ကြိုဆိုပါသည်

Together သည် - လူနာများနှင့် မိဘများ၊ မိသားစုဝင်များနှင့် သူငယ်ချင်းများအပါအဝင် - ကလေးကင်ဆာကြောင့် ထိခိုက်မှုရှိသူတိုင်းအတွက် ရင်းမြစ်အသစ်တစ်ခု ဖြစ်ပါသည်။

ပိုမိုလေ့လာရန်

G Tube၊ (GJ Tube) နှင့် J Tube နေရာချခြင်း

ဂျီ ပြွန် (G Tube)၊ ဂျီဂျေပြွန် (GJ Tube)၊ နှင့် ​ဂျေ ပြွန် (J Tube) များကို ဝမ်းဗိုက်နံရံတွင် ဖောက်ထားသည့် အပေါက် (stoma) တစ်ခုမှတဆင့် နေရာချခြင်း။ အပေါက်ဖောက်သည့် လုပ်ထုံးလုပ်နည်းကို အော့စ်တိုမီ (ostomy) ဟုခေါ်ပါသည်။ အစာထည့်သည့်ပြွန်အတွက် အပေါက်ဖောက်သည့် လုပ်ငန်းစဉ်အဆင့်ဆင့်ကို အဓိက နည်းလမ်း ၃ ခုဖြင့် လုပ်နိုင်ပါသည် -

  1. ပုံရိပ်-လမ်းညွှန်ဖြင့် ထည့်ခြင်း (Image-guided)
  2. ခွဲစိတ်ပြီးထည့်ခြင်း (Surgical)
  3. အူလမ်းကြောင်းကြည့်မှန်ပြောင်းမှတဆင့် ထည့်ခြင်း (Endoscopic)

လုပ်ငန်းစဉ်အဆင့်ဆင့်အမျိုးအစားသည် ဆေးရုံတွင်းရရှိနိုင်သောရင်းမြစ်များ၊ ဆေးဖက်ဆိုင်ရာအဖွဲ့၏ ကျွမ်းကျင်မှု၊ လူနာ၏ ကျန်းမာရေးအချက်အလက်များ၊ နှင့် လူနာအနေဖြင့် အခြားခွဲစိတ်မှုဆိုင်ရာ လုပ်ထုံးလုပ်နည်းများ လိုမလို စသည့်အချက်အမြောက်အများအပေါ် မူတည်ပါလိမ့်မည်။

အကယ်၍ အစာထည့်သည့်ပြွန်ကို အထွေထွေမေ့ဆေး (general anesthesia) သုံးပြီးထည့်ပါက လုပ်ထုံးလုပ်နည်းမစတင်မီ သီးသန့်အချိန်ပမာဏတစ်ခုအတွင်း ဘာကိုမှ မစားမသောက်ရန် လူနာအား ပြောကြားနိုင်ပါသည်။ NPO လမ်းညွှန်ချက်များကို လိုက်နာရန် အလွန်အရေးကြီးပါသည်။

စောင့်ကြည့်ရန် နှင့် နာကျင်မှုကို ထိန်းချုပ်ရန် လူနာများအနေဖြင့် ဆေးရုံတွင် ညအိပ်နေရလေ့ရှိပါသည်။ အစာသွင်းပိုက် နေရာချအပြီးတွင် စောင့်ရှောက်ရေးအဖွဲ့က သီးခြား NPO လမ်းညွှန်ချက်များ ပေးပါလိမ့်မည်။ အစာအိမ်ဖောက်ထည့်ခြင်းမှ ပြန်လည်နာလန်ထူချိန် နှင့်/သို့မဟုတ် အစာအိမ်ဖောက်ထည့်ပြီးနောက်တွင် ပေးသည့်ဆေးများ အပြောင်းအလဲရှိနိုင်ပါသည်။ သောက်သုံးနေသည့် သို့မဟုတ် စီစဉ်ထားသည့် ဆေးဝါးပြောင်းလဲမှုတစ်ခုခုရှိပါက မိသားစုများအနေဖြင့် ဆွေးနွေးသင့်ပါသည်။ အစာသွင်းပိုက် အလုပ်ကောင်းကောင်းလုပ်ကြောင်းနှင့် အစာခြေစနစ်ကောင်းကောင်းချိန်ညှိကြောင်း သေချာအောင်ပြုလုပ်ရန် အရည်များ နှင့် အစာလမ်းကြောင်းမှထည့်သည့်အစာများကို တဖြည်းဖြည်းချင်း စတင်ပါမည်။

အစာအိမ်ဖောက်ပြီး ပြွန်ထည့်ခြင်း၊ အစာအိမ်-အူသိမ်ဖောက်ပြီး ပြွန်ထည့်ခြင်း၊ နှင့် အူသိမ်ဖောက်ပြီး အစာထည့်ခြင်း လုပ်ပြီးနောက်ဆက်တွဲအကျိုးဆက်များ

