အရိုးတွင်းခြင်ဆီကို စုပ်ယူခြင်းနှင့် တစ်ရှူးစစ်ဆေးခြင်း

အရိုးတွင်းခြင်ဆီကို စုပ်ယူခြင်းနှင့် တစ်ရှူးစစ်ဆေးခြင်းဆိုသည်မှာ အဘယ်နည်း။

အရိုးတွင်းခြင်ဆီကို စုပ်ယူ၍ တစ်ရှူးစစ်ဆေးခြင်းသည် စစ်ဆေးရန်အတွက် ရိုးတွင်းခြင်ဆီနမူနာများကို ယူရန်အသုံးပြုသည့် လုပ်ထုံးလုပ်နည်းများဖြစ်ပါသည်။ အရိုးတွင်းခြင်ဆီသည် အရိုးအများစုထဲတွင်ရှိသည့် နူးညံ့ပြီး ပျော့ပျောင်းသော တစ်ရှူးဖြစ်ပါသည်။

အရိုးတွင်းခြင်ဆီ သည် သွေးဆဲလ်များထုတ်လုပ်ပေးသည့်စက်ရုံကဲ့သို့ လုပ်ဆောင်ပါသည်။ ၎င်းသည် သွေးကို ဖွဲ့စည်းပေးသည့် (hematopoietic) ပင်မဆဲလ်များကို ဖန်တီးပေးပြီး အောက်ပါတို့အဖြစ် ကြီးထွားဖွံ့ဖြိုးလာစေပါသည်-

• သွေးနီဥဆဲလ်များ (အောက်ဆီဂျင်ကို သယ်ဆောင်သော)
• သွေးဥမွှားများ (သွေးခဲခြင်းကို ကူညီပေးသော)
• သွေးဖြူဥဆဲလ်များ (ကူးစက်ရောဂါကို တိုက်ခိုက်သော)

အရိုးတွင်းခြင်ဆီတွင် အရည်အပိုင်းနှင့် ပိုမိုအစိုင်အခဲဖြစ်သော အပိုင်းတို့ ပါဝင်ပါသည်။ အရိုးတွင်းခြင်ဆီ စုပ်ယူခြင်းတွင်၊ ဆေးထိုးအပ်နှင့် တွဲတပ်ထားသည့် သေးငယ်၍အခေါင်းပါသောအပ်ကို အသုံးပြု၍ အရည်အရိုးတွင်းခြင်ဆီနမူနာအနည်းငယ်ကို စုပ်ယူပါသည်။ ရိုးတွင်းခြင်ဆီ တစ်ရှူးစစ်ဆေးခြင်းတွင် စောင့်ရှောက်မှုအဖွဲ့သည် ရိုးတွင်းခြင်ဆီပါရှိသည့် အရိုးတစ်ရှူးအပိုင်းအစငယ်ကို ဖယ်ရှားရန်အတွက် ထိုတစ်နေရာတည်းသို့ပင် ပို၍ကြီးသောအပ်တစ်ချောင်းကို ထိုးသွင်းပါလိမ့်မည်။

လူနာအများစုသည် အရိုးတွင်းခြင်ဆီ စုပ်ယူခြင်းနှင့် တစ်ရှူးစစ်ဆေးခြင်းတို့ကို တစ်ပြိုင်နက်တည်း လုပ်ဆောင်ရလေ့ရှိသည်။

အရိုးတွင်းခြင်ဆီကို စုပ်ယူ၍ တစ်ရှူးစစ်ဆေးခြင်း၏ အကျိုးကျေးဇူးများ

အရိုးတွင်းခြင်ဆီ စစ်ဆေးမှုများကို အောက်ပါတို့အတွက် အသုံးပြုနိုင်ပါသည်-

• ရိုးတွင်းခြင်ဆီသည် လုံလောက်သော သွေးဥများ ထုတ်လုပ်နေခြင်း ရှိ၊ မရှိကို သိရှိရန်
• သွေးရောဂါများ၊ ကင်ဆာများနှင့် ရောဂါပိုးဝင်ခြင်းကဲ့သို့သော ဆေးဘက်ဆိုင်ရာ အခြေအနေအချို့ကို ရောဂါရှာဖွေဖော်ထုတ်ရန်
• ကင်ဆာသည် ခန္ဓာကိုယ်၏ အခြားအစိတ်အပိုင်းများမှ အရိုးတွင်းခြင်ဆီသို့ ပျံ့နှံ့သွားခြင်း ရှိ၊ မရှိကို ရှာဖွေရန်
• ရိုးတွင်းခြင်ဆီသည် ကုသမှုကို တုံ့ပြန်ခြင်း ရှိ၊ မရှိ သိရှိရန်
  

