ကြိုဆိုပါသည်

Together သည် - လူနာများနှင့် မိဘများ၊ မိသားစုဝင်များနှင့် သူငယ်ချင်းများအပါအဝင် - ကလေးကင်ဆာကြောင့် ထိခိုက်မှုရှိသူတိုင်းအတွက် ရင်းမြစ်အသစ်တစ်ခု ဖြစ်ပါသည်။

ပိုမိုလေ့လာရန်

အမျိုးသမီး၀ - ၁၈ နှစ်အကြားဖြစ်သော ကလေးဘဝ ကင်ဆာလူနာများတွင် သန္ဓေတည်နိုင်စွမ်းကို ကာကွယ်ခြင်း

အချို့ ၀ - ၁၈ နှစ်အကြားဖြစ်သော ကလေးဘဝ ကင်ဆာကုသမှုများသည် နောင်အခါတွင် အမျိုးသမီးလူနာ၏ ကိုယ်ဝန်ရရှိနိုင်သည့် စွမ်းရည်အပေါ်တွင် ထိခိုက်စေနိုင်သည်။

ကင်ဆာရောဂါရှာဖွေဖော်ထုတ်မှုကို ရရှိပြီးနောက်ပိုင်းတွင် ကလေးများရရှိခြင်းသည် လူနာများ သို့မဟုတ် မိဘများ၏စိတ်အတွင်း၌ အထူးဦးစားပေးအချက်မဟုတ်ဘဲ ဖြစ်နေနိုင်သည်။ သို့ရာတွင် မိသားစုများသည် ကုထုံးမစတင်မီ ကုသမှု၏ အကျိုးသက်ရောက်မှုကို လူနာ၏ ကင်ဆာအထူးကုဆရာဝန်နှင့် ဆွေးနွေးသင့်သည်။ ကလေးကင်ဆာကုသဌာနတွင် မိသားစုနှင့်တိုင်ပင်ဆွေးနွေးပေးသော သန္ဓေတည်နိုင်စွမ်းဆိုင်ရာ အထူးကုဆရာဝန် လည်းရှိနိုင်ပါသည်။

သန္ဓေတည်နိုင်စွမ်းဟူသည်မှာ လူတစ်ဦးဦး၏ မျိုးဆက်ပြန့်ပွားနိုင်သည့်စွမ်းရည်ကို ရည်ညွှန်းပြီး အမျိုးသားတစ်ဦးအနေဖြင့် ဖခင်ဖြစ်နိုင်ခြင်း နှင့် အမျိုးသမီးတစ်ဦးအနေဖြင့် ကိုယ်ဝန်ရရှိနိုင်သောစွမ်းရည်ဖြစ်သည်။

အမျိုးသမီးမျိုးဆက်ပြန့်ပွားရေးစနစ်

အမျိုးသမီးများတွင် သားဥအိမ်နှစ်ခုရှိသည်။ ၎င်းတို့သည် တင်ပါးဆုံနေရာတွင် ရှိသည်။ လူလားမြောက်ခြင်းဖြစ်စဉ်အတွင်း ဦးနှောက်ရှိ ပစ်ကျူထရီကလင်းသည် သားဥအိမ်များကို အီစထရိုဂျင်နှင့် ပရိုဂရပ်စထရွန်းတို့ကို ပိုမိုထုတ်လုပ်ရန် စတင်အချက်ပြသည်။ ၎င်းတို့သည် မျိုးဆက်ပြန့်ပွားရေးစနစ်အလုပ်လုပ်ရန် လိုအပ်သော ဟိုမုန်းများဖြစ်သည်။

မိန်းကလေးတစ်ယောက်သည် သူမအတွက် လိုအပ်သောမျိုးဥများဖြင့် မွေးဖွားလာပြီးဖြစ်သည်။ တစ်လလျှင် တစ်ကြိမ် သားအိမ်မှပုံမှန် မျိုးဥတစ်လုံး ထုတ်လွှတ်ပေးလေ့ရှိသည်။ အမျိုးသားထံမှ သုက်ပိုးသည် မျိုးဥတစ်ခုနှင့် သန္ဓေအောင်သည့်အခါ ကိုယ်ဝန်ဆောင်ခြင်း စတင်ဖြစ်ပေါ်လာသည်။

