ကြိုဆိုပါသည်

Together သည် - လူနာများနှင့် မိဘများ၊ မိသားစုဝင်များနှင့် သူငယ်ချင်းများအပါအဝင် - ကလေးကင်ဆာကြောင့် ထိခိုက်မှုရှိသူတိုင်းအတွက် ရင်းမြစ်အသစ်တစ်ခု ဖြစ်ပါသည်။

ပိုမိုလေ့လာရန်

အရိုး သိပ်သည်းဆ စကင်

အရိုး သတ္တုဓာတ်သိပ်သည်းဆ စမ်းသပ်မှုသည် အရိုး အထုအထည်ကို တိုင်းတာသည်။ အရိုး သတ္တုဓာတ်သိပ်သည်းဆသည် အရိုးတွင် ထုံးဓာတ်နှင့် အခြားသော အရိုးသတ္တုဓာတ်များတို့၏ ပမာဏကို ရည်ညွှန်းသည်။ အသုံးများဆုံးသော အရိုး သတ္တုဓာတ်သိပ်သည်းဆ စမ်းသပ်မှုမှာ ဒီအိပ့်ချ်အေ (DXA) သို့မဟုတ် ဒီအီးအိပ့်ချ်အေ (DEXA) (စွမ်းအင် နှစ်မျိုးသုံးဓာတ်မှန် စုပ်ယူမှုတိုင်းတာခြင်း) ဖြစ်ပြီး ၎င်းသည် အရိုး အထုအထည်ကို တိုင်းတာရန် ဓာတ်ရောင်ခြည်များကို အသုံးပြုသည်။

ကလေးကင်ဆာအတွက် အချို့သော ကုသမှုများ သည် အရိုး အထုအထည် ဆုံးရှုံးမှု ကို ဖြစ်စေနိုင်ပြီး ၎င်းသည် အရိုးပွခြင်း.ကို နောက်ပိုင်း ဖြစ်လာနိုင်သည်။

အရိုးထုထည် ဆုံးရှုံးမှု အန္တရာယ်ရှိနိုင်သော လက်ရှိလူနာများနှင့် ၀ - ၁၈ နှစ်အကြားဖြစ်သော ကလေးဘဝ ကင်ဆာ အသက်ရှင်ကျန်ရစ်သူများသည် အောက်ပါအခြေအနေရှိသော လူနာများဖြစ်သည်-

  • အရိုးများ အားနည်းစေသော အခြေအနေရှိခြင်း
  • အရိုးများ အားနည်းစေသော ဆေးသောက်သုံးနေရခြင်း
  • အရိုး ပြဿနာများအတွက် ကုသမှု ခံယူနေရခြင်း

အရိုးပွခြင်း ဖြစ်ပေါ်လာမှု အန္တရာယ်ရှိသော ၀ - ၁၈ နှစ်အကြားဖြစ်သော ကလေးဘဝ ကင်ဆာ အသက်ရှင်ကျန်ရစ်သူများတွင် ရေရှည် နောက်ဆက်တွဲ ပြုစုစောင့်ရှောက်မှု ရယူသောအခါ ဒီအိတ်စ်အေ (DXA) စကင် ရှိသင့်သည်။

DXA စကင် တစ်ခုကို ပြင်ဆင်ပုံ

ဆေးနှင့် ကုသမှု မှတ်တမ်း

မိဘများအား လူနာ၏ ယခင် ဆေးကုသမှုများနှင့် အရိုး ကျန်းမာရေး မှတ်တမ်းတို့နှင့်ပက်သက်၍ စစ်တမ်း မေးခွန်းလွှာကို ဖြေကြားရန် ပြောပါမည်။

ဝန်ထမ်းများအား ကြိုပြောရမည်ဖြစ်သော အရေးကြီးသော အရာများ

  • အကယ်၍ လူနာသည် ယခင်က ဘေရီယမ် သို့မဟုတ် ခွဲခြားမြင်နိုင်သော ပစ္စည်းရည်နှင့် စစ်ဆေးမှုတစ်ခု သို့မဟုတ် စကင်ရိုက်ခဲ့ပါက ဝန်ထမ်းအား ပြောပြပါ။ ရိုက်ခဲ့ဖူးသည်ဟုဆိုပါက လုပ်ငန်းစဉ်ကို ပြန်၍ အချိန်ဇယား ဆွဲနိုင်သည်။
  • အကယ်၍ လူနာသည် ကိုယ်ဝန်ရှိနိုင်သည့် အခွင့်အရေးရှိခဲ့လျှင် ဝန်ထမ်းအားပြောပြပါ။ အကယ်၍ ရှိခဲ့ပါက စမ်းသပ်မှုသည် ကလေးကို အန္တရာယ်ရှိစေနိုင်သည်။

