ကလေးဘဝတွင် ကင်ဆာရောဂါမှ လွတ်မြောက်လာသူများအတွက် HPV ကာကွယ်ဆေး

HPV ဆိုတာ ဘာလဲ။

နှာခေါင်းစည်းတပ်ဆင်ထားသောဆရာဝန်က မိန်းကလေးငယ်တစ်ဦးအား ပလာစတာကပ်ပေးနေသည်။ — HPV ကာကွယ်ဆေးသည် ဘေးကင်းပြီး၊ ထိရောက်မှုရှိကာ၊ အာနိသင် ရေရှည်ခံကြောင်း သုတေသနပြုချက်များအရ သိရသည်။

လူပါပီလိုမာဗိုင်းရပ်စ် (HPV) သည် ကင်ဆာရောဂါ 6 မျိုးအထိ ဖြစ်ပွားစေနိုင်သော အတွေ့ရများသည့် ဗိုင်းရပ်စ်တစ်ခု ဖြစ်သည်။ HPV ကာကွယ်ဆေးထိုးခြင်းသည် HPV ကြောင့်ဖြစ်ပွားသော ကင်ဆာရောဂါများ၏ 90% ကျော်ကို ကာကွယ်ပေးနိုင်သည်။

ကင်ဆာရောဂါ ကာကွယ်ခြင်းသည် ကလေးဘဝတွင် ကင်ဆာရောဂါမှ လွတ်မြောက်လာသူများအတွက် အထူးပင် အရေးကြီးပါသည်။ လေ့လာမှုအများအပြားအရ ကလေးဘဝတွင် ကင်ဆာရောဂါမှ လွတ်မြောက်လာသူများသည် အသက်ကြီးလာသည်နှင့်အမျှ သာမန်လူထုအတွင်းရှိ ၎င်းတို့နှင့် အသက်တူသူများနှင့် နှိုင်းယှဉ်ပါက ဒုတိယအကြိမ် ကင်ဆာရောဂါ ထပ်မံဖြစ်ပွားနိုင်ခြေ အနည်းငယ် ပိုများကြောင်း သိရသည်။

လူဦးရေ၏ 80 ရာခိုင်နှုန်းသည် ၎င်းတို့၏ သက်တမ်းတစ်လျှောက်တွင် HPV ဗိုင်းရပ်စ်ဒဏ်ကို ခံရမည် ဖြစ်သည်။ လိင်မှုကိစ္စ တက်ကြွစွာရှိနေသော အမျိုးသားနှင့် အမျိုးသမီး အားလုံးနီးပါးသည် ၎င်းတို့၏ ဘဝတစ်ချိန်ချိန်တွင် HPV ပိုး ကူးစက်ခံရတတ်သည်။ အမေရိကန်နိုင်ငံတွင် နှစ်စဉ် လူဦးရေ 14 သန်းခန့် HPV ပိုး ကူးစက်ခံနေရသည်။ ဒုတိယ အဖြစ်အများဆုံး လိင်မှတစ်ဆင့် ကူးစက်တတ်သော ရောဂါမှာ ကလိုင်မီးဒီးယား (chlamydia) ဖြစ်ပြီး နှစ်စဉ် လူနာသစ် 3 သန်းခန့် ရှိသည်။

HPV ကူးစက်မှု၏ 90 ရာခိုင်နှုန်းခန့်သည် တစ်နှစ် သို့မဟုတ် နှစ်နှစ်အတွင်း အလိုအလျောက် ပျောက်ကွယ်သွားတတ်ပြီး၊ မည်သည့်လက္ခဏာမျှ မပြတတ်သလို၊ ကင်ဆာရောဂါလည်း မဖြစ်ပွားစေပါ။ အားကောင်းသော ကိုယ်ခံအားသည် အများစုသော HPV ကူးစက်မှုကို ရှင်းရန်ကူညီပါလိမ့်မည်။

သို့ရာတွင်၊ အချို့ ကိုယ်ခံအားစနစ်များသည် HPV ကို မတိုက်ဖျက်နိုင်ကြပါ။ အကယ်၍ ပိုးကူးစက်မှုသည် နှစ်ပေါင်းများစွာ ကြာရှည်နေပါက၊ ကင်ဆာရောဂါဆီသို့ ဦးတည်သွားနိုင်ပါသည်။

HPV သည် ကင်ဆာရောဂါ 6 မျိုးကို ဖြစ်ပွားစေနိုင်သည်-

စအို
သားအိမ်ခေါင်း
အော်ရိုဖာရင်ဂျီယယ် (ပါးစပ်အနောက်ပိုင်းနှင့် လည်ချောင်း)
လိင်တံ
မိန်းမကိုယ်
မိန်းမကိုယ်အပြင်ဘက်နှုတ်ခမ်း

HPV သည် အမျိုးသမီးများတွက် သားအိမ်ခေါင်းကင်ဆာဖြစ်ပွားရန် အဓိက အကြောင်းရင်းဖြစ်သည်။ ဆေးရွက်ကြီးနှင့် အရက်ပြီးလျှင် HPV သည် အမျိုးသားများတွင် အော်ရိုဖာရင်ဂျီယယ် (လည်ချောင်း) ကင်ဆာ ဖြစ်ပွားမှုကို ပိုမို ဖြစ်စေနိုင်သော အကြောင်းရင်းတစ်ခု ဖြစ်သည်။

HPV ကာကွယ်ဆေးသည် ဘေးကင်းပြီး၊ ကင်ဆာ ၆ မျိုးကို ကာကွယ်ရာတွင် ထိရောက်မှုရှိကာ၊ အာနိသင် ရေရှည်ခံပါသည် — ကလေးဘဝတွင် ကင်ဆာရောဂါမှ လွတ်မြောက်လာသူများသည် HPV ကာကွယ်ဆေးကို ထိုးနှံသင့်သည်။ HPV ကာကွယ်ဆေး ထိုးနှံရန် အကောင်းဆုံးအချိန်မှာ အသက် 9-12 နှစ် ဖြစ်သည်။