ပုံတွင် ဆယ်ကျော်သက်အရွယ်မိန်းကလေးတစ်ဦးအား သူမ၏သားအိမ်၊ သားဥပြွန်၊ သားဥအိမ်များ၊ သားအိမ်ခေါင်းနှင့် မိန်းမကိုယ်တို့နှင့်အတူ ညွှန်းဆိုပြထားသည်။ ပင်မပုံ၏ ညာဘက်ရှိ အမျိုးသမီးငယ်ခန္ဓာကိုယ်၏ အရိပ်ထိုးပုံတွင် ပီနီယယ်ဂလင်း၊ ဟိုက်ပိုသဲလမတ်၊ ပစ်ကျူထရီကလင်း၊ သိုင်းရွိုက်နှင့် ပါရာသိုင်းရွိုက်၊ သိုင်းမတ်စ်၊ အက်ဒ်ရီနယ်လ်ဂလင်းနှင့် ပန်ကရိယတို့ဖြစ်သည့် ကိုယ်တွင်းထုတ်ဂလင်းစနစ် ကိုယ်အင်္ဂါအစိတ်အပိုင်းများကိုလည်း ရေးဆွဲပြထားသည်။

အမျိုးသမီး၏ မျိုးဆက်ပြန့်ပွားရေးစနစ်၏ ကိုယ်အင်္ဂါအစိတ်အပိုင်းများသည် မိန်းမတစ်ဦးအနေဖြင့် ကိုယ်ဝန်ရရှိနိုင်ရန် အတူတကွအလုပ်လုပ်ပြီး ဖွံ့ဖြိုးလာသည့် လူသားကို ဆက်လက်သယ်ဆောင်သည်မှာ ကိုယ်ဝန်ရှိချိန်မှ မွေးဖွားရန်အချိန်အထိဖြစ်သည်။

အမျိုးသမီးများရှိ သန္ဓေတည်နိုင်စွမ်းကို ကင်ဆာကုသမှုမှ ထိခိုက်စေမည့်ပုံစံ

ကုသမှုသည် လူနာ၏ တင်ပါးဆုံနေရာ၊ မျိုးပွားအင်္ဂါအစိတ်အပိုင်းများနှင့် ပစ်ကျူထရီကလင်း လုပ်ဆောင်ချက်ကို ထိခိုက်စေသဖြင့် လူနာ၏သန္ဓေတည်နိုင်စွမ်းကို ထိခိုက်စေနိုင်သည်။ ကုသမှုသည် မျိုးဥများ၏အရေအတွက်ကို လျော့ကျစေနိုင် သို့မဟုတ် မျိုးဥ၏ အရည်အသွေးကို ကျစေနိုင်သည်။

  1. အယ်လကိုင်းဂုဏ်သတ္တိရှိသော ပစ္စည်းများနှင့် အချို့သော ကင်ဆာကုသရေးဆေးဝါး ဟုခေါ်ဆိုသော ဆေးဝါးများသည် သန္ဓေတည်နိုင်စွမ်းနှင့် ပတ်သက်သည့်ပြဿနာများကို ဖြစ်ပေါ်စေနိုင်သည်။

