ကလေးများ နားလည်သဘောပေါက်ရန် လွယ်ကူသည့် အဓိပ္ပာယ်ဖွင့်ဆိုချက်များ

မေ့ဆေး — လုပ်ထုံးလုပ်နည်းအတွင်း သို့မဟုတ် ခွဲစိတ်ကုထုံးပြုလုပ်စဉ်အတွင်း မြင်တွေ့နိုင်ခြင်း၊ ကြားနိုင်ခြင်း သို့မဟုတ် ခံစားရစေနိုင်ခြင်းမရှိသည့် အိပ်ပျော်စေသော ဆေးဝါး။

အသားစထုတ်ယူ၍ စစ်ဆေးခြင်း — ကင်ဆာဆဲလ်များ သို့မဟုတ် အခြားသော ရောဂါဖြစ်စေသည့် ဆဲလ်များတစ်ခုခုရှိ၊ မရှိကို အဏုကြည့်မှန်ဘီလူးအောက်တွင် ကြည့်ရှုရန် ခန္ဓာကိုယ်မှ တစ်ရှုးအစငယ်တစ်ခုကို ထုတ်ယူခြင်း။

သွေးဥဆဲလ် အရေအတွက် — သွေးဖြူဥဆဲလ်၊ သွေးနီဆဲလ်များနှင့် သွေးဥမွှားများ၏ အရေအတွက်ကို သိရှိစေသည့် ဓာတ်ခွဲခန်းတွင် ပြုလုပ်သော လေ့လာမှု။

သွေးဖောက်ထုတ်ခြင်း — သူနာပြုဆရာမ သို့မဟုတ် ဆရာ၀န်တစ်ဦးသည် သွေးပြန်ကြောတစ်ခုမှနေ၍ သွေးအချို့ကို ထုတ်ယူရန် ဆေးထိုးအပ်တစ်ချောင်းကို အသုံးပြုပါလိမ့်မည်။

သွေးသွင်းခြင်း — လိုအပ်သည့်အခါတွင် သင့်ခန္ဓာကိုယ်သို့ သွေးများကို ပိုမိုပေးသွင်းနိုင်သည့် နည်းလမ်းတစ်ခု။

ရိုးတွင်းခြင်ဆီ — အရိုးများ၏ အလယ်တွင်ရှိသည့် ပန်းနုရောင်ရှိသော ရေမြုပ်သဏ္ဌာန် ပစ္စည်း။ ဤနေရာသည် သွေးဆဲလ်များနှင့် ပင်မဆဲလ်ဟုခေါ်သော သွေးဆဲလ်အမျိုးအစားများအပါအဝင် ဆဲလ်အများအပြားကို ထုတ်လုပ်သည့်နေရာ ဖြစ်ပါသည်။

ရိုးတွင်းခြင်ဆီ အစားထိုးကုသခြင်း — ရိုးတွင်းခြင်ဆီ အစားထိုးကုသခြင်း (ပင်မဆဲလ် အစားထိုးကုသမှုဟုလည်း ခေါ်ဆိုသည်) သည် နာမကျန်းမှုအမျိုးမျိုးကို ကုသသည့်အစီအစဉ်၏ တစ်စိတ်တစ်ပိုင်း ဖြစ်ပါသည်။ ရိုးတွင်းခြင်ဆီ အစားထိုးကုသခြင်းတွင် ကျန်းမာသော သွေးဆဲလ်အစ (ပင်မဆဲလ်ဟု ခေါ်ဆိုသည်) ကို လူတစ်ဦး၏ ရိုးတွင်းခြင်ဆီ သို့မဟုတ် သွေးကြောမှ ထုတ်ယူပြီး ကုသမှုပြုလုပ်ရန် လိုအပ်သူထံသို့ ပြောင်းထည့်ပေးပါသည်။ တစ်ခါတစ်ရံတွင် သင့်ခန္ဓာကိုယ်မှ ရရှိသည့် ကျန်းမာသော ပင်မဆဲလ်များကိုလည်း အစားထိုးကုသခြင်းအတွက် အသုံးပြုနိုင်ပါသည်။ အခြားအချိန်များတွင် ပင်မဆဲလ်များကို သတ်မှတ်ထားသော အလှူရှင်တစ်ဦးထံမှ ရယူပါသည်။ ဆဲလ်များသည် အလှူရှင်၏ သွေးကြော သို့မဟုတ် ရိုးတွင်းခြင်ဆီမှ ရရှိနိုင်ပါသည်။ ပင်မဆဲလ်များကို ရိုးတွင်းခြင်ဆီမှထုတ်ယူလျှင် အလှူရှင်သည် ရိုးတွင်းခြင်ဆီကို ရှည်လျားသော အပ်တစ်ချောင်းဖြင့် ထုတ်ယူရန်အတွက် ခွဲစိတ်မှု ပြုလုပ်ရပါသည်။ ကျန်းမာသော ပင်မဆဲလ်များကို ရိုးတွင်းခြင်ဆီမှ သီးခြားထုတ်ယူပြီး လိုအပ်နေသည့် လူနာထံသို့ ထိုးသွင်းပေးပါသည်။

