انفیکشن کی روک تھام کرنے کا طریقہ

سنگین بیماریوں میں مبتلا بچوں میں انفیکشن کا خطرہ زیادہ ہو سکتا ہے۔

بعض بیماریاں اور علاج جیسے کیموتھیراپی آپ کے بچے کے مدافعتی نظام کو کمزور کر سکتے ہیں۔ مدافعتی نظامکمزور مدافعتی نظام والے شخص کو امیونوکمپرومائزڈ کہا جاتا ہے۔ ان میں انفیکشنز کا خطرہ زیادہ ہوتا ہے۔

اگر آپ کے بچے کا مدافعتی نظام کمزور ہے، تو COVID-19، فلو، اور RSV جیسے وائرس ایک صحت مند بچے کی نسبت زیادہ سنگین ہو سکتے ہیں۔

انفیکشن کی روک تھام کے لیے تجاویز

اگر آپ کے بچے کا مدافعتی نظام کمزور ہے، تو بیماری کو زیادہ سنگین ہونے سے روکنے کے لیے اقدامات کرنا اہم ہے۔ اپنے بچے کے ڈاکٹر سے اپنے بچے کے انفیکشن کے خطرے کے بارے میں بات کریں۔

اچھی صفائی ستھرائی اختیار کریں

انفیکشنز کی روک تھام میں مدد کے لیے یقینی بنائیں کہ آپ کا بچہ اور اس کا ماحول صاف ہو۔ انفیکشن کی روک تھام کا بہترین طریقہ یہ ہے کہ اپنے ہاتھ بار بار صاف کریں۔ اپنے ہاتھ صاف کریں صابن اور پانی سے یا الکحل پر مبنی ہینڈ سینیٹائزر استعمال کریں۔

انفیکشن کی روک تھام کے لیے ذاتی نگہداشت اہم ہے۔ اس میں شامل ہیں:

• دانت صاف کرنا اور منہ کی اچھی نگہداشت
• روزانہ نہانا
• جلد کو کیڑوں کے کاٹنے اور قدرتی عوامل سے محفوظ رکھنا جو ردِعمل کا سبب بن سکتے ہیں
• زخموں کو پٹیوں سے ڈھانپنا
• زخموں اور لائن یا کیتھیٹر کی نگہداشت کے لیے نگہداشتی ٹیم کے مشورے پر عمل کرنا

سامنا ہونے کے خطرے کو محدود کریں

• اگر آپ کے خاندان کے کسی دوسرے فرد میں سانس کی بیماری کی علامات ہوں، تو اسے اپنے بچے سے دور رکھیں۔
• آپ کے بچے کو بیمار شخص سے 6 فٹ دور رہنا چاہیے اور ماسک پہننا چاہیے۔

سفر کو محدود کریں، ہجوم سے بچیں، عوامی مقامات پر فیس ماسک پہنیں، اور اپنے گھرانے سے باہر کے لوگوں کے ساتھ رابطہ محدود کریں۔

اپنے بچے کو جراثیم سے محفوظ رکھیں

حتیٰ کہ دھول اور مٹی میں بھی ایسے نقصان دہ جراثیم ہو سکتے ہیں جو کمزور مدافعتی نظام والے بچوں کے لیے نقصان دہ ہوں۔ فرشوں اور سطح کی جگہ کی مستقل صفائی کرتے رہنے سے انفیکشن کے خطرے کو کم کرنے میں مدد مل سکتی ہے۔

ان جگہوں پر خاص توجہ دیں جہاں آپ کا بچہ طبی نگہداشت حاصل کرنے جاتا ہے۔ بچوں کے ذریعے استعمال کیے جانے والے کھلونے اور دیگر سامانوں میں بھی جراثیم آسکتے ہیں۔ کھلونوں اور الیکٹرانکس چیزوں کو باقاعدگی سے صاف کریں۔

نرم کھلونوں، کمبلوں، اور لینن کے بنے آبجکٹس کو گرم پانی سے دھوئیں۔ بستر کی چادریں اور لینن اکثر تبدیل کریں۔

ٹیکے لگوائیں:

• اگر آپ کا بچہ ویکسین کے لیے اہل ہے اور اس کی نگہداشت ٹیم متفق ہے، تو اپنے بچے کو ویکسین لگوائیں۔
• اپنے بچے کو اضافی تحفظ فراہم کرنے کے لیے یقینی بنائیں کہ آپ کے گھر کے افراد ویکسین شدہ ہوں۔

