ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာ

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာဆိုသည်မှာ အဘယ်နည်း။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာဆိုသည်မှာ မျိုးရိုးဗီဇတစ်ခုအတွင်း သက်ရောက်မှုဖြစ်စေသည့် အပြောင်းအလဲ (မျိုးရိုးဗီဇပြောင်းလဲမှု) ဖြစ်သည်။ အုပ်စုတစ်ခု သွေးနီဥဆဲလ်များအတွင်း ဟေမိုဂလိုဘင် ထုတ်လုပ်ပေးသည့် မျိုးရိုးဗီဇတွင် ပြောင်းလဲမှုတစ်ခု ဖြစ်ပေါ်နေခြင်းကို ဆိုလိုသည်သွေးနီဥဆဲလ် အားလုံးတွင် ဟေမိုဂလိုဘင် ပါဝင်သည်။ ဟေမိုဂလိုဘင် သည် အဆုတ်မှ ခန္ဓာကိုယ်အနှံ့အပြားသို့ အောက်ဆီဂျင် သယ်ဆောင်ပေးသည့် ပရိုတင်းတစ်မျိုး ဖြစ်သည်။

ပုံမှန်ဟေမိုဂလိုဘင် ရှိသူများတွင် ဟေမိုဂလိုဘင် အေ အမျိုးအစား တစ်ခုတည်းသာ ရှိသည်။ ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိသူများတွင်မူ ၎င်းတို့၏ သွေးနီဥဆဲလ်များထဲ၌ ဟေမိုဂလိုဘင် အေ နှင့် ဟေမိုဂလိုဘင် အီး နှစ်မျိုးလုံး ရှိနေတတ်သည်။

သယ်ဆောင်သူလက္ခဏာသည် ရောဂါဖြစ်ပွားခြင်းနှင့် ကွဲပြားပါသည်

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိသူအများစုတွင် ဖျားနာမှုဆိုင်ရာ လက္ခဏာများ သို့မဟုတ် ရောဂါလက္ခဏာများ ပြသလေ့မရှိပါ။ ဤလက္ခဏာသည် ပုံမှန်အားဖြင့် မည်သည့်ကျန်းမာရေးပြဿနာမျှ မဖြစ်စေပါ။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိသူများတွင် ဟေမိုဂလိုဘင် အီး ရောဂါ (Hemoglobin E Disease) သို့မဟုတ် ဟေမိုဂလိုဘင် အီး/ဘီတာ မျိုးရိုးလိုက် သွေးနီဥချို့တဲ့သော သွေးအားနည်းရောဂါ (Hemoglobin E/Beta Thalassemia) မရှိပါ။ ၎င်းတို့သည် နောင်တစ်ချိန်တွင်လည်း ထိုအခြေအနေများ မဖြစ်ပွားနိုင်ပါ။ သို့သော်လည်း ၎င်းတို့သည် ဤရောဂါများအတွက် မျိုးရိုးဗီဇများကို ၎င်းတို့၏ သားသမီးများထံ လက်ဆင့်ကမ်း ပေးနိုင်ပါသည်။

• ဟေမိုဂလိုဘင် အီး ရောဂါ (Hemoglobin E Disease) ဆိုသည်မှာ သွေးနီဥဆဲလ်များထဲတွင် ဟေမိုဂလိုဘင် အီး အများဆုံး ပါဝင်နေစေသည့် မျိုးရိုးလိုက်သော သွေးဆိုင်ရာ ရောဂါ (Blood Disorder) တစ်ခု ဖြစ်သည်။ ဟေမိုဂလိုဘင် အီး အလွန်အမင်း များပြားနေခြင်းသည် သင့်ခန္ဓာကိုယ်အတွင်းရှိ သွေးနီဥဆဲလ် အရေအတွက်နှင့် အရွယ်အစားကို လျော့နည်းစေကာ အပျော့စား သွေးအားနည်းရောဂါ (Mild Anemia) ကို ဖြစ်ပွားစေနိုင်သည်။ ဟေမိုဂလိုဘင် အီး ရောဂါ (Hemoglobin E Disease) သည် ပုံစံမမှန်သော သွေးဆဲလ်ရောဂါ (Sickle Cell Disease) အမျိုးအစားတစ်ခု မဟုတ်သည့်အပြင် ပုံမှန်အားဖြင့် ပြင်းထန်သော ကျန်းမာရေးပြဿနာများကို မဖြစ်ပွားစေပါ။
• ဟေမိုဂလိုဘင် အီး/ဘီတာ မျိုးရိုးလိုက် သွေးနီဥချို့တဲ့သော သွေးအားနည်းရောဂါ (Hemoglobin E/Beta Thalassemia) ဆိုသည်မှာ ခန္ဓာကိုယ်မှ သွေးနီဥဆဲလ် ထုတ်လုပ်မှုနှင့် ဟေမိုဂလိုဘင် ထုတ်လုပ်မှုကို ပိုမိုနည်းပါးသွားစေသည့် မျိုးရိုးလိုက်သော သွေးဆိုင်ရာ ရောဂါတစ်ခု ဖြစ်သည်။ ၎င်းသည် ပြင်းထန်သော ကျန်းမာရေးပြဿနာများကို ဖြစ်ပွားစေနိုင်သည့် တစ်သက်တာ ခံစားရမည့် ရောဂါဝေဒနာတစ်ခု ဖြစ်သည်။ ဤရောဂါရှိသူများသည် ဆေးဝါးကုသမှု ခံယူရန် လိုအပ်သည်။
• ပုံစံမမှန်သော ဟေမိုဂလိုဘင် အီး ရောဂါ (Sickle Hemoglobin E Disease) (HbSE) သည် ပုံစံမမှန်သော သွေးဆဲလ်ရောဂါ (Sickle Cell Disease) အမျိုးအစားတစ်ခု ဖြစ်သည်။ ဤရောဂါအခြေအနေရှိသူများသည် ၎င်းတို့၏ သွေးနီဥဆဲလ်များထဲတွင် ဟေမိုဂလိုဘင် အက်စ် နှင့် ဟေမိုဂလိုဘင် အီး နှစ်မျိုးလုံး ပါဝင်နေတတ်သည်။ အချို့သော အခြေအနေများအောက်တွင် အဆိုပါ သွေးနီဥဆဲလ်များသည် တံစဉ်ပုံ (သို့မဟုတ် ငှက်ပျောသီးကဲ့သို့) ပုံသဏ္ဌာန် ပြောင်းလဲသွားပြီး စေးကပ်ကာ မာကျောသွားတတ်သည်။ ပုံစံမမှန်သောဆဲလ်များသည် အစုလိုက်အပြုံလိုက် ဖြစ်သွားနိုင်ပြီး သွေးကြောများကို ပိတ်ဆို့စေနိုင်သည်။ ၎င်းက ဆဲလ်များ ပျက်စီးခြင်းနှင့် နာကျင်ခြင်းတို့ကို ဖြစ်စေနိုင်သည်။ ပုံစံမမှန်သော ဟေမိုဂလိုဘင် အီး ရောဂါ (Sickle Hemoglobin E Disease) သည် စဉ်ဆက်မပြတ် ဆေးဝါးစောင့်ရှောက်မှု ခံယူရန် လိုအပ်ပါသည်။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာဖြစ်ပွားနိုင်ခြေရှိသော အကြောင်းရင်းများ