အစာသွင်းပိုက်တစ်ခု နေရာချခြင်းက ကင်ဆာရောဂါကုသမှုခံယူစဉ်အတောအတွင်း လုပ်လေ့ရှိသော လုပ်ထုံးလုပ်နည်းတစ်ခုဖြစ်သည်။ သို့သော်လည်း မေ့ဆေး နှင့် ခွဲစိတ်သည့် လုပ်ထုံးလုပ်နည်းများနှင့်အတူ အန္တရာယ်များ အစဉ်ပါဝင်လေ့ရှိပါသည်။ ဆရာဝန်က လုပ်ထုံးလုပ်နည်းအသေးစိတ် နှင့် အန္တရာယ်များနှင့် အကျိုးကျေးဇူးများကို ရှင်းပြပါလိမ့်မည်။ ကူးစက်ရောဂါဖြစ်ပွားမည့် အန္တရာယ်ကို လျှော့ချရန် နှင့် အစာသွင်းပိုက် အလုပ်ကောင်းကောင်းလုပ်အောင် ထိန်းသိမ်းရန် စောင့်ရှောက်ရေးလမ်းညွှန်များအားလုံးကို လိုက်နာရန် အရေးကြီးပါသည်။

ထည့်သွင်းချိန်အတောအတွင်း အဓိကအန္တရာယ်များတွင် မေ့ဆေးကြောင့်ရသည့် ပြဿနာများ သို့မဟုတ် အနီးအနားရှိကိုယ်တွင်းအင်္ဂါများ ထိခိုက်ဒါဏ်ရာရမှုများ ပါဝင်ပါသည်။ အစာသွင်းပိုက် နေရာချပြီးနောက် အများဆုံးဖြစ်လေ့ရှိသော နောက်ဆက်တွဲပြဿနာများမှာ ပြွန်နေရာရွေ့သွားခြင်း၊ ပြွန်ပိတ်ခြင်း သို့မဟုတ် ယိုခြင်း၊ အစာခြေသည့် ပြဿနာများဖြစ်ခြင်း၊ ပြွန်ပတ်လည်ရှိ အရေပြားတွင် ပြဿနာများရှိခြင်း နှင့် ကူးစက်ပိုးဝင်ခြင်း တို့ဖြစ်သည်။

ဆိုးဝါးသည့် နောက်ဆက်တွဲရှုပ်ထွေးမှုများမှာ ရှားပါးပါသော်လည်း ဖြစ်တတ်ပါသည်။ မေးခွန်းများ သေချာမေးပြီး စောင့်ရှောက်ရေးအဖွဲ့မှပေးသော လမ်းညွှန်များအားလုံးကို သေချာလိုက်နာပါ။ အစာသွင်းပိုက် နေရာချပြီးနောက် ဆေးဝါးများ အပြောင်းအလဲတစ်ခုခု ရှိမရှိအကြောင်း သင်၏ဆရာဝန်နှင့် စစ်ဆေးပါ။

ပုံရိပ် လမ်းညွှန်ဖြင့် အစာအိမ်ဖောက်ပြီး ပြွန်ထည့်ခြင်း နှင့် အစာအိမ်-အူသိမ်လယ်ဖောက်ပြီး ပြွန်ထည့်ခြင်း

ပုံရိပ်လမ်းညွှန်ဖြင့် အစာအိမ်ဖောက်ပြီး ပြွန်ထည့်ခြင်းက ဝမ်းဗိုက်မှတဆင့် အစာအိမ်တွင်းသို့ အစာထည့်သည့်ပြွန် နေရာချခြင်းကို လမ်းညွှန်ပေးရန် ဖလူရိုစကုပ်ပီ (fluoroscopy) နည်းကို အသုံးပြုပါသည်။ ယင်းနည်းလမ်းကို ဓာတ်မှန်ဖြင့်ကြည့်၍ အရေပြားအောက်မှ အစာအိမ်တွင်းသို့ဖောက်ထည့်ခြင်း (percutaneous radiologic gastrostomy) (PRG) ဟုလည်းသိကြပါသည်။ ယင်းလုပ်ငန်းစဉ်အဆင့်ဆင့်အတွင်း အစာအိမ် နှင့် ဝမ်းဗိုက်ကို လက်ငင်းဓာတ်မှန်ရိုက်ထားသည့်ပုံကို ဗွီဒီယို မော်နီတာတစ်ခုပေါ်တွင် ပြပါသည်၊ သို့ဖြစ်ပါ၍ ယင်းကိုလုပ်နေချိန်အတောအတွင်း ဓာတ်မှန်ဆိုင်ရာအဖွဲ့က လုပ်ထုံးလုပ်နည်းကို ကြည့်ရှုနိုင်ပါသည်။ ကနဦးပြွန်သည် အစဉ်အားဖြင့် ခပ်ရှည်ရှည်ပြွန်တစ်ခုဖြစ်ပါသော်လည်း အနာကျက်သွားပြီးနောက်တွင် ယင်းအား မသိသာသည့် ကိရိယာတစ်ခုဖြင့် ပြောင်းလဲနိုင်ပါသည်။ တစ်ခါတစ်ရံတွင် မသိသာသည့် ပြွန်ကို ကနဦးမှာကတည်းက နေရာချနိုင်ပါသည်။