HPV ကာကွယ်ဆေးဆိုတာ ဘာလဲ။

ကာကွယ်ဆေးသည် သင့်ကိုယ်ခံအားစနစ်က အချို့သော ကူးစက်ရောဂါများကို တိုက်ဖျက်နိုင်ရန် ကူညီပေးသည်။ HPV ကာကွယ်ဆေးသည် ခန္ဓာကိုယ်ကို HPV ကူးစက်မှုမှ ကာကွယ်ပေးမည့် ကိုယ်ခံအားစနစ်ကို ပဋိပစ္စည်းများ ထုတ်လုပ်စေပါသည်

အမေရိကန် ကင်ဆာအဖွဲ့အစည်း (American Cancer Society) က ကလေးဘဝတွင် ကင်ဆာရောဂါမှ လွတ်မြောက်လာသူများ အပါအဝင် အသက် 9-12 နှစ်ကြားရှိ ယောက်ျားလေးများနှင့် မိန်းကလေးများ အားလုံး HPV ကာကွယ်ဆေး ထိုးနှံကြရန် အကြံပြုထားသည်။

HPV ထိုးဆေးသည် လိင်ပိုင်းဆိုင်ရာ ထိတွေ့မှုမှတစ်ဆင့် ကူးစက်တတ်သော HPV ဗိုင်းရပ်စ်နှင့် မထိတွေ့မီတွင် ထိုးနှံပါက အထိရောက်ဆုံးဖြစ်သည်။ HPV ကာကွယ်ဆေး ထိုးနှံရန် အကောင်းဆုံးအချိန်မှာ အသက် 9-12 နှစ် ဖြစ်သည်။ ဤအသက်အရွယ်များတွင် ကိုယ်ခံအား တုံ့ပြန်မှုသည် အကောင်းဆုံး ဖြစ်သည်။ ကလေးသူငယ် အားလုံးနီးပါးသည် HPV ဗိုင်းရပ်စ်နှင့် ထိတွေ့ဖူးခြင်း ရှိဦးမည် မဟုတ်ပါ။ ကလေးများသည် အသက် 16 နှစ်မပြည့်မီတွင် ကိုယ်ခံအား တုံ့ပြန်မှု အားအကောင်းဆုံး ရှိကြသည်။

ကျောင်းတက်ရန်အတွက် ဤကာကွယ်ဆေးထိုးရန် မဖြစ်မနေ မသတ်မှတ်ထားသော်လည်း ကလေးများကို HPV ကာကွယ်ဆေး ထိုးနှံပေးသင့်သည်။ အသက် 9-12 နှစ်အတွင်း HPV ကာကွယ်ဆေး ထိုးနှံခြင်းသည် HPV ကြောင့်ဖြစ်သော ကင်ဆာရောဂါများကို အကောင်းဆုံး ကာကွယ်မှု ရရှိစေရန် သေချာစေသည်။ HPV ကာကွယ်ဆေးထိုးခြင်းသည် ဘေးကင်းပြီး၊ ထိရောက်မှုရှိကာ၊ အာနိသင် ရေရှည်ခံပါသည်။

အကယ်၍ တစ်ဦးတစ်ယောက်သည် အသက် 9-12 နှစ်ကြားတွင် ကာကွယ်ဆေး မထိုးနှံခဲ့ရပါက၊ လူတိုင်းအတွက် အသက် 26 နှစ်အထိ ထိုးနှံရန် ခွင့်ပြုထားပြီး၊ အသက် 27-45 နှစ်အတွင်းရှိ အချို့သောသူများအတွက်လည်း ထိုးနှံရန် ခွင့်ပြုချက် ရှိပါသည်။

ရောဂါထိန်းချုပ်ရေးနှင့် ကာကွယ်ရေးဗဟိုဌာန (CDC) က အသက် 9-14 နှစ်အတွင်းရှိ ကလေးများနှင့် ဆယ်ကျော်သက်များအတွက် HPV ကာကွယ်ဆေး 2 ကြိမ်ထိုးရန် အကြံပြုထားသည်။ အသက် 15^နှစ် ပြည့်ပြီးမှ HPV ကာကွယ်ဆေး စတင်ထိုးနှံသူများအတွက်၊ မူ 3 ကြိမ်ထိုးရန် အကြံပြုထားသည်။

ကလေးဘဝတွင် ကင်ဆာရောဂါမှ လွတ်မြောက်လာသူများ သို့မဟုတ် ကိုယ်ခံအားကျဆင်းနေသူများအတွက်မူ၊ Children's Oncology Group (COG) က အသက်အရွယ်မရွေး HPV ကာကွယ်ဆေး 3 ကြိမ်ထိုးရန် အကြံပြုထားသည်။

HPV က မည်သို့ ကူးစက်ပျံ့နှံ့သနည်း။

HPV ဗိုင်းရပ်စ် အမျိုးအစား ပေါင်း 200 ကျော် ရှိသည်။ ၎င်းတို့အနက် အမျိုးအစား 40 မှာ မိန်းမကိုယ်၊ စအို သို့မဟုတ် ပါးစပ်ဖြင့် လိင်ဆက်ဆံမှု သို့မဟုတ် လိင်အင်္ဂါနှင့် လက်ချောင်းထိတွေ့မှုများအပါအဝင် လိင်ပိုင်းဆိုင်ရာထိတွေ့မှုမှတစ်ဆင့် အလွယ်တကူ ပျံ့နှံ့နိုင်သည်။ အရေပြားနှင့် ကိုယ်တွင်းအင်္ဂါများကို ဖုံးပေးသော အမြှေးပါးတို့ တိုက်ရိုက် လိင်ပိုင်းဆိုင်ရာ ထိတွေ့မိခြင်းကြောင့် ဗိုင်းရပ်စ်သည် ပိုးရှိသူထံမှ ၎င်း၏အဖော်ထံသို့ ကူးစက်သွားစေသည်။

