သွေးယိုစိမ့်မှုရောဂါရှိသော ကလေးတွင် သွေးအနည်းငယ်ထွက်ခြင်းကို ကုသခြင်း

သွေးယိုစိမ့်မှုရောဂါဆိုသည်မှာ အဘယ်နည်း။

သွေးယိုစိမ့်မှုရောဂါဆိုသည်မှာ သွေးများ ကောင်းစွာမခဲနိုင်သည့် ဆေးဘက်ဆိုင်ရာ အခြေအနေတစ်ခု ဖြစ်ပါသည်။ ပုံမှန်အားဖြင့် သွေးဥမွှားဟုခေါ်သော သွေးဆဲလ်များနှင့် သွေးခဲစေသည့်ပစ္စည်းဟုခေါ်သော ပရိုတင်းများသည် သွေးခဲများဖြစ်စေရန် ကူညီပေးပြီး သွေးထွက်ခြင်းကို ရပ်တန့်စေပါသည်။ အကယ်၍ သင့်ကလေးတွင် သွေးယိုစိမ့်မှုရောဂါရှိပါက သွေးထွက် များခြင်း သို့မဟုတ် ကြာရှည်ခြင်းတို့ ဖြစ်နိုင်ပါသည်။

သင့်ကလေးတွင် သွေးထွက်သည့်အခါ အမြန်လုပ်ဆောင်ရန်မှာ အရေးကြီးပါသည်။ သွေးထွက်ခြင်းဖြစ်စဉ်များသည် များသောအားဖြင့် အသေးအဖွဲသာ ဖြစ်လေ့ရှိပါသည်။ သွေးအနည်းငယ်ထွက်ခြင်းသည် ဒဏ်ရာတစ်ခုကြောင့်ဖြစ်နိုင်ပြီး ပြတ်ရှဒဏ်ရာ၊ အနာ သို့မဟုတ် အညိုအမဲစွဲဒဏ်ရာများကို ဖြစ်စေနိုင်ပါသည်။ သွေးထွက်ခြင်းသည် နှာခေါင်းသွေးယိုခြင်းကဲ့သို့သော ဒဏ်ရာမရှိဘဲနှင့်လည်း ဖြစ်နိုင်ပါသည်။ သင်သည် ဤဖြစ်စဉ်များကို အများအားဖြင့် အိမ်တွင် ကုသနိုင်ပါသည်။

အကယ်၍ သွေးထွက်ခြင်းသည် ပြင်းထန်ပါက သို့မဟုတ် မရပ်တန့်ပါက ချက်ချင်းဆေးကုသမှု ခံယူပါ။

သေးငယ်သည့် ပြတ်ရှဒဏ်ရာ သို့မဟုတ် အနာကို မည်သို့ကုသရမည်နည်း

သင့်ကလေးတွင် အိမ်မှာကုသနိုင်သည့် အနည်းငယ်သွေးထွက်မှု သို့မဟုတ် ဒဏ်ရာအနည်းငယ်ရရှိပါက ဤအခြေခံ အရေးပေါ်ကုသမှုအဆင့်များသည် သင့်ကို ကူညီပေးနိုင်ပါသည်။ သင်၏ စောင့်ရှောက်မှုအဖွဲ့မှ ပေးသော ညွှန်ကြားချက်များကို အမြဲလိုက်နာဆောင်ရွက်ပါ။

သွေးတိတ်စေရန် ဖိထားပါ

အနာပေါ်တွင် ညင်သာစွာဖိထားရန် သန့်ရှင်းသော အဝတ်၊ မျက်နှာသုတ်ပုဝါ သို့မဟုတ် ဂွမ်းစကို အသုံးပြုပါ။ သွေးတိတ်သည်အထိ ဖိထားပါ။ 