  • G သို့မဟုတ် GJ tube နေရာမချမီ လူနာများအနေဖြင့် သွေးစစ်ဆေးမှုနှင့် ကိုယ်ခန္ဓာ စမ်းသပ်မှုတစ်ခု ရရှိပါသည်။ စောင့်ရှောက်ရေးအဖွဲ့ဝင်များက စာရွက်စာတမ်းဖြည့်ရန် နှင့် မေးခွန်းများကိုဖြေဆိုရန် မိသားစုနှင့် တွေ့ဆုံပါသည်။
  • လူနာအား ဝတ်ရုံရှည်တစ်ခု လဲလှယ်ပြီးလုပ်ထုံးလုပ်နည်းလုပ်ရန်အတွက် ဓာတ်မှန် ဖြည့်စွက်လုပ်ငန်း လုပ်သည့်အခန်း သို့မဟုတ် ခွဲစိတ်ခန်းတစ်ခုသို့ ခေါ်ဆောင်သွားပါသည်။ ဆေးဖက်ဆိုင်ရာစင်တာ၏ မူဝါဒများပေါ်မူတည်ပြီး လူနာတစ်ဦးအနေဖြင့် လုပ်ငန်းစဉ်အဆင့်ဆင့်လုပ်ရန် အချိန်ရောက်သည်အထိ မိဘတစ်ဦးက ကလေးနှင့် လိုက်ပါဝင်ရောက်နိုင်ပါသည်။
  • လုပ်ငန်းစဉ်အဆင့်ဆင့်လုပ်ရန်အတွက် ကလေးများအား အထွေထွေမေ့ဆေး ပေးပါသည်။
  • အသည်း၏တည်နေရာ သိရှိရန် နှင့် ယင်းအားထိခိုက်ဒါဏ်ရာမရအောင် ကာကွယ်ရန် အာထရာဆောင်း ပုံရိပ်ကို အသုံးပြုပါသည်။
  • စောင့်ရှောက်ရေးအဖွဲ့က ဝတ်ရုံရှည်များ၊ မျက်နှာဖုံးများ နှင့် လက်အိတ်များ ဝတ်ဆင်ထားကြပါသည်။ ဝမ်းဗိုက်ပေါ်တွင် ခွဲကြောင်းပေးမည့်ဧရိယာကို ချန်လှပ်ပြီး လူနာ၏ကိုယ်ခန္ဓာအားဖုံးအုပ်ရန် အပြာရောင် စက္ကူအုပ်စတစ်ခုကို သုံးပါသည်။ ယင်းက အဆိုပါဧရိယာကို သန့်ရှင်းအောင်ထားရန် နှင့် ကူးစက်ပိုးများမှကာကွယ်ရာတွင် ကူညီပါသည်။
  • အစာအိမ်ကို လေဖြင့် ဖောင်းအောင် နှာခေါင်းပိုက်တစ်ခုမှတဆင့် လေမှုတ်သွင်းလေ့ရှိပါသည်။
  • ဖလူရိုစကုပ်ပီ (Fluoroscopy) ကို ဝမ်းဗိုက်၏ပုံရိပ်များ ရိုက်ကူးရန် နှင့် ပြွန်နေရာချရန်နေရာတစ်ခု ရွေးချယ်ရန် အသုံးပြူပါသည်။
  • ဝမ်းဗိုက်အရေပြားကို သန့်ရှင်းရေးလုပ်ပါသည်။ ပြီးနောက် အနာအကျင်သက်သာစေရန် ထုံဆေးတစ်မျိုး အသုံးပြုပြီး ယင်းဧရိယာကို ထုံအောင်လုပ်ပါသည်။ ယင်းက ထုံစေသည့် လိုင်ဒိုကိန်း (lidocaine) ထိုးဆေးတစ်မျိုး ဖြစ်လေ့ရှိပါသည်။
  • အစာအိမ်ကို လေဖြင့်ဖောင်းထားလျက် အစာအိမ်ကို ဝမ်းဗိုက်၏ နံရံတွင် ချည်ထားရန် ရီတန်းရှင်း ချုပ်ရိုးများ (retention sutures) သို့မဟုတ် ချည်ကြိုးများ (fasteners) ၂-၄ ခု အသုံးပြုပါသည်။ ယင်းက စတုရန်းပုံ သို့မဟုတ် တြိဂံပုံ ဧရိယာခပ်သေးသေးပုံစံတစ်ခု ပေါ်စေပါသည်။ ယင်းချုပ်ရိုးများကို ၁၀- ၁၄ ရက်အကြာတွင် ဖြုတ်ပါမည်။
  • အခေါင်းပါသည့် အပ်တစ်ချောင်းကို အရေပြားမှဖောက်ပြီး အစာအိမ်တွင်းသို့ ထိုးသွင်းပါသည်။ လမ်းညွှန်ဝိုင်ယာတစ်ချောင်းကို အပ်မှတဆင့်ထည့်၍ အပ်ကို ထုတ်လိုက်ပါသည်။
  • လမ်းညွှန် ဝိုင်ယာအား အစာအိမ် သို့မဟုတ် အူသိမ်အတွင်း နေရာမှန်ချပေးရာတွင် လမ်းညွှန်ပေးရန် ပုံရိပ်ရိုက်ခြင်းကို အသုံးပြုပါသည်။
  • အပေါက်ကို ကျယ်စေရန် ချဲ့သည့်အရာ (dilator) ဟုခေါ်သည့် အခေါင်းပါသောကိရိယာသေးသေးတစ်ခုကို လမ်းညွှန်ဝိုင်ယာပေါ်မှ တပ်လျက် အရေပြားကိုဖြတ်ကာ အစာအိမ်တွင်းသို့ ထိုးထည့်ပါသည်။ အပေါက်ကို အစာထည့်သည့်ပြွန် ဆန့်သည်အထိကျယ်စေရန် ချဲ့သည့်အရာအတွဲလိုက် အသုံးပြုပါသည်။
  • ပြီးနောက် အစာထည့်သည့်ပြွန်ကို လမ်းညွှန်ဝိုင်ယာပေါ်မှ တပ်လိုက်ပါသည်။ အစာထည့်သည့်ပြွန် နေရာကျသည်နှင့် ပြွန်ကို အစာအိမ်နံရံနှင့်ကပ်အောင်နေရာ ဆက်ချထားရန် ပြွန်ပေါ်ရှိ ပူဖောင်းသေးသေးတစ်လုံးကို ရေဖြင့်ြဖည့်ပါသည်။
  • အစာသွင်းပိုက်က နေရာမှန်တွင်ရှိသောအခါ၌ လမ်းညွှန်ဝိုင်ယာကို ထုတ်ပါသည်။
  • လုပ်ထုံးလုပ်နည်းအပြီးတွင် အရေပြားကို သန့်ရှင်းပြီး ပြွန်ကအရေပြားပေါ် ဖောက်ထွက်သည့်နေရာပေါ်၌ ဆေးပတ်တီးစ ကပ်ပါသည်။
  • လူနာများအနေဖြင့် ပြန်လည်နာလန်ထူသည့်နေရာတွင် တစ်နာရီခန့် ခေတ္တနေရလေ့ရှိပါသည်။

