ပြန်လည်သန်စွမ်းရေးဆိုင်ရာ ဝန်ဆောင်မှု အမျိုးအစားများ

ပြန်လည်သန်စွမ်းရေးဆိုင်ရာ ဝန်ဆောင်မှုများဆိုသည်မှာ အဘယ်နည်း။

ပြန်လည်သန်စွမ်းရေးကုထုံးဆိုသည်မှာ လူနာများအား နေ့စဉ်လုပ်ငန်းဆောင်တာများ၏ ကဏ္ဍအမျိုးမျိုးတွင် ကူညီပေးသည့် ဝန်ဆောင်မှုအုပ်စုတစ်ခုကို ဆိုလိုပါသည်။ ပြန်လည်သန်စွမ်းရေးဆိုင်ရာတွင် အထူးပြုသော ကျန်းမာရေးစောင့်ရှောက်မှုပေးသူများ သို့မဟုတ် ကုထုံးပညာရှင်များသည် ကလေးများကို နေ့စဉ်ဘဝနှင့် ဘဝနေထိုင်မှုအဆင့်အတန်းအား အမှီအခိုကင်းစွာ မြှင့်တင်နိုင်စေမည့် စွမ်းရည်နှင့် ကျွမ်းကျင်မှုများ တိုးတက်လာစေရန်ကူညီပေးနိုင်ပါသည်။

ပြန်လည်သန်စွမ်းရေးဆိုင်ရာ ဝန်ဆောင်မှုအမျိုးအစားများတွင် အောက်ပါတို့ ပါဝင်ပါသည်-

• ရုပ်ပိုင်းဆိုင်ရာကုထုံး
• လုပ်ငန်းခွင်ဆိုင်ရာ ကုထုံး
• အကြားအာရုံဆိုင်ရာပညာနှင့် အကြားအာရုံ ပြုစုစောင့်ရှောက်ခြင်း
• စကားပြော-ဘာသာစကား ကုထုံး

သင်၏ ကုထုံးပညာရှင်နှင့် အခြားကျန်းမာရေးစောင့်ရှောက်မှုပေးသူများသည် သင့်ကလေးကို အကဲဖြတ်စစ်ဆေး၍ ကုသမှုအစီအစဉ်ကို ရေးဆွဲပါလိမ့်မည်။ ပြန်လည်သန်စွမ်းရေးသည် အသက်အရွယ်မရွေး လူနာများရင်ဆိုင်နေရသော စိန်ခေါ်မှုများအား မည်သို့ရင်ဆိုင်ဖြေရှင်းရမည်ကို သင်ယူနိုင်ရန် ကူညီပေးနိုင်ပါသည်။

ပြန်လည်သန်စွမ်းရေးဆိုင်ရာ ဝန်ဆောင်မှုများသည် မည်သို့ကူညီပေးနိုင်သနည်း

ပြန်လည်သန်စွမ်းရေးဆိုင်ရာကုထုံးသည် သင့်ကလေးကို အောက်ပါတို့ အပါအဝင် နည်းလမ်းများစွာဖြင့် ကူညီပေးနိုင်ပါသည်-

• သန်စွမ်းမှု၊ ဟန်ချက်ငြိမ်မှု၊ ညှိနှိုင်းဆောင်ရွက်နိုင်မှုနှင့် လှုပ်ရှားနိုင်မှုတို့ကို တိုးတက်ကောင်းမွန်စေခြင်း
• နေ့စဉ်ဘဝ၊ ကျောင်းနှင့် လုပ်ငန်းခွင်ကျွမ်းကျင်မှုဆိုင်ရာ လှုပ်ရှားမှုများတွင်အထောက်အကူပေးခြင်း
• သင့်ကလေးသည် ဖွံ့ဖြိုးမှုမှတ်တိုင်များကို ပြည့်မီနေခြင်း ရှိ၊ မရှိကို ကြည့်ရှု၍ နှေးကွေးမှုများကို ဖြေရှင်းနိုင်ရန် ကူညီပေးခြင်း
• အကြားအာရုံ၊ အမြင်အာရုံ၊ စကားပြောဆိုမှု၊ ပြောဆိုဆက်သွယ်မှုနှင့် အစာစားခြင်းနှင့် မျိုချခြင်းတို့ကို အကဲဖြတ်စစ်ဆေး၍ ကူညီပေးခြင်း
• ဘီးတပ်ကုလားထိုင်များ၊ လမ်းလျှောက်အထောက်အကူကိရိယာများ၊ အရိုးအဆစ်အထောက်အကူပြု ပစ္စည်းများ၊ အထိန်းကိရိယာများနှင့် အကြားအာရုံအထောက်အကူပြုကိရိယာများကဲ့သို့သော ပစ္စည်းကိရိယာများနှင့် အထောက်အကူပြုပစ္စည်းများဆိုင်ရာ လိုအပ်ချက်များကို စိစစ်ရွေးချယ်ခြင်း