ထုံးဖြည့်စွက်ဆေးများ အသုံးပြုခြင်းမှ ရပ်တန့်ပါ

ထုံးဓာတ် သို့မဟုတ် ထုံးဓာတ်ဖြည့်စွက်ဆေးများ (နေ့စဉ် ဗီတာမင်များ) ကို သောက်သုံးနေရသော လူနာများသည် ၎င်းတို့သောက်ခြင်းကို စကင် မရိုက်မီ အနည်းဆုံး ၂၄ နာရီ ရပ်တန့်သင့်သည်။ 

သက်သောင့်သက်သာရှိသော အဝတ်များကို ဝတ်ဆင်ပါ

လူနာများသည် ချောင်ပြီး သတ္တုနှိပ်ကြယ်သီး သို့မဟုတ် ဇစ်များပါသော သက်သောင့်သက်သာရှိသော အဝတ်များကို ဝတ်သင့်ခြင်းမှာ သတ္တုသည် အရိုးသိပ်သည်းဆ စစ်ဆေးမှုများပေါ်တွင် ပေါ်လာနိုင်သည့်အတွက်ကြောင့်ဖြစ်သည်။

ရှောင်ရှားရန် အခြားသော အရာများမှာ-

  • လက်ပတ်နာရီများ
  • လက်ဝတ်လက်စား
  • သတ္တုနှင့် ပြုလုပ်ထားသော ဆံပင် ကလစ်များ
  • မျက်မှန်
  • အထဲတွင် သတ္တုနှင့်လုပ်ထားသော သွားအထိန်း

လူနာများသည် စကင်ဖတ်နေစဉ်အတွင်း ဆေးရုံဝတ်ရုံကို ဝတ်ဆင်နိုင်သည်။ 

လူနာသည် ငြိမ်သက်စွာရှိနေသင့်သည်

DXA စကင်တစ်ခုသည် ၄၅ မိနစ်ခန့်ကြာသည်။ လူနာသည် ငြိမ်သက်စွာ ရှိရမည်ဖြစ်သည်။ သို့မဟုတ်လျှင် ဓာတ်မှန်များ ဝါးသွားမည်။ လူနာသည် အိပ်ချင်ယောင်ဆောင်ပါက သို့မဟုတ် ရုပ်တုကဲ့သို့ ဖြစ်နေပါက အဆင်ပြေပါသည်။

ရှားပါးဖြစ်ရပ်များတွင် ကလေးများသည်၎င်းတို့အား ငြိမ်သက်စွာလဲလျောင်းနေစေရန် ကူညီပေးသော ဆေးလိုအပ်နိုင်သည်။ နို့စို့ကလေးများဖြစ်ပါက ဝန်ထမ်းသည် စစ်ဆေးမှုမစတင်မီ မိဘများကို လူနာများအား နို့တိုက်ကျွေးခိုင်းနိုင်သည်။

DXA စကင် ရိုက်နေစဉ်အတွင်း မည်သည်ကို မျှော်လင့်ရမည်နည်း

  • လူနာသည် ၎င်း၏ ခန္ဓာကိုယ်ပေါ်တွင် စကင်စက် ရွေ့လျားစဉ်၌ စင်အမာခံပေါ်တွင် လဲလျောင်းသည်။
  • DXA စကင်တစ်ခုသည် ပုံမှန်အားဖြင့် ကျောရိုးနှင့် တင်ပါးရိုး ပုံများကို ရိုက်ယူသော်လည်း တစ်ခါတစ်ရံတွင် ခန္ဓာကိုယ်တစ်ခုလုံးကို စကင်ဖတ်သည်။
  • ကျောရိုးစကင်တစ်ခု အတွက် ဝန်ထမ်းအဖွဲ့ဝင်တစ်ဦးသည် ကျောနောက်ပိုင်း တည့်မတ်နေစေရန် အမာသေတ္တာတစ်ခုပေါ်တွင် လူနာ၏ခြေထောက်ကို ထားပါမည်။
  • တင်ပါးရိုးစကင်တစ်ခုအတွက် ဝန်ထမ်းအဖွဲ့ဝင်တစ်ဦးက လူနာ၏ ခြေထောက်ကို အထိန်းအချုပ်ကိရိယာတစ်ခုတွင် ထားပါမည်။ ထိုပြင်ဆင်ချက်များသည် စကင်စက်ကို အကောင်းဆုံးသော ပုံရိပ်များရရှိအောင် ကူညီပေးသည်။
  • လူနာသည် စကင်စက်မှ တစ်ဝီဝီမြည်သံတစ်ခုကို ကြားနိုင်သော်လည်း စကင်များသည် ပုံမှန်အားဖြင့် မဆူညံပါ။
  • စကင်သည် မနာကျင်စေပါ။