မှတ်ချက် - လုပ်ထုံးလုပ်နည်းများနှင့် ခွဲစိတ်နည်းလမ်းများက ဆေးရုံ၏မူဝါဒများ၊ ရရှိနိုင်သော ရင်းမြစ်များ၊ ကျွမ်းကျင်မှု နှင့် လူနာ၏လိုအပ်ချက်များပေါ်မူတည်ပြီး ကွဲပြားနိုင်ပါသည်။ သင်၏လုပ်ငန်းစဉ်အဆင့်ဆင့်ကို သင့်စောင့်ရှောက်ရေးအဖွဲ့ဖြင့် သေချာဆွေးနွေးပါ။

ခွဲစိတ်နည်းဖြင့် အစာအိမ်ဖောက်ခြင်း၊ အစာအိမ်နှင့်အူသိမ်လယ်ဖောက်ခြင်း နှင့် အူသိမ်လယ်ဖောက်ခြင်း

ခွဲစိတ်နည်းဖြင့် အစာထည့်သည့်ပြွန်(G tube၊ GJ tube၊ သို့မဟုတ် J tube) နေရာချခြင်း ကို ခွဲစိတ်ခန်းအတွင်း လူနာအား အထွေထွေမေ့ဆေး (general anesthesia)ပေးထားချိန်တွင် လုပ်ဆောင်ပါသည်။ အစာသွင်းပိုက်ကို အစာအိမ်နံရံမှတဆင့်ဖြတ်၍ အစာအိမ်တွင်း (G tube) သို့မဟုတ် အူသေး (GJ tube) အတွင်း တိုက်ရိုက် နေရာချပါသည်။ အူသိမ်ဖောက်ထည့်သည့် (J) ပြွန်ကို အူသေးနံရံမှတဆင့်ဖြတ်၍ တိုက်ရိုက်နေရာချပါသည်။ ယင်းပြွန်များက မသိသာသည့် သို့မဟုတ် ကြယ်သီးသဏ္ဍာန် ကိရိယာများဖြစ်သည်။ အကယ်၍ ပြွန်ရှည်တစ်ခုကို ကနဦးတွင်အသုံးပြုထားပါက ၆ ပတ်အတွင်း လမ်းကြောင်းအနာကျက်သွားပြီးနောက် မသိသာသည့်ကိရိယာတစ်ခုဖြင့် အစားထိုးနိုင်ပါသည်။

ခွဲစိတ်မှုက ခွဲကြောင်းသေး အမြောက်အများသုံးကာ အနည်းဆုံးထိုးဖောက်၍ မှန်ပြောင်းဖြင့်ခွဲစိတ်မှု (laparoscopic) သို့မဟုတ် ခွဲကြောင်းကြီးကြီးတစ်ခုသုံးသည့် ဖွင့်ပြီးခွဲစိတ်မှုမျိုး ဖြစ်နိုင်ပါသည်။ လက်ပရိုစကုပ်မှန်ပြောင်း (laparoscopic) ဖြင့်ခွဲစိတ်မှုတွင် လုပ်ငန်းစဉ်အဆင့်ဆင့်ကို လမ်းညွှန်ပေးရန် အလွန်သေးငယ်သော ကင်မရာတစ်ခုကို ထည့်သွင်းပါသည်။ ဖွင့်ပြီးခွဲစိတ်မှုတစ်ခုတွင် အစာအိမ် သို့မဟုတ် အူသေးအတွင်း ရောက်ရှိရန် ဝမ်းဗိုက်နံရံကိုဖြတ်၍ ခွဲကြောင်းကြီးကြီးတစ်ခုလုပ်ပါသည်။