HPV အမျိုးအစားများ

HPV တွင် အမျိုးအစား နှစ်မျိုး ရှိသည်-

အန္တရာယ်ကြီးမားသော HPV များ- ဤအမျိုးအစားများသည် ကင်ဆာရောဂါ ဖြစ်ပွားစေနိုင်သည်။ HPV အမျိုးအစား 16 နှင့် 18 တို့သည် သားအိမ်ခေါင်း၊ စအို၊ ပါးစပ်၊ လည်ချောင်းနှင့် မိန်းမကိုယ်ကင်ဆာများ၏ ထက်ဝက်ကျော်ကို ဖြစ်ပွားစေသည်။ HPV အမျိုးအစား 31၊ 33၊ 45၊ 52 နှင့် 58 တို့သည် အမျိုးသမီးများတွင် 14% နှင့် အမျိုးသားများတွင် 4% ကင်ဆာ ထပ်ဆောင်းဖြစ်ပွားစေနိုင်သည်။ ဤအမျိုးအစား အားလုံးကို HPV ကာကွယ်ဆေးဖြင့် ကာကွယ်နိုင်ပါသည်။
အန္တရာယ်နည်းသော HPV များ- ဤအမျိုးအစားများသည် ကင်ဆာရောဂါ မဖြစ်ပွားစေပါ။ ၎င်းတို့သည် လိင်အင်္ဂါတွင်း၊ စအို၊ နှုတ်ခမ်း၊ ပါးစပ်၊ လျှာနှင့် လည်ချောင်းတစ်ဝိုက်ရှိ အရေပြားတွင်များတွင် ကြွက်နို့များဖြစ်စေသည်။ HPV အမျိုးအစား 6 နှင့် 11 တို့သည် လိင်အင်္ဂါကြွက်နို့ ဖြစ်ပွားမှုများ၏ 90% နှင့် အသက်ရှူလမ်းကြောင်းတွင် ကြွက်နို့များ ဖြစ်ပွားသည့်ရောဂါ အများစုကို ဖြစ်ပွားစေသည်။ ဤအမျိုးအစား နှစ်မျိုးလုံးကိုလည်း HPV ကာကွယ်ဆေးဖြင့် ကာကွယ်နိုင်ပါသည်။

ပိုးကူးစက်ခံထားရသူ၏ ကိုယ်ခံအားစနစ်က နောက်ဆုံးတွင် ဗိုင်းရပ်စ်ပိုးကို ရှင်းလင်းဖယ်ရှားနိုင်ခဲ့လျှင်ပင် ထိုပိုးရှိနေစဉ်အတွင်း အခြားသူများထံသို့ HPV ပိုးကို ကူးစက်စေနိုင်ပါသေးသည်။ အခြားသူတစ်ဦး၏ ကိုယ်ခံအားစနစ်သည် (ထိုဗိုင်းရပ်စ်ကို) မတိုက်ဖျက်နိုင်ခြင်းမျိုး ရှိနိုင်ပါသည်။ HPV လက္ခဏာ မပြသောသူများသည်လည်း အခြားသူတစ်ဦးထံသို့ HPV ပိုး ဖြန့်ဝေနိုင်ပြီး ကူးစက်ခံရသူတွင် လက္ခဏာများ ပေါ်လာနိုင်ပါသည်။

ရောဂါထိန်းချုပ်ရေးနှင့် ကာကွယ်ရေးဗဟိုဌာန (CDC) ၏ ခန့်မှန်းချက်အရ လိင်မှုကိစ္စ တက်ကြွသော အမျိုးသမီး 80% နှင့် အမျိုးသား 90% ကျော်သည် ဘဝတွင် HPV ကူးစက်ခံရမည်ဖြစ်ပြီး၊ ယင်းတို့အနက် ထက်ဝက်ခန့်မှာ အန္တရာယ်ကြီးမားသော သို့မဟုတ် ကင်ဆာဖြစ်စေနိုင်သော HPV အမျိုးအစား ကူးစက်ခံရခြင်း ဖြစ်နိုင်သည်။ လက်ရှိတွင် လူဦးရေ၏ ထက်ဝက်ခန့် (အမျိုးသားနှင့် အမျိုးသမီး နှစ်ဦးစလုံး) ၌ HPV ပိုး ကူးစက်ထားခြင်း ခံရသည် (အသက် 14-59 နှစ်အတွင်းရှိ အမျိုးသမီး 42.5% ၊ အသက် 20–24 နှစ်အတွင်းရှိ အမျိုးသမီး 53.8% ၊ အသက် 18–70 နှစ်အတွင်းရှိ အမျိုးသား 52–69%)။

HPV ကို မည်သို့ ကာကွယ်ရမည်နည်း

HPV ပိုးကို ကာကွယ်ရန် ကလေးဘဝနှင့် ဆယ်ကျော်သက်အရွယ် ကင်ဆာရောဂါမှ လွတ်မြောက်လာသူများသည် အောက်ပါတို့ကို လုပ်ဆောင်သင့်သည်-