အနာကို သန့်စင်ပြီး ပတ်တီးစည်းပါ 

ပြတ်ရှဒဏ်ရာ သို့မဟုတ် အနာကို ထိကိုင်ခြင်းမပြုမီ လက်ကို ဆပ်ပြာနှင့် ရေဖြင့် သေချာစွာဆေးကြောပါ။ ဖုန်နှင့် အမှိုက်များကို ဖယ်ရှားရန် အနာကို ဆေးကြောပါ။ အနာကို ဆပ်ပြာနှင့် ရေဖြင့် သန့်စင်ဆေးကြောပါ။ ကောင်းစွာ ဆေးကြောပါ။ နေရာကို ခြောက်သွေ့အောင်ပြုလုပ်ပြီး ပိုးသတ်ထားသော ပတ်တီး သို့မဟုတ် ဂွမ်းစဖြင့် ဖုံးအုပ်ထားပါ။

RICE နည်းလမ်းကို အသုံးပြုပါ

RICE နည်းလမ်းသည် နာကျင်ခြင်းနှင့် ရောင်ရမ်းမှုကို လျှော့နည်းစေနိုင်ပြီး နောက်ထပ်သွေးထွက်ခြင်းကို ကာကွယ်ပေးနိုင်ပါသည်။ ၎င်းသည် အရွတ်ဒဏ်ရာရခြင်း၊ ကြွက်သားဒဏ်ဖြစ်ခြင်းနှင့် ညိုမဲဒဏ်ရာများအတွက်လည်း အထောက်အကူဖြစ်စေပါသည်။ RICE နည်းလမ်း၏ အဆင့်များတွင် အောက်ပါတို့ ပါဝင်ပါသည်-

• အနားယူပါ- ဒဏ်ရာရသည့်နေရာကို အနားပေးပါ။ ၎င်းသည် သွေးထွက်နိုင်ခြေကို လျှော့ချပေးပြီး သက်သာပျောက်ကင်းမှုကို မြှင့်တက်စေပါလိမ့်မည်။ ထိုနေရာကို အသုံးမပြုပါနှင့် သို့မဟုတ် အလေးမတင်ပါနှင့်။
  
• ရေခဲကပ်ပါ- ရေခဲအိတ် ကပ်ပါ။ အရေပြားကို ကာကွယ်ရန်အတွက် ရေခဲအိတ်ကို အဝတ်စပေါ်တွင် တင်ပါ။
  
• ဖိထားခြင်း- နေရာကို အထောက်အပံ့ဖြစ်စေရန်နှင့် ရောင်ရမ်းမှုကို လျော့ကျစေရန်အတွက် ထိုနေရာကို မျှော့ကြိုးထည့်ထားသည့်ပတ်တီးဖြင့် စီးပါ။
  
• မြှင့်ထားပါ- ဒဏ်ရာရသည့်နေရာကို မြှင့်ထားပါ။ ဒဏ်ရာရသည့် ခန္ဓာကိုယ်အစိတ်အပိုင်းကို နှလုံးအထက်တွင် ထားနိုင်ရန် ကြိုးစားပါ။
  

RICE နည်းလမ်းကို အနည်းဆုံး 24 နာရီ ဆက်လက်၍ ပြုလုပ်ပါ။ 

ပြတ်ရှဒဏ်ရာများ သို့မဟုတ် အနာများအတွက် နေရာကို သန့်ရှင်းခြောက်သွေ့စွာထား၍ ရောဂါပိုးဝင်ခြင်းမှ ကာကွယ်ရန် အဆင့်များကို လုပ်ဆောင်ပါ။ အနာစောင့်ရှောက်မှုဆိုင်ရာ အထူးညွှန်ကြားချက်များနှင့် ပတ်သက်၍ သင့်စောင့်ရှောက်မှုအဖွဲ့နှင့် တိုင်ပင်ဆွေးနွေးပါ။

သင်၏ကျန်းမာရေးစောင့်ရှောက်မှုပေးသူနှင့် တိုင်ပင်ဆွေးနွေးခြင်းမရှိဘဲ ဆေးညွှန်းမပါဘဲ အလွယ်တကူဝယ်ယူနိုင်သည့် NSAID အကိုက်အခဲပျောက်ဆေးများကို မပေးပါနှင့်။