ယေဘုယျအားဖြင့် မှန်ပြောင်းဖြင့် (laparoscopic) G tube နေရာချခြင်းကို ဖွင့်ပြီးခွဲစိတ်မှုဖြင့် လုပ်ဆောင်ပါသည်။ သို့ပါသော်လည်း နံရံများ ကပ်နေခြင်း၊ အနာရွတ်တစ်ရှူးများရှိခြင်း သို့မဟုတ် ရောဂါနှင့်ဆက်စပ်သော အချက်များရှိပါက ဖွင့်၍ခွဲစိတ်မှု လိုအပ်နိုင်ပါသည်။ လုပ်ထုံးလုပ်နည်းအတွက် စုစုပေါင်းကြာချိန်မှာ မေ့ဆေးနှင့် ပြန်လည်နာလန်ထူခြင်းအပါအဝင် ၁-၂ နာရီခန့် ကြာလေ့ရှိပါသည်။

  • G သို့မဟုတ် GJ tube နေရာမချမီ လူနာများအနေဖြင့် သွေးစစ်ဆေးမှုနှင့် ကိုယ်ခန္ဓာ စမ်းသပ်မှုတစ်ခု ရရှိပါသည်။ စောင့်ရှောက်ရေးအဖွဲ့ဝင်များက စာရွက်စာတမ်းဖြည့်ရန် နှင့် မေးခွန်းများကိုဖြေဆိုရန် မိသားစုနှင့် တွေ့ဆုံပါသည်။
  • လူနာအား ဝတ်ရုံရှည် လဲလှယ်ပေးပြီး လုပ်ထုံးလုပ်နည်းလုပ်ဆောင်ရန် ခွဲစိတ်ခန်းတစ်ခုတွင်းသို့ ခေါ်ဆောင်ပါသည်။ ဆေးဖက်ဆိုင်ရာစင်တာ၏ မူဝါဒများပေါ်မူတည်ပြီး လူနာတစ်ဦးအနေဖြင့် လုပ်ငန်းစဉ်အဆင့်ဆင့်လုပ်ရန် အချိန်ရောက်သည်အထိ မိဘတစ်ဦးက ကလေးနှင့် လိုက်ပါဝင်ရောက်နိုင်ပါသည်။
  • လူနာအား ထွေထွေမေ့ဆေးပေးပြီး လုပ်ထုံးလုပ်နည်း လုပ်နေစဉ်တလျှောက် အနီးကပ် စောင့်ကြည့်ပါသည်။
  • စောင့်ရှောက်ရေးအဖွဲ့က ဝတ်ရုံရှည်များ၊ မျက်နှာဖုံးများ နှင့် လက်အိတ်များ ဝတ်ဆင်ထားကြပါသည်။ ဝမ်းဗိုက်ပေါ်တွင် ခွဲကြောင်းပေးမည့်ဧရိယာကို ချန်လှပ်ပြီး လူနာ၏ကိုယ်ခန္ဓာအားဖုံးအုပ်ရန် အပြာရောင် စက္ကူအုပ်စတစ်ခုကို သုံးပါသည်။ ယင်းက အဆိုပါဧရိယာကို သန့်ရှင်းအောင်ထားရန် နှင့် ကူးစက်ပိုးများမှကာကွယ်ရာတွင် ကူညီပါသည်။
  • ဝမ်းဗိုက်ပေါ်ရှိအရေပြားကို သန့်ရှင်းရေးလုပ်ပြီး ခွဲစိတ်ရန် ပြင်ဆင်ပါသည်။ ဗိုက်ပေါ်ရှိ ချက်နေရာတွင် ခွဲကြောင်းသေးသေးတစ်ခု ပြုလုပ်ပါသည်။ ကင်မရာအသေးတစ်လုံးပါသော ခွဲစိတ်ကိရိယာပါးပါးတစ်ခုကို ခွဲကြောင်းမှတဆင့် ထည့်သွင်းကာ အစာအိမ် နှင် ပတ်ဝန်းကျင်ရှိ ကိုယ်တွင်းအင်္ဂါများ၏ လက်ငင်းပုံရိပ်များရိုက်ရန် အသုံးပြုပါသည်။
  • ခွဲစိတ်ဆရာဝန်က ဝမ်းဗိုက်၏ ဘယ်ဖက်အပေါ်ပိုင်းတွင် ခွဲကြောင်းသေး ၂-၃ ခု လုပ်ပါလိမ့်မည်။ အစာအိမ်ကို ဆုပ်ကိုင်ကာ ဝမ်းဗိုက်နံရံဆီသို့ ဆွဲတင်ရန် ခွဲစိတ်ကိရိယာတစ်ခုကို အသုံးပြုပါသည်။ ယင်းကို ချုပ်ရိုး ၂ ခု ဖြင့်နေရာချတွယ်ကာ အစာထည့်သည့်ပြွန် နေရာချမည့် ဧရိယာတစ်ခု ဖန်တီးပေးပါသည်။
  • မေ့ဆေးအဖွဲ့က နှာခေါင်းပိုက်တစ်ခုမှတဆင့် အစာအိမ်တွင်းသို့ လေမှုတ်ထည့်ပါသည်။
  • မှန်ပြောင်းဖြင့် တိုက်ရိုက် ကြည့်ရှု (direct laparoscopic visualization) ၍ အစာထည့်သည့်ပြွန်ကို နေရာချမည့်နေရာတွင် အခေါင်းပါသည့် အပ်တစ်ချောင်းကို အရေပြားမှဖြတ်ကာ အစာအိမ်တွင်းသို့ ထိုးထည့်ပါသည် လမ်းညွှန်ဝိုင်ယာတစ်ချောင်းကို အပ်မှဖြတ်ပြီး အစာအိမ်တွင်းသို့ ထည့်ကာ အပ်ကို ထုတ်ယူပါသည်။
  • အပေါက်ကို ကျယ်စေရန် ချဲ့သည့်အရာ (dilator) ဟုခေါ်သည့် အခေါင်းပါသောကိရိယာသေးသေးတစ်ခုကို လမ်းညွှန်ဝိုင်ယာပေါ်မှ တပ်လျက် အရေပြားကိုဖြတ်ကာ အစာအိမ်တွင်းသို့ ထိုးထည့်ပါသည်။ အပေါက်ကို အစာထည့်သည့်ပြွန် ဆန့်သည်အထိကျယ်စေရန် ချဲ့သည့်အရာအတွဲလိုက် အသုံးပြုပါသည်။
  • ပြီးနောက် အစာထည့်သည့်ပြွန်ကို လမ်းညွှန်ဝိုင်ယာပေါ်မှ တပ်လိုက်ပါသည်။ အစာထည့်သည့်ပြွန် နေရာကျသည်နှင့် ပြွန်ကို အစာအိမ်နံရံနှင့်ကပ်အောင်နေရာ ဆက်ချထားရန် ပြွန်ပေါ်ရှိ ပူဖောင်းသေးသေးတစ်လုံးကို ရေဖြင့်ြဖည့်ပါသည်။
  • အစာသွင်းပိုက်က နေရာမှန်တွင်ရှိသောအခါ၌ လမ်းညွှန်ဝိုင်ယာကို ထုတ်ပါသည်။
  • အစာအိမ်ကို ဝမ်းဗိုက်နံရံနှင့် ကပ်ပြီးနေရာကျအောင်ထားရာတွင် ကူညီရန် ချုပ်ရိုများ သုံးပါသည်။
  • လုပ်ထုံးလုပ်နည်းအပြီးတွင် အရေပြားကို သန့်ရှင်းပြီး ပြွန်ကအရေပြားပေါ် ဖောက်ထွက်သည့်နေရာပေါ်၌ ဆေးပတ်တီးစ ကပ်ပါသည်။
  • လူနာများအနေဖြင့် ပြန်လည်နာလန်ထူသည့်နေရာတွင် တစ်နာရီခန့် ခေတ္တနေရလေ့ရှိပါသည်။