အရိုးတွင်းခြင်ဆီကို စုပ်ယူ၍ တစ်ရှူးစစ်ဆေးခြင်းပြုလုပ်စဉ်တွင် မျှော်လင့်ထားရမည့်အချက်များ

သင့်ကလေးသည် လုပ်ထုံးလုပ်နည်းကို ပြုလုပ်စဉ်အတွင်း မေ့ဆေး သို့မဟုတ် စိတ်ငြိမ်ဆေးများ ပေးခြင်းကို ခံရနိုင်ပါသည်။ စစ်ဆေးမှုမပြုလုပ်မီ သင့်ကလေးသည် အစာရှောင်ခြင်းဆိုင်ရာ လမ်းညွှန်ချက်များ သို့မဟုတ် စားသောက်ခြင်းဆိုင်ရာ စည်းမျဉ်းများကို သေချာလိုက်နာဆောင်ရွက်စေရန် ပြုလုပ်ပါ။  

 အရိုးတွင်းခြင်ဆီကို စုပ်ယူ၍ တစ်ရှူးစစ်ဆေးခြင်း၏ အဆင့်များတွင် အများအားဖြင့် အောက်ပါတို့ ပါဝင်ပါသည်-

1. စောင့်ရှောက်မှုအဖွဲ့ဝင်တစ်ဦးသည် လုပ်ထုံးလုပ်နည်းပြုလုပ်မည့်နေရာတွင် နေရာလေးတစ်ခုကိုသာ ထုံစေသောထုံဆေး သို့မဟုတ် ထုံစေသည့်ဆေးကို ခရင်မ်ဖြင့် သို့မဟုတ် ထိုးဆေးဖြင့် ပေးနိုင်ပါသည်။
   
2. သင့်ကလေးသည် အများအားဖြင့် ဘေးတစ်စောင်းလှဲနေရပါလိမ့်မည်။
   
3. လုပ်ထုံးလုပ်နည်းကို လုပ်ဆောင်မည့်သူသည် စစ်ဆေးမှုအတွက် မှန်ကန်သည့်နေရာကိုရှာဖွေရန် သင့်ကလေး၏ ကျောရိုးအောက်ပိုင်းကို စမ်းသပ်ကြည့်မည် ဖြစ်ပါသည်။
   
4. ထိုနေရာကို ပိုးသတ်ဆေးရည်ဖြင့် သန့်ရှင်းရေးပြုလုပ်ပါမည်။ အရည်သည် အေးအေးလေးဖြစ်ပါသည်။ ထို့နောက် ကျန်းမာရေးစောင့်ရှောက်မှုပေးသူသည် ဖော်ပြမည့် အရေပြား၏သေးငယ်သော နေရာတနေရာကိုသာချန်ထားပြီး၊ ပလတ်စတစ်တဘက်များကို နောက်ကြောပေါ်တွင် နေရာချထားနိုင်ပါသည်။
   
5. စောင့်ရှောက်မှုအဖွဲ့ဝင်သည် ဆေးထိုးပြွန်နှင့် တွဲတပ်ထားသည့် အပ်ကို ထိုးသွင်းပါမည်။ အကယ်၍ သင့်ကလေးသည် နိုးနေပါက သင့်ကလေးသည် အနည်းငယ်တွန်းခြင်းကဲ့သို့ ခံစားရပါလိမ့်မည်။
   
6. စောင့်ရှောက်မှုအဖွဲ့ဝင်သည် အရည်ရိုးတွင်းခြင်ဆီအချို့ကို (သွေးနှင့် ဆင်တူသည်) ဆေးထိုးအပ်ထဲသို့ စုပ်ယူပါမည်။ အကယ်၍ သင့်ကလေးသည် နိုးနေပါက ခဏတာ ခပ်စူးစူးနာကျင်မှုကို ခံစားရနိုင်ပါသည်။
   