    အယ်လကိုင်းဂုဏ်သတ္တိရှိသော ဆေးဝါးများ
    သတ္တုဓာတ်သိပ်သည်းဆ မြင့်မားစွာ ပါဝင်သည့်ဆေးဝါးများ
    သောက်သုံးရန် ပုံမှန်အားဖြင့် ညွှန်ကြားလေ့မရှိသော အယ်လကိုင်းဆေးဝါးများ
  2. တင်ပါးဆုံနေရာသို့ဓာတ်ရောင်ခြည်ကုထုံး ပြုလုပ်ခြင်းသည် အနီးဝန်းကျင်ရှိ မျိုးပွားအင်္ဂါအစိတ်အပိုင်းများကို ထိခိုက်ပျက်စီးစေနိုင်သည့်အတွက် သန္ဓေတည်နိုင်စွမ်းအပေါ်တွင် ထိခိုက်စေနိုင်သည်။ ကုသမှုသည် အမျိုးသမီးတစ်ဦး၏ သားဥအိမ်ကို ထိခိုက်စေနိုင်ပြီး မျိုးဥများ၏ အရေအတွက်နှင့် အရည်အသွေးကို လျော့ကျစေနိုင်သည်။ အချို့သောအခြေအနေများတွင်ဓာတ်ရောင်ခြည်ကုထုံးသည် သားအိမ် (သန္ဓေလောင်းတည်ရာ) ကို ထိခိုက်စေနိုင်ပြီး ကိုယ်ဝန် ခိုင်စေနိုင်သည့် စွမ်းရည်ကို လျော့ကျစေသည်။

    ခွဲစိတ်ကုသရေး လုပ်ငန်းစဉ်များ သည် သန္ဓေတည်နိုင်စွမ်းအပေါ်တွင် မျိုးဆက်ပြန့်ပွားရေး ကိုယ်အင်္ဂါအစိတ်အပိုင်းများကို ထိခိုက်သည့် အကျိုးသက်ရောက်မှုရှိသည်။

    ပစ်ကျူထရီကလင်းပါဝင်သော ဦးနှောက်အပိုင်းအား ကုသမှုပြုလုပ်ခြင်းသည် ဟော်မုန်းထုတ်လုပ်ခြင်းကို ထိခိုက်စေနိုင်သောကြောင့် သန္ဓေတည်နိုင်စွမ်းကိုလည်း ထိခိုက်နိုင်စေသည်။

ကုသမှုမစတင်မီ အောက်ပါပြဿနာရပ်များကို ဖြေရှင်းဆောင်ရွက်ပါ။

ကင်ဆာကုသမှုမှ ရရှိစေနိုင်သည့် လူနာ၏ကလေးရနိုင်သည့် စွမ်းရည်ပေါ်တွင် သက်ရောက်မှုနှင့်ပတ်သက်၍ မိဘများနှင့် လူနာတို့သည် ကုသမှုမစတင်မီ ဆေးဝါးကူညီမှု အသင်းနှင့် ပြောဆိုသင့်သည်။

  • ကုသမှုသည် သန္ဓေတည်နိုင်စွမ်းကို ထိခိုက်စေနိုင်သည်ဆိုလျှင် သန္ဓေတည်နိုင်စွမ်းကို ကာကွယ်ဆောင်ရွက်မှုများ လုပ်ဆောင်နိုင်ရန်အတွက် ဆေးဝါးကူညီမှုအသင်းအား မေးမြန်းပါ။
  • ကုသမှုများ၏ ကုန်ကျစရိတ်များအကြောင်းနှင့် ၎င်းတို့သည် အာမခံဖြင့် အကျုံးဝင်နိုင်ခြင်းရှိမရှိကို ဖော်ထုတ်ပါ။

