ဆေးဝါးများကို ဘေးကင်းလုံခြုံစွာ သိမ်းဆည်းခြင်းနှင့် စွန့်ပစ်ခြင်း

ဆေးဝါးများကို ဘေးကင်းလုံခြုံစွာ မည်သို့သိမ်းဆည်းရမည်နည်း။

ဆေးဝါးများကို မှန်ကန်သောနည်းလမ်းဖြင့် မသိမ်းဆည်းပါက ၎င်းတို့သည် ကောင်းစွာ အာနိသင် မပြနိုင်ပါ သို့မဟုတ် အန္တရာယ်ပင် ဖြစ်လာနိုင်ပါသည်။ ဘေးကင်းလုံခြုံစွာ သိမ်းဆည်းခြင်းသည် မတော်တဆ အဆိပ်သင့်ခြင်း၊ ပမာဏအလွန်အကျွံ သောက်မခြင်း သို့မဟုတ် အလွဲသုံးစား အသုံးပြုခြင်းအန္တရာယ်များကိုလည်း လျော့နည်းစေပါသည်။

ဆေးဝါးများကို ဘေးကင်းလုံခြုံစွာ သိမ်းဆည်းရန်အတွက် သတိပေးချက်များတွင် အောက်ပါတို့ ပါဝင်ပါသည်-

• ဆေးဝါးများကို ကလေးများ မမြင်နိုင်၍ မရောက်နိုင်သည့် နေရာတွင် သိမ်းဆည်းပါ။  အသုံးပြုပြီးတိုင်း ဆေးဝါးများကို သိမ်းဆည်းပါ။ ဆေးများကို မကြာမီတွင် ထပ်မံပေးရမည်ဆိုလျှင်တောင်မှ ဆေးဝါးများကို ကောင်တာပေါ်တွင် သို့မဟုတ် ပိုက်ဆံအိတ် သို့မဟုတ် ကျောပိုးအိတ်ထဲတွင် မထားခဲ့ပါနှင့်။ ၎င်းသည် အထူးသဖြင့် အန္တရာယ်ရှိသည့် ဆေးဝါးများ သို့မဟုတ် ထိန်းချုပ်ဆေးဝါးများအတွက် အရေးကြီးပါသည်။
• ဆေးဝါးများကို ၎င်းတို့၏ တံဆိပ်ကပ်ထားသည့် မူရင်းဘူးများထဲတွင် သိမ်းဆည်းပါ။ ဆေးတံဆိပ်တွင် ဆေးဝါးအမည်၊ ဆေးပမာဏ၊ ပြန်လည်ဖြည့်တင်းမှုများနှင့် ညွှန်ကြားချက်များကဲ့သို့သော အရေးကြီးသည့် သတင်းအချက်အလက်များ ပါရှိပါသည်။ အမျိုးအစားမတူညီသောဆေးဝါးများကို ပုလင်းတစ်လုံးတည်းတွင် မည်သည့်အခါမှ မရောနှောပါနှင့်။ ဆေးထည့်သည့်ဗူး သို့မဟုတ် ဆေးထည့်သည့်ပစ္စည်းကို အသုံးပြုပါက မူရင်းဆေးဘူးများကိုလည်း သိမ်းဆည်းထားပါ။
• ဆေးဝါး၏ အညွှန်းတံဆိပ်ကို စစ်ဆေးပြီး သိမ်းဆည်းမှုဆိုင်ရာ ညွှန်ကြားချက်များကို လိုက်နာဆောင်ရွက်ပါ။ ဆေးဝါးအချို့သည် ရေခဲသေတ္တာထဲတွင် သိမ်းဆည်းရန် သို့မဟုတ် အလင်းရောင်မရှိသည့် နေရာတွင် သိမ်းဆည်းရန် လိုအပ်ပါသည်။ အကယ်၍ မသေချာပါက ဆေးအား မည်သို့သိမ်းဆည်းရမည်ကို ဆေးဝါးကျွမ်းကျင်ပညာရှင်အား မေးမြန်းပါ။
• ရေခဲသေတ္တာတွင် သိမ်းဆည်းခြင်း မပြုလုပ်ရသည့် ဆေးဝါးများကို ခြောက်သွေ့ပြီး အေးမြသည့်နေရာတွင် သိမ်းဆည်းပါ။ ဆေးဝါးများကို ရေချိုးခန်းထဲတွင် မသိမ်းဆည်းပါနှင့်။ ရေပန်းများ၊ ရေချိုးခြင်းများနှင့် ရေစိမ်ကန်များမှ ထွက်သည့် အစိုဓာတ်နှင့် အပူသည် ဆေးဝါးများကို ပျက်စီးစေနိုင်ပါသည်။ ဆေးဝါးများကို သိမ်းဆည်းရန် ဘေးကင်းလုံခြုံသည့် နေရာများတွင် ဗီရိုအတွင်းရှိ စင် သို့မဟုတ် ဘေစင် သို့မဟုတ် မီးဖိုနှင့်ဝေးသော မီးဖိုချောင်ကက်ဘိနက်တို့ ပါဝင်ပါသည်။
• ရေခဲသေတ္တာတွင် သိမ်းဆည်းရမည့် ဆေးဝါးများကို အစားအစာများနှင့် ဝေးဝေးတွင် သိမ်းဆည်းပါ။ ရေခဲသေတ္တာထဲတွင် သိမ်းဆည်းရန် လိုအပ်သော ဆေးဝါးများကို ရေခဲသေတ္တာ၏ အံဆွဲ သို့မဟုတ် ဘူးထဲတွင် သိမ်းဆည်းပါ။ ဆေးဝါးများကို ပုံသေအပူချိန်တွင် သိမ်းဆည်းပါ။ ဆေးဝါးများကို ရေခဲအခန်းထဲတွင် သို့မဟုတ် ရေခဲအခန်းအနီးတွင် မထားပါနှင့်။
• ဆေးဝါးများကို ကားထဲတွင် မသိမ်းဆည်းပါနှင့်။ ကားသည် အလွန်ပူလွန်းခြင်း သို့မဟုတ် အလွန်အေးလွန်းခြင်းတို့ ဖြစ်လာနိုင်ပါသည်။ အပူချိန်လွန်ကဲခြင်းသည် ဆေးဝါးများကို အာနိသင်ပြောင်းလဲစေနိုင်ပါသည် သို့မဟုတ် ပျက်စီးစေနိုင်ပါသည်။ သင် ကားပေါ်မှဆင်းသည့်အခါ ဆေးဝါးများကို ယူဆောင်သွားပြီး လုံခြုံစွာရှိနေကြောင်းကို သေချာအောင်ပြုလုပ်ပါ။ 