ကင်ဆာ — ခန္ဓာကိုယ်အတွင်း၌ မကျန်းမာသော ဆဲလ်များ ပေါက်ဖွားသည့် နာမကျန်းမှု ဖြစ်ပါသည်။ မကျန်းမာသည့်ဆဲလ်များ ဆက်၍ပွားများမှုများ လျင်မြန်စွာ ဖြစ်ပေါ်လာသည့်အခါ ကင်ဆာရောဂါ ဖြစ်ပွားလာသည်။ ကင်ဆာဆဲလ်များသည် မည်သည့်နေရာတွင် ရှိနေသည်ဖြစ်စေ ၎င်းတို့တည်ရှိသည့် ခန္ဓာကိုယ်အစိတ်အပိုင်း၏ လိုအပ်သောလုပ်ငန်းကို လုပ်ဆောင်ရာတွင် အခက်အခဲ ဖြစ်ပေါ်စေပါသည်။ ကင်ဆာအမျိုးအစားများစွာရှိကာ ၎င်းတို့တွင် ကိုယ်ပိုင်နာမည်များရှိကြပြီး ၎င်းတို့အတွက် မတူညီသည့် ဆေးဝါး သို့မဟုတ် ကုသမှုများ ရှိပါသည်။ ကင်ဆာများသည် ၎င်းတို့အား တွေ့ရှိသည့်နေရာ၊ တွေ့မြင်ရသည့်ပုံစံနှင့် ပေါက်ဖွားကြီးထွားသည့်နည်းလမ်းတို့အပေါ် မူတည်၍ ကွဲပြားခြားနားကြပါသည်။

ပိုက်ပြွန် — သေးငယ်ပါးလွှာပြီး ပျော့ပြောင်းသော ပြွန်တစ်ခုဖြစ်ပြီး အရည်များကို ခန္ဓာကိုယ်အတွင်း သို့မဟုတ် ပြင်ပသို့ ပေးသွင်းမှု ထုတ်ယူမှုများပြုလုပ်ရာတွင် အထောက်အကူပြုသည်။

ဆဲလ်များ — ခန္ဓာကိုယ်၏ အသေးငယ်ဆုံးသော အစိတ်အပိုင်းများဖြစ်ကြပြီး အဏုကြည့်မှန်ဘီလူးအကူအညီဖြင့်သာ မြင်တွေ့နိုင်သည်။ ဆဲလ်များသည် ခန္ဓာကိုယ်၏ အစိတ်အပိုင်းများအားလုံးကို တည်ဆောက်ရန်အတွက် ပုံစံတကျပြုလုပ်ထားသော ဘလောက်တုံးများသဖွယ် လုပ်ဆောင်ပါသည်။ ခန္ဓာကိုယ်ကို ဆဲလ်သန်းပေါင်းများစွာဖြင့် ပြုလုပ်ထားပါသည်။