ပြန်လည်သန်စွမ်းရေးပညာရှင်များသည် သူနာပြုစုစောင့်ရှောက်မှု၊ အာဟာရ၊ စိတ်ပညာ၊ လူမှုရေးလုပ်ငန်း၊ သက်ဝင်ယုံကြည်မှုဆိုင်ရာစောင့်ရှောက်မှု၊ ကျောင်းဝန်ဆောင်မှုများ နှင့် ကလေးဘဝတို့ကဏ္ဍရှိ အခြားကျန်းမာရေးစောင့်ရှောက်မှုပေးသူများနှင့်လည်း ညှိနှိုင်းဆောင်ရွက်လေ့ရှိပါသည်။

ပြန်လည်သန်စွမ်းရေးဆိုင်ရာ ဝန်ဆောင်မှုများကို မည်သို့ရယူရမည်နည်း

ဆေးရုံများနှင့် ကုသရေးဌာနများစွာသည် အတွင်းလူနာနှင့် ပြင်ပလူနာ နှစ်မျိုးလုံးအတွက် ပြန်လည်သန်စွမ်းရေးဆိုင်ရာဝန်ဆောင်မှုများကို ပေးလေ့ရှိကြသည်။ ပြန်လည်သန်စွမ်းရေးဆိုင်ရာဝန်ဆောင်မှုများကို ဒေသခံလူမှုအသိုင်းအဝိုင်းရှိ ဆေးရုံများ၊ ဆေးခန်းများနှင့် ကျောင်းများမှတစ်ဆင့်လည်း ရရှိနိုင်ပါသည်။

သင့်ကလေး၏ စောင့်ရှောက်မှုအဖွဲ့သည် သင့်လိုအပ်ချက်များနှင့် ကိုက်ညီမည့် ဝန်ဆောင်မှုများကို ရှာဖွေနိုင်ရန် ကူညီပေးနိုင်ပါသည်။

ပြန်လည်သန်စွမ်းရေးဆိုင်ရာ ဝန်ဆောင်မှုများနှင့် ပတ်သက်၍ မေးရန်မေးခွန်းများ

• ကျွန်ုပ်ကလေးသည် မည်သည့်ကုထုံးဝန်ဆောင်မှုများကို လိုအပ်ပါသနည်း။
• ကုထုံးသည် ကျွန်ုပ်ကလေးကို မည်သို့ကူညီပေးနိုင်သနည်း။
• ကုထုံးများသည် အချိန်မည်မျှကြာမည်နည်း။
• အာမခံသည် ကျွန်ုပ်ကလေး၏ ကုသမှုအတွက် ငွေးပေးချေမည်လား။
• ကျွန်ုပ်သည် ကျန်းမာရေးစောင့်ရှောက်မှုပေးသူထံမှ လွှဲပြောင်းမှု လိုအပ်ပါသလား။
• ကျွန်ုပ်သည် အိမ်တွင် ကျွန်ုပ်ကလေးနှင့်အတူ မည်သည့်လေ့ကျင့်ခန်းများ သို့မဟုတ် လှုပ်ရှားမှုများကို ပြုလုပ်နိုင်ပါသနည်း။

ဆက်စပ်သည့် အကြောင်းအရာ