်နှစ်ခြိုက်ခြိုက် အိပ်မပျော်ခြင်း
  
• အပြုအမူ ပြောင်းလဲမှုများ သို့မဟုတ် စိတ်ခံစားမှု တက်လိုက်ကျလိုက်ဖြစ်ခြင်းများ
  
• အာရုံစူးစိုက်၍မရခြင်း
  
• ကိုယ်လက်လှုပ်ရှားမှုများတွင် စိတ်ဝင်စားမှု နည်းပါးခြင်း
  
• ရောဂါများ ပျံ့နှံ့သွားမည် သို့မဟုတ် ပြန်လည်ဖြစ်ပွားမည်ကို ကြောက်ရွံ့ခြင်း

စကန်ဖတ်စစ်ဆေးစမ်းသပ်ခြင်းနှင့် ဆက်နွှယ်သော စိုးရိမ်သောကကို ကိုင်တွယ်ဖြေရှင်းရန် ဗျူဟာများ

လူများသည် စိုးရိမ်ပူပန်မှုကို မတူညီစွာ ခံစားရသကဲ့သို့၊ ၎င်းတို့၏ ကိုင်တွယ်ဖြေရှင်းပုံများမှာလည်း ကွဲပြားကြပါသည်။ အောက်ဖော်ပြပါတို့မှာ စစ်ဆေးမှုရလဒ်များကို စောင့်ဆိုင်းနေစဉ်အတွင်း စိုးရိမ်ပူပန်မှုကို ကိုင်တွယ်ဖြေရှင်းရန်အတွက် နည်းဗျူဟာအချို့ ဖြစ်ပါသည်။  

• သင်နှစ်သက်သည့် လှုပ်ရှားမှုများဖြင့် အာရုံလွှဲခြင်း-  ပျော်စရာတစ်ခုခုကို ပြုလုပ်ခြင်းသည် သင့်အာရုံကို အခြားနေရာသို့ လွှဲပြောင်းစေပါသည်။
• လေ့ကျင့်ခန်းလုပ်ခြင်း-  လေ့ကျင့်ခန်းလုပ်ခြင်းသည် စိတ်ဖိစီးမှုနှင့် စိုးရိမ်ပူပန်မှုများကို လျှော့ချရာတွင် အထောက်အကူပြုကြောင်းကို လေ့လာမှုများစွာက ဖော်ပြခဲ့ပါသည်။
• အပန်းဖြေခြင်းဆိုင်ရာ နည်းစနစ်များ-  အသက်ပြင်းပြင်းရှူခြင်း၊ အပန်းပြေစေသည့်တေးဂီတ နားထောင်ခြင်း၊ အမြင်အာရုံဖြင့် မြင်ယောင်ကြည့်ခြင်း၊ ယောဂကျင့်ခြင်း၊ တရားထိုင်ခြင်း၊ နှိပ်နယ်ခြင်း သို့မဟုတ် ကိုယ်လက်ဆန့်ထုတ်လေ့ကျင့်ခန်ပြုလုပ်ခြင်းတို့ကို စမ်းကြည့်ပါ။
• စိုးရိမ်ပူပန်မှုကို အသိအမှတ်ပြုပြီး လက်ခံပါ-  အများအားဖြင့် သင်၏ခံစားချက်များကို ရိုးရှင်းစွာဖြင့် ဖော်ပြခြင်းသည် ၎င်းတို့ကို စီမံခန့်ခွဲရာတွင် ကူညီပေးနိုင်ပါသည်။ စကန်ဖတ်စစ်ဆေးစမ်းသပ်ခြင်းဆိုင်ရာ စိုးရိမ်သောကဖြစ်ခြင်းသည် ပုံမှန်ဖြစ်ကြောင်းကို သင့်ကိုယ်သင် သို့မဟုတ် သင့်ကလေးကို သတိပေးပါ။
• လူမှုရေးဆိုင်ရာ အထောက်အပံ့ကို ရှာဖွေပါ- အခြားသူများနှင့် စကားပြောဆိုခြင်းသည် အထောက်အကူ ဖြစ်စေနိုင်ပါသည်။ စစ်ဆေးမှုဆိုင်ရာ စိုးရိမ်စိတ်နှင့် ပတ်သက်၍ တိုင်ပင်ဆွေးနွေးရန် ပံ့ပိုးပေးသော မိသားစုဝင်များနှင့် သူငယ်ချင်းများကို ရှာဖွေပါ။ စစ်ဆေးမှုများအတွက် သို့မဟုတ် ရလဒ်များ ရရှိသည့်အခါတွင် သင်နှင့်အတူ တစ်စုံတစ်ဦးအတူ ရှိနေခြင်းသည် အထောက်အကူဖြစ်စေနိုင်ပါသည်။
• ကြိုတင်စီစဉ်ပါ-  စိတ်ဖိစီးမှုအနည်းဆုံးအချိန်တွင် စကင်န်စစ်ဆေးခြင်း သို့မဟုတ် ဆေးဘက်ဆိုင်ရာစစ်ဆေးမှုများကို ပြုလုပ်ရန် အချိန်ဇယားဆွဲပါ။ စစ်ဆေးမှုများ မပြုလုပ်မီ၊ ပြုလုပ်နေစဉ်နှင့် ပြုလုပ်ပြီးနောက်တွင် သင်အသုံးပြုမည့် ရင်ဆိုင်ဖြေရှင်းမှုဆိုင်ရာ ကိရိယာများ သို့မဟုတ် အရင်းအမြစ်များကို ရှာဖွေဖော်ထုတ်ပါ။ စစ်ဆေးမှုများပြုလုပ်ပြီးနောက်တွင် ပျော်ရွှင်ဖွယ်ရာ တစ်စုံတစ်ခုကို ပြုလုပ်ရန်အတွက် စီစဉ်ပါ။
• ရလဒ်များအတွက် ပြင်ဆင်ထားပါ-  ရလဒ်များကို မည်သည့်အချိန်တွင် မည်သည့်နည်းဖြင့် ရရှိမည်ဖြစ်ကြောင်းကို သိရှိပါစေ။ အပြုသဘောဆောင်နေပါ၊ သို့သော် ရလဒ်ဆိုးများဖြစ်နိုင်ခြေအတွက် အစီအစဉ်များ ရေးဆွဲပါ။ စောင့်ဆိုင်းနေရခြင်းသည် တစ်စုံတစ်ဦးအနေဖြင့် အခြေအနေတစ်ခုကို ထိန်းချုပ်နိုင်စွမ်းမရှိဟု ခံစားရစေနိုင်ပါသည်။ အစီအစဉ်တစ်ခုကို ပြုလုပ်ခြင်းသည် ထိန်းချုပ်နိုင်စွမ်းရှိသည်ဟုသော ခံစာချက်ကို ပေးစွမ်းနိုင်ပါသည်။
• အခြားသူများကို ကူညီပါ-  အကူအညီလိုအပ်နေသူများကို ကူညီပေးခြင်းသည် စိတ်အာရုံကို စိတ်ဖိစီးမှုမှ တခြားသို့ ပြောင်းရွှေ့ပေးနိုင်ပါသည်။