ဆေးဝါးများကို ဘေးကင်းလုံခြုံစွာ မည်သို့စွန့်ပစ်ရမည်နည်း

ဆေးဝါးများအား မည်သို့စွန့်ပစ်ရမည်ကို သင်၏ဆေးဝါးကျွမ်းကျင်ပညာရှင် သို့မဟုတ် ကျန်းမာရေးစောင့်ရှောက်မှုပေးသူအား မေးမြန်းပါ။ ၎င်းတို့သည် ဆေးဝါးအမျိုးအစားပေါ် မူတည်၍ မတူညီသော အဆင့်များကို အကြံပြုပေးနိုင်ပါသည်။ အန္တရာယ်ရှိသည့် ဆေးဝါးများကို ဘေးကင်းလုံခြုံစွာ ကိုင်တွယ်ခြင်းအတွက် သင့်စောင့်ရှောက်မှုအဖွဲ့၏ ညွှန်ကြားချက်များကို လိုက်နာဆောင်ရွက်ပါ။

• ဆေးဝါးများ ပြန်လည်သိမ်းဆည်းသည့်နေရာများ သို့မဟုတ် ဆေးဝါးပြန်လည်သိမ်းဆည်းသည့်ပွဲများ- ဆေးဆိုင်များနှင့် ဆေးခန်းများစွာတွင် သင်ဆေးဝါးများကို စွန့်ပစ်နိုင်သည့် လုံခြုံသော ဆေးဝါးပြန်လည်သိမ်းဆည်းသည့်သေတ္တာများ ရှိပါသည်။ ဆေးဝါးများ ပြန်လည်သိမ်းဆည်းသည့်ပွဲများကို သင့်ဒေသခံအသိုင်းအဝိုင်းတွင် ပံ့ပိုးပေးနိုင်ပါသည်။
• ဆေးလက်တွေ့သုတေသနဆိုင်ရာ ဆေးများကို ပြန်လည်အပ်နှံခြင်း- ဆေးလက်တွေ့သုတေသနတွင် ပါဝင်သည့် လူနာများသည် ညွှန်ကြားချက်များအတိုင်း သုတေသနဆိုင်ရာ ဆေးဝါးများအားလုံးကို ဆေးရုံဆေးဆိုင် သို့မဟုတ် ဆေးလက်တွေ့သုတေသနအဖွဲ့ထံသို့ ပြန်လည်အပ်နှံသင့်ပါသည်။ သုတေသနဆိုင်ရာ ဆေးဝါးများကို တိတိကျကျရေတွက်ထားပြီး သုတေသနလေ့လာမှု၏ အစိတ်အပိုင်းအနေဖြင့် စောင့်ကြည့်လေ့လာပါသည်။

