အဆစ်အစားထိုး ကုသမှု သို့မဟုတ် ခြေလက်ကို ဖြတ်တောက်ခြင်းမရှိဘဲ ခွဲစိတ်ခြင်းပြုလုပ်ပြီးနောက် စောင့်ရှောက်မှု

အဆစ်အစားထိုး ကုသမှု သို့မဟုတ် ခြေလက်ကို ဖြတ်တောက်ခြင်းမရှိဘဲ ခွဲစိတ်မှုများတွင် ပျက်စီးနေသော သို့မဟုတ် ရောဂါရှိသောအရိုးကို အစားထိုးရန် အရိုး သို့မဟုတ် အဆစ်အတု (ခြေတု) ကို ထည့်သွင်းခြင်း ပါဝင်ပါသည်။ ခွဲစိတ်မှု ပြုလုပ်ပြီးနောက် သင့်ကလေးသည် အိမ်တွင် ဘေးကင်းစွာဖြင့် ပြန်လည်သက်သာကောင်းမွန်လာစေရန် အချိန်နှင့် အထောက်အပံ့ လိုအပ်ပါလိမ့်မည်။ သင့်ကလေး၏ လုပ်ဆောင်နိုင်စွမ်း ပြန်လည်ရရှိပြီး လမ်းလျှောက်ခြင်း၊ ကစားခြင်းနှင့် နေ့စဉ်လုပ်ငန်းဆောင်တာများကို ပြန်လည်လုပ်ဆောင်နိုင်စေရန် ကြွက်သားသန်မာစေခြင်းနှင့် ရွေ့လျားနိုင်သည့်အတိုင်းအတာဆိုင်ရာ လေ့ကျင့်ခန်းများအတွက် သင်၏ ရုပ်ပိုင်းဆိုင်ရာကုထုံးပညာရှင်နှင့် အတူတကွ လုပ်ဆောင်ပါ။ 

အောက်ဖော်ပြပါ အကြံပြုချက်များသည် ရောဂါပိုးဝင်ခြင်းအန္တရာယ်ကို လျှော့ချရန်၊ ခြေတု (အဆစ်အတု သို့မဟုတ် ခြေလက်အတု) ကို ကာကွယ်ရန်နှင့် ဆေးကုသမှုခံယူရမည့်အချိန်ကို သိရှိရန်အတွက် ကူညီပေးနိုင်ပါသည်။ သင်၏ စောင့်ရှောက်မှုအဖွဲ့မှ ပေးသော ညွှန်ကြားချက်များကို အမြဲလိုက်နာဆောင်ရွက်ပါ။  

ရောဂါပိုးဝင်ခြင်းကို ကြိုတင်ကာကွယ်ခြင်း

ရောဂါပိုးဝင်ခြင်းသည် ကုသရန်ခက်ခဲနိုင်ပြီး တစ်ခါတစ်ရံတွင် ခြေတုသို့ ပျံ့နှံ့သွားနိုင်သောကြောင့် ထိခိုက်ဒဏ်ရာရရှိသည့် ခြေလက်ကို ကာကွယ်ရန်အတွက် အပိုအဆင့်များ လုပ်ဆောင်ရန်မှာ အရေးကြီးပါသည်။ 