သန္ဓေတည်နိုင်စွမ်းကို ထိန်းသိမ်းနိုင်သည့် လုပ်ငန်းစဉ်အဆင့်ဆင့်

  1. သားဥအိမ် တစ်ရှုးအား အေးခဲ၍ သိမ်းဆည်းခြင်း

    သားဥအိမ် တစ်ရှုးအား အေးခဲ၍ သိမ်းဆည်းခြင်း (ခရိုင်ယိုပရီဆာဗေးရှင်း) တွင် သားဥအိမ်မှ တစ်ရှုးအားဖယ်ရှားခြင်း ပါဝင်သည်။ တစ်ရှုးကို အစိတ်အမွှာများအဖြစ် လှီးဖြတ်ပြီး အေးခဲသိမ်းဆည်းထားသည်။ ကင်ဆာကုသမှုပြီးသည့်နောက်တွင် ဆရာ၀န်များသည် ပြန်လည်နွေးပျော်လာသော အေးခဲထားသည့် တစ်ရှုးအမွှာကို ခန္ဓာကိုယ်အတွင်းသို့ ထည့်သွင်းပေးနိုင်သည်။ တစ်ရှုးတွင် ကင်ဆာဆဲလ်များရှိနိုင်သည့် အခွင့်အလမ်းလည်း ရှိသည်။ ထိုသို့သော အခြေအနေတွင် ကင်ဆာဆဲလ်များသည် ထိုသို့ထည့်သွင်းပြီးသည်နှင့် ပျံ့နှံ့သွားနိုင်သည့် အန္တရာယ်ရှိသည်။ ယင်းကုသမှုကို စမ်းသပ်မှုအဆင့်အဖြစ်သာ သတ်မှတ်ထားသည်။

  2. မျိုးဥ (မမျိုးဥ) အား အေးခဲ၍ သိမ်းဆည်းခြင်း (ခရိုင်ယိုပရီဆာဗေးရှင်း)

    မျိုးဥအား အေးခဲ၍ သိမ်းဆည်းခြင်း ( မျိုးဥ သို့မဟုတ် မမျိုးဥ ခရိုင်ယိုပရီဆာဗေးရှင်းဟုလည်းခေါ်ဆိုသည်) သည် မျိုးဥများကို မျိုးဥအိမ်အတွင်းမှ ဖယ်ရှားပြီး အေးခဲသိမ်းဆည်းထားသည့် လုပ်ငန်းစဉ်ဖြစ်သည်။ လူနာသည် မျိုးဥအိမ်များအတွင်းရှိ မျိုးဥများကို ထုတ်လုပ်ရန် လှုံ့ဆော်သည့် ဟော်မုန်းများကို လက်ခံရရှိပါသည်။ မျိုးဥများကို ဖယ်ရှားသည်။ နောက်ပိုင်းတွင် မျိုးဥများကို အရည်ပျော်စေနိုင်ပြီး ဓာတ်ခွဲခန်းအတွင်း၌ သုက်ပိုးများနှင့် သန္ဓေသားကို ဖြစ်ပေါ်စေပြီး အမျိုးသမီး၏ သားအိမ်အတွင်းသို့ ထည့်သွင်းသည်။ အဆိုပါရွေးချယ်ခွင့်သည် ရာသီသွေးစက်ဝန်းများစတင်ခဲ့ပြီးဖြစ်သည့် မိန်းကလေးများအတွက်သာ ရွေးချယ်နိုင်သည့် ရွေးချယ်ခွင့်တစ်ခုဖြစ်သည်။

    မျိုးဥများကို စောင့်ဆိုင်းထုတ်ယူရန်အလို့ငှာ ကင်ဆာကုသမှုကို ရက်သတ္တပတ်အနည်းငယ်ကြာမျှ ရွေ့ဆိုင်းရမည်ဖြစ်သဖြင့် ထိုရွေးချယ်ခွင့်ကို အမြဲတစေရွေးချယ်နိုင်ခြင်းမရှိပါ။ အဆိုပါရွေးချယ်ခွင့်သည် ဟော်မုန်းများအား ခံနိုင်ရည်မရှိသည့် အကျိတ်များရှိသူ လူနာများအတွက်လည်း အန္တရာယ်ရှိနိုင်သည်။

    သန္ဓေသား အေးခဲသိမ်းဆည်းခြင်း (ခရိုင်ယိုပရီဆာဗေးရှင်း)

    သန္ဓေသား အေးခဲသိမ်းဆည်းခြင်း (ခရိုင်ယိုပရီဆာဗေးရှင်း) သည် သန္ဓေတည်နိုင်စွမ်းကို ထိန်းသိမ်းခြင်းအတွက် နောက်ထပ်နည်းလမ်းတစ်ရပ်ဖြစ်သည်။ သို့ရာတွင် ထိုရွေးချယ်ခွင့်သည် လူလားမြောက်ခြင်းအဆင့်အား ဖြတ်ကျော်ခဲ့ပြီးဖြစ်သည့် အမျိုးသမီးများအတွက်သာ ရရှိနိုင်သည်။ ဤနေရာတွင်လည်း သုက်ပိုးအလှူရှင်တစ်ဦးကို လိုအပ်သည်။