ဦးနှောက်-ကျောရိုးရည် — ဦးနှောက်နှင့် ကျောရိုးတစ်ဝိုက်ရှိ အရည်။ ၎င်းကို အတိုကောက်အားဖြင့် CSF ဟု ခေါ်ဆိုကြသည်။ အဆိုပါအရည်သည် ဦးနှောက်နှင့် ကျောရိုးအား ကူရှင် သို့မဟုတ် အကာအကွယ်တစ်ခုသဖွယ် လုပ်ဆောင်ပေးပြီး ဘေးကင်းစိတ်ချရစေရန် ထိန်းသိမ်းပေးပါသည်။ ခန္ဓာကိုယ်အစိတ်အပိုင်းများ၏ ကြံ့ခိုင်မှုကို ထိန်းသိမ်းပေးရန်အတွက် ဤအရည်အတွင်းတွင် အာဟာရဓာတ်များ (ဗီတာမင်များသဖွယ်) ပါဝင်သည်။ ဆေးရုံတွင် ဆေးဘက်ဆိုင်ရာအဖွဲ့မှ တစ်စုံတစ်ဦးသည် CSF ပမာဏအနည်းငယ်ကို အဏုကြည့်မှန်ဘီလူးအောက်တွင် ကြည့်ရှုနိုင်ပြီး လူတစ်ဦး၏ ခန္ဓာကိုယ်သည် မည်သို့လုပ်ဆောင်နေကြောင်းနှင့် ဆေးဝါးသည် အထောက်အကူပြုနိုင်ခြင်းရှိ၊ မရှိနှင့် ပတ်သက်သည့် အရေးကြီးသော အချက်အလက်များကို ပြသပေးပါသည်။

ကင်ဆာဆေးသွင်းကုသခြင်း — တစ်ခါတစ်ရံတွင် ကီမိုဆေးသွင်းကုထုံးဟု ခေါ်ဆိုသည်။ ၎င်းသည် ကင်ဆာဆဲလ်များကို ရှင်းလင်းသုတ်သင်ရန် အသုံးပြုသည့် ဆေးဝါးအပြင်းစားတစ်မျိုးဖြစ်ပြီး ကင်ဆာဆဲလ်များ ခန္ဓာကိုယ်အတွင်း ပေါက်ဖွားကြီးထွားမှုကို ရပ်တန့်စေပါသည်။ ကင်ဆာဆေးသွင်းကုသခြင်းအမျိုးမျိုးရှိပြီး မတူညီသော နာမည်များဖြင့် မှည့်ခေါ်ပါသည်။ အချို့သော ကင်ဆာဆေးသွင်းကုသခြင်းကို ဆေးလုံးပုံစံဖြင့် ထုတ်လုပ်ပြီး အချို့ကိုမူ အရည်ပုံစံဖြင့် ထုတ်လုပ်ထားသည်။

ပိုးမွေးမြူခြင်း — သင့်ခန္ဓာကိုယ်အတွင်းရှိ ပိုးမွှားများကို စစ်ဆေးသည့် စစ်ဆေးမှုတစ်မျိုး။ ဆရာ၀န် သို့မဟုတ် သူနာပြုဆရာမသည် ပိုးမွေးမြူခြင်းကို ပြုလုပ်ရန် သင့်သွေးအချို့ကို အသုံးပြုနိုင်သည်။ ၎င်းတို့သည် သင့်တင်ပါး၊ နှာခေါင်း သို့မဟုတ် လည်မျိုကို ထိတွေ့ရန် သို့မဟုတ် သုတ်ရန် တို့ဖတ်တစ်ခုကို အသုံးပြုနိုင်သည်။