7. နမူနာများကို ပိုမို၍လိုအပ်ပါက စောင့်ရှောက်မှုအဖွဲ့သည် ဆေးထိုးပြွန် 1 ခုထက်ပို၍ တပ်ဆင်ခြင်းသည် ပုံမှန်ဖြစ်ပါသည်။ သင့်ကလေး၏ ခန္ဓာကိုယ်သည် ဖယ်ရှားလိုက်သည့် အရည်ပမာဏအနည်းငယ်ကို လျင်မြန်စွာ ပြန်လည်ဖြည့်တင်းပေးမည် ဖြစ်ပါသည်။
   
8. စောင့်ရှောက်မှုအဖွဲ့ဝင်သည် အပ်ကိုထုတ်၍ နေရာကို သန့်ရှင်းရေးပြုလုပ်ပေးကာ ပတ်တီးစည်းပေမည် ဖြစ်ပါသည်။
   

ပုံမှန်အားဖြင့် တင်ပဆုံရိုးမှ နမူနာကို ထုတ်ယူလေ့ရှိပါသည်။ စုပ်ယူခြင်းနှင့် အသားစယူ၍ စစ်ဆေးခြင်း နှစ်ခုစလုံးကို လုပ်ဆောင်ပါက တစ်ခုစီအတွက် အပ်တစ်ချောင်းစီကို အသုံးပြုပါမည်။ အသားစယူခြင်းကို ပုံမှန်အားဖြင့် အရိုးတွင်းခြင်ဆီ စုပ်ထုတ်ခြင်း မပြုလုပ်မီ သို့မဟုတ် ပြုလုပ်ပြီးနောက် လုပ်ဆောင်လေ့ရှိသည်။ နှစ်မျိုးစလုံးအတွက် စုစုပေါင်းကြာချိန်မှာ ပုံမှန်အားဖြင့် 30 မိနစ်ခန့် ဖြစ်သည်။

အရိုးတွင်းခြင်ဆီ စုပ်ထုတ်ခြင်းနှင့် အသားစယူခြင်း ပြုလုပ်ပြီးနောက်

လုပ်ထုံးလုပ်နည်း ပြီးဆုံးသွားသည့်အခါ သင့်ကလေး၏ ပြုစုကုသမှုအဖွဲ့ဝင်တစ်ဦးက လုပ်ထုံးလုပ်နည်းအကြောင်းကို သင့်အား လာရောက် အသိပေး ပြောကြားပါလိမ့်မည်။ အကယ်၍ သင့်ကလေးကို အထွေထွေမေ့ဆေး သို့မဟုတ် အိပ်ဆေး ပေးထားခဲ့လျှင် ၎င်းတို့သည် ပြန်လည်နာလန်ထူသည့်နေရာတွင် အချိန်အနည်းငယ် စောင့်ဆိုင်းရမည် ဖြစ်သည်။

သင့်ကလေးသည် အသားစယူထားသည့်နေရာတွင် နာကျင်ကိုက်ခဲမှု ရှိနိုင်ပါသည်။ လူနာအများစုသည် 24 နာရီကြာပြီးနောက် ပုံမှန်လုပ်ဆောင်မှုများကို ပြန်လည်လုပ်ဆောင်နိုင်သည်။

သင့်ပြုစုကုသရေးအဖွဲ့မှ အောက်ပါအချက်များကို အသိပေးပါလိမ့်မည်-

• အပ်စိုက်ထားခဲ့သည့် နေရာအား မည်သို့ ပြုစုကုသရမည်နည်း
• လုပ်ထုံးလုပ်နည်းအပြီးတွင် ဖြစ်ပေါ်လာမည့် နာကျင်ကိုက်ခဲခြင်း သို့မဟုတ် မသက်မသာဖြစ်ခြင်းများကို သက်သာစေမည့် နည်းလမ်းများ
• သင့်ကလေးသည် မည်သည့်လှုပ်ရှားမှုများကို ရှောင်ကြဉ်ရမည်နည်းနှင့် မည်မျှအထိ ရှောင်ကြဉ်ရမည်နည်း

အကယ်၍ အောက်ပါတို့အပါအဝင် ပြဿနာတစ်စုံတစ်ရာ သို့မဟုတ် ပိုးဝင်သည့် လက္ခဏာများကို သတိပြုမိပါက သင့်ပြုစုကုသရေးအဖွဲ့ထံသို့ ဆက်သွယ်ပါ-