အခြား အနည်းငယ်သွေးထွက်မှုများကို မည်သို့ ကုသရမည်နည်း

နေ့စဉ်လှုပ်ရှားမှုများသည် သွေးထွက်ခြင်း သို့မဟုတ် အညိုအမဲစွဲခြင်းတို့ကို ဖြစ်စေနိုင်ပါသည်။ အိမ်တွင် သင့်ကလေးကို စောင့်ရှောက်ရန် အောက်ပါအကြံပြုချက်များကို အသုံးပြုပါ။

• ပါးစပ် သို့မဟုတ် သွားဖုံးမှ သွေးထွက်ခြင်း- ပါးစပ်ကို ရေခဲ သို့မဟုတ် ရေအေးဖြင့် ပလုတ်ကျင်းပါ။ သွားဖုံးသွေးယိုခြင်းကို ကာကွယ်ရန် ခံတွင်းစောင့်ရှောက်မှုအတွက် သင့်စောင့်ရှောက်မှုအဖွဲ့၏ ညွှန်ကြားချက်များကို လိုက်နာဆောင်ရွက်ပါ။
  
• နှာခေါင်းသွေးယိုခြင်း- သင့်ကလေးကို မတ်မတ်ထိုင်ခိုင်းပြီး ရှေ့သို့အနည်းငယ်ကိုင်းထားပေးပါ။ နှာခေါင်းရိုးအောက်ရှိ နှာခေါင်းပေါက်တစ်ဖက်စီ၏ အပြင်ကို ဖိထားပေးပါ။ ထိုနေရာကို လက်မနှင့် လက်ညှိုးဖြင့် ညှစ်ထားပြီး 5–10 မိနစ်ခန့် ညင်သာစွာ ဖိထားပါ။ သွေးတိတ်သွားခြင်း ရှိ၊ မရှိကို ကြည့်ရန် ဖိထားခြင်းကို ဖြည်းဖြည်းချင်း လွှတ်ပါ။
  

သင့်ရဲ့ စောင့်ရှောက်မှုအဖွဲ့ကို မည်သည့်အချိန်တွင် ဆက်သွယ်ရမည်နည်း

အောက်ပါတို့တွင် ဆေးကုသမှုခံယူပါ-

• သွေးထွက်ခြင်းသည် များလွန်းပါက သို့မဟုတ် 15–20 မိနစ်ကြာသည်အထိ သွေးမတိတ်ပါက။
  
• အနာသည် ကြီးပါက သို့မဟုတ် နက်ပါက။
  
• အနာတွင် သင် သန့်ရှင်းလို့မရသည့် ဖုန်နှင့် အမှိုက်များ ရှိပါက။
  
• နာကျင်မှုသည် အလွန်ပြင်းထန်ပါက သို့မဟုတ် ပို၍ ဆိုးလာပါက။
  
• သင့်ကလေးတွင် ခန္ဓာကိုယ်အတွင်း သွေးထွက်ခြင်း လက္ခဏာများ ရှိပါက။
  
• သင်သည် နီရဲခြင်း၊ ရောင်ရမ်းခြင်း၊ ပူနွေးခြင်း သို့မဟုတ် ပြည်တည်ခြင်းကဲ့သို့သော ပိုးဝင်သည့် လက္ခဏာများကို သတိထားမိပါက
  
• အနာသည် သက်သာပျောက်ကင်းခြင်း မရှိပါက။
  
• ဒဏ်ရာသည် တိရစ္ဆာန်တစ်ကောင်မှ ကိုက်ခြင်း သို့မဟုတ် ညစ်ပတ်၍သံချေးတက်နေသည့် အရာဝတ္ထုကြောင့် ဖြစ်ပါက။
  

ဆက်စပ် အကြောင်းအရာများ