ရောဂါရှာဖွေဖော်ထုတ်မှု — ဖျားနာမှုတစ်ခု၏ အမည်။ လူနာတစ်ဦးအား မည်သည့်အရာက နာမကျန်းဖြစ်စေကြောင်းကို သိရှိဖော်ထုတ်ရန်အတွက် ဆရာ၀န်များသည် အမျိုးမျိုးသော စစ်ဆေးမှုများကို စီစဉ်ပြုလုပ်နိုင်သည်။ လူနာ၏ ခန္ဓာကိုယ်အတွင်း နာမကျန်းဖြစ်သည့်အရာကို ဆေးဘက်ဆိုင်ရာအဖွဲ့မှ စဉ်းစားဆုံးဖြတ်ပြီးသည်နှင့် သူ သို့မဟုတ် သူမ၏ နာမကျန်းမှု၏အမည်ကို လူနာအား ပြောပြနိုင်ပါသည်။ ရောဂါအမည် သို့မဟုတ် ရောဂါရှာဖွေခြင်းကို သိရှိခြင်းသည် မည်သည့်ဆေးဝါးများကို လိုအပ်ကြောင်း ဆေးကုသရေးအဖွဲ့အား သိရှိစေရန် အထောက်အကူပြုပါသည်။

အရည်ထုတ်ပိုက် — ခွဲစိတ်မှုပြုလုပ်သည့်နေရာမှ အရည်ကို သင့်ခန္ဓာကိုယ်ပြင်ပသို့ ထုတ်ယူသည့် ပြွန်ငယ်တစ်ခု။ အရည်သည် ခွဲစိတ်မှုပြုလုပ်သည့်နေရာအတွင်း စုဝေးနေပြီး ၎င်းနေရာတွင် ရှိမနေသင့်ပါ။ ၎င်းသည် ရေနှင့် သဏ္ဌာန်တူပြီး ၎င်းအတွင်း၌ သွေးလည်း ပါဝင်နိုင်ပါသည်။

အနာပတ်တီးကို အသစ်လဲခြင်း — သင်၏ ဗဟိုသွေးပြန်ကြောပိုက်၊ PICC ပိုက်များ သို့မဟုတ် ဝင်ထွက်ပေါက်တို့အပေါ်တွင် ပတ်တီးအထည်စကိုပတ်ခြင်း။

ဆိုးဆေးရည်/ မြင်သာစေသည့်အရည် — စကင်ဖတ်ရှုသည့်အခါ သင့်ခန္ဓာကိုယ် အတွင်းပိုင်းအား ဆရာ၀န်များမှ မြင်တွေ့နိုင်စေရန် အထောက်အကူပြုသည့် ဆေးဝါး။

ဖော်လီဆီးပိုက် — ခန္ဓာကိုယ်တွင်းမှ ဆီးများကို ပြင်ပသို့ ထုတ်ပေးသည့် ပြွန်ငယ်။ အဆိုပါပြွန်သည် ခန္ဓာကိုယ်မှ ဆီးများထွက်သည့်နေရာသို့ ဝင်သွားပါသည်။

IV — အပ်တစ်ချောင်းကို အသုံးပြု၍ သွေးပြန်ကြောအတွင်းသို့ တပ်ဆင်သော ပြွန်ငယ်။ ၎င်းသည် ခန္ဓာကိုယ်အတွင်းသို့ ဆေးဝါးများ ပေးသွင်းနိုင်သည့် နည်းလမ်းတစ်ခုဖြစ်ပါသည်။

ပိုက် သို့မဟုတ် ဗဟိုသွေးပြန်ကြောပိုက် — နှလုံးအနီးရှိ သွေးပြန်ကြောမကြီးအတွင်းသို့ ဝင်ရောက်သွားပြီး ရင်ဘတ်အလယ်ရှိ ခန္ဓာကိုယ်မှ ပြန်လည်ထွက်ပေါ်လာသော ပြွန်။

ခါးရိုးဖောက်ခြင်း — ဆရာ၀န်များနှင့် ဆေးကုသသူ သူနာပြုများသည် သင့်ကျောရိုးအတွင်းရှိ CSF အချို့ကို ရယူရန် အပ်ငယ်တစ်ချောင်းကို အသုံးပြုသည်။ CSF သည် လူတိုင်း၏ ဦးနှောက်နှင့် ကျောရိုးဝန်းကျင်ရှိ အရည်တစ်မျိုးဖြစ်သည်။