• ချမ်းတုန်ခြင်း သို့မဟုတ် အဖျားတက်ခြင်း
• အပ်စိုက်ထားခဲ့သည့်နေရာမှ သွေးဆက်တိုက်ထွက်နေခြင်း
• အပ်စိုက်ထားခဲ့သည့်နေရာတွင် နီမြန်းခြင်း၊ ရောင်ရမ်းခြင်း၊ အရည်ထွက်ခြင်း၊ သို့မဟုတ် အနံ့ဆိုးထွက်ခြင်း

အရိုးတွင်းခြင်ဆီ နမူနာများကို စစ်ဆေးရန်အတွက် ဓာတ်ခွဲခန်းသို့ ပေးပို့လိမ့်မည်။ သင့်ပြုစုကုသရေးအဖွဲ့ဝင်တစ်ဦးက စစ်ဆေးမှုရလဒ်များကို သင်နှင့်အတူ ဆွေးနွေးတိုင်ပင်ပါလိမ့်မည်။

အရိုးတွင်းခြင်ဆီ စုပ်ထုတ်ခြင်းနှင့် အသားစယူခြင်းတို့တွင် ဖြစ်နိုင်ခြေရှိသော စိုးရိမ်ရမှုများ

သင့်ပြုစုကုသရေးအဖွဲ့သည် လုပ်ထုံးလုပ်နည်းကို တတ်နိုင်သမျှ ဘေးအကင်းဆုံးဖြစ်အောင် ကြိုးပမ်းဆောင်ရွက်ပါသည်။ အရိုးတွင်းခြင်ဆီ စုပ်ထုတ်ခြင်းနှင့် အသားစယူခြင်းတို့တွင် ဖြစ်နိုင်ခြေရှိသော စိုးရိမ်ရမှုများ သို့မဟုတ် နောက်ဆက်တွဲပြဿနာများတွင် အောက်ပါတို့ ပါဝင်သည်-

• အပ်စိုက်သည့်နေရာတွင် သွေးထွက်ခြင်း
• ရောဂါပိုးဝင်ခြင်း
• နာကျင်ခြင်း သို့မဟုတ် မသက်မသာဖြစ်ခြင်း
• အညိုအမည်းစွဲခြင်း
• အနီးနားရှိ သွေးကြောများ သို့မဟုတ် အာရုံကြောများ ထိခိုက်ပျက်စီးခြင်း
• မေ့ဆေး သို့မဟုတ် အခြားဆေးဝါးများနှင့် ဓာတ်မတည့်မှုဖြစ်ခြင်း
• လုံလောက်သော နမူနာပမာဏကို မရရှိခြင်း။ ဤကဲ့သို့ဖြစ်ပါက အခြားလုပ်ထုံးလုပ်နည်းတစ်ခုကို ထပ်မံလုပ်ဆောင်ရန် လိုအပ်ပါသည်။

စိုးရိမ်ပူပန်မှု တစ်စုံတစ်ရာရှိပါက သင့်ပြုစုကုသရေးအဖွဲ့နှင့် ဆွေးနွေးပါ။

သင်၏ စောင့်ရှောက်မှုအဖွဲ့ကို မေးရန် မေးခွန်းများ

• ကျွန်ုပ်ကလေးသည် အရိုးတွင်းခြင်ဆီ အသားစယူခြင်း သို့မဟုတ် စုပ်ထုတ်ခြင်းကို ဘာကြောင့် ပြုလုပ်ရန် လိုအပ်ပါသလဲ။
• ဤလုပ်ထုံးလုပ်နည်းအတွက် ကျွန်ုပ်ကလေးကို အထွေထွေမေ့ဆေး သို့မဟုတ် အိပ်ဆေး ပေးမှာလား။
• လုပ်ထုံးလုပ်နည်းက ဘယ်လောက်ကြာမှာလဲ။
• အရိုးတွင်းခြင်ဆီ စစ်ဆေးနေစဉ်အတွင်း သို့မဟုတ် စစ်ဆေးပြီးနောက် ကျွန်ုပ်၏ကလေးက နာကျင်မှု ခံစားရမှာလား။
• အကယ်၍ နောက်ပိုင်းတွင် မေးခွန်းများ သို့မဟုတ် ပြဿနာများရှိလာပါက ကျွန်ုပ်တို့ ဘယ်သူ့ကို ဆက်သွယ်ရမလဲ။
• စစ်ဆေးမှုရလဒ်တွေကို ဘယ်လိုနဲ့ ဘယ်အချိန်မှာ သိရမလဲ။

ဆက်စပ်အကြောင်းအရာများ