အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ဆိုသည်မှာ အဘယ်နည်း။

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ဆိုသည်မှာ လူတစ်ဦးအား အစားအစာမဟုတ်သော ပစ္စည်းများကို အလွန်အမင်း တောင့်တပြီး စားသုံးမိစေသည့် အစာစားခြင်းဆိုင်ရာ ဝေဒနာတစ်ခု ဖြစ်ပါသည်။ အဆိုပါ ပစ္စည်းများတွင် ရွှံ့မြေ၊ ရွှံ့ (clay)၊ မြေဖြူခဲ၊ ဆံပင်၊ စာရွက်၊ ကတ်ထူပြား၊ မုန့်ဖုတ်ဆော်ဒါ၊ ဆပ်ပြာ၊ ရေခဲ သို့မဟုတ် ကွာကျနေသော ဆေးသုတ်အဖတ်များကဲ့သို့သော အရာများ ပါဝင်နိုင်ပါသည်။ 

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) သည် ကလေးသူငယ်များနှင့် ဆယ်ကျော်သက်များ၊ ကိုယ်ဝန်ဆောင်မိခင်များအပြင် သတ်မှတ်ထားသော စိတ်ကျန်းမာရေး သို့မဟုတ် ကိုယ်ခန္ဓာကျန်းမာရေး အခြေအနေရှိသူများတွင် ပိုမိုအဖြစ်များပါသည်။ 

သင့်ကလေး စားသုံးမိသည့် ပစ္စည်းအမျိုးအစားနှင့် အဆိုပါ အပြုအမူ မည်မျှအကြိမ်ရေ ဖြစ်ပွားသည်အပေါ် မူတည်၍ အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)သည် ကျန်းမာရေးပြဿနာများကို ဖြစ်ပေါ်စေနိုင်ပါသည်။ အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ၏ နောက်ဆက်တွဲ ပြဿနာများတွင် အောက်ပါတို့ ပါဝင်ပါသည်-

• သွေးအားနည်းခြင်း
  
• ခဲဆိပ်သင့်ခြင်း
  
• ရောဂါပိုးဝင်ခြင်း
  
• ဝမ်းပျက်ခြင်း သို့မဟုတ် ဝမ်းချုပ်ခြင်း
  
• အူလမ်းကြောင်းဆိုင်ရာ ပြဿနာများ သို့မဟုတ် အူပိတ်ခြင်း
  
• အာဟာရချို့တဲ့ခြင်း
  
• သွားများ ပျက်စီးခြင်း
  

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ဖြစ်ရခြင်း၏ အကြောင်းအရင်းများ

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ဖြစ်ရခြင်း၏ အကြောင်းအရင်းကို သဲသဲကွဲကွဲ မသိရသေးသော်လည်း အချို့သော အခြေအနေများသည် သင့်ကလေးတွင် ဤဝေဒနာဖြစ်ပွားနိုင်ခြေကို တိုးမြင့်စေနိုင်ပါသည်။ ၎င်းတို့တွင် အောက်ပါတို့ ပါဝင်ပါသည်-

• ပုံစံမမှန်သော သွေးဆဲလ်ရောဂါ (Sickle Cell Disease)
  
• သံဓာတ်၊ ဇင့်ဓာတ် သို့မဟုတ် အခြားမရှိမဖြစ် လိုအပ်သော အာဟာရဓာတ်များ နည်းပါးခြင်းကဲ့သို့သော အာဟာရချို့တဲ့မှုများ
  
• ဟီမိုဂလိုဘင် နည်းပါးခြင်း
  
• အစာအာဟာရ မပြည့်ဝခြင်းနှင့် ဆာလောင်ခြင်း 
  
• အော်တစ်ဇင် သို့မဟုတ် ဉာဏ်ရည်မမှီခြင်းကဲ့သို့သော ကြီးထွားဖွံ့ဖြိုးမှုဆိုင်ရာ မစွမ်းဆောင်နိုင်မှုများ 
  
• စိုးရိမ်ပူပန်ခြင်း၊ စိတ်စွဲလွန်ရောဂါ (OCD) သို့မဟုတ် စိတ်ကွဲရောဂါ (Schizophrenia) ကဲ့သို့သော စိတ်ကျန်းမာရေး ပြဿနာများ
  