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာသည် ဖြစ်ခဲပါသည်။ ၎င်းသည် အရှေ့တောင်အာရှ၊ အာဖရိက၊ အိန္ဒိယ၊ အရှေ့အလယ်ပိုင်း သို့မဟုတ် မြေထဲပင်လယ်ဒေသတို့မှ ဆင်းသက်လာသူများတွင် ပိုမိုအဖြစ်များသည်။ သို့သော်လည်း မည်သည့်လူမျိုး သို့မဟုတ် မည်သည့်ဆင်းသက်ရာ မျိုးရိုးမဆို ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိနေနိုင်ခြေ ရှိပါသည်။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာအတွက် စစ်ဆေးမှုများ

သွေးစစ်ဆေးခြင်းဖြင့် သင့်တွင် ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိ၊ မရှိ သိရှိနိုင်သည်။ ၎င်းစစ်ဆေးမှုများကို မွေးကင်းစကလေးငယ်များ ပုံမှန်ရောဂါရှာဖွေစစ်ဆေးခြင်း၏ အစိတ်အပိုင်းတစ်ခုအနေဖြင့် မကြာခဏ ပြုလုပ်လေ့ရှိသည်။ သင့်မိသားစုဝင်တစ်ဦးဦးတွင် ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိနေပါကလည်း သင့်ဆရာဝန်က အဆိုပါစစ်ဆေးမှုကို ပြုလုပ်ရန် အကြံပြုနိုင်ပါသည်။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာ မျိုးရိုးလိုက်ပုံ 

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာသည် မိသားစုမျိုးရိုးအလိုက် ဖြစ်ပွားတတ်သည်။ မျက်လုံးအရောင် သို့မဟုတ် ဆံပင်အရောင်ကဲ့သို့ပင် ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာအတွက် မျိုးရိုးဗီဇများသည် မိဘများထံမှ သားသမီးများထံသို့ မျိုးရိုးလိုက်ခြင်း သို့မဟုတ် လက်ဆင့်ကမ်းခြင်း ဖြစ်သည်။

ဟေမိုဂလိုဘင် အီး ပုံစံမျိုးကွဲ သယ်ဆောင်သူ လက္ခဏာရှိသော မိဘများသည် ဟေမိုဂလိုဘင် အီး ရောဂါ (Hemoglobin E Disease) သို့မဟုတ် ဟေမိုဂလိုဘင် အီး/ဘီတာ မျိုးရိုးလိုက် သွေးနီဥချို့တဲ့သော သွေးအားနည်းရောဂါ (Hemoglobin E/Beta Thalassemia) ရှိသည့် ကလေး မွေးဖွားလာနိုင်ပါသည်။ ကလေးတစ်ဦးတွင် အဆိုပါ သွေးဆိုင်ရာ ရောဂါ ပါလာခြင်း ရှိ၊ မရှိမှာ မိဘနှစ်ပါးစလုံးထံမှ ရရှိသော မျိုးရိုးဗီဇများအပေါ်တွင် မူတည်သည်။

သယ်ဆောင်သူလက္ခဏာ အခြေအနေများအကြောင်း ပိုမိုလေ့လာရန် သင့်ဆရာဝန် သို့မဟုတ် မျိုးရိုးဗီဇဆိုင်ရာ အကြံပေးပုဂ္ဂိုလ်နှင့် ဆွေးနွေးပါ။ သင့်ပြုစုကုသရေးအဖွဲ့သည် သင့်ကျန်းမာရေးအခြေအနေနှင့် သင့်ကလေး၏ သယ်ဆောင်သူလက္ခဏာ အခြေအနေအကြောင်း ပိုမိုအသေးစိတ် ပြောပြနိုင်ပါသည်။

ဆက်စပ်အကြောင်းအရာများ