ကာကွယ်ဆေးထိုးပါ- HPV ကာကွယ်ဆေးသည် ဘေးကင်းပြီး၊ ထိရောက်မှုရှိကာ၊ အာနိသင် ကြာရှည်ခံပါသည်။
လိင်ဆက်ဆံစဉ်အတွင်း ကွန်ဒုံးကို စနစ်တကျ မှန်ကန်စွာ အသုံးပြုပါ- ဤအရာက HPV ကူးစက်နိုင်ခြေကို လျှော့ချပေးမည် ဖြစ်သော်လည်း ကွန်ဒုံးသည် အရေပြားထိတွေ့သည့် နေရာအားလုံးကို ဖုံးအုပ်ပေးနိုင်ခြင်း မရှိပါ။
တစ်လင်တစ်မယားစနစ် ဆက်ဆံရေးရှိပါစေ - သို့မဟုတ် သင့်အပေါ်၌သာ သစ္စာရှိသော (သင့်တစ်ဦးတည်းနှင့်သာ လိင်ဆက်ဆံသော) သူနှင့်သာ လိင်ဆက်ဆံပါ။
သားအိမ်ခေါင်းကင်ဆာ ရှိ၊ မရှိ စစ်ဆေးရန်ပုံမှန် သားအိမ်ခေါင်းအချွဲမြှေး ယူ၍ စစ်ဆေးခြင်း ခံယူပါ- အသက် 21-29 နှစ်ကြားရှိ အမျိုးသမီးများသည် 3 နှစ်လျှင် တစ်ကြိမ် စစ်ဆေးမှု ခံယူသင့်သည်။ အသက် 30-65 နှစ်အတွင်းရှိ အမျိုးသမီးများသည် သားအိမ်ခေါင်းအချွဲမြှေး ယူ၍ စစ်ဆေးခြင်းနှင့် HPV စစ်ဆေးမှု နှစ်ခုတွဲကို 5 နှစ်လျှင် တစ်ကြိမ် ခံယူနိုင်သည်၊ သို့မဟုတ် သားအိမ်ခေါင်းအချွဲမြှေး ယူ၍ စစ်ဆေးခြင်းတစ်ခုတည်းကို 3 နှစ်လျှင် တစ်ကြိမ် ခံယူနိုင်ပါသည်။

HPV ကာကွယ်ဆေးနှင့် ပတ်သက်သည့် အမှားနှင့် အမှန်များ

HPV သည် လိင်ကိစ္စဆက်နွှယ်နေသောကြောင့် ၎င်းကူးစက်မှု၊ ပျံ့နှံ့ပုံနှင့် ထိုးဆေး၏ သက်ရောက်မှုများနှင့် ပတ်သက်၍ လွဲမှားသော အယူအဆများစွာ ရှိနေကြသည်။

အယူအဆ အလွဲအမှားများ- HPV ကာကွယ်ဆေးသည် စိတ်မချရပါ။

အမှန်တရားအချက်များ- HPV ကာကွယ်ဆေးသည် လက်ရှိစျေးကွက်ထဲတွင် အန္တရာယ်အကင်းဆုံး ကာကွယ်ဆေးများထဲမှ တစ်ခုဖြစ်သည်။

အမျိုးသားကင်ဆာသိပ္ပံ၏ အဆိုအရ HPV ကာကွယ်ဆေးများကြောင့် ပြင်းထန်သော ဘေးထွက်ဆိုးကျိုးများ ဖြစ်ပွားကြောင်း မတွေ့ရှိရပါ။ အဖြစ်အများဆုံး ပြဿနာများမှာ အခြားကာကွယ်ဆေးများ ကဲ့သို့ပင် — ဆေးထိုးထားသောနေရာ၌ နာကျင်ခြင်း၊ ထိလျှင်နာခြင်း၊ နီရဲခြင်း သို့မဟုတ် ရောင်ရမ်းခြင်းတို့ ဖြစ်သည်။ ခေါင်းကိုက်ခြင်းလည်း ဖြစ်နိုင်ပါသည်။

ဥပဒေအရ၊ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) သည် မည်သည့်ကာကွယ်ဆေးကိုမဆို လိုင်စင်မချပေးမီနှင့် မသုံးစွဲမီ ဘေးကင်းပြီး ထိရောက်မှု ရှိ၊ မရှိ ဆုံးဖြတ်ရမည် ဖြစ်သည်။

CDC နှင့် FDA တို့သည် လူထုအတွင်း အကျိုးဆက်အသစ်များ သို့မဟုတ် နောက်ဆက်တွဲ ဘေးထွက်ဆိုးကျိုးများ မရှိစေရန် စျေးကွက်အတွင်းရှိ ကာကွယ်ဆေးအားလုံး၏ ဘေးကင်းမှုကို အစဉ်တစိုက် စောင့်ကြည့်စစ်ဆေးနေသည်။ ထိုးဆေးတုံ့ပြန်မှု မှတ်တမ်းတင်စနစ် (VAERS) သည် ကာကွယ်ဆေးများကြောင့် ဖြစ်ပေါ်လာသော တုံ့ပြန်မှုဆိုင်ရာ အချက်အလက်များကို စုဆောင်းမှတ်တမ်းတင်ပေးသည်။ တုံ့ပြန်မှုတစ်စုံတစ်ရာကို အစီရင်ခံရာတွင် သင့်ကျန်းမာရေးစောင့်ရှောက်မှုပေးသူထံ ဆက်သွယ်ရန် အွန်လိုင်းဖောင် သို့မဟုတ် ဒေါင်းလုဒ်ရယူနိုင်သော ဖောင်ကို အသုံးပြုပါ။

လတ်တလော နေမကောင်းဖြစ်နေသူများသည် ပိုးဝင်ခြင်း သက်သာသွားသည်အထိ စောင့်သင့်ပြီး ကာကွယ်ဆေးမထိုးမီ အနည်းဆုံး 24 နာရီကြာ ဖျားနာမှု မရှိရပါ။