• ကိုယ်ဝန်ဆောင်ခြင်း

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) အား ရောဂါရှာဖွေခြင်း

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) လက္ခဏာများကို သတိပြုမိပါက သင့် ပြုစုကုသရေးအဖွဲ့နှင့် ဆွေးနွေးတိုင်ပင်ပါ။ အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)အဖြစ် ရောဂါရှာဖွေအတည်ပြုရန်အတွက် အဆိုပါ စားသောက်မှုအပြုအမူသည်-

• အနည်းဆုံး 1 လခန့် ကြာမြင့်နေရပါမည်။
• သင့်ကလေး၏ ဖွံ့ဖြိုးမှုအဆင့်နှင့် ပုံမှန်အားဖြင့် ကိုက်ညီမှုမရှိခြင်း။ မွေးကင်းစကလေးငယ်များနှင့် လမ်းလျှောက်တတ်စကလေးများ ပစ္စည်းများကို ပါးစပ်ထဲ ထည့်လေ့ရှိခြင်းမှာ ပုံမှန်သဘာဝ ဖြစ်ပါသည်။
• လူမှုပတ်ဝန်းကျင် သို့မဟုတ် ယဉ်ကျေးမှုအရ ပုံမှန်ထုံးစံ မဟုတ်ပါ။ အချို့သော ယဉ်ကျေးမှုများတွင် အစားအစာမဟုတ်သည့် အချို့အရာများကို စားသုံးခြင်းသည် လက်ခံထားကြသော ဓလေ့တစ်ခု ဖြစ်နိုင်ပါသည်။

အစားအစာမဟုတ်သော ပစ္စည်းများကို စားသုံးခြင်းသည် သင့်ကလေး စားသုံးမိသည့် ပစ္စည်းအမျိုးအစားပေါ် မူတည်၍ အန္တရာယ်ရှိနိုင်ပါသည်။ သင့်ပြုစုကုသရေးအဖွဲ့သည် ကျန်းမာရေးပြဿနာများကို ရှာဖွေရန် အခြားစစ်ဆေးမှုများ ပြုလုပ်နိုင်ပါသည်။ ၎င်းတို့တွင် အောက်ပါတို့ ပါဝင်ပါသည်-

• သွေးစစ်ဆေးခြင်းများ
• ဝမ်းစစ်ဆေးခြင်းများ
• ပုံရိပ်ဖော်စစ်ဆေးခြင်းများ

စိတ်ကျန်းမာရေးစောင့်ရှောက်မှုပေးသူက အစားအစာမဟုတ်သော ပစ္စည်းများကို စားသုံးသည့် အပြုအမူများသည် ကြီးထွားဖွံ့ဖြိုးမှု နှောင့်နှေးခြင်း သို့မဟုတ် စိတ်ကျန်းမာရေးပြဿနာတစ်ခုခုနှင့် ဆက်စပ်မှု ရှိ၊ မရှိ သိရှိနိုင်ရန် ဆန်းစစ်အကဲဖြတ်မှု ပြုလုပ်နိုင်ပါသည်။

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ကို ကုသခြင်း

အလွန်အမင်း တောင့်တစိတ်ဖြစ်ပေါ်ခြင်းကြောင့် သင့်ကလေးအနေဖြင့် အဆိုပါ အပြုအမူကို ရပ်တန့်ရန် ခက်ခဲနိုင်ပါသည်။ သင့်ကလေးတွင် အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ရှိနေသည်ဟု ယူဆပါက သင့်ကလေး၏ ပြုစုကုသရေးအဖွဲ့အား အသိပေးရန် အရေးကြီးပါသည်။

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)ကို ကုသရာတွင် အဆင့်အမျိုးမျိုး ပါဝင်ပါသည်။ သင့်ကလေး၏ ကုသမှုအစီအစဉ်သည် အောက်ပါအချက်များအပေါ်တွင် မူတည်ပါလိမ့်မည်- 

• စားသုံးမိသည့် အစားအစာအမျိုးအစား
• အဆိုပါ အပြုအမူ မည်မျှအကြိမ်ရေ ဖြစ်ပွားသည်ဟူသောအချက်
• အဆိုပါ အပြုအမူ မည်မျှကြာအောင် စွဲစွဲမြဲမြဲ ဖြစ်ပွားနေသည်ဟူသောအချက်  
• နောက်ခံအကြောင်းအရင်းများ သို့မဟုတ် အန္တရာယ်ရှိနိုင်သည့် အချက်များ  
• အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)ကြောင့် ဖြစ်ပွားလာသော ကျန်းမာရေးပြဿနာများ