ဆေးဝါးများကို အိမ်သုံးအမှိုက်ပုံးထဲသို့ မည်သို့စွန့်ပစ်ရမည်နည်း

အိမ်သုံးအမှိုက်ပုံးထဲသို့ စွန့်ပစ်နိုင်သည့် ဆေးဝါးများအတွက် အောက်ပါအဆင့်များကို လိုက်နာဆောင်ရွက်ပါ-

1. ဆေး (ဆေးပြားများ သို့မဟုတ် အရည်) ကို ကြောင်ချေး၊ အမှိုက်မှုန့် သို့မဟုတ် ကော်ဖီမှုန့်ကဲ့သို့သော မနှစ်သက်ဖွယ်ပစ္စည်းနှင့် ရောမွှေပါ။
2. အရောအနှောကို လေလုံပိတ် အိတ် သို့မဟုတ် ဘူးထဲသို့ ထည့်ပါ။
3. လေလုံပိတ်ဘူးကို အမှိုက်ပုံးထဲသို့ စွန့်ပစ်ပါ။
4. ဆေးဗူးပေါ်မှ မူလဆေးညွှန်ကြားချက်ပါရှိသော လေဗယ်ညွှန်းရှိ ကိုယ်ရေးအချက်အလက်အားလုံးကို ခြစ်ပြီး ဖျက်ပစ်ပါ။ ထို့နောက် စွန့်ပစ်ပါ။ 

အခြားညွှန်ကြားချက်များမရှိပါက ဆေးဝါးများကို  အိမ်သာထဲသို့  ရေဆွဲချ၍ မစွန့်ပစ်ပါနှင့်။ ဆေးဝါးများသည် ရေစနစ်ထဲသို့ ဝင်ရောက်သွားပြီး အခြားသူများကို ဖျားနာစေနိုင်သည် သို့မဟုတ် ပတ်ဝန်းကျင်ကို ထိခိုက်စေနိုင်ပါသည်။

သင်သည် အမေရိကန်ပြည်ထောင်စုတွင် နေထိုင်ပါက  သင့်ဒေသအတွင်းရှိ  ဆေးဝါးများ ပြန်လည်အပ်နှံသည့်နေရာများကို ရှာဖွေပါ။ သင်သည်  FDA ၏ Flush List ကိုလည်း စစ်ဆေးနိုင်ပါသည်။