ကိုယ်ဝန်ဆောင် အမျိုးသမီးများသည် ကိုယ်ဝန်ဆောင်ကာလအတွင်း လုံလောက်စွာ စမ်းသပ်စစ်ဆေးထားခြင်း မရှိသေးသောကြောင့် ကာကွယ်ဆေးကို မထိုးသင့်ပါ။ တဆေး သို့မဟုတ် အလူမီနီယမ်နှင့် ပြင်းထန်သော ဓာတ်မတည့်မှု ရှိသူ မည်သူမဆို ၎င်းကာကွယ်ဆေးကို မထိုးသင့်ပါ။ ကာကွယ်ဆေးကြောင့်ဖြစ်သော ဓာတ်မတည့်မှု တုံ့ပြန်မှုများတွင် အင်ပြင်များထွက်ခြင်း၊ အသက်ရှူရခက်ခဲခြင်းနှင့် အားနည်းခြင်းတို့ ပါဝင်နိုင်သည်။ ချက်ချင်း ကျန်းမာရေးစောင့်ရှောက်မှု ခံယူရန် လိုအပ်သည့် အခြားသော ကာကွယ်ဆေးတုံ့ပြန်မှုများမှာ အဖျားကြီးခြင်း သို့မဟုတ် အပြုအမူ ပြောင်းလဲလာခြင်းတို့ ဖြစ်သည်။

အဖြစ်များသော ဘေးထွက်ဆိုးကျိုးများမှာ ခေါင်းမူးခြင်း၊ မေ့လဲခြင်း၊ ခေါင်းကိုက်ခြင်း၊ ပျို့အန်ခြင်းနှင့် ဖျားခြင်းတို့ဖြစ်သည်။ ထို့အပြင် ဆေးထိုးထားသော လက်မောင်းတွင် နာကျင်ခြင်း၊ နီရဲခြင်းနှင့် ရောင်ရမ်းခြင်းတို့ ရှိကြောင်း အစီရင်ခံထားသည်။

မေ့လဲခြင်းသည် မည်သည့်ကာကွယ်ဆေး ထိုးခြင်းနှင့်မဆို သက်ဆိုင်နိုင်သောကြောင့် ကာကွယ်ဆေးထိုးပြီးနောက် လူနာအား 15 မိနစ်ခန့်အထိ ထိုင်နေရန် သို့မဟုတ် လှဲလျောင်းနေရန် အကြံပြုထားသည်။
အယူအဆ အလွဲအမှားများ- ရေရှည်ဆိုးကျိုးတွေကို ကျွန်ုပ်တို့ မသိရသေးပါ။

အမှန်တရားအချက်များ- ၎င်းကာကွယ်ဆေးကို 2006 ခုနှစ် ဇွန်လကတည်းက စတင်ရရှိနိုင်ခဲ့ပြီ ဖြစ်သည်။ ကာကွယ်ဆေးအပေါ် ဆက်လက်လေ့လာမှုများနှင့် စောင့်ကြည့်မှုများအရ ရှားပါးသော ဘေးထွက်ဆိုးကျိုးများနှင့် နောက်ဆက်တွဲဆိုးကျိုးများကိုသာ တွေ့ရှိရသည်။

2006 ခုနှစ် ဇွန်လမှ 2017 ခုနှစ် ဒီဇင်ဘာလအထိ အမေရိကန်ပြည်ထောင်စုတွင် HPV ကာကွယ်ဆေး အကြိမ်ရေ သန်း 100 ကျော် ဖြန့်ချိခဲ့သည်။ 10 နှစ်ကြာ နောက်ဆက်တွဲ လေ့လာမှုတစ်ခုတွင်၊ ကာကွယ်ဆေးသည် အလွန်ဘေးကင်းကြောင်း တွေ့ရှိခဲ့ရသည်။ အသားမျှင်များ မာလာခြင်း (MS)၊ Guillain-Barré syndrome၊ မတ်တပ်ရပ်လိုက်ပါက နှလုံးခုန်မြန်လာပြီး သွေးပေါင်ချိန်ကျသည့်ရောဂါ (POTS)၊ နာတာရှည် နေရာကွက်၍ နာကျင်ရောဂါ (CPRS) နှင့် နာတာရှည် နုံးခွေရောဂါတို့ကဲ့သို့ ကိုယ်ခံအားစနစ် ကမောက်ကမ ဖြစ်မှု ရောဂါများနှင့် သက်ဆိုင်သည့် ဖြစ်နိုင်သော ဆက်စပ်မှုများကို ထပ်ဆောင်းလေ့လာချက်များအရ HPV ထိုးသူများတွင် ၎င်းတို့အတွက် အန္တရာယ် တိုးလာခြင်း မရှိကြောင်း တွေ့ရှိရသည်။

အချက်အလက်များ ထပ်မံသိရှိလိုပါက၊ 2020 ပြည့်နှစ် New England Journal of Medicine ပါ HPV ကာကွယ်ဆေးထိုးခြင်းနှင့် သားအိမ်ခေါင်းကင်ဆာ ဖြစ်ပွားနိုင်ခြေဆောင်းပါးကို ဖတ်ရှုပါ။
အယူအဆ အလွဲအမှားများ- HPV ကာကွယ်ဆေး ထိုးပြီးနောက် သေဆုံးသူများ ရှိပါသလား။

အမှန်တရားအချက်များ- HPV ကာကွယ်ဆေး ထိုးပြီးနောက် သေဆုံးနိုင်ခြေ တိုးလာခြင်း မရှိပါ။

CDC နှင့် Vaccine Safety Datalink တို့သည် HPV ကာကွယ်ဆေး ထိုးပြီးနောက် သေဆုံးကြောင်း အစီရင်ခံချက်များကို စုံစမ်းစစ်ဆေးသည့် လေ့လာမှုများ ပြုလုပ်ခဲ့သည်။ ကာကွယ်ဆေးထိုးပြီးနောက် သေဆုံးမှုအများစုသည် ကာကွယ်ဆေးနှင့် မသက်ဆိုင်ကြောင်း (ဥပမာ- မတော်တဆမှုများ၊ မိမိကိုယ်ကို သတ်သေခြင်း စသည်) အတည်ပြုနိုင်ခဲ့ပြီး HPV ကာကွယ်ဆေးကြောင့် သေဆုံးရခြင်းဖြစ်သည်ဟု ညွှန်ပြသည့် အထောက်အထား မရှိပါ။
အယူအဆ အလွဲအမှားများ- မိန်းကလေးများသာ HPV ကာကွယ်ဆေး ထိုးသင့်သည်။