انفیکشن کے ذرائع سے آگاہ رہیں

ایسی چیزیں جو عموما آپ کے ذہن میں نہیں آسکتی ہیں وہ کمزور مدافعتی نظام والے بچوں کے لیے انفیکشن کا ماخذ ہو سکتے ہیں۔ اپنی طبی ٹیم سے ان ممکنہ خطرات کے بارے میں بات کریں:

• تازہ پھول: پھولوں اور پودوں میں نقصان دہ بیکٹیریا اور فنگس ہو سکتے ہیں۔
• پالتو جانور اور دیگر جانور: ایسے جانوروں سے رابطے سے بچیں جو پالتو نہ ہوں۔ یقینی بنائیں کہ پالتو جانوروں کو ویکسین لگی ہو، وہ اچھی صحت میں ہوں، اور انہیں باقاعدگی سے نہلایا جاتا ہو۔
• دھول اور مٹی: کچھ مریض ایسپرجیلس اور دیگر جراثیم سے بیمار ہو سکتے ہیں جو دھول اور مٹی میں موجود ہوتے ہیں۔ ایسپرجلس فنگس کی ایک ٹائپ ہے۔ صحت مند افراد اسے سانس کے ذریعے اندر لے سکتے ہیں بغیر بیمار ہوئے۔ لیکن کمزور مدافعتی نظام والے افراد میں اس سے ایسپرجیلوسس نامی انفیکشن پیدا ہو سکتا ہے۔

محفوظ کھانے کے بارے میں غور کریں

خوراک تیار کرنے اور کھانے سے پہلے ہاتھ دھوئیں۔ خوراک تیار کرنے کی جگہوں کو صاف رکھیں۔ کھانے کو ٹھیک سے اسٹور کریں اور پکائيں۔ کھانے سے پہلے پھلوں اور سبزیوں کو دھوئیں۔

ان غذاؤں کے بارے میں اپنے ڈاکٹر سے بات کریں جن سے پرہیز کرنا ضروری ہے، اور ان کی دی گئی غذائی ہدایات پر عمل کریں۔

پتلے پاخانوں پر نظر رکھیں

کیموتھیراپی، اشعاعی معالجہ، یا انفیکشن اسہال کا سبب بن سکتے ہیں۔ صابن اور پانی سے ہاتھ دھوئیں اور سطحوں کو جراثیم سے پاک کریں۔ ڈائپر تبدیل کرتے وقت ایک بار استعمال ہونے والے دستانے پہنیں۔

انفیکشن کی نشانیاں

اگر آپ کا بچہ کسی وائرس کے سامنے آیا ہو یا اس میں بیماری کی علامات ہوں، تو اپنے بچے کی نگہداشت ٹیم کو کال کریں، جیسے:

• بخار
• کھانسی
• کپکپی
• اسہال
• سانس پھولنا
• جسم میں درد
• ناک بہنا
• گلے میں خراش

جانیں کہ علامات پیدا ہونے پر کیا کرنا ہے۔ ہنگامی صورتِ حال کے علاوہ ڈاکٹر کے پاس جانے سے پہلے کال کریں۔ یقینی بنائیں کہ آپ کے پاس اضافی ادویات اور طبی سامان موجود ہو۔

طبی ملاقاتوں میں تاخیر نہ کریں جب تک کہ آپ کا ڈاکٹر ایسا کرنے کو نہ کہے۔

اگر آپ کو اپنے بچے کی صحت یا ویکسینز کے بارے میں سوالات ہوں، تو اپنے بچے کی نگہداشت ٹیم سے بات کریں۔ آپ کے بچے کی صحت کے انتظام میں مدد کے لیے وہ رہنمائی کا بہترین ذریعہ ہیں۔

انفیکشن کی روک تھام کے بارے میں اپنی نگہداشت ٹیم سے پوچھنے کے لیے سوالات

• انفیکشن کی روک تھام کے بہترین طریقے کیا ہیں؟
• مجھے کیسے معلوم ہوگا کہ میرے بچے کو انفیکشن ہے؟
• اگر میرے بچے کو انفیکشن ہو جائے، تو مجھے کیا کرنا چاہیے؟
• کیا کچھ خاص غذائیں ہیں جو میرے بچے کو کھانی یا جن سے پرہیز کرنا چاہیے؟
• مجھے اپنے بچے کی نگہداشت ٹیم کو کب کال کرنی چاہیے؟

متعلقہ مواد