အစာအိမ်-အူသိမ်လယ်ဖောက်ပြီး အစာသွင်းပိုက် နေရာချခြင်း -

GJ ပြွန် နေရာချခြင်းက G ပြွန် နေရာချခြင်းနှင့် တူညီသော အထွေထွေအဆင့်များအတိုင်း လိုက်နာပါသည်။ သို့သော်လည်း လမ်းညွှန်ဝိုင်ယာကို အစာအိမ်မှဖြတ်၍ အူသိမ်တွင်း နေရာမှန်ရောက်အောင် ရှေ့တိုးထည့်ရာတွင် ဖလူရိုစကုပ်သုံးသည့်နည်းလမ်း (fluoroscopy) ကိုအသုံးပြုပါသည်။ ပြီးနောက် GJ ပြွန်ကို လမ်းညွှန်ဝိုင်ယာပေါ်တွင် တပ်လိုက်ပါသည်။ G ပြွန် ထည့်ရန်ကြိုးစားပြီးနောက် GJ ပြွန်ကို မကြာခဏဆိုသလို နေရာချလေ့ရှိပါသည်။ ယင်းသို့သောအခြေအနေရှိပါက GJ ပြွန်ကို G ပြွန်ထည့်သည့် လမ်းကြောင်းမှတဆင့် နေရာချပါသည်။

မှတ်ချက် - လုပ်ထုံးလုပ်နည်းများနှင့် ခွဲစိတ်နည်းလမ်းများက ဆေးရုံ၏မူဝါဒများ၊ ရရှိနိုင်သော ရင်းမြစ်များ၊ ကျွမ်းကျင်မှု နှင့် လူနာ၏လိုအပ်ချက်များပေါ်မူတည်ပြီး ကွဲပြားနိုင်ပါသည်။ သင်၏လုပ်ငန်းစဉ်အဆင့်ဆင့်ကို သင့်စောင့်ရှောက်ရေးအဖွဲ့ဖြင့် သေချာဆွေးနွေးပါ။

အူတွင်းကြည့်မှန်ပြောင်းထည့်ပြီး အရေပြားအောက်မှ အစာအိမ်ဖောက်ခြင်း (PEG)

