ایکسرے

ایکسرے کیا ہوتا ہے؟

ایکسرے امیجنگ ٹیسٹ کی ایک قسم ہے جو جسم کے اندر کی سیاہ و سفید تصاویر بناتی ہے۔ نگہداشت صحت فراہم کرنے والے زخموں یا بیماریوں کی تشخیص اور نگرانی میں مدد کے لیے ایکسرے استعمال کرتے ہیں۔

ایکسرے کیسے کام کرتا ہے

ایکسرے مشین جسم کے مختلف حصوں میں تابکاری کی تھوڑی مقدار بھیجتی ہے۔  

ایکسرے تصویر میں سیاہ اور سفید کے شیڈز اس بات پر منحصر ہوتے ہیں کہ جسم سے کتنی تابکاری گزرتی ہے: 

• ہڈیاں اور دھات جیسی گھنی ساختیں سفید دکھائی دیتی ہیں کیونکہ یہ سب سے زیادہ تابکاری جذب کرتی ہیں۔   
  
• چربی اور دیگر نرم ٹشوز سرمئی دکھائی دیتے ہیں کیونکہ یہ کم تابکاری جذب کرتے ہیں۔  
  
• ہوا سب سے کم تابکاری جذب کرتی ہے۔ پھیپھڑے اور ہوا پر مشتمل دیگر ساختیں سیاہ دکھائی دیتی ہیں۔
  

ایکسرے کے فوائد

ایکسرے تیز اور بغیر درد کے ہوتے ہیں۔ یہ آپ کے بچے کی صحت کے بارے میں اہم تفصیلات فراہم کر سکتے ہیں۔ ایکسرے آپ کی نگہداشت ٹیم کو یہ دیکھنے میں مدد کر سکتا ہے کہ جسم کے اندر کیا ہو رہا ہے۔ ایکسرے دکھا سکتا ہے:

• کینسر یا دیگر صحت کے مسئلے کے شواہد 
  
• انفیکشنز
  
• ہڈیوں کے ٹوٹنے یا ہڈیوں اور جوڑوں کے دیگر مسائل
  
• دانتوں کے کیویٹیز
  
• جسم میں موجود بیرونی اشیاء
  

ایکسرے سے پہلے

ایکسرے تکلیف دہ نہیں ہے۔ لیکن آپ کے بچے کو ساکت رہنے کی ضرورت ہے تاکہ تصویر واضح آئے۔ ٹیسٹ کے دوران حرکت نہ کرنے کی اہمیت کے بارے میں اپنے بچے سے بات کریں۔

ٹیکنالوجسٹ نامی نگہداشت صحت کرنے والا پیشہ ور آپ کے بچے کا ایکسرے لے گا۔ اگر آپ کا بچہ گھبرایا ہوا یا بے آرام ہو تو ٹیکنالوجسٹ کو ضرور بتائیں۔ 

ایکسرے لیے جانے کے دوران آپ کو کمرے میں رہنے کی اجازت دی جا سکتی ہے۔ اگر ایکسرے روم میں موجود کوئی بھی (مریض یا دیکھ بھال کرنے والی) حاملہ ہو تو عملے کو بتائیں۔

آپ کے بچے سے زیورات، گھڑی یا عینک اتارنے کو کہا جا سکتا ہے۔ انہیں ہسپتال کا گاؤن پہننے کی ضرورت پڑ سکتی ہے۔ 

کچھ ایکسرے کے لیے، کنٹراسٹ میڈیم — جیسے آیوڈین یا بیریم— تصاویر میں بہتر تفصیلات دینے کے لیے استعمال کیا جاتا ہے۔ اگر آپ کے بچے کو کبھی بھی ایکسرے کنٹراسٹ سے کوئی ردعمل (الرجی وغیرہ) ہوا ہو، تو ٹیکنالوجسٹ یا اپنی نگہداشت ٹیم کے کسی رکن کو ضرور بتائیں۔ 

ایکسرے کے دوران کیا توقع کریں

ایکسرے ٹیکنالوجسٹ آپ کے بچے کو پوزیشن میں لانے میں مدد کرے گا۔ آپ کا بچہ کھڑا، بیٹھا یا لیٹ سکتا ہے۔ پوزیشن مشین اور جسم کے اس حصے پر منحصر ہوگی جس کا ایکسرے کیا جا رہا ہے۔ 

ہر ممکن حد تک واضح تصویر حاصل کرنا ضروری ہے۔ بعض اوقات، بچے کو ساکت رکھنے کے لیے خصوصی پیڈنگ یا پٹیاں استعمال کی جاتی ہیں۔ آپ کے بچے کو سانس روکنا پڑ سکتا ہے کیونکہ حرکت کرنے سے ایکسرے دھندلا ہو جائے گا۔ 

ٹیکنالوجسٹ حفاظتی رکاوٹ کے پیچھے چلا جائے گا اور آپ کے بچے سے کہے گا کہ وہ چند سیکنڈ بہت ساکت رہے جب ایکسرے لیا جا رہا ہو۔ 

اگر مزید ایکسرے کی ضرورت ہو تو ٹیکنالوجسٹ آپ کے بچے کی پوزیشن بدلنے میں مدد کر سکتا ہے۔ 

ایکسرے کے بعد

اگر آپ کے بچے نے ایکسرے کے دوران گاؤن پہنا تو وہ ایکسرے مکمل ہونے پر دوبارہ اپنے کپڑے پہن سکتا ہے۔ 

ایکسرے کے بعد تصاویر ریڈیولوجسٹ کو بھیجی جائیں گی۔ یہ ڈاکٹر امیجنگ ٹیسٹوں کی تشریح میں ماہر ہوتا ہے۔ ریڈیولوجسٹ ایکسرے دیکھے گا اور آپ کی نگہداشت ٹیم کو رپورٹ بھیجے گا۔

ایکسرے کے ممکنہ خطرات

ایکسرے تصاویر لینے کے لیے تابکاری کی بہت کم مقدار استعمال کرتے ہیں۔ یہ زیادہ تر لوگوں کے لیے محفوظ ہے۔ لیکن یہ ضروری ہے کہ بہت زیادہ ایکسرے نہ کروائے جائیں جب تک آپ کی نگہداشت ٹیم نہ کہے کہ ان کی ضرورت ہے۔ ڈاکٹر صرف ضرورت پڑنے پر ہی ایکسرے تجویز کرے گا۔ ماحول میں لوگوں کو ہر روز ریڈی ایشن کا سامنا کرنا پڑتا ہے۔ ایکسریز کے طبی فوائد، تابکاری (radiation) کی معمولی مقدار کے خطرات سے کہیں زیادہ ہیں۔ 

آپ کی نگہداشت ٹیم سے پوچھنے کے لیے سوالات

• میرے بچے کو ایکسرے کی ضرورت کیوں ہے؟
  
• کیا میں ایکسرے کے دوران اپنے بچے کے ساتھ رہ سکتی ہوں؟ 
  
• کیا میرے بچے کو ایکسرے کے دوران شیلڈ پہننے کی ضرورت ہے؟
  
• کیا کوئی اور ٹیسٹ ہیں جن کی میرے بچے کو ضرورت ہو سکتی ہے؟
  
• نتائج حاصل کرنے میں کتنا وقت لگے گا؟
  

متعلقہ مواد