စိုးရိမ်ပူပန်မှုများအတွက် အကူအညီကို မည်သည့်အချိန်တွင် ရယူရမည်နည်း 

တစ်ခါတစ်ရံတွင် စိုးရိမ်ပူပန်မှုသည် နေ့စဉ်ဘဝနှင့် လုပ်ဆောင်ချက်များကို လွှမ်းမိုး၍ အနှောင့်အယှက် ဖြစ်စေနိုင်ပါသည်။ အကယ်၍ သင် သို့မဟုတ် သင့်ကလေး၏ စိုးရိမ်ပူပန်မှုနှင့် ပတ်သက်၍ ပူပန်မှုများရှိပါက သင်၏စောင့်ရှောက်မှုအဖွဲ့နှင့် တိုင်ပင်ဆွေးနွေးပါ။ စိတ်ပညာရှင်၊ လူမှုရေးဝန်ထမ်း၊ ဘုန်းတော်ကြီး သို့မဟုတ် ကလေးဘဝအထူးကုပညာရှင်တစ်ဦးသည် စိတ်ခံစားမှုဆိုင်ရာကျန်းမာရေးအတွက် ပံ့ပိုးမှုနှင့် အရင်းအမြစ်များကို ပံ့ပိုးပေးနိုင်ပါသည်။

စိတ်ပညာနှင့် စိတ်ကျန်းမာရေးဆိုင်ရာ ဝန်ဆောင်မှုများအကြောင်း နောက်ထပ်အချက်အလက်များကို ရှာဖွေပါ။

သင်၏ ကျန်းမာရေး စောင့်ရှောက်မှုအဖွဲ့ကို မေးရန် မေးခွန်းများ  

• ကျွန်ုပ်သည် စစ်ဆေးမှုရလဒ်များအတွက် ကျွန်ုပ်၏ကလေးကို မည်သို့ပြင်ဆင်ပေးနိုင်မည်နည်း။
• စစ်ဆေးမှုရလဒ်များသည် မည်မျှကြာနိုင်သနည်း။
• ကျွန်ုပ်တို့သည် ရလဒ်များအားလုံးကို တစ်ပြိုင်နက်တည်း ရရှိမည်လား။
• ကျွန်ုပ်တို့သည် စစ်ဆေးမှုရလဒ်များကို မည်သို့ ရရှိမည်နည်း။
• စစ်ဆေးမှုရလဒ်များရရှိပြီးနောက် ကျွန်ုပ်တို့၏ နောက်ထပ်ပြုလုပ်ရမည့်အဆင့်များမှာ အဘယ်နည်း။
• ကျွန်ုပ်တို့သည် အထောက်အပံ့ကို လိုအပ်ပါက ရရှိနိုင်သည့် အထောက်အပံ့အရင်းအမြစ်များမှာ အဘယ်နည်း။

ဆက်စပ်အကြောင်းအရာများ