အူတွင်းကြည့်မှန်ပြောင်းထည့်ပြီး အရေပြားအောက်မှ အစာအိမ်ဖောက်ခြင်း (PEG) ဆိုသည်မှာ အူတွင်းကြည့်မှန်ပြောင်းတစ်ခု သုံးပြီး အစာသွင်းပိုက်တစ်ခု ထည့်သွင်းနေရာချခြင်းဖြစ်သည်။ အူတွင်းကြည့်မှန်ပြောင်းဆိုသည်မှာ ပိန်ပိန်၊ ရှည်ရှည်၊ ကွေးလွယ် ဆန့်လွယ်သော ကိရိယာတစ်ခုဖြစ်ပြီး အဖျားတွင် မီးသီး နှင့် ကင်မရာတစ်လုံး တပ်ထားပါသည်။ အူတွင်းကြည့်မှန်ပြောင်းကို ပါးစပ်မှသွင်းပြီး အစာမျိုလမ်းကြောင်း တစ်လျှောက်ဖြတ်ကာ အစာအိမ်တွင်းသို့ ရွှေ့ပြီးထည့်ပါသည်။ ဗွီဒီယို မော်နီတာတစ်ခုမှ အစာအိမ်အတွင်းပိုင်း၏ ရုပ်ပုံတစ်ခုကို ပြသသည့်အတွက် အစာထည့်ပြွန်ကို နေရာမှန်တွင် ချပေးနိုင်ပါသည်။ အစာသွင်းပိုက်က အစာအိမ်မှဖြတ်သန်းပြီး အရေပြားအပြင်ဖက်သို့ ဝမ်းဗိုက်ပေါ်ရှိ ခွဲကြောင်းသေးတစ်ခုမှဖြတ်၍ ထွက်ပါသည်။ ယင်းလုပ်ထုံးလုပ်နည်းကို အထွေထွေမေ့ဆေး ဖြင့် လုပ်ဆောင်လေ့ရှိပါသည်။ လုပ်ထုံးလုပ်နည်းအတွက် စုစုပေါင်းကြာချိန်မှာ မေ့ဆေးနှင့် ပြန်လည်နာလန်ထူခြင်းအပါအဝင် ၁-၂ နာရီခန့် ကြာလေ့ရှိပါသည်။ PEG သည် ရှည်ရှည်ပြွန်တစ်ချောင်းဖြစ်လေ့ရှိသော်လည်း လမ်းကြောင်း အနာကျက်ပြီးနောက်တွင် မသိသာလှသည့် ကိရိယာတစ်ခုဖြင့် ပြောင်းနိုင်ပါသည်။