အမှန်တရားအချက်များ- အမျိုးသားများသည်လည်း HPV နှင့် ဆက်စပ်သော ကင်ဆာများ ဖြစ်ပွားနိုင်သောကြောင့် ကာကွယ်ဆေး ထိုးရန် လိုအပ်ပါသည်။

အမေရိကန်တွင် နှစ်စဉ် အမျိုးသား 20,000 နီးပါးသည် HPV ကြောင့်ဖြစ်သော ကင်ဆာရောဂါများကို ခံစားနေရသည်။ ၎င်းသည် HPV နှင့် ဆက်စပ်သော ကင်ဆာရောဂါ ဖြစ်ပွားမှုအားလုံး၏ 43% ဖြစ်သည်။ ဤကိန်းဂဏန်းများသည် လူငယ် အမျိုးသားများအကြား မြင့်တက်လျက်ရှိသည်။ အမျိုးသားများတွင် အဖြစ်အများဆုံး HPV နှင့် ဆက်စပ်သော ကင်ဆာမှာ လည်ချောင်းကင်ဆာ ဖြစ်သော်လည်း စအိုနှင့် အူအဆုံးပိုင်း၊ ခံတွင်းနှင့် လိင်တံကင်ဆာများလည်း ဖြစ်ပွားနိုင်သည်။ အမျိုးသမီးများတွင် ဖြစ်ပွားတတ်သော သားအိမ်ခေါင်းကင်ဆာနှင့် မတူဘဲ ဤကင်ဆာများအတွက် ကြိုတင်စစ်ဆေးမှုများ မရှိပါ။ ဆိုလိုသည်မှာ ၎င်းကင်ဆာများကို ကုသရန် ပိုမိုခက်ခဲလာသည့် နောက်ကျသော အဆင့်များရောက်မှသာ စစ်ဆေးတွေ့ရှိလေ့ရှိကြသည်။

အမျိုးသားများသည်လည်း လိင်အင်္ဂါကြွက်နို့ကို ဖြစ်စေသော HPV အမျိုးအစားများ (အမျိုးအစား 6 နှင့် 11) ကူးစက်ခံရနိုင်ပြီး ပြန်လည်ကူးစက်စေနိုင်သည်။

အမျိုးသားများသည် HPV ရောဂါလက္ခဏာ တစ်စုံတစ်ရာ မပြသသော်လည်း၊ ၎င်းတို့၏ အဖော်ထံသို့ HPV ကူးစက်စေနိုင်သည်။

HPV နှင့် ဆက်စပ်နေသော ကင်ဆာများအကြောင်း အသေးစိတ် သိရှိလိုပါက၊ ဤအကြောင်းအရာနှင့် ပတ်သက်သည့် CDC ၏ U.S. Cancer Statistics Data Brief သို့ ဝင်ရောက်ကြည့်ရှုပါ။
အယူအဆ အလွဲအမှားများ- ကျွန်ုပ်၏ ကလေးသည် လိင်ပိုင်းဆိုင်ရာ ထိတွေ့မှု မရှိသေးသောကြောင့် HPV ကာကွယ်ဆေး မလိုပါ။

အမှန်တရားအချက်များ- ကာကွယ်ဆေးသည် လိင်ပိုင်းဆိုင်ရာ ထိတွေ့မှုများ မစတင်မီ ထိုးနှံပါက အထိရောက်ဆုံး ဖြစ်သည်။

HPV ကာကွယ်ဆေးသည် အခြားသူတစ်ဦးနှင့် လိင်ပိုင်းဆိုင်ရာ မစတင်မီ ကာကွယ်ဆေးအကြိမ်ပြည့် ထိုးနှံပြီး ကောင်းမွန်သော ကိုယ်ခံအားတုံ့ပြန်မှု ရရှိရန် အချိန်လုံလောက်စွာ ရရှိထားသည့် ယောကျာ်းလေးများနှင့် မိန်းကလေးများကို အကောင်းဆုံး ကာကွယ်မှု ပေးစွမ်းနိုင်သည်။

လိင်ပိုင်းဆိုင်ရာ ထိတွေ့မှု မတိုင်မီ ကာကွယ်ဆေးထိုးခြင်းသည် ရောဂါကာကွယ်ခြင်းနှင့် အပြင်းထန်ဆုံး ဆက်စပ်မှု ရှိသည်။ ကူးစက်မှုအသစ်အများစုကို လိင်ပိုင်းဆိုင်ရာ စတင်လုပ်ဆောင်ခါစ လူများတွင် တွေ့ရှိရသည်။ လိင်ပိုင်းဆိုင်ရာလှုပ်ရှားမှု ဆိုသည်မှာ အရာများစွာကို ဆိုလိုနိုင်ကြောင်း သတိရရန် အရေးကြီးပါသည်။ လိင်အင်္ဂါ အစိတ်အပိုင်းများကို လက်ဖြင့် ထိတွေ့စမ်းသပ်ခြင်းကပင် ကူးစက်မှုကို ဖြစ်စေနိုင်သည် — သို့သော် လိင်ဆက်ဆံခြင်းသည်သာ ကူးစက်မှု အများစု၏ အဓိက အရင်းအမြစ် ဖြစ်သည်ဟု ယူဆကြသည်။
အယူအဆ အလွဲအမှားများ- ယောကျာ်းလေးနှင့် မိန်းကလေးအတွက် HPV ကာကွယ်ဆေး ဖော်မြူလာ အမျိုးအစား မတူညီကြပါ။