    အဆိုပါရွေးချယ်ခွင့်အတွက် အမျိုးသမီးသည် ခန္ဓာကိုယ်ပြင်ပ သန္ဓေအောင်ခြင်း (IVF) ဟုခေါ်သော လုပ်ငန်းစဉ်တစ်ရပ်ကို တွေ့ကြုံလုပ်ဆောင်ရသည်။ အမျိုးသမီးသည် မျိုးဥအိမ်များအတွင်းရှိ မျိုးဥများကို ထုတ်လုပ်ရန် လှုံ့ဆော်သည့် ဟော်မုန်းများကို လက်ခံရရှိပါသည်။ မျိုးဥများကို ဖယ်ရှားသည်။ သုက်ပိုးနှင့် မျိုးဥတို့ကို ချိတ်ဆက်ခြင်းအားဖြင့် သန္ဓေသားလောင်းများကို ဖန်တီးသည်။ ၎င်းတို့ကို အေးခဲ၍သိမ်းဆည်းသည်။ နောင်အခါတွင် သန္ဓေသားလောင်း တစ်ခု သို့မဟုတ် နှစ်ခုကို အမျိုးသမီး၏ သားအိမ် (သန္ဓေလောင်းတည်ရာ) အတွင်း ဆေးဝါးအကူအညီဖြင့်ဖြစ်စေ ဆေးဝါးအကူအညီမပါဘဲဖြစ်စေ ထည့်သွင်းနိုင်သည်။

    အဆိုပါရွေးချယ်ခွင့်သည် မျိုးဥအား အေးခဲ၍ သိမ်းဆည်းခြင်းနည်းတူ ကုသမှုအား ရွေ့ဆိုင်းရန် လိုအပ်ပြီး ဟော်မုန်းများသုံးစွဲခြင်း ပါဝင်သည်။

    သားဥအိမ် နေရာရွေ့ပြောင်းခြင်း (အူဖိုရိုပက်ဇီ)

    ၎င်းနေရာအား ကင်ဆာဆဲလ်ပျံ့နှံ့ဝင်ရောက်လာနိုင်သည့်အတွက် လူနာတွင် အခြားသော ခွဲစိတ်ကုသမှုလုပ်ငန်းစဉ်ကို ပြုလုပ်ရန်ရှိသည့်အခါမှသာ ထိုရွေးချယ်ခွင့်ကို ပေးအပ်လေ့ရှိသည်။ အဆိုပါလုပ်ငန်းစဉ်အတွင်း ခွဲစိတ်ဆရာဝန်များသည် မျိုးဥအိမ်များကို ဓာတ်ရောင်ခြည်ကုထုံးရရှိမည့်နေရာမှ အခြားတစ်နေရာသို့ ရွေ့ပြောင်းပေးသည်။ ရည်မှန်းချက်မှာ သားဥအိမ်များကို ဆက်လက်လုပ်ဆောင်နိုင်စွမ်းရှိနိုင်ပြီး ဓာတ်ရောင်ခြည်နှင့် ထိတွေ့နိုင်ခြင်းမရှိသည့် တင်ပါးဆုံအတွင်းသို့ ရွေ့ပြောင်းရန်ဖြစ်သည်။
     

  3. သားဥအိမ်အား အကာအကွယ်ပြုလုပ်ခြင်း

    လူနာများသည် ဓာတ်ရောင်ခြည်ကုသမှုကို ရရှိသည့်အခါ သို့မဟုတ် ဓာတ်ရောင်ခြည်အသုံးပြုရသည့် ဓာတ်မှန်များအား ရိုက်ကူးရသည့်အခါ ဆေးဝါးကုသမှုအသင်းသည် သားဥအိမ်များပျက်စီးခြင်းမှ ကာကွယ်ရန် ခန္ဓာကိုယ်ပြင်ပတွင် အကာအကွယ်တစ်ခုကို ထားပေးနိုင်သည်။ အခြားသော ခန္ဓာကိုယ်အစိတ်အပိုင်းများ ဓာတ်ရောင်ခြည်ခံယူရရှိနေချိန်တွင် ထိုအကာအကွယ်သည် သားဥအိမ်များကို ပြန့်ကြဲနေသည့် ဓာတ်ရောင်ခြည်မှ ကာကွယ်ပေးသည်။