• ဒဏ်ရာများကို ခြောက်သွေ့သန့်ရှင်းစွာထားပါ။ သင့်စောင့်ရှောက်မှုအဖွဲ့၏ ညွှန်ကြားချက်များကို အမြဲလိုက်နာဆောင်ရွက်ပြီး ဒဏ်ရာစောင့်ရှောက်မှုမပြုလုပ်မီ လက်များကို ဆေးကြောပါ။   
• သင့်ကလေးတွင် အောက်ပါ ရောဂါပိုးဝင်သည့် ရောဂါလက္ခဏာများရှိပါက သင်၏စောင့်ရှောက်မှုအဖွဲ့ကို ခေါ်ဆိုပါ- 
  • ဖျားခြင်း 
  • ထိခိုက်ဒဏ်ရာရရှိသည့် ခြေလက်တစ်ဝိုက်တွင် နီရဲခြင်း၊ ရောင်ရမ်းခြင်း၊ ပူခြင်း သို့မဟုတ် နာကျင်ခြင်း    
  • ထိခိုက်ဒဏ်ရာရရှိသည့် ခြေလက်ရှိ အနာမှ ပြည် သို့မဟုတ် ပုံမှန်မဟုတ်သည့် အရည်များ ယိုစိမ့်ခြင်း   
• ထိခိုက်ဒဏ်ရာရရှိသည့် ခြေလက်တွင် ပြတ်ရှဒဏ်ရာများ၊ ခြစ်ရာများနှင့် လက်သည်းငုပ်ခြင်းများမဖြစ်အောင် ရှောင်ကြဉ်ရန် ကြိုးစားပါ။ ၎င်းသည် ပြင်းထန်ဆိုးရွားသည့် ရောဂါပိုးဝင်ခြင်းကို ဖြစ်စေနိုင်ပါသည်။   
• ရောဂါများကို ချက်ချင်း ကုသပါ။ ဆီးလမ်းကြောင်းပိုးဝင်ခြင်းကဲ့သို့သော ရောဂါများသည် ခြေတုပတ်လည်တွင် ရောဂါပိုးဝင်ခြင်းကို ဖြစ်စေနိုင်ပါသည်။ 
• သင့်ကလေးတွင် ခြေတုရှိကြောင်းကို ကျန်းမာရေးစောင့်ရှောက်မှုပေးသူအားလုံးအား အသိပေးပါ။ ရောဂါပိုးဝင်ခြင်းကို ကာကွယ်ရန်အတွက် သင့်ကလေးသည် သွားနှင့် ခံတွင်းဆိုင်ရာ ကုသမှု၊ လုပ်ထုံးလုပ်နည်း သို့မဟုတ် ခွဲစိတ်မှုမပြုလုပ်မီ ပဋိဇီဝပိုးသတ်ဆေးများကို သောက်သုံးရန် လိုအပ်ပါသည်။ 
  • သင့်ကလေး၏စောင့်ရှောက်မှုအဖွဲ့အား လုပ်ဆောင်မည့်လုပ်ထုံးလုပ်နည်းများအကြောင်းကို အသိပေးပါ။ 
  • သင့်ကလေးသည် ပုံမှန်သွားနှင့် ခံတွင်းသန့်ရှင်းရေးမလုပ်မီတွင် ပဋိဇီဝပိုးသတ်ဆေးများကို သောက်သုံးရန် မလိုအပ်ပါ ။ 

လှုပ်ရှားမှုဆိုင်ရာ လမ်းညွှန်ချက်များကို လိုက်နာဆောင်ရွက်ပါ

ခွဲစိတ်မှု ပြုလုပ်ပြီးနောက် သင်၏စောင့်ရှောက်မှုအဖွဲ့သည် သင့်ကလေး ပြန်လည်သက်သာကောင်းမွန်လာနေစဉ်အတွင်း လုပ်ဆောင်နိုင်သည့် လှုပ်ရှားမှုဆိုင်ရာ ကန့်သတ်ချက်များ သို့မဟုတ် ကန့်သတ်မှုများကို ပေးပါလိမ့်မည်။ ခွဲစိတ်မှုမှ ပြန်လည်သက်သာကောင်းမွန်လာပြီးနောက်တွင်ပင် သင့်ကလေး၏ ရုပ်ပိုင်းဆိုင်ရာ လှုပ်ရှားမှုအချို့ကို လုပ်ဆောင်နိုင်စွမ်းသည် ခွဲစိတ်မှုမပြုလုပ်ခင်ကနှင့် ကွဲပြားနိုင်ပါသည်။ ၎င်းတို့သည် ထိတွေ့ရသည့် အားကစားများ သို့မဟုတ် အင်အားပြင်းထန်သည့် လှုပ်ရှားမှုများကဲ့သို့သော လှုပ်ရှားမှုအချို့အား ပြုလုပ်ခြင်းကို ရပ်တန့်ရန် လိုအပ်နိုင်ပါသည်။  

သင်၏ စောင့်ရှောက်မှုအဖွဲ့သည် ခြေတုကို ကာကွယ်ရန်နှင့် ဒဏ်ရာမရရှိအောင် ကြိုတင်ကာကွယ်ရန်အတွက် သီးခြားလှုပ်ရှားမှုဆိုင်ရာ ကန့်သတ်ချက်များကို ပေးပါလိမ့်မည်။  