DXA စက်သည် စစ်ဆေးခံရသော အရိုးများကို ဖြတ်ပြီး မတူညီသော စွမ်းအင်အထွတ်နှစ်ခုရှိသည့် ပမာဏနည်း ဓာတ်ရောင်ခြည်များကို ပေးပို့သည်။ တစ်ရှူးပျော့သည် အဓိကအားဖြင့် အထွတ်တစ်ခုကို စုပ်ယူသည်။ အရိုးသည် အဓိကအားဖြင့် အခြားတစ်ခုကို စုပ်ယူသည်။ တစ်ရှူးပျော့ ပမာဏကို စုစုပေါင်းမှ နုတ်ယူနိုင်သည်။ ကျန်ရှိသော ပမာဏသည် လူနာ၏ အရိုး သတ္တုဓာတ်သိပ်သည်းဆ ဖြစ်သည်။ DXA စကင်စက်များသည် အထူးဆော့ဖ်ဝဲကို အသုံးပြုပြီး ၎င်းသည် ကွန်ပျူတာ မော်နီတာပေါ်တွင် အရိုး သိပ်သည်းဆ တိုင်းတာချက်များကို တွက်ချက်ပြီး ပြသပေးသည်။

အာဖရိကန်-အမေရိကန် ကလေးလူနာသည် အနီးအနားရှိ နည်းပညာရှင်နှင့်အတူ အရိုးသိပ်သည်းဆ စကင်တစ်ခုကို လုပ်ဆောင်ရန် ပြင်ဆင်သည်။

ကျောရိုးစကင်တစ်ခု အတွက် ဝန်ထမ်းအဖွဲ့ဝင်တစ်ဦးသည် ကျောနောက်ပိုင်း တည့်မတ်နေစေရန် အမာသေတ္တာတစ်ခုပေါ်တွင် လူနာ၏ခြေထောက်ကို ထားပါမည်။

DXA စကင်များသည် ကျွန်ုပ်ကလေးအတွက် ဘေးကင်းပါသလား။

DXA စကင်သည် ပုံမှန် ဓာတ်မှန်ထက် ပို၍နည်းသော ရောင်ခြည်ကို အသုံးပြုသည်။ မိသားစုများသည် မည်သည့်စိုးရိမ်ထိတ်လန့်မှုကိုမဆို ဆေးဘက်ဆိုင်ရာအဖွဲ့နှင့် ဆွေးနွေးတိုင်ပင်သင့်သည်။

တစ်စုံတစ်ယောက်က စကင်ရိုက်နေစဉ်အတွင်း လူနာနှင့်အတူ ရှိမည်လား။

ပုံမှန်အားဖြင့် မိဘတစ်ဦးသည် လူနာနှင့်အတူ ရှိနေနိုင်သည်။ (အကယ်၍ ကိုယ်ဝန်ဆောင်ထားပါက မိဘသည် နားနေခန်းတွင် နေခဲ့ရပါမည်။)

ဝန်ထမ်းအဖွဲ့ဝင်တစ်ဦးသည် စက်ကိုမောင်းနှင်ပြီး အနီးအနားတွင် ရှိနေပါမည်။

မည်သည့်အချိန်တွင် မိသားစုများသည် ရလဒ်အဖြေများ ရရှိမည်နည်းနှင့် ၎င်းရလဒ်မှာ မည်သည်ကို ဆိုလိုသနည်း။

ပုံရိပ်ဖော်စစ်ဆေးခြင်းကို ရှင်းလင်းရန် လေ့ကျင့်ပေးသော ဆရာဝန်ဖြစ်သော ဓာတ်မှန်ကျွမ်းကျင်သူသည် ရလဒ်အဖြေများကို ခွဲခြမ်းစိတ်ဖြာပြီး လူနာ၏ ကင်ဆာအထူးကုဆရာဝန်ဆီသို့ အစီရင်ခံစာ ပို့မည်ဖြစ်သည်။ DXA စကင်ရလဒ်အဖြေများရရန် ၁ ရက်မှ ရက်ပေါင်းများစွာ ကြာနိုင်သည်။ ၎င်းတို့ကို မည်သည့်အချိန်တွင် ရရှိနိုင်မည်ကို ဆရာဝန်အား မေးပါ။

DXA စကင်သည် ဇက်-ရမှတ်ဟုခေါ်သော တိုင်းတာချက်တစ်မျိုးကို ထုတ်ပေးသည်။ ၎င်းရမှတ်သည် အသက်၊ အရွယ်နှင့် လိင်အမျိုးအစားတူ အခြားလူများနှင့် နှိုင်းယှဉ်ထားသော လူနာ၏ အရိုးထုထည် မည်မျှလောက် ရှိသည်ကို ဖော်ပြသည်။ အကယ်၍ ၎င်းရမှတ်သည် ပုံမှန်ထက်ပို၍ မြင့်ခြင်း သို့မဟုတ် နိမ့်ခြင်း ရှိပါက နောက်ထပ် ဆေးစမ်းသပ်မှုများ ဆက်လုပ်ရန် လိုအပ်နိုင်ကြောင်း ညွှန်ပြသည်။


ပြန်လည် ဆန်းစစ်သည့်နေ့ - ၂၀၁၈ ခုနှစ် ဇူလိုင်လ