ပြန်ရည်ကျိတ်များ — ခန္ဓာကိုယ်၏ အစိတ်အပိုင်းများဖြစ်ပြီး ပဲစေ့ငယ်များ စုထားသည့်ပုံစံရှိ၍ ရောဂါဖြစ်စေနိုင်သော ပိုးမွှားများကို ရှာဖွေသုတ်သင်ရှင်းလင်းရာတွင် ဆန်ကာတစ်ခုသဖွယ် လုပ်ဆောင်ပါသည်။ ပြန်ရည်ကျိတ်များသည် ရောဂါပိုးကူးစက်မှုကို တိုက်ခိုက်ရာတွင် အကူအညီပေးရန်အတွက် သွေးဖြူဥဆဲလ်များကို စုဝေးစေပြီး ခန္ဓာကိုယ်၏ နာမကျန်းဖြစ်သော နေရာများသို့ ရွေ့လျားစေသည်။ ပြန်ရည်ကျိတ်များကို ခန္ဓာကိုယ်အတွင်းရှိ နေရာအမျိုးမျိုးတွင် တွေ့ရှိရပါသည်။ သင်သတိပြုမိနိုင်သည့် နေရာနှစ်ခုမှာ လည်ပင်းနှင့် ချိုင်းအောက်ရှိနေရာများ ဖြစ်ပါသည်။

ဆေးဝါး — ရောဂါကို ကုသရန် သို့မဟုတ် တားဆီးကာကွယ်ရန် အသုံးပြုသည့် အရာ။ ၎င်းကို ဆေးလုံးများအနေဖြင့် သောက်သုံးရပါသည် သို့မဟုတ် သွေးပြန်ကြောအတွင်းသို့ အရည်အနေဖြင့် ထိုးသွင်းပေးပါသည်။

ကိုယ်အင်္ဂါအစိတ်အပိုင်း —  သီးခြား လုပ်ငန်း လုပ်ဆောင်သည့် ခန္ဓာကိုယ်အစိတ်အပိုင်းကို ဖွဲ့စည်းထားသည့် တစ်ရှူးအုပ်စု။ ကိုယ်အင်္ဂါအစိတ်အပိုင်းများ၏ နမူနာအချို့မှာ အစာအိမ်၊ နှလုံးနှင့် ဦးနှောက်များဖြစ်ပါသည်။

PICC ပိုက် — သွေးပြန်ကြောငယ်တစ်ခုအတွင်း တပ်ဆင်ထားသည့် ပြွန်ရှည်တစ်ခုဖြစ်ပြီး သွေးပြန်ကြောမကြီးအတွင်းသို့ ရောက်ရှိပါသည်။ PICC ပိုက်သည် ဆရာ၀န်းများနှင့် သူနာပြုများ ဆေးဝါးများ ထိုးသွင်းရန်နှင့် သွေးထုတ်ယူရန်အတွက် နည်းလမ်းတစ်ရပ် ဖြစ်ပါသည်။

သွေးဥမွှားများ — ခန္ဓာကိုယ်အတွင်းရှိ ပတ်တီးကဲ့သို့ သွေးယိုစီးမှုကို ရပ်တန့်စေရန် အထောက်အကူပြုသည့် ဆဲလ်များ။ တစ်စုံတစ်ဦးသည် ပြတ်ရှမှု သို့မဟုတ် စုတ်ပြဲပွန်းပဲ့မှုတစ်ခုကို ရရှိသည့်အခါ သွေးဥမွှားများသည် အတူစုဝေးရောက်ရှိလာပြီး သွေးယိုစီးမှုကို ရပ်တန့်စေသည်။