• ထိတွေ့ရသည့် အားကစားနည်းများကို ရှောင်ကြဉ်ပါ။ ထိတွေ့ရသည့် အားကစားများဆိုသည်မှာ သင့်ကလေးသည် ကစားနေစဉ်အတွင်း အခြားကစားသမားများ သို့မဟုတ် ပစ္စည်းကိရိယာများနှင့် တိုက်ရိုက်ရုပ်ပိုင်းဆိုင်ရာထိတွေ့နိုင်ခြေရှိသည့် မည်သည့်အားကစားနည်းမဆိုကို ဆိုလိုပါသည်။    ၎င်းတို့တွင် အမေရိကန်ဘောလုံး၊ ဘောလုံး၊ ဘတ်စကက်ဘော၊ ဟော်ကီနှင့် လက်ခရော့စ်ကဲ့သို့သော အားကစားနည်းများ ပါဝင်ပါသည်။  
• အင်အားပြင်းထန်သည့် လှုပ်ရှားမှုများအကြောင်းနှင့် ပတ်သက်၍ သင်၏စောင့်ရှောက်မှုအဖွဲ့နှင့် တိုင်ပင်ဆွေးနွေးပါ။ အင်အားပြင်းထန်သည့် လှုပ်ရှားမှုများသည် အရိုးများ သို့မဟုတ် အဆစ်များအပေါ်သို့ ဖိအားများစွာကို ဖြစ်စေနိုင်ပါသည်။ အထူးသဖြင့် သင့်ကလေးသည် ခြေထောက်ကို ထိခိုက်ထားပါက ပြေးခြင်း သို့မဟုတ် ခုန်ခြင်းကဲ့သို့သော လှုပ်ရှားမှုများကို ရှောင်ကြဉ်ရန် လိုအပ်နိုင်ပါသည်။ 
• အင်အားမပြင်းထန်သည့် လှုပ်ရှားမှုများကို အားပေးပါ။ ကိုယ်လက်လှုပ်ရှားမှုသည် ကြွက်သားများနှင့် အဆစ်များကို သန်မာစေရန် ကူညီပေးပြီး အလုံးစုံကျန်းမာရေးကို အထောက်အကူ ဖြစ်စေပါသည်။ ရေကူးခြင်း၊ လမ်းလျှောက်ခြင်း သို့မဟုတ် ဂေါက်သီးရိုက်ခြင်းကဲ့သို့သော သင့်ကလေးအတွက် ဘေးကင်းလုံခြုံသည့် ရွေးချယ်စရာများအကြောင်းကို သင်၏စောင့်ရှောက်မှုအဖွဲ့အား မေးမြန်းပါ။ ရုပ်ပိုင်းဆိုင်ရာကုထုံးပညာရှင် သို့မဟုတ် အလုပ်အကိုင်ဆိုင်ရာ ကုထုံးပညာရှင် တစ်ဦးသည် သင့်ကလေး ဘေးကင်းလုံခြုံစွာ နေထိုင်နိုင်စေရန်အတွက် လှုပ်ရှားမှုများကို ချိန်ညှိရန် ကူညီပေးနိုင်ပါသည်။ 

ခြေတုဆိုင်ရာ ပြဿနာများကို စောင့်ကြည့်ပါ

အဆစ်အစားထိုး ကုသမှု သို့မဟုတ် ခြေလက်ကို ဖြတ်တောက်ခြင်းမရှိဘဲ ခွဲစိတ်ခြင်း ပြုလုပ်ပြီးနောက်၊ တစ်ခါတစ်ရံ၌ သင့်ကလေး၏ ခြေတုလက်တုတွင် ပြဿနာများ ရှိနိုင်ပါသည်။ ၎င်းတို့တွင် ခြေတုအနီးနားတွင် ထိခိုက်ဒဏ်ရာရရှိခြင်း သို့မဟုတ် ပျက်စီးခြင်း၊ ရောဂါပိုးဝင်ခြင်း၊ ချောင်ခြင်း သို့မဟုတ် အစိတ်အပိုင်းများ နေရာရွေ့ခြင်းတို့ ပါဝင်နိုင်ပါသည်။   

အောက်ဖော်ပြပါအရာများထဲမှ တစ်ခုခုဖြစ်ပေါ်ပါက သင်၏စောင့်ရှောက်မှုအဖွဲ့အား ချက်ချင်းအသိပေးပါ- 

• အထူးသဖြင့် ထိခိုက်ဒဏ်ရာရရှိသည့် ခြေလက်တွင် တိုက်မိခြင်း သို့မဟုတ် လဲကျပြီးနောက်တွင် ပျောက်ကင်းသက်သာခြင်းမရှိသော နာကျင်မှုအသစ် သို့မဟုတ် ပိုဆိုးလာသော နာကျင်မှု သို့မဟုတ် ရောင်ရမ်းမှု ဖြစ်ပါက 
• အထူးသဖြင့် သင့်ကလေးသည်လည်း ဖျားနာနေပြီး ခြေလက်ပေါ်ရှိ ဒဏ်ရာတွင် နီရဲခြင်း၊ နွေးထွေးခြင်း သို့မဟုတ် အရည်များ ယိုစိမ့်ခြင်း ဖြစ်ပါက 
• ခြေလက်ကို အသုံးပြုသည့်အခါတွင် အက်ကွဲသံ သို့မဟုတ် မတည်ငြိမ်သည့် ခံစားချက် ဖြစ်ပါက  
• အဆစ် ရွေ့လျားနိုင်သည့် အတိုင်းအတာပမာဏ၊ ခြေလက်၏ ပုံစံအနေအထား သို့မဟုတ် ၎င်း မည်သို့ကွေးညွတ်ခြင်း သို့မဟုတ် လည်နေခြင်းတို့တွင် ပြောင်းလဲမှုများရှိပါက 