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)အတွက် ကုသမှုများတွင် အောက်ပါတို့ ပါဝင်နိုင်ပါသည်-

• သင့်ကလေးအနေဖြင့် အပြုအမူများနှင့် အလွန်အမင်းတောင့်တစိတ်များကို စီမံခန့်ခွဲနိုင်ရန် ကူညီပေးမည့် အပြုအမူဆိုင်ရာ ကုထုံး
• သင့်ကလေးသည် အစားအစာမဟုတ်သော ပစ္စည်းများကို လက်လှမ်းမမီနိုင်စေရန် ပတ်ဝန်းကျင်ကို ပြောင်းလဲပေးခြင်း
• စိတ်ဖိစီးမှု၊ စိုးရိမ်ပူပန်မှု သို့မဟုတ် စိတ်ကျန်းမာရေးအခြေအနေများကို သင့်ကလေး ရင်ဆိုင်ကျော်လွှားနိုင်ရန် ကူညီပေးမည့် နှစ်သိမ့်ဆွေးနွေးခြင်း သို့မဟုတ် စိတ်ပညာပိုင်းဆိုင်ရာ ကုသမှု
• စားသောက်မှုအစီအစဉ်တစ်ခု ရေးဆွဲရန်နှင့် အာဟာရဆိုင်ရာ စိုးရိမ်ပူပန်မှုများကို ဖြေရှင်းရန်အတွက် အာဟာရပညာရှင်နှင့် တွေ့ဆုံခြင်း  
• အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ၏ နောက်ခံအကြောင်းအရင်းများကို ရှာဖွေရန်နှင့် ကျန်းမာရေးပြဿနာမှန်သမျှကို ကုသရန် ဆေးဘက်ဆိုင်ရာ စောင့်ရှောက်မှုပေးခြင်း  

အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) နှင့်ပတ်သက်၍ မေးခွန်းများရှိပါက သို့မဟုတ် နောက်ထပ်သိရှိလိုပါက သင့်ပြုစုကုသရေးအဖွဲ့နှင့် ဆွေးနွေးတိုင်ပင်ပါ။

သင့်ကလေး၏ စားသောက်မှုအပြုအမူများကို မှတ်တမ်းရေးမှတ်ထားခြင်းသည် အထောက်အကူပြုနိုင်ပါသည်။ သင့်ကလေး ဘာတွေစားသနည်း၊ အဆိုပါ အပြုအမူ မည်သည့်အချိန်တွင် ဖြစ်ပွားသနည်း၊ မည်မျှအထိ သို့မဟုတ် မည်မျှအကြိမ်ရေ ဖြစ်ပွားသနည်းဟူသောအချက်နှင့် ပြဿနာများ သို့မဟုတ် ဘေးထွက်ဆိုးကျိုးမှန်သမျှကို ချရေးထားပါ။

သင့်ကလေးသည် အဆိပ်အတောက်ဖြစ်စေနိုင်သော သို့မဟုတ် အန္တရာယ်ရှိစေနိုင်သော အရာတစ်ခုခုကို စားမိသွားသည်ဟု ယူဆပါက ဆေးဘက်ဆိုင်ရာ အကူအညီကို ချက်ချင်းရယူပါ။

သင်၏ စောင့်ရှောက်မှုအဖွဲ့ကို မေးရန် မေးခွန်းများ

• ကျွန်ုပ်ကလေးတွင် အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)ကို မည်သည့်အရာက ဖြစ်စေပါသနည်း။
• အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica)အတွက် ကုသမှုဆိုင်ရာ ရွေးချယ်စရာများက ဘာတွေလဲ။
• ကျွန်ုပ်ကလေးတွင် အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) နှင့် ဆက်စပ်နေသော ကျန်းမာရေးအန္တရာယ်များက ဘာတွေလဲ။
• အစားအစာ မဟုတ်သော အရာများကို စွဲလမ်းစားသောက်တတ်သော စိတ်ရောဂါ (Pica) ကို ရင်ဆိုင်နေရသော မိသားစုများအတွက် ပံ့ပိုးကူညီမှုအဖွဲ့များ သို့မဟုတ် အရင်းအမြစ်များ ရှိပါသလား။
• ကျွန်ုပ်ကလေးအတွက် ရေရှည်မျှော်မှန်းချက် အခြေအနေက ဘာဖြစ်နိုင်မလဲ။
   

ဆက်စပ်အကြောင်းအရာများ