သွေးပြန်ကြောပိုက် ဝင်ထွက်ပေါက် (ဝင်ထွက်ပေါက်) — သင့်ခန္ဓာကိုယ်အား ဆေးဝါးထိုးသွင်းရန် သို့မဟုတ် သွေးရယူရန် နည်းလမ်းတစ်ရပ်။ ၎င်းသည် စက်ဝိုင်းပုံစံရှိပြီး ရာဘာပစ္စည်းတစ်ခုကို အလယ်တွင် ထားရှိကာ အရေပြားအောက်တွင် တပ်ဆင်ရပါသည်။ ဝင်ထွက်ပေါက်ကို အသုံးပြုရန်အတွက် သူနာပြုဆရာမသည် အပ်တစ်ချောင်းကို အရေပြားကို ဖြတ်လျက် ရာဘာပစ္စည်း၏ အလယ်ဗဟိုသို့ ထိုးသွင်းတပ်ဆင်သည်။

ဓာတ်ရောင်ခြည်ကုထုံး  — မျက်စိဖြင့် မမြင်တွေ့နိုင်သော ရောင်ခြည်များအသုံးပြုထားသည့် ကုသမှုတစ်မျိုးဖြစ်ပြီး ခန္ဓာကိုယ်အတွင်းရှိ ကင်ဆာဆဲလ်များ ပေါက်ဖွားကြီးထွားမှုကို ရပ်တန့်စေရန် အထောက်အကူပြုပါသည်။ လူတစ်ဦးသည် ဓာတ်ရောင်ခြည်ကို မြင်တွေ့နိုင်ခြင်း သို့မဟုတ် ခံစားမိနိုင်ခြင်း မရှိပါ။

သွေးနီဥဆဲလ်များ — အောက်ဆီဂျင်ကို ခန္ဓာကိုယ်တစ်ခုလုံးသို့ သယ်ဆောင်ပြီး ခန္ဓာကိုယ်စွမ်းအင်ကို ထုတ်ပေးသည့် သွေးအစိတ်အပိုင်း ဖြစ်ပါသည်။

စကန်စစ်ဆေးခြင်း — ခန္ဓာကိုယ်အတွင်းပိုင်းပုံကို ရိုက်ကူးရန် ဖြစ်ပါသည်။ စက်သည် သင့်အား ထိတွေ့မည် မဟုတ်ပါ။

ဆေးထိုးခြင်း သို့မဟုတ် ဆေးထိုးသွင်းခြင်း — အပ်ကို အသုံးပြုသော ဆေးပေးသွင်းသည့် နောက်ထပ်နည်းလမ်းတစ်ခု ဖြစ်ပါသည်။

စတီးရွိုက်ဆေးများ — ကင်ဆာဆဲလ်များကို ဖယ်ရှားသုတ်သင်ရာတွင် အကူအညီရရှိစေသည့် ဆေးဝါးတစ်မျိုး ဖြစ်ပါသည်။ ၎င်းတို့သည် နာမကျန်းမှုများ သို့မဟုတ် ၎င်းတို့၏ ကုသမှုများကြောင့် ဖြစ်ပေါ်သော မအီမသာဖြစ်ခြင်း၊ ပျို့အန်ခြင်း၊ ဓာတ်မတည့်မှုများနှင့် ခေါင်းကိုက်ခဲမှုများအတွက်လည်း အထောက်အကူပြုနိုင်ပါသည်။

ခွဲစိတ်ကုထုံး — ဆရာ၀န်များသည် ခန္ဓာကိုယ်အတွင်းရှိ မကျန်းမာသော တစ်စုံတစ်ရာကို ပြုပြင်ရန် သို့မဟုတ် ထုတ်ယူရန် အပေါက်တစ်ခုကို ပြုလုပ်ကြသည်။ ကလေးအများစုသည် ခွဲစိတ်ကုထုံးပြုလုပ်နေစဉ်တွင် မေ့ဆေးကြောင့် အိပ်ပျော်နေမည်ဖြစ်၍ ၎င်းကို ခံစားမိမည် မဟုတ်ပါ။ ခွဲစိတ်ကုထုံးပြီးဆုံးသည့်အခါ အပေါက်ကို ပြန်လည်ပိတ်မည်ဖြစ်ပြီး မေ့ဆေးကို ရပ်တန့်ပြီးနောက် လူနာနိုးထလာပါသည်။