အမှန်တရားအချက်များ- ဆေးတစ်ကြိမ်စာစီသည် လုံးဝ တူညီပါသည်။

လူနာ၏ ကျားမ သို့မဟုတ် ကာကွယ်ဆေးထိုးသည့် အချိန်ကာလ နှင့်မဆိုင်ဘဲ ဆေးပမာဏမှာ အတူတူပင် ဖြစ်သည်။
အယူအဆ အလွဲအမှားများ- ကျွန်ုပ်၏ ကလေးကို HPV ကာကွယ်ဆေး ထိုးပေးခြင်းက လိင်ပိုင်းဆိုင်ရာကို အားပေးရာ ရောက်လိမ့်မည်။

အမှန်တရားအချက်များ- ဆေးဘက်ဆိုင်ရာ အထောက်အထားများအရ လိင်ပိုင်းဆိုင်ရာ လှုပ်ရှားမှု တိုးလာခြင်းနှင့် HPV ကာကွယ်ဆေးတို့အကြား မည်သည့်ဆက်စပ်မှုမျှ မတွေ့ရှိရပါ။

ယုံကြည်စိတ်ချရသော လေ့လာမှုများစွာက ဤပြဿနာကို အနီးကပ် လေ့လာခဲ့ကြသည်။ HPV ထိုးဆေးသည် လိင်ကိစ္စအပေါ် မည်သည့် သက်ရောက်မှုမျှမရှိကြောင်းနှင့် မိဘများသည် ကလေးများကို ဆေးထိုးခြင်းမှ မတားဆီးသင့်ကြောင်း လေ့လာမှုတိုင်းက ဖော်ပြထားသည်။
အယူအဆ အလွဲအမှားများ- ကျွန်ုပ်တို့ မိသားစုသည် ကျောင်းအတွက် လိုအပ်သော ကာကွယ်ဆေးအားလုံးကို ထိုးထားပြီးဖြစ်ရာ၊ ၎င်းဆေးသည် ကျောင်း၏သတ်မှတ်ချက်တွင် မပါဝင်ပါက၊ ထိုးရန် မလိုပါ။

အမှန်တရားအချက်များ- HPV ကာကွယ်ဆေးသည် CDC ၏ အကြံပြုထားသော ကာကွယ်ဆေး အစီအစဉ်တွင် ပါဝင်သည်။

ကျောင်းများက ဤကာကွယ်ဆေးကို မဖြစ်မနေ မတောင်းဆိုခြင်းသည်၊ ၎င်းဆေး မလိုအပ်ဟု မဆိုလိုပါ။ CDC က HPV ကာကွယ်ဆေး ထိုးရန် အကြံပြုထားသည်။ ဖြစ်နိုင်ပါက အသက် 11-12 နှစ်အတွင်း သို့မဟုတ် တတ်နိုင်သမျှ အစောဆုံး ကာကွယ်ဆေးထိုးရန် အရေးကြီးပါသည်။
အယူအဆ အလွဲအမှားများ- ကျွန်ုပ်တို့ မိသားစုသည် ကလေးနှင့် “လိင်ပညာပေးအကြောင်းအရာကို ဆွေးနွေးပြောဆိုရန်” အဆင်မသင့်ဖြစ်သေးပါ။

အမှန်တရားအချက်များ- ဤကာကွယ်ဆေး ထိုးသည့်အခါ ကလေးများနှင့် အသေးစိတ် အချက်အလက်များကို ဆွေးနွေးရန် မလိုအပ်ပါ။

အသည်းရောင်အသားဝါဘီ (Hep B)၊ ဝက်သက်၊ ပါးချိတ်ရောင်၊ ဂျာမန်ဝက်သက် (MMR)၊ မေးခိုင်၊ ဆုံဆို့၊ ကြက်ညှာ (TDaP) ကဲ့သို့သော အခြားကာကွယ်ဆေးထိုးမှုများ နည်းတူ၊ ဤဆေးများသည် ၎င်းတို့ကို ကျန်းမာစေရန်နှင့် HPV ဆေး၏ အခြေအနေတွင်မူ HPV ကင်ဆာများအကြောင်း စိုးရိမ်ပူပန်မှု ကင်းစေရန် ထိုးပေးခြင်းဖြစ်ကြောင်း ကလေးများကို ပြောပြပါ။
အယူအဆ အလွဲအမှားများ- HPV ကာကွယ်ဆေးသည် မျိုးမအောင်ခြင်းဖြစ်စေနိုင်သည်။

အမှန်တရားအချက်များ- လေ့လာမှုများအရ မျိုးပွားနိုင်စွမ်း ပြဿနာများနှင့် ကာကွယ်ဆေးအကြား ဆက်စပ်မှုရှိကြောင်း အထောက်အထား မတွေ့ရှိရပါ။