  • PEG ပြွန် နေရာမချမီ လူနာများအနေဖြင့် သွေးစစ်ဆေးမှုများ နှင့် ကိုယ်ခန္ဓာ စမ်းသပ်မှုတစ်ခု ရရှိပါမည်။ စောင့်ရှောက်ရေးအဖွဲ့ဝင်များက စာရွက်စာတမ်းများ ဖြည့်ရန်နှင့် မေးခွန်းများကိုဖြေဆိုရန် မိသားစုနှင့် တွေ့ဆုံပါလိမ့်မည်။
  • လူနာအား ဆေးရုံဝတ်ရုံရှည်တစ်ထည် ပြောင်းဝတ်ပေးပါလိမ့်မည်။
  • လုပ်ငန်းစဉ်အဆင့်ဆင့်ကို ကုသရေးခန်း သို့မဟုတ် ခွဲစိတ်ခန်းတစ်ခုအတွင်း ပြုလုပ်နိုင်ပါသည်။
  • လူနာအား ထွေထွေမေ့ဆေးပေးပြီး လုပ်ထုံးလုပ်နည်း လုပ်နေစဉ်တလျှောက် အနီးကပ် စောင့်ကြည့်ပါသည်။
  • စောင့်ရှောက်ရေးအဖွဲ့က ဝတ်ရုံရှည်များ၊ မျက်နှာဖုံးများ နှင့် လက်အိတ်များ ဝတ်ဆင်ပါလိမ့်မည်။ ဝမ်းဗိုက်ပေါ်တွင် ခွဲကြောင်းပေးမည့်ဧရိယာကို ချန်လှပ်ပြီး လူနာ၏ကိုယ်ခန္ဓာအားဖုံးအုပ်ရန် အပြာရောင် စက္ကူအုပ်စတစ်ခုကို သုံးပါသည်။ ယင်းက အဆိုပါဧရိယာကို သန့်ရှင်းအောင်ထားရန် နှင့် ကူးစက်ပိုးများမှကာကွယ်ရာတွင် ကူညီပါသည်။
  • ဝမ်းဗိုက်ပေါ်ရှိအရေပြားကို သန့်ရှင်းရေးလုပ်ပါသည်။ ပြီးနောက် အနာအကျင်သက်သာစေရန် ထုံဆေးတစ်မျိုး အသုံးပြုပြီး ယင်းဧရိယာကို ထုံအောင်လုပ်ပါသည်။ ယင်းက ထုံစေသည့် လိုင်ဒိုကိန်း (lidocaine) ထိုးဆေးတစ်မျိုး ဖြစ်လေ့ရှိပါသည်။
  • အူတွင်းကြည့်မှန်ပြောင်းကို ပါးစပ်မှတဆင့် အစာမျိုလမ်းကြောင်းကိုဖြတ်ကာ အစာအိမ်တွင်းသို့ လမ်းညွှန်ဖြင့် ထည့်ပါလိမ့်မည်။ အူတွင်းကြည့်မှန်ပြောင်းပေါ်ရှိ အလင်းရောင်ကို ပြွန်ရောက်ရှိသောနေရာအား ခွဲခြားသတ်မှတ်ရန် အသုံးပြုပါသည်။
  • အူတွင်းကြည့်မှန်ပြောင်းဖြင့် ပြွန်ကိုနေရာချရာတွင် အဓိကနည်းလမ်း နှစ်မျိုးကို အသုံးပြုပါသည် -
    • ဆွဲသည့်နည်းလမ်း - ပြွန်ထားမည့်နေရာကို ရွေးပြီးသည်နှင့် အခေါင်းပါသည့်အပ်ကို ဝမ်းဗိုက်ပေါ်ရှိ အရေပြားမှတဆင့် အစာအိမ်တွင်းသို့ ထည့်သွင်းပါသည်။ ပြီးနောက် လမ်းညွှန်ဝိုင်ယာကို အပ်အခေါင်းပေါက်မှတဆင့် ထည့်ပါသည်။ အူတွင်းကြည့်မှန်ပြောင်းကို ဝိုင်ယာနှင့်ချိတ်၍ အစာအိမ်၊ အစာမျိုပြွန် တလျှောက် အပေါ်ဆွဲတင်ပြီး ပါးစပ်မှအပြင်သို့ထုတ်ရန် အသုံးပြုပါသည်။ ထို့နောက် အစာသွင်းပိုက်ကို လမ်းညွှန်ဝိုင်ယာပေါ်မှတပ်ပြီး ပါးစပ်တစ်လျှောက်မှ အစာအိမ်တွင်းသို့ ရွှေ့ချပါသည်။ ပြွန်၏ ရှူးသွားသောအဖျားပိုင်းကို ဝမ်းဗိုက်နံရံတစ်လျှောက် ဖြည်းဖြည်းချင်းဆွဲယူပြီး ခွဲကြောင်းအသေးမှ အပြင်သို့ထုတ်ပါသည်။
    • တွန်းသည့်နည်းလမ်း - ပြွန်ထားမည့်နေရာကို ရွေးချယ်ပြီးသည်နှင့် အပ်ရှည်တစ်ချောင်းကို ဝမ်းဗိုက်ပေါ်ရှိအရေပြားမှတဆင့် အစာအိမ်တွင်းသို့ ထိုးသွင်းပါသည်။ လမ်းညွှန်ဝိုင်ယာကို အပ်မှတဆင့် ထည့်ပြီး အစာသွင်းပိုက်ကို လမ်းညွှန်ဝိုင်ယာပေါ်မှ တွန်းထည့်ပါသည်။
  • အစာသွင်းပိုက်ကို အစာအိမ်အတွင်း နေရာချပြီးသည်နှင့် ပြွန်ကို ယင်းနေရာတွင် ဆက်လက်ထားရှိရန် အဖျားရှိ ပူဖောင်းသေးသေးတစ်လုံးကို ရေဖြည့်ပါသည်။ အစာသွင်းပိုက်က နေရာမှန်တွင်ရှိသောအခါ၌ လမ်းညွှန်ဝိုင်ယာကို ထုတ်ပါသည်။ ပြင်ပရှိ အထစ် သို့မဟုတ် အပြားတစ်ခုက ယင်းအား အရေပြားအပြင်ဖက် တွင် နေရာကျအောင် ထိန်းထားပေးပါသည်။
  • လုပ်ထုံးလုပ်နည်း ပြီးနောက်တွင် အရေပြားကို သန့်ရှင်းရေးလုပ်ပြီး ပြွန်က အရေပြားအပြင်ဖက်ထွက်သည့်နေရာပေါ်၌ ဆေးပတ်တီးစတစ်ခု အုပ်ပါလိမ့်မည်။
  • အစာသွင်းပိုက်၏ တည်နေရာကိုစစ်ဆေးရန် အူတွင်းကြည့်မှန်ပြောင်းဖြင့် ကြည့်သည့် နည်းလမ်း (Endoscopy)၊ ဖလူရိုစကုပ်ဖြင့်ကြည့်သည့် နည်းလမ်း (fluoroscopy)၊ သို့မဟုတ် ဓာတ်မှန်ကို အသုံးပြုပါလိမ့်မည်။
  • အထွေထွေမေ့ဆေးရရှိသောလူနာများအနေဖြင့် နာလန်ထသည့်နေရာတွင် ခပ်တိုတိုအချိန်တစ်နာရီခန့် နေရလေ့ရှိပါမည်။

မှတ်ချက် - လုပ်ထုံးလုပ်နည်းများနှင့် ခွဲစိတ်နည်းလမ်းများက ဆေးရုံ၏မူဝါဒများ၊ ရရှိနိုင်သော ရင်းမြစ်များ၊ ကျွမ်းကျင်မှု နှင့် လူနာ၏လိုအပ်ချက်များပေါ်မူတည်ပြီး ကွဲပြားနိုင်ပါသည်။ သင်၏လုပ်ငန်းစဉ်အဆင့်ဆင့်ကို သင့်စောင့်ရှောက်ရေးအဖွဲ့ဖြင့် သေချာဆွေးနွေးပါ။

---
ပြန်လည်သုံးသပ်ခဲ့သည့်ရက်စွဲ- ဒီဇင်ဘာလ၊ ၂၀၁၈ ခုနှစ်