ကုသမှုမစတင်မီ မေးမြန်းရန် မေးခွန်းများ

သင်၏သမီးသည် အလွန်ငယ်ရွယ်သည့်အရွယ်ဖြစ်လျှင် သန္ဓေတည်နိုင်စွမ်းဆိုင်ရာ ရွေးချယ်ခွင့်များကို ဆွေးနွေးရန် အထူးအဆန်းဖြစ်နေနိုင်သည်။ သို့ရာတွင် ကုသမှုမစတင်မီ ဆွေးနွေးမှုပြုလုပ်ခြင်းသည် အကောင်းဆုံးအချိန်ဖြစ်ကြောင်း ကျန်းမာရေးစောင့်ရှောက်မှု ဝန်ဆောင်မှုပေးသူများစွာက ယုံကြည်သည်။

အောက်ပါကဲ့သို့သော မေးခွန်းများ မေးမြန်းခြင်းပြုလုပ်ရန် ထည့်သွင်းစဉ်းစားပါ။

  • ကုသမှုသည် သန္ဓေမတည်နိုင်ခြင်း၏ဖြစ်နိုင်ခြေကို တိုးမြင့်စေနိုင်သလား သို့မဟုတ် ၎င်း၏ အကြောင်းရင်းဖြစ်နိုင်သလား။
  • သန္ဓေတည်နိုင်စွမ်းပြဿနာများကို ဖြစ်ပေါ်စေနိုင်ခြင်းမရှိသည့် အကြံပြုထားသော အခြားကင်ဆာကုသမှုများ ရှိပါသလား။
  • မည်သည့် သန္ဓေတည်နိုင်စွမ်းထိန်းသိမ်းမှုရွေးချယ်ခွင့်များကို ကျွန်ုပ်အတွက် အကြံပြုလိုပါသနည်း။
  • ဤဆေးရုံတွင် မည်သည့် သန္ဓေတည်နိုင်စွမ်းထိန်းသိမ်းမှုရွေးချယ်ခွင့်များကို ရရှိနိုင်ပါသနည်း။ သန္ဓေတည်နိုင်စွမ်းဆိုင်ရာ ဆေးကုဌာနတစ်ခုတွင် ရရှိနိုင်ပါသလား။
  • ကျွန်ုပ်အနေဖြင့် ပိုမိုလေ့လာခြင်းကိစ္စရပ်နှင့်ပတ်သက်၍ ပြောဆိုနိုင်ရန်အလို့ငှာ (မျိုးဆက်ပြန့်ပွားရေးဆိုင်ရာ အကျိတ်နှင့် ဟော်မုန်းမူမမှန်ရောဂါ အထူးကုကဲ့သို့) သန္ဓေတည်နိုင်စွမ်းဆိုင်ရာ အထူးကုဆရာဝန်တစ်ဦးကို အကြံပြုနိုင်ပါမည်လား။
  • သားဆက်ခြားခြင်းကိုရော အကြံပြုပါသလား။
  • ကုသမှုပြီးနောက် ကျွန်ုပ်၏သန္ဓေတည်နိုင်စွမ်းကို ပြန်လည်ရရှိနိုင်မည့် အခွင့်အလမ်းများရှိပါသလား။

---
ဤဆောင်းပါးတွင် ဖော်ပြထားသည့် မည့်သည့်ကုန်ပစ္စည်းအမှတ်တံဆိပ်ကိုမျှ သုံးစွဲရန် Together
က ထောက်ခံချက် မပေးပါ။

---
ပြန်လည်သုံးသပ်ခဲ့သည့်ရက်စွဲ- ဇွန်လ 2018