တစ်ရှူး တစ်ရှူး — အလုပ်တစ်ခုတည်းကို လုပ်ဆောင်ရန် စုစည်းပြီး အတူတကွ အုပ်စုဖွဲ့ထားသော ခန္ဓာကိုယ်အတွင်းရှိ ဆဲလ်များအစုတစ်ခု ဖြစ်ပါသည်။ တစ်ရှူးများဖြင့် ဖွဲ့စည်းထားသည့် အရာများ၏ ဥပမာများမှာ- ကျွန်ုပ်တို့၏ အရေပြားအပေါ်ယံလွှာ၊ ကြွက်သားများနှင့် အရိုးများ သို့မဟုတ် အရိုးနုကဲ့သို့သော အစိတ်အပိုင်းများ ချိတ်ဆက်ရန် ကူညီပေးသည့် အရာများ ဖြစ်ပါသည်။

ကုသမှု — ကင်ဆာပျောက်ကင်းစေရန်အတွက် လုပ်ဆောင်ရာတွင် ဆရာဝန်များ အသုံးပြုသည့်အရာများအားလုံး ဖြစ်ပါသည်။ ကုသမှုအစီအစဉ်တစ်ခုတွင် ဆေးဝါးများ၊ ပြသမှုများ၊ စစ်ဆေးမှုများနှင့် လူနာတစ်ဦးစီအတွက် ရွေးချယ်ပြုလုပ်သော လုပ်ငန်းစဉ်များအားလုံး ပါဝင်နိုင်သည်။ ကင်ဆာအမျိုးအစား အမျိုးမျိုးအတွက် ကုသမှုပုံစံ အမျိုးမျိုး ရှိပါသည်။

အကျိတ် — ခန္ဓာကိုယ်အတွင်း ကြီးထွားပြီး အတူစုဝေးကာ အဖုအထစ်ဖြစ်လာသည့် မကျန်းမာသောဆဲလ်များ အစုအဝေး။ အကျိတ်အမျိုးအစား အများအပြား ရှိပါသည်။ အချို့အကျိတ်များသည် ကင်ဆာပုံစံမျိုးဖြစ်သော်လည်း အချို့သည် ကင်ဆာမဟုတ်ပါ။ အချို့အကျိတ်များကို သင် မြင်တွေ့နိုင်သည်။ အခြားအကျိတ်များသည် ခန္ဓာကိုယ်အတွင်း နက်ရှိုင်းသည့်နေရာတွင် တည်ရှိပြီး သင် မြင်တွေ့နိုင်ခြင်းမရှိပါ။ အကျိတ်တစ်မျိုးစီတွင် နာမည်တစ်မျိုးစီ ရှိပါသည်။ အကျိတ်များသည် ၎င်းတို့အား တွေ့ရှိသည့်နေရာ၊ တွေ့မြင်ရသည့်ပုံစံ၊ ပေါက်ဖွားကြီးထွားသည့်နည်းလမ်းနှင့် လိုအပ်သည့် ဆေးဝါး သို့မဟုတ် ကုသမှုအမျိုးအစား အပေါ်မူတည်ပြီး ကွဲပြားခြားနားကြသည်။

သွေးဖြူဥဆဲလ်များ — ရောဂါပိုးကူးစက်မှုကို တိုက်ဖျက်ရာတွင် အထောက်အကူပြုသည့် သွေးအစိတ်အပိုင်း ဖြစ်ပါသည်။ ဤဆဲလ်များသည် လူများကို ပိုးမွှားများနှင့် နာမကျန်းဖြစ်ခြင်းမှ ဘေးကင်းစေရန် အလုပ်ကောင်းစွာလုပ်ဆောင်ကြပါသည်။ သွေးဖြူဥဆဲလ်အမျိုးအစား အမျိုးမျိုးရှိပြီး ခန္ဓာကိုယ်ကို နာမကျန်းဖြစ်ခြင်းမှ ကုသရာတွင် အထောက်အကူပြုပါသည်။

ဆက်စပ်အကြောင်းအရာများ