မည်သည့်အခါတွင် ဆေးဝါးများကို စွန့်ပစ်ရမည်နည်း

အောက်ပါအခြေအနေများတွင် ဆေးဝါးများကို စွန့်ပစ်ရပါမည်-

• ဆေးတောင့်များ သို့မဟုတ် ဆေးပြားများ၏ ကျိုးပဲ့နေသော အပိုင်းအစများ ရှိပါက စွန့်ပစ်ပါ။  သင်သည် မှန်ကန်သည့်ဆေးပမာဏကို ပေးနိုင်မည် မဟုတ်သောကြောင့် ၎င်းတို့ကို ချက်ချင်းစွန့်ပစ်ပါ။ အချို့ဆေးဝါးများသည် ပြတ်ထွက်ခြင်း သို့မဟုတ် ကျိုးပဲ့နေခြင်းဖြစ်လျှင်ပင် အန္တရာယ်ဖြစ်စေနိုင်ပါသည်။
• သက်တမ်းကုန်ဆုံးသွားပါက စွန့်ပစ်ပါ။ ဆေးပုလင်းပေါ်ရှိ သက်တမ်းကုန်ဆုံးရက်ကို စစ်ဆေးပါ။ သက်တမ်းကုန်ဆုံးသွားသော ဆေးဝါးများသည် ကောင်းစွာ အာနိသင်မရှိခြင်း ဖြစ်နိုင်ပါသည် သို့မဟုတ် အန္တရာယ်ကို ဖြစ်စေနိုင်ပါသည်။
• ၎င်းတို့သည် အရောင်၊ အနံ့ သို့မဟုတ် မာကြောမှုတို့ ပြောင်းလဲသွားနိုင်ပါသည်။ အရောင်ပြောင်းသွားသည့်၊ အက်ကွဲနေသည့် သို့မဟုတ် အနံ့အသစ် သို့မဟုတ် အနံ့ဆိုးသော ဆေးဝါးများကို အသုံးမပြုပါနှင့်။ နောက်ကျိနေသော သို့မဟုတ် အရောင်ပြောင်းသွားသော၊ ပို၍ပျစ်လာသည့် သို့မဟုတ် ပျစ်ချွဲမှုပုံစံ ပြောင်းလဲသည့်၊ သို့မဟုတ် ပေါလောပေါ်နေသည့် အမှုန်အမွှားများရှိသည့် ဆေးအရည်ဆေးများကို အသုံးမပြုပါနှင့်။
• ၎င်းတို့ကို မလိုအပ်တော့ပါ။ အသုံးမပြုရသေးသော သို့မဟုတ် မလိုအပ်တော့သော ဆေးညွှန်းဆေးဝါးများကို နောင်တွင်အသုံးပြုရန်အတွက် သိမ်းဆည်းထားခြင်း မပြုလုပ်ပါနှင့်။ ယခင်ဖျားနာမှ ကျန်ရှိသည့်ဆေးဝါးများကို နောင်တွင်အသုံးပြုရန်အတွက် သိမ်းဆည်းမထားပါနှင့်။ ၎င်းတို့တွင် ပဋိဇီဝပိုးသတ်ဆေးများ၊ အကိုက်အခဲပျောက်ဆေး၊ ချောင်းဆိုးပျောက်ဆေးရည် သို့မဟုတ် မျက်စဉ်းဆေးများ ပါဝင်ပါသည်။ မည်သည့်ညွှန်ကြားသည့်ဆေးဝါးတစ်ခုခုကို မသောက်သုံးမီတွင်၊ ဆေးဝါးသည် မှန်ကန်သောအမျိုးအစားနှင့် ပမာဏဖြစ်ကြောင်းကို သေချာစေရန်အတွက် ကျန်းမာရေးစောင့်ရှောက်မှုပေးသူနှင့် ပြသပါ။ 

သင်၏ ကျန်းမာရေး စောင့်ရှောက်မှုအဖွဲ့ကို မေးရန် မေးခွန်းများ

• ကျွန်ုပ်သည် ဤဆေးဝါးကို မည်သို့ သိမ်းဆည်းရမည်နည်း။ ၎င်းသည် ရေခဲသေတ္တာထဲတွင် သိမ်းဆည်းရန် လိုအပ်ပါသလား၊ သို့မဟုတ် အလင်းရောင်နှင့် မထိတွေ့အောင် ကာကွယ်ထားရန် လိုအပ်ပါသလား။
• ဤဆေးအတွက် အထူးဘေးကင်းလုံခြုံမှုဆိုင်ရာ သီးခြားညွှန်ကြားချက်များ ရှိပါသလား။
• ကျွန်ုပ်သည် သိမ်းဆည်းမှုဆိုင်ရာ ညွှန်ကြားချက်များကို မှန်ကန်စွာ လိုက်နာခြင်း မရှိခဲ့ပါက မည်သို့လုပ်သင့်သနည်း။
• ဤဆေးဝါးသည် မည်သည့်အချိန်တွင် သက်တမ်းကုန်ဆုံးမည်နည်း။
• ကျွန်ုပ်သည် ကျန်နေသေးသည့် သို့မဟုတ် အသုံးမပြုရသေးသည့် ဆေးဝါးများကို ဘာလုပ်ရမည်နည်း။
• ဤဆေးကို အမှိုက်ပုံးထဲသို့ စွန့်ပစ်လို့ရပါသလား။
• ဒေသအတွင်းတွင် ဆေးဝါးများကို ပြန်လည်သိမ်းဆည်းသည့် နေရာများ ရှိပါသလား။

နောက်ထပ် အချက်အလက်များ ရှာဖွေရန်

ဆက်စပ်အကြောင်းအရာများ