အကြံပြုထားသည့် နောက်ဆက်တွဲ စောင့်ရှောက်မှုကို ခံယူပါ

ရုပ်ပိုင်းဆိုင်ရာကုထုံး 

သင့်ကလေးသည် နောက်ဆက်တွဲစောင့်ရှောက်မှု၏ တစ်စိတ်တစ်ပိုင်းအ‌နေဖြင့် ရုပ်ပိုင်းဆိုင်ရာကုထုံးကို ခံယူရမည်ဖြစ်ပါသည်။ ရုပ်ပိုင်းဆိုင်ရာကုထုံးသည် သန်စွမ်းမှု၊ ရွေ့လျားမှုနှင့် ခြေလက်ကို ဘေးကင်းစွာအသုံးပြုခြင်းတို့ကို တိုးတက်စေရန် ကူညီပေးနိုင်ပါသည်။  

ခြေတုလက်တုကို စောင့်ကြည့်ခြင်းနှင့် ချိန်ညှိခြင်း 

ခြေတုကို စစ်ဆေးရန်၊ ချိန်ညှိရန် သို့မဟုတ် သင့်ကလေး ကြီးထွားလာသည်နှင့်အမျှ အစားထိုးကုသရန် လိုအပ်နိုင်ပါသည်။ သင်၏စောင့်ရှောက်မှုအဖွဲ့သည် ရေရှည် နောက်ဆက်တွဲလိုအပ်ချက်များကို ညွှန်ကြားပေးပါလိမ့်မည်။ 

သင်၏ စောင့်ရှောက်မှုအဖွဲ့ကို မေးရမည့် မေးခွန်းများ

• အိမ်၌ ကျွန်ုပ်ကလေး ပြန်လည်သက်သာကောင်းမွန်လာနေချိန်တွင် မည်သည်တို့ကို မျှော်လင့်ထားသင့်သနည်း။  
• ကျွန်ုပ်သည် ရောဂါပိုးဝင်ခြင်း သို့မဟုတ် ခြေတုပြဿနာများ၏ မည်သည့်ရောဂါလက္ခဏာများကို စောင့်ကြည့်သင့်ပါသနည်း။  
• ကျွန်ုပ်သည် ကျွန်ုပ်ကလေး၏ နာကျင်မှုကို ဘေးကင်းလုံခြုံစွာဖြင့် မည်သို့စီမံခန့်ခွဲနိုင်သနည်း။  
• မည်သည့်လှုပ်ရှားမှုများသည် ဘေးကင်း၍ ကျွန်ုပ်ကလေးသည် မည်သည်တို့ကို ရှောင်ကြဉ်သင့်ပါသနည်း။  
• ကျွန်ုပ်ကလေးသည် မည်သည့်အချိန်တွင် ကျောင်းပြန်တက်၍ ပုံမှန်လှုပ်ရှားမှုများကို ပြန်လုပ်နိုင်မည်နည်း။ 
• ကျွန်ုပ်ကလေးသည် ရုပ်ပိုင်းဆိုင်ရာကုထုံးကို မည်သည့်အချိန်တွင် စတင်သင့်၍၊ ၎င်းတွင် မည်သည်တို့ ပါဝင်မည်နည်း။  
• အနာဂတ်တွင် ကျွန်ုပ်ကလေး၏ ခြေတုကို ပြန်လည်ချိန်ညှိရန် သို့မဟုတ် အစားထိုးကုသရန် လိုအပ်ပါသလား။ 
• ကျွန်ုပ်ကလေးသည် မည်သည့်နောက်ဆက်တွဲစောင့်ရှောက်မှုကို လိုအပ်မည်နည်း။ 
• စောင့်ရှောက်မှုအဖွဲ့ကို မည်သည့်အချိန်တွင် ခေါ်ဆိုသင့်ပါသနည်း။ 

ဆက်စပ်သည့် အကြောင်းအရာ