CDC ၏ လေ့လာမှုများသည် အထူးသဖြင့် ရာသီထိန်ခြင်း (မျိုးပွားနိုင်သောအသက်အရွယ်ရှိ အမျိုးသမီးတစ်ဦး ရာသီမလာခြင်း)နှင့် မျိုးဥအိမ် လုပ်ဆောင်ချက် မလုံလောက်ခြင်း (စောစီး သွေးဆုံးခြင်း) တို့ကို အထူးပြု လေ့လာခဲ့သည်။ HPV ကာကွယ်ဆေး ထိုးထားသော အမျိုးသမီးများနှင့် မထိုးထားသော အမျိုးသမီးများအကြား ရာသီထိန်ခြင်း ဖြစ်ပွားမှုနှုန်းတွင် ကွာခြားချက် မရှိပါ။ 2009–2015 ခုနှစ်အတွင်း၊ အမေရိကန်ပြည်ထောင်စုတွင် အသုံးပြုရန် Gardasil ကာကွယ်ဆေး အကြိမ်ရေ သန်း 60 ကျော် ဖြန့်ဝေခဲ့သည်။ ဤကာလအတွင်း၊ ထိုးဆေး တုံ့ပြန်မှု မှတ်တမ်းတင်စနစ် (VAERS) သို့ မမျိုးဥအိမ် အလုပ်မလုပ်တော့ခြင်းဆိုင်ရာ အစီရင်ခံစာ 17 စောင် ရရှိခဲ့သည်။ အစီရင်ခံစာတစ်ဆယ့်ငါးစောင်မှာ ရောဂါရှာဖွေအတည်ပြုရန် လုံလောက်သော အချက်အလက် မပါရှိဘဲ ကောလာဟလအဆင့်သာ ဖြစ်သည်ဟု သတ်မှတ်ခဲ့သည်။ အစီရင်ခံစာ နှစ်စောင်မှာ ဆရာဝန်များထံမှ ဖြစ်သည်။
အယူအဆ အလွဲအမှားများ- HPV ကာကွယ်ဆေးသည် ကင်ဆာဖြစ်စေသည်။

အမှန်တရားအချက်များ- ကာကွယ်ဆေးကြောင့် ကင်ဆာဖြစ်စေသည်ဟူသော မည်သည့် ဆက်စပ်မှုကိုမျှ မတွေ့ရှိရပါ။ ဆန့်ကျင်ဘက်အနေဖြင့်၊ ၎င်းသည် ကင်ဆာကို ကာကွယ်ပေးပါသည်။

ကာကွယ်ဆေး အစီအစဉ်သည် အမျိုးသားနှင့် အမျိုးသမီးများကို ထိခိုက်စေနိုင်သော ကင်ဆာ 6 မျိုးကို အဓိက ဖြစ်စေသည့် HPV အမျိုးအစားများ ကူးစက်ခြင်းမှ ကာကွယ်ပေးသည်။

HPV ကာကွယ်ဆေး ရရှိနိုင်ပုံ

သင့်ကလေး၏ အခြေခံကျန်းမာရေးစောင့်ရှောက်မှုပေးသူကို ကာကွယ်ဆေးထိုးခြင်းအကြောင်း မေးမြန်းပါ သို့မဟုတ် ဒေသန္တရ ကျန်းမာရေးဌာနသို့ ဆက်သွယ်ပါ။

ကာကွယ်ဆေးသည် ပုဂ္ဂလိက အာမခံ အစီအစဉ် အများစုတွင် အကျုံးဝင်သည်။

ကလေးများအတွက် ကာကွယ်ဆေး (VFC) အစီအစဉ် သည် အာမခံမရှိသော၊ ဆေးဝါးအကူအညီအတွက် သတ်မှတ်ချက်ပြည့်မီသော၊ အမေရိကန် အင်ဒီယန်း သို့မဟုတ် အလက်စကာ တိုင်းရင်းသား၊ အသက် 18 နှစ်နှင့် အောက်ကလေးများအတွက်ဖြစ်သည်။ သတ်မှတ်ချက်ပြည့်မီသော ကလေးများအတွက် VFC ပံ့ပိုးသူမှ ပေးသော ကာကွယ်ဆေးများအတွက် ကျသင့်ငွေ မရှိပါ။

အသက် 19 နှစ်အောက် ဖြစ်ပြီး အောက်ပါ သတ်မှတ်ချက်တစ်ခုခုနှင့် ကိုက်ညီသော မည်သည့်ကလေးမဆို ဤအစီအစဉ်တွင် ပါဝင်ခွင့်ရှိသည် -

ဆေးဝါးအကူအညီအတွက် အကျုံးဝင်သူ
အာမခံမရှိသူ
အမေရိကန် အင်ဒီယန်း သို့မဟုတ် အလက်စကာ တိုင်းရင်းသား
အာမခံ အပြည့်အဝမရရှိသူ (ဆိုလိုသည်မှာ သင့်ကလေးတွင် ကျန်းမာရေးအာမခံ ရှိသော်လည်း၊ ၎င်းသည် ကာကွယ်ဆေးကို အကျုံးမဝင်ခြင်း ဖြစ်သည်။ VFC အစီအစဉ်တွင် စာရင်းသွင်းထားသော ကျန်းမာရေးစောင့်ရှောက်မှုပေးသူ 40,000 ကျော် ရှိသည်။)

အပိုဆောင်း အချက်အလက်များ

—
ပြန်လည်သုံးသပ်သည့်ရက်စွဲ- ဖေဖော်ဝါရီလ 2024

ဆက်စပ်အကြောင်းအရာများ

ဆင့်ပွားကင်ဆာများ
ရှားပါးသော်လည်း ကလေးငယ်၏ အသက်ကို ကယ်တင်ပေးခဲ့သော ထိုကုသမှုကိုယ်တိုင်ပင် နောက်ပိုင်းတွင် ဆင့်ပွားကင်ဆာ ဖြစ်ပေါ်လာစေနိုင်သည်။
ကျန်းမာသော နေထိုင်မှုပုံစံ
ကလေးဘဝက ပြင်းထန်သော ဖျားနာမှု ခံစားခဲ့ရသူများအတွက် ကျန်းမာသော လူနေမှုပုံစံသည် မရှိမဖြစ် လိုအပ်သည်။ အာဟာရပြည့်ဝစွာ စားသောက်ခြင်း၊ ကိုယ်လက်လှုပ်ရှားမှု ပြုလုပ်ခြင်းနှင့် ကျန်းမာရေး စစ်ဆေးမှုများ ပြုလုပ်ပုံကို လေ့လာပါ။