بلڈ کلچر

بلڈ کلچر کیا ہے؟

بلڈ کلچر ایک لیبارٹری ٹیسٹ ہے جو خون میں انفیکشن کی جانچ کے لیے استعمال کیا جاتا ہے۔ یہ انفیکشن درج ذیل کی وجہ سے ہو سکتے ہیں: بیکٹیریا, وائرسز، یا فنگس۔

کچھ مریضوں میں جان لیوا انفیکشنز کا خطرہ زیادہ ہوتا ہے۔ جب مریضوں کو بخار یا انفیکشن کی بعض دیگر علامات ظاہر ہوں، تو یہ کسی سنگین بیماری کی نشانی ہو سکتے ہیں۔ نگہداشت صحت فراہم کرنے والوں کو ان علامات کی وجہ کے بارے میں معلومات درکار ہوتی ہیں تاکہ مریض کا علاج جلد از جلد کیا جا سکے۔

انفیکشن کے ماخذ کا پتہ لگانے میں مدد کے لیے غالباً بلڈ کلچر کیا جائے گا۔

بلڈ کلچر کیسے کام کرتا ہے

بلڈ کلچر کے لیے خون کے نمونے درکار ہوتے ہیں۔ عام طور پر انفیکشن کے ماخذ کی شناخت کے لیے خون کے کم از کم 2 نمونے درکار ہوتے ہیں۔

• نگہداشت ٹیم کا رکن خون کا نمونہ لینے کے لیے آپ کے بچے کی نس میں سوئی داخل کرے گا۔ کچھ مریضوں میں، انفیکشن کا ایک عام ماخذ وینس ایکسیس ڈیوائس ہوتا ہے جیسے سینٹرل لائن، پورٹ، یا پیریفرلی اِنسرٹڈ سینٹرل کیتھیٹر (PICC)۔ جب بخار والے مریضوں کے پاس ایسی ڈیوائس ہو، تو نگہداشت ٹیم کو عموماً ڈیوائس سے خون کا نمونہ لینا پڑتا ہے۔
• ہر خون کا نمونہ 1 یا زیادہ بوتلوں میں رکھا جاتا ہے۔ ہر بوتل میں ایک مختلف مادہ (جسے کلچر میڈیم کہا جاتا ہے) ہوتا ہے جو مختلف اقسام کے بیکٹیریا اور فنگس کو بڑھنے کی اجازت دیتا ہے۔

درکار خون کی مقدار مریض کی عمر اور وزن پر منحصر ہوتی ہے۔ خون کے نمونے بخار کی تشخیص کے فوراً بعد اور اینٹی بایوٹکس دینے سے پہلے لیے جانے چاہئیں۔ دوسرے جراثیم کو خون کے نمونے میں داخل ہونے یا اسے آلودہ کرنے سے روکنے کے لیے اقدامات کرنا بھی ضروری ہے۔

نمونے جمع کرنے کے بعد، انہیں لیبارٹری بھیج دیا جاتا ہے۔ نمونوں والی بوتلوں کو ایک خاص مشین میں رکھا جاتا ہے جو 5 دن یا اس سے زیادہ عرصے تک نمونوں کا جائزہ لیتی ہے تاکہ دیکھا جا سکے کہ کوئی جرثومہ بڑھتا ہے یا نہیں۔ لیبارٹری ٹیکنالوجسٹ کسی بھی افزائش کی تصدیق خوردبین کے نیچے سلائیڈ پر نمونے کو دیکھ کر کرتے ہیں۔

بلڈ کلچر کے نتائج

اگر کلچر میں جراثیم بڑھتے ہیں، تو ٹیسٹ مثبت ہوتا ہے اور انفیکشن کی نشاندہی کرتا ہے۔ اگر کلچر میں کوئی جراثیم نہ بڑھیں، تو ٹیسٹ منفی ہوتا ہے۔

نگہداشت صحت فراہم کرنے والا آپ کے بچے کی علامات اور بلڈ کلچر کے نتائج کی معلومات استعمال کرتے ہوئے تشخیص کرے گا۔

لیبارٹری یہ جانچ بھی کر سکتی ہے کہ کون سی دوا جراثیم کے خلاف سب سے بہتر کام کرے گی۔ اس ٹیسٹ میں چند دن یا اس سے بھی زیادہ وقت لگ سکتا ہے۔

آپ کی نگہداشت ٹیم نتائج آپ کے ساتھ شیئر کرے گی۔ اگر انفیکشن ہو تو وہ آپ کے ساتھ مل کر علاج کا منصوبہ تیار کریں گے۔

بلڈ کلچر کے ممکنہ خطرات

بلڈ کلچر کے لیے خون کا نمونہ لینا ضروری ہوتا ہے۔ یہ عام طور پر محفوظ ہوتا ہے، لیکن چند ممکنہ خطرات موجود ہیں۔ ان میں شامل ہیں:

• سوئی لگنے کی جگہ پر درد یا تکلیف
• خون بہنا یا نیل پڑنا
• چکر آنا یا بے ہوشی محسوس ہونا
• انفیکشن

آپ کی نگہداشت ٹیم سے پوچھنے کے لیے سوالات

• میرے بچے کو بلڈ کلچر کی ضرورت کیوں ہے؟
• نتائج واپس آنے میں کتنا وقت لگے گا؟
• اگر کلچر مثبت ہو تو اس کا کیا مطلب ہے؟
• اگر ٹیسٹ انفیکشن ظاہر کرے تو اگلے اقدامات کیا ہوں گے؟
• کیا نتائج کا انتظار کرتے ہوئے میرے بچے کو علاج کی ضرورت ہوگی